HMOTAOPAZY 25

Pawla Kaisarâ kô tlô â chhuah

1Festâ cha a bia a vaw tlô tawhta noh thô a châ nahta, Kaisaria tawhta Zerusale lâ khy ta. 2Theihthai beizy nata Zu nôpawpazy ta Pawla ama leihna cha a hnohta tlôkhei ei ta. 3Pawla cha Zerusale lâ a vaw chhi awpa ta a khokheina a haw ei ta. Lâpi liata a byh ta, thie amâ chhuahpa vâta cha hawhta ama hiapa a châ. 4Châhrasala Festâ ta Pawla cha Kaisaria liata patâhpa châ ta, ano chhao Kaisaria lâ thlai a lie awpa a châzie âmo chho ta. 5Festâ ta, “Nama hry liata biehneituhpazy ei hnohta a zu ei sala, cha chyhsa cha adoleina a hnei khiahta cha, ama leihna cha za tlôkhei mawh ei sy” tah ta.

6Ama hry liata noh charie tlyma, noh hrawh tlyma a châh tawhta, Festâ cha Kaisaria lâ zu ha ta. A mylâ ta ryureina dyuchhai liata a tyuh ta, Pawla cha a vaw chhi awpa ta biepie ta. 7A vaw tlô nahta, Zerusale tawhta Zu chyhsa a zupazy cha Pawla kiapâh liata a vaw duah ei ta, biepeipa hluhpi ta leih ei ta, châhrasala â do tlai na tahpa reih pasia thei leipa ei ta. 8Pawla ta a thaichâna bie reih ta, “Zuzy ryhpa chakhiapa ta tlyma, Achhyna o ryhpa chakhiapa ta tlyma, Kaisarâ chakhiapa ta tlyma, khâpa hmo hmah parao va na,” tah ta. 9Châhrasala Festâ ta Zuzy hry liata moh pha khohpa ta, Pawla hnohta, “Zerusale lâ khy ta, na thâtih he ei hmiakô liata pachia awpa na khoh ma?” tah ta. 10Pawla ta, “Kaisarâ ryureina dyuchhai hmiakô liata ei duah hih. He he ei thâtih pachia nawpa su tlai a châ. Zuzy chô liata khâpa hmo hmah parao va na, cha cha nâ chhao ta a siapa ta na pahno. 11Hmoparaotuhpa châ ha sah la, thina tlâh a châpa hmo a paraopa ei châ khiahta cha, thina khôkhâh awpa a chhuah va na. He Zu chyhsazy ta eina leihna ei he khâpa hmah a y leipa a châ khiahta deikua cha, ahy hmahta âmo lâ na hlâ thei aw veih ei. Kaisarâ kô ei tlô aw,” tah ta. 12Festâ ta a ryureilâhpazy â chhohia khai nahta, Pawla cha a chhy ta, “Kaisarâ kô tlô awpa na khoh ha tawhta cha, Kaisarâ lâ na sie aw,” tah ta.

Pawla Akripâ nata Benisi hmiakô liata

13Noh khazie tlyma a khô tawhta, Bei Akripâ nata Benisi cha Festâ a naoh awpa ta Kaisaria lâ za tlô ei ta. 14Cha liata noh hluhpi ama châhpa vâta, Festâ ta Pawla kyh cha abei chho ta, “Felika khata atâhpa pakha siesai ta. 15Zerusale liata ei y chhôh kha, theihthai beizy nata Zu machâzy ta ano leihna bie vaw reih ei ta, thailei pachâsa awpa ta amâ haw. 16Kei ta ama hnohta, ‘Ama leihpa chyhsa ta a leihtuhpazy hmiakô liata a thaichâna bie hmiadaisâ ta a rei ha tua leipa ta thailei pachâsapa cha, Rawma taozie châ vei,’ tahpa ta ei chhy ei. 17Chatanachata he lâ amâ zu nahta, pahawhpasâh leipa ta, a mylâ ta ryureina dyuchhai liata thlai a tyuh na ta, cha chyhsa cha a vaw chhi awpa ta bie ei pie. 18A leihtuhpazy a vaw duah ei ta, ei pangiasapa hawhta moleina biepeipa a hneipa khâpa hmah reih tlôh leipa ei ta. 19Ama zyhna kyh nata Zisu ama tahpa, a thi hapa, Pawla ta a hrohpa hawhta a reipa kyh liata amâ eina tlao vaw châ ta. 20Cha kyh cha a pachâna rai ei pahno leipa vâta, Zerusale lâ khy ta, cha biezy cha, cha liata pachia awpa a khoh nata khoh lei hiahri na ta. 21Châhrasala Pawla ta beichaipa ta biepathluna tao awpa ta ano lâ tlôkhei awpa ta â hawpa vâta, Kaisarâ lâ ei paphao thei hlâlei cha patâh chy awpa ta bie ei pie haw,” tah ta. 22Akripâ ta Festâ hnohta, “Kei chhao, cha chyhsa bie reipazy nathlie awpa ei khoh kaw,” tah ta. Festâ ta, “A biereipa cha mylâ na nathlie aw,” tah ta.

23A mylâ ta Akripâ nata Benisi cha pheisaih hyutuhpazy nata khihpi nôpawzy chhaota rônah ngaitapa ta a vy ei ta, zawpi ahmaohna o liata a ngia ei ta. Festâ bie ta Pawla cha a vaw ngiakhei ei ta. 24Festâ ta, “Bei Akripâ nata eima hnohta a ypa zydua saih u, he chyhsa nama hmôpa he, ano kyh liana heta Zerusale nata he liata Zu chyhsa a ypa zydua ta a hroh tlâh châ khao vei tahpa ta thata awh ei ta. 25Châhrasala thina tlâh a châpa hmo khâpa hmah a taopa hmô va na. Ano ta beichaipa kô tlô awpa â haw hapa vâta, beichaipa lâ cha paphao awpa ei chhuah. 26Châhrasala ano kyh liata ei zibeipa lâ ro hmeiseih awpa chhao hnei va na. Chavâta nama zydua hmiakô liata ei vaw chhi hih, a eih pachaipa ta, Bei Akaripâ, nâma hmiakô liata ei vaw chhi, bie na hiahri khai tawhta khâpa chhâ ma ro awpa ei hnei thei nawpa ta. 27Atâhpa paphao tlôh ta, biepeipa a hneipa palâsa leipa cha, yzie a hneipa ta pahno leipa na ta,” tah ta.

Currently Selected:

HMOTAOPAZY 25: MARVBSI

Highlight

Copy