HMOTAOPAZY 24

Pawla Felika hmiakô liata

1Noh pangawh a khô tawhta, theihthai beichaipa Anania cha machâ thokhazy chhaota za tlô ta, Tertula ama tahpa dâhthaipa chhao a hlao ta. Pawla ama leihna cha râhvaotuhpa hmiakô liata reih ei ta. 2Pawla cha aw papua ei ta, Tertula ta ama leihna bie cha reih ta: “Felika zachhih chaipa, na zawhzi ta thlalôh ngaitapa ta y pi ta, na hmiasai phapa vâta, he phopi châta taopathinazy y ta, 3kyh to nata su to liata na hmotaopazy a ly ngaitapa ta eimâ pyh tyh. 4Eima cha pahawhpasâh tu lei nawpa ta, bie chyuta eima reih awpa he nôpha kawpa ta miah na nathlie awpa ta eima châ haw. 5He chyhsa he tymâna a taotuhpa, khizaw liata Zu chyhsa zydua a patypahreituhpa nata Nâzari py liata ama hyutuh chaipa pakha a châpa ta eima pahno. 6Achhyna o taihta papuapalei a chhuah ta, chavâta eima patupa a châ. 7Eima ryhpa hawhta pachia a chhuah pi ta, châhrasala pheisaih hyutuhpa Lysia a vy ta, thachahra hmâpa ta eima ku tawhta la ta, a leihtuhpazy cha na hmiakô liata a duah awpa ta biepiepa a tao.#24.7 Châh 7-na he hlâno kuropa Biehrai thokha liata y vei. 8Nâma tlai ta bie hiahri la, eima leihna zydua ano tawhta na pahno thei aw,” tah ta. 9Zuzy chhao ta, ama leihna cha â dopa tlai a châ tahpa a vaw pykhei ei ta.

10Bie reih awpa ta râhvaotuhpa ta ano lâ a ku a thliethlâpa a hmô na ta, Pawla ta a chhy ta, “Kô hluhpi chhôh, he phopi chô liata ryureituhpa na châpa ei pahnopa vâta, thathyu ngaitapa ta ei thaichâna bie ei reih aw. 11Zerusale liata Khazohpa a chhy awpa ta ei khy tawhta, noh hrawh hleino khô mâh vei, tahpa na pahno thei aw. 12Achhyna o liata tlyma, pakhyna ozy liata tlyma, khihpi chhôh liata tlyma, chyhsa ei eichhiapa nata zawpi ei pasyupa ahy hmahta na hmô veih ei. 13Tahmâ chhao, eina leihna bie he â do tlai na tahpa pasia thei aw veih ei. 14Châhrasala he bie he na hnohta ei phuah aw. Âmo ta py ama tahpa Lâpi zyhna siezie hawhta miah pathlatuhpazy Khazohpa a chhypa châ na ta, ryhpa nata hrohsopazy châbu liata ropa zydua a ngiapâtuhpa ei châ. 15Chyhsa siapa nata sia leipazy thyuheihna a y awpa Khazohpa liata hnabeiseihna a hneipa châ na ta, cha bie cha âmo chhao ta amâ ngiapâpa a châ. 16Chavâta Khazohpa nata chyhsapa lâta chhie nata pha pahnona pathaihpa hnei awpa khâ ei chhuah tyh. 17#Hmt 21.17-28Kô hluhpi a khô tawhta, ei chiheihzy deichhyna hmo pie awpa nata atheihna hlâ awpa ta a vy na ta. 18Cha hmozy ei tao hai nota, Achhyna o chhôh liata pathaihpa ta na hmô ei ta, zawpizy y leipa ei ta, atymâna chhao y vei. 19Cha liata Asia râh tawhta Zu chyhsazy y ei ta, eina leih nawpa ei ama hnei khiahta cha, âmo cha he liata ypa ta, na hmiakô liata eina leih awpa ei a châ. 20Cha leipa chhao ta, he chyhsazy tlai heta ryureina hmiakô liata ei dua no khata, ei paraopa khâpa ama hmô, reih mawh ei sy. 21#Hmt 23.6Ama hmiakô liata ei dua nota ei reipa bie, ‘Athihpa thyuheihna kyh liata tanoh he nama hmiakô liata a duahpa ei châ hih,’ ei tahpa bie hleikhô ta eina leihna awpa hropa ama pahno khiahta cha, reih mawh ei sy,” tah ta.

Pawla patâhpa a châ

22Felika cha Lâpi zyhna kyh a pahno kawpa vâta, “Pheisaih hyutuhpa Lysia â zu tita nama bie he ei pachâ aw,” tah ta, ama bie cha soh ha chy ta. 23Pheisaih za kha hyutuhpa hnohta Pawla cha patâhna o liata khô chy awpa ta biepie ta. Châhrasala khotalaina khazie rakha ma piepa ta, a viasazy ta ama deichhy awpa pakhâ lei awpa ta biepie ta.

24Noh khazie tlyma a khô tawhta, Felika cha a lapinô Drusilâ, Zu zuah a vaw chhipa ta vaw tlô ta, Pawla cha paawsa ta, Krista Zisu ngiapâna kyh pareisa ta. 25Siana kyh nata asohsina kyh nata ryureina a vaw y awpa kyhzy Pawla ta a reih nahta, Felika cha chi ngaita ta, “Vawh chy la, daihti rypaohpa ei hnei tita ei cha aw heih aw,” tah ta. 26Felika cha Pawla ta tâkâ a pie awpa hnabeiseih ta, chavâta khâ paawsa ta, bie â chho tyh. 27Kô no a sie tawhta, Felika cha Pôsia Festâ ta a thla ta. Zuzy hry liata moh pha a khohpa vâta, Felika ta Pawla cha patâhna o liata siesai ta.

Currently Selected:

HMOTAOPAZY 24: MARVBSI

Highlight

Copy