ÂTHAONA 27

Zakaw ta Aisika byhnâ a to

1Aisika cha vaw machâ ta, hmô thei khao leina taihta a mo vaw zoh ha ta. A sawchapaw uhtheipa Esaw aw ta, a hnohta, “Ei sawchapawpa,” tah ta, ano ta, “He liata ei y,” tah ta. 2Aisika ta, “Pachâ teh, machâ ha na ta, ei thi nawpa noh chhao pahno va na. 3Chavâta tahmâ ngiachhiepa ta na chaihrai, na lavâ nata na libaw zy kha la la, râh a khie la, sa na vaw kapa mah y. 4Ei thi hlâta byhnâ ei cha awpa thei nawpa ta, ei aoh khopa âhmie pahâhpa na chhopa la, ei nie awpa ta kei lâ vaw cheih mah y,” tah ta.

5Aisika ta a sawchapawpa Esaw hnohta a reipa cha, Rebekâ ta thei ta. Sa ka ta, vaw phao awpa ta Esaw râh â khie chhôh ta, 6Rebekâ ta a sawchapawpa Zakaw hnohta, “Pachâ teh, na paw ta na uhta Esaw hnohta, 7‘Sa na vaw phaopa la, âhmie pahâhpa na chhopa mah y. Chatanachata nie aw na ta, ei thi hlâta Abeipa hmiakô liata byhnâ ei cha awpa aw,’ tahpa ta a reipa ei thei. 8Chavâta ei sawchapawpa y, tahmâ ei bie nathlie la, bie ei cha piepa hawhta tao mah y. 9Sahroh zaw lâ vawh la, cha tawhta mietaw phapa pô no na kei lapa la, na paw châta a aoh khopa âhmie pahâhpa ei chhopa aw. 10Cha cha na paw o lâ vawkhei aw chi ta, nie aw ta, chatanachata a thi hlâta byhnâ a cha awpa aw,” tah ta. 11Zakaw ta a nô Rebekâ hnohta, “Ei uhta Esaw cha chyhsa hmi rôh kawpa châ ta, kei cha chyhsa mihpa châ tlôh na ta. 12Ei paw ta na vaw hria sala, ano a dôveipa hawhta châ aw na ta, byhnâ châ leipa ta, ei chô liata chhiesana a patlôsatuhpa tlao ei châ aw mâh tâh,” tah ta. 13A nô ta a hnohta, “Ei sawchapawpa, chhiesana na to awpa cha, keima chô liata y mawh sy. Ei bie nathlie teh. Vawh la, sahrohzy cha kei lâ vaw cheih teh,” tah ta. 14Zakaw cha vawh ta, sahrohzy cha kei la ta, a nô lâ a vykhei ta. A nô ta a paw aoh khopa hawhta, âhmie pahâhpa cha chhoh ta. 15Rebekâ ta a sawchapaw uhtheipa Esaw chysia pha chaipa, a o liata a sopazy la ta, a sawchapaw seihnaipa Zakaw cha paky ta. 16A kuzy nata a rao mihpa liata mietaw vozy bai ta. 17Âhmie pahâhpa nata viahchhâ a taopazy cha, a sawchapawpa Zakaw ku liata pie ta.

18Zakaw cha a paw lâ vawh ta, “Ei pâ,” tah ta. Aisika ta, “He liata ei y. Ei sawchapawpa, ahy na châ?” tah ta. 19Zakaw ta a paw hnohta, “Na sawchapaw uhtheipa Esaw ei châ. Eina chhopa hawh chi ta ei tao haw. Ngiachhiepa ta a kaw tyuh la, ei sakapa sa he nie la, byhnâ na awpa mah y,” tah ta. 20Aisika ta a sawchapawpa hnohta, “Ei sawchapawpa, Kheihtazieta cha hawhta sa na vaw hmô patoh thlâh haw?” tah ta. Zakaw ta, “Abeipa na Khazohpa ta hlao eina patlohpa vâta a châ,” tah ta. 21Aisika ta Zakaw hnohta, “Ei sawchapawpa y, ei sawchapawpa Esaw na châ hmeiseih tlai ma, châ vei ma, tahpa ei pahno thei nawpa ta, ngiachhiepa ta a vaw hnia tua, ei cha hria tua aw,” tah ta. 22Zakaw ta a paw Aisika cha a kei hnia ta, ano ta vaw hria ta, “A ao cha Zakaw ao châ ta, a kuzy deikua cha, Esaw ku châ tlôh,” tah ta. 23A uhta Esaw ku hawhta a ku hmi a rôhpa vâta Aisika ta Zakaw cha pahno khao vei. Chatanachata byhnâ awpa ta. 24Aisika ta, “Ei sawchapawpa Esaw na châ tlai ma?” tah ta, Zakaw ta, “Ei châ,” tah ta. 25Aisika ta, “Ei kiapâh lâ vaw cheih teh. Ei sawchapawpa sakapa cha nie aw na ta, byhnâ ei cha awpa aw,” tah ta. Zakaw ta pati cha a paw kiapâh lâ cheih ta, a paw ta nie ta. Kresawhti chhao cheipa ta, doh hra ta. 26A paw Aisika ta a hnohta, “Ei sawchapawpa y, nâ vaw hnia la, nâ pahnâ teh,” tah ta. 27#Heb 11.20Zakaw ta a paw cha a kei hniapa ta, a pahnâ ta. Aisika ta a chysia roh thei ta, byhnâ awpa ta,

“Ei sawchapawpa roh cha,

Abeipa byhnâ piepa râh roh a châ.

28Khazohpa ta avâ diati cha piepa ta,

Lei phapa cha pie sala,

Sâh nata kresawhti hluhpi cha pie mawh sy.

29 # Âtn 12.3 Phopizy ta cha chakao ei sala,

Râhzy ta châ naoh mawh ei sy!

Na unawhzy chô liata bei ta y la,

Na nô sawzy ta châ naoh mawh ei sy!

Chhie châ sapatuhpa maih,

Chhiesapa ta y ei sala;

Byhnâ châ awpatuhpa maih,

Byhnâ topa ta y mawh ei sy!”

tah ta.

30Aisika ta Zakaw châta byhnâ a aw khaipa nahta, Zakaw cha a paw Aisika hmiakô tawhta a pua pathla hlâta, a uhta Esaw cha râh â khiena lâ tawhta vaw tlô ta. 31Ano chhao ta âhmie pahâhpa tao ta, a paw lâ vaw cheih ta. A paw hnohta, “Ei pâ, thyu la na sawchapawpa sakapa he nie la, byhnâ cha na awpa mah y,” tah ta. 32A paw Aisika ta a hnohta, “Ahy na châ?” tah ta. Ano ta, “Na sawchapawpa, na sawchapaw uhtheipa Esaw na ei châ,” tah ta. 33Aisika cha thata a chalyu ta, “Cha khiah, sa ka ta, kei lâ vaw cheih ta, na vaw tlô hlâta na paniesa ta, a châta byhnâ ei aw hapa kha, ahy ma a châ tly? Chatatlyh, ano tlai kha byhnâ cha a to aw,” tah ta. 34Esaw cha a paw biezy a thei nahta, palôh pasa ngaitapa ta aoh tlili ta cha ta. A paw hnohta, “Hy ei pâ y, kei he, kei chhao he, byhnâ na awpa hra mah y,” tah ta. 35Châhrasala Aisika ta, “Na nawhta ta piehpie ngaitapa ta a vy ta, na byhnâ a cha lapa haw,” tah ta. 36#Âtn 25.29-34Esaw ta, “Zakaw#27.36 “Zakaw” tahpa cha “Dôvei” tahna a châ. moh a phaoh awpa tlai a vaw châ he! Ei no dua eina dôvei ha hih. Sawchapaw uhtheipa châna tovyuh na lapa ta, tahmâ ei byhnâ eina lapa heih hih!” tah ta. Chatawhcha Esaw ta, “Byhnâ miakha chhâ na pahlôhpa va chi ma?” tah ta. 37Aisika ta a hnohta, “Ano cha na bei ta ei tao haw. A unawhpa zydua ano chakaotuhpa ta pie na ta, sâh nata kresawhti ta ei pasa haw. Ei sawchapawpa y, na châta khâpa ei tao thei khao aw?” tah ta. 38#Heb 12.17Esaw ta a paw hnohta, “Ei pâ, byhnâ cha miakha deita ma na hnei? Hy ei paw y, kei he, kei chhao he, byhnâ na awpa hra mah y,” tah ta, Esaw cha ao paro ngaitapa ta cha ta. 39#Heb 11.20A paw Aisika ta a chhy ta, a hnohta,

“Pachâ teh, lei phapa nata a hlapa liata pahrâ aw chi ta,

Chô lâ tawhta avâ diati nata a hlapa liata na pahrâ aw.

40 # Âtn 36.8; 2 Abei 8.20 Na zaozi ta hroh aw chi ta,

Na unawhpa na chakao aw;

Na pua tita deikua cha,

A raopaky na rao tawhta na pahluh aw,”

tah ta.

Harânâ lâ Zakaw a sie

41A paw ta byhnâ a patosa hapa vâta, Zakaw cha Esaw ta a hao kaw ta. Esaw ta a palôh liata, “Ei paw mâchhie eima sa nawpa nohzy a hnia ha ta, cha tina chata ei unawhpa Zakaw cha ei thie aw,” tah ta. 42A sawchapaw uhtheipa Esaw bie cha Rebekâ chho ei ta. Chyhsa tuah ta, a sawchapaw seihnaipa Zakaw cha kei paawsa ta, a hnohta, “Na uhta Esaw ta, thie châ chhuahpa ta anosasyh ta thlah â palôh. 43Chavâta ei sawchapawpa y, ei bie nathlie mah y. Thyu la, Harânâ liata ei rilâhpa Lâbâ lâ a râ la, 44na uhta hiehâhna a pai hlâlei cha, a hnohta noh khazie tlyma kei y chy mah y. 45Na chô liata na uhta hiehâhna paipa ta, a chô liata na hmo taopa a my hlâlei cha, cha liata y chy mah y. A hiehâhna a pai tita, chyhsa vaw tuah aw na ta, ei cha vaw padysa aw. Khazia nama pano ta noh kha ta ei cha pahlei aw ei?” tah ta.

46Rebekâ ta Aisika hnohta, “Hiti chanôzy vâna heta, hro eina ai kaw. Zakaw ta âmo hawhpa Hiti chanô, he râh zuah he lapinô ta a hnei hra chhochhi khiahta cha, hro he ei châta khâpa a phahnai aw?” tah ta.

Currently Selected:

ÂTHAONA 27: MARVBSI

Highlight

Copy