Zekaria 12
12
Wɛ wó vere Jerusalem tiina bam o yage
1Kwora kalo Baŋa Wɛ na toŋe se ka vo Isarele tiina bam seeni to mo tento: Baŋa Wɛ ye wolo na lware wɛyuu kom pa se ko tigi palalala, ye o daare o chwi tega kam kuri to. O ta daare ke jworo o yage nabiina wone. Wonto tage o we:
2“Nii-na! Amo wó pa Jerusalem teo ji nenɛɛne zoŋa de ka wo sana. Dwi-gɛ tiina balo na bwola da to wó nyɔ ka wone ye ba beiri. Ko ta wó ke konto dwoŋi ko pa Judah tiina bam mo de ba na tɔge ba kwaare jara de Jerusalem tei to. 3Maŋa kam konto ne, dwi tiina bam maama ná jeeri se ba ke jara de Jerusalem teo kom, amo wó pa ko ji nenɛɛne kandwɛ-polɔgɔ mo ko pa-ba. Wolo maama ná kwaane se o guri-ko, ko wó tiini ko ke kotu zonne.”
4 Baŋa Wɛ ta na tage kolo to mo tento: “Ka maŋa ne, a lage a pa sisein-nɔɔna bam maama fom mo, se se dira bam maama de yirisi. A laam maa wó taa fɔge a nii Judah tiina bam baŋa ne. Ko nam ná ye dwi-gɛ tiina sisei sem de, a wó pa se yia dwei. 5Judah yiga tiina bam laam wó ta ba tete ne we, ‘Jerusalem teo nɔn-bia bam nɛ dam, Paŋwa Tu Baŋa Wɛ na ye ba Wɛ to ŋwaane.’
6Maŋa kam konto ne, amo wó pa se Judah yiga tiina bam taa nye de min-zoŋa na to dɛ wone tei to mo. Ba ta wó taa ye ne min-vogo na to men-zwaro wone. Konto to, ba wó pa teene delo maama na bwola da to chɔge kula. Ko daare ye Jerusalem teo kom tete taa zege cheppe de ko nɔn-bia bam maama. 7Amo Baŋa Wɛ nam lage a pa Judah jar-keira bam mo da yiga ba na wɔnɔ, se Pɛ David dwi tiina bam de Jerusalem nɔn-bia bam maama yé na zula ba dwoni Judah tiina bam.
8Maŋa kam konto ne, amo Baŋa Wɛ tete mo lage a taa kwoli balo na zoore Jerusalem teo kom wone to. Wolo na ye nabwom ba maama wone to wó jwoŋi dam ne David na dana tei to mo. David dwi tiina bam wó taa nii ba baŋa ne, ne ko ye Baŋa Wɛ maleka kam tete mo wo ba yiga ne. 9Maŋa kam konto ne, amo yia wó seene dwi tiina balo maama na kwaare jara de Jerusalem to baŋa ne, se a yɔɔre a chɔge-ba.”
Ba keeri ba pa wolo nɔɔna na zɔge to
10“Amo Baŋa Wɛ nam lage a kwei teiŋ-jara jworo de ka-duri-nɔɔna-ŋwaŋa mo a ke David dwi dem, de Jerusalem nɔn-bia bam maama wone. Ko maa wó pa se ba kwoni ba nii amo ye ba keeri ba pa wolo wom ba na zɔge to. Ba wó taa tiini ba keeri wonto lua ye ba chwoosa, ne nɔɔna na gɛ ba bu-doa, naa ba bu-kwea tei to mo.#Jɔn 19:37; Gurim 1:7 11Maŋa kam konto ne, Jerusalem tiina wó keeri bugi-bugi, ne nɔɔna déem na keeri tei Hadad-Rimon ne, teo kolo na wo Megido te-kampare sem ne to mo. 12Balo na zoore tega kam jei maama ne to wó taa keeri mo bugi-bugi, sɔ-yuu de sɔ-yuu maama, se kaana bam keira taa ye ka yera de baara bam keira. David diga kam wó keeri lua kam ba yerane, ye ba kaana bam de keeri ba yerane. Natan diga kam de wó keeri ba yerane, ye ba kaana bam de keeri ba yerane. 13Levi diga tiina bam, de ba kaana de wó keeri ba yerane. Simeyi diga kam de ba kaana wó da ba keeri ba yerane, 14ko woli de sɔ-yuni telo maama ta na daare to, de ba kaana.
Currently Selected:
Zekaria 12: xsmKBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
