Maake 2

Yezu jege dam se o saare nɔɔna wɛleera

Matiyu 9:1-8; Luka 5:17-26

1Da fenfee na kɛ to, Yezu ma jwoori o vo o zo Kaparenia. Teo kom nɔɔna bam ma lɔre we o tu sɔŋɔ. 2Ba dedɛ ma ba ba tigisi sɔŋɔ kom ne pa se pwola daa tera ko ni ne de fenfee de. O maa wora o tɛ Wɛ kwora kam o bere-ba. 3O na wora o bere-ba konto to mo nɔɔna bana ya zeŋe gɔrɔ ba jege ba beene o tei. 4Ba na yi jei sem to, ba ma ware ba ja‑o ba yi Yezu tei, kɔgɔ kom na daga to ŋwaane. Ba ma ja‑o ba di sɔŋɔ kom nayuu ye ba daare ba zage-ko ba puri bɔɔne ba maŋe de Yezu na wo mɛ to. Ba ma pa se gungwolo kolo gɔrɔ kom na tigi ka baŋa ne to tɔge da ka tu diga kam wo. 5Yezu ma lɔre we ba ke ba wo-dedoa ded‑o. O ma ta de gɔrɔ kom o we, “A bu, nmo wɛleera yam saare.”

6Wɛ nia zamesem tiina badaara ya wora. Ba maa jei ba bwɛ ba wone ba we, 7“Bɛ mo ye o na chwoŋa se o ŋɔɔne konto dwoŋi? O pae se o de Wɛ ye bedwe mo. Nɔɔn-nɔɔno ba jege chwoŋa se o yage nɔɔno wɛleera o ma chɛ‑o, ko ná dae Wɛ yerane.”

8Yezu ma lɔre ba na jege boboŋa yalo ba wone to. O ma ta de-ba o we, “Bɛŋwaane mo á boŋe konto dwoŋi? 9Kɔ mo ye mɔle, amo ná tage de gɔrɔ kom we o wɛleera yam saare, naa a ná tage ded‑o we o zaŋe wɛɛne o kwei o gungwolo kom o taa via? 10Amo nam wó pa se abam lɔre we amo wolo na ye Nabiin-bu wom to jege dam logo baŋa ne se a yage nɔɔno wɛleera a ma chɛ‑o.” O laam ma ta de gɔrɔ kom o we, 11“A tɛ nmo, zaŋe wɛɛne n kwei n gungwolo kom n ja n vo sɔŋɔ.” 12Yezu na tage konto to, nɔɔno wom ma seene o zaŋe ba maama yiga ne o kwei o gungwolo kom o nwoŋi o viiri. Ba na nɛ konto to, ko ma ke ba maama yaau. Ba ma tei Wɛ ye ba we, “Dé daa ta wo fɔge dé na keim dento dwoŋi.”

Yezu bwoŋi Levi se o taa tɔge‑o

Matiyu 9:9-13; Luka 5:27-32

13Yezu daa ma nwoŋi o vo o wo naneo ni ne. Kɔgɔ dedɛ ma ba o tei ko gilimi‑o. O maa wora o bere-ba Wɛ chega kam. 14O daa ma zaŋe o maa kɛa. O na maa vei to, o ma na nɔɔno wodwoŋi, o yere mo Levi.#2:14 Levi yere dedwoŋi ye Matiyu. Matiyu 9:9 O kwo yere mo Alafayu. O déem jei mɛ seeni o na yeini o jwoŋi lampwoo nɔɔna tei ne to mo. Yezu ma ta ded‑o o we, “Zaŋe n ta‑n tɔge-ne.” O ma seene o zaŋe o tɔge o kwaga.

15Yezu déem ma vo Levi sɔŋɔ se o di wodiu. O de o kwaga tɔgena bam na wora to, lampwoo lara de nɔn-chechɔgero dedɛ maa tɔge ba wora ba di wodiu de-ba, kolo ŋwaane balo na tɔge‑o to daga. 16Wɛ nia zamesem tiina badaara na nwoŋi Farisi tiina kɔgɔ kom wone to maa tɔge ba wora. Ba na nɛ Yezu na jei o di wodiu de nɔn-chechɔgero de lampwoo lara konto to, ba ma bwei o kwaga tɔgena bam ba we, “Bɛ mo ke ye o di wodiu dedaane lampwoo lara de nɔn-chechɔgero tem konto?”

17Yezu ma ni ba na tage kolo to. O laam ma ta de-ba o we, “Ko ná ye balo na jege ya-dɛɛra to, banto ba jege se ba vo dɔkta tu tei se o yɔɔre-ba. Ko daare balo na ba jege yazura to mo jege se ba vo se ba na yɔɔrem. Amo na tu logo baŋa to, ko dae balo na maŋe ba ye nɔn-ŋona to ŋwaane, se a nam tu se a pa nɔn-chechɔgero mo tɔge chwoŋa.”#1 Tim 1:15

Yezu berem dem ye berem-doore

Matiyu 9:14-17; Luka 5:33-39

18Jɔn kwaga tɔgena bam de Farisi tiina bam déem yeini ba vɔ ni. Nɔɔna badwonna ma vo Yezu tei ba bwei‑o ba we, “Bɛŋwaane mo Jɔn kwaga tɔgena bam de Farisi tiina tɔgena bam yeini ba vɔ ni ye nmo kwaga tɔgena bam ba vɔa?” 19Yezu ma leiri-ba o we, “Nɔɔno ná wora o ke kadiri, ye o dwonna ná wora se ba tɔge ba di, banto wó wane ba vɔ ni na? Kan-baro wom ta ná wo ba tei ne, ba bá sɛ ba vɔ ni. 20Ko nam wó ba ko yi maŋa kam ba na wó ja kan-baro wom ba viiri to. Dɛ dem konto ne ye o daa tera ba tei ne to mo ba laam wó vɔ ni wo-chechɔgɔ ŋwaane.

21Nɔɔn-nɔɔno bá sɛ o kwei gare-yi-doore o ma feiri gare-dwoŋo kolo na kaare to. O nam ná ke konto, gare-doŋo kom laam wó vuuri gare-dwoŋo kom pa se ko tiini ko chɔge dedɛ. 22Nɔɔn-nɔɔno ta bá sɛ o kwei sa-doora o lwo o ke lɔ-dwoŋa wone. O ná ke konto, ye sana bam ná keeri, ba wó pa se lɔa kam bage mo. Lɔa kam wó chɔge ye sana bam de lwo ba yage. Konto ŋwaane nɔɔno maŋe se o kwei sa-doora o ke lɔ-doŋa wone mo.”

Yezu Krista dwoi siu dɛ chullu tem

Matiyu 12:1-8; Luka 6:1-5

23Juu tiina siu dɛ dedwoŋi na yi to, Yezu déem ma tɔge kara wo o maa kɛa. O kwaga tɔgena bam de maa tɔge ba via. Ba ma bobo se ba taa bwori mena ba yu ba dona.#Nia Gulim 23:25 24Farisi tiina balo na tɔge ba wora to ma ta de Yezu ba we, “Nii ba na ke tei to! Bɛ mo ye ba ke totoŋe delo na chɔge dé siu dɛ chullu tem to?” 25Yezu ma leiri-ba o we, “Abam ta wo fɔge á ga Wɛ tɔnɔ kom na bere Pɛ David taane tei to na? Ko bere we kana déem jege wonto de o nɔɔna bam ye ba lage wodiu se ba di. 26O ma vo o zo diga kalo na ye Wɛ nyem to, ye o kwei bworobworo kolo na tigi da Wɛ ŋwaane to o di. Bworobworo kom konto chula se nɔn-gaa di-ko, ko ná dae Wɛ kaanem tiina bam yerane. David déem di bworobworo kom ye o daare o pa o nɔɔna bam de tɔge ba di. Keim dem konto ke maŋa kalo Abiatara déem na ye Wɛ kaanem yuu tu to mo.”#1 Samuwel 21:6

27O daa ma ta de-ba o we, “Wɛ na ke nabiina o yage logo baŋa ne to, o tiŋi siu dɛ bakwɛ maama wone se ko taa jege wolim mo ko pa-ba mo. Ko nam dae we Wɛ ke nabiina siu dɛ chullu tɔgem ŋwaane mo.#Nwoŋim 23:12 28Konto ŋwaane Nabiin-bu wom ta jege dam siu dɛ chullu tem baŋa ne.”

Currently Selected:

Maake 2: xsmKBG

Highlight

Copy