Maake 3

Yezu yɔɔre nɔɔno siu dɛ ne

Matiyu 12:9-14; Luka 6:6-11

1Yezu daa ma jwoori o vo o zo ba jeerim diga kam. Nɔɔno maa wora o jeŋa dedoa na tega. 2Nɔɔna balo na wora to badwonna maa lage chwoŋa se ba bere we Yezu ke o tusi. Konto ŋwaane ba jei ba yere Yezu se ba nii, o wó sɛ o yɔɔre nɔɔno wom siu dɛ ne naa o bá sɛ. 3Yezu ma ta de nɔɔno wom o we, “Zaŋe n zege nɔɔna maama tetare ne.”

4O laam ma bwei ba maama o we, “Dé chullu tem bere bɛ mo? Kɔ mo tɔge chwoŋa, nɔɔno ná ke o dwoŋi lanyerane siu dɛ dem ne, naa o ná ke‑o lwarem? Kɔ mo lamma, nɔɔno ná vere o dwoŋi ŋwea siu dɛ dem ne, naa o ná go‑o?” O na bwei-ba konto to, ba ma chem. 5O ma nii ba maama ye o bane zaŋe. O wo ma chɔge dedɛ de ba na jege yi-dɛɛre tei to. O laam ma ta de nɔɔno wom o we, “Twe n jeŋa kam.” O ma seene o twe-ka, ye ka jwoori ka ke lanyerane. 6Farisi tiina bam na nɛ o na ke tei to, ba ma nwoŋi ba vo ba ŋɔɔne de Pɛ Herodi kwaga nɔɔna se ba beeri chwoŋa ba go Yezu.

7Yezu de o kwaga tɔgena bam ma zaŋe ba kɛ. Ba ma vo ba yi naneo kom ni. Kɔgɔ dedɛ ma nwoŋi Galili de Judea jei sem maama ne ba tɔge o kwaga. 8Nɔɔna badwonna de ma nwoŋi Jerusalem, de Judea maama, de Yidumia jei sem ne. Badaara de ma nwoŋi jei selo na wo Jɔdan buga kam bubɛ dedwoŋi dem ne to, de Tura de Sidon nawuura yam maama wone. Nɔn-fɔrɔ dedɛ ma vo Yezu tei, ba na lɔre o na ke kikia yalo maama to ŋwaane. 9Ba kɔgɔ kom na daga ye ba kwaane ba peene‑o dedɛ to, o ma ta de o kwaga tɔgena bam se ba ja nabworo ba ba ba zege da se o wane o zo ko wo. 10O na maŋe o yɔɔre nɔɔna dedɛ to ma pa se jaweena maama ma yigi ba peene‑o, ye ba kwaane se ba dwei o yera yam. 11Maŋa maama chichiri sem ná yeini se na‑o, se wó to o yiga ne ye se kaase se we, “Nmo mo ye Wɛ Bu wom.”#Luka 8:28 12Chichiri sem ná yeini se tɛ konto dwoŋi, o yeini o kaane-se mo se se yé pa nɔɔn-nɔɔno lɔre o na ye wolo to.

Yezu le o totoŋa nakwa

Matiyu 10:1-4; Luka 6:12-16

13Yezu laam ma zaŋe o vo o di peo kodwoŋi yuu. O ma bwoŋi balo o na lage o kuri to pa se ba ba o tei. Ba na tu to, 14o ma le nɔɔna fuga-balei ye o tiŋi-ba se ba taa ye o totoŋa nakwa bam. O na kuri-ba to, ko ye se ba taa sale‑o mo, se o wane o toŋe-ba nɔɔna tei ne se ba tɔɔle Wɛ kwora kam. 15O ta ma pa-ba dam se ba wane setaana ba zeili.

16Nɔɔna fuga-balei bam o na le to yera mo tento:

Simon wolo Yezu na pɛ o yere we Piita to.

17Jemsi wolo na ye Zebedi bu to, de o nyaane Jɔn. Yezu ma pa banto yere we Boanerega, ko kuri mo ‘Doa bagem nyena’.

18Anduru, de Filipi, de Batoloma, de Matiyu, de Tomas, dedaane Jemsi wolo na ye Alafayu bu to, de Tadayus, de Simon wolo na nwoŋi Zɛlota tigisim#3:18 Zɛlota tigisim nyena tiini ba chuli Rom tiina, ba na bɛɛse Juu tiina to ŋwaane. wone to, 19dedaane Judas Yisakara wolo na tu o yeigi Yezu o pa nɔɔna to.

Wɔ dam mo Yezu mae o zeili setaana?

Matiyu 12:22-32; Luka 11:14-23; 12:10

20Yezu ma jwoori o vo sɔŋɔ. Nɔn-kɔgɔ dedɛ daa ta ma ba ba gilimi sɔŋɔ kom ni dem. Ko ma pa se Yezu de o kwaga tɔgena bam daa ware ba na laŋa se ba di wodiu de. 21O sɔŋɔ tiina ma lɔre ko na ke‑o tei to. Ba ma zaŋe ba nwoŋi se ba vo ba ja‑o ba ke diga ne, kolo ŋwaane nɔɔna tɛ ba we o chwo mo.

22Wɛ nia zamesem tiina ya nwoŋi Jerusalem mo ba ba se ba nii. Ba maa tɛ ba we, “Setaana pɛ Bɛlzabula mo tei‑o. Ko ye wonto dam ŋwaane mo o wae setaana o zeila.”

23Yezu laam ma bwoŋi-ba se ba ba o tei ye o daare o maŋe memaŋa o bere-ba o we, “Nɔɔno wó wane o ma setaana pɛ dam o ma zeili setaana na? 24Teo kolo paare ná pɔɔre kuni belei pa ba jege daane, ko jege se ko to mo. 25Sɔŋɔ kolo maama ná pɔɔre ko tete wone, ko de jege se ko to mo. 26Setaana pɛ ná jwoori o jege de o tete, ko bere we o kɔgɔ kom pɔɔre belei mo ye o dam ti. O jege se o to mo. 27Ko nam na ye tei to, setaana pɛ nye de nɔn-babea na nii o sɔŋɔ tei to mo. Venvereno ná lage se o zo nɔn-babea sɔŋɔ o ŋɔ, o jege se o bobo o ja nɔn-babea kam mo o vɔ. O ná ke konto yiga, o laam wó wane o kwaleme o jejegero tem o ja viiri.

28A tɛ abam chega ŋwaane to, keim-balwaaro telo maama nɔɔna na ke to, naa ta-balwaaro telo ba na ŋɔɔne to, Wɛ wae o yage-te o ma chɛ-ba. 29Ko daare wolo maama nam ná ŋɔɔne o yaale Wɛ Sin-laao kom, Wɛ bá sɛ o ma chɛ konto tu. O keim-balɔrɔ kom konto wó taa wo o yuu ne mo taa wuu, ye o bere o bá na bora kɔtaa.” 30Ba daa ta maa tɛ ba we chichira mo daane‑o. Ko ye konto ŋwaane mo o tage de-ba konto dwoŋi.

Yezu nu de o nyaana na ye balo to chekke

Matiyu 12:46-50; Luka 8:19-21

31Yezu nu de o nyaana ma ba o na wo mɛ to. Ba ma vo ba zege sɔŋɔ kom pwooni ne, ye ba pa ni se ba bwoŋi‑o. 32Kɔgɔ dedɛ maa jei ba gilimi Yezu. Ba ma ta ded‑o ba we, “N nu de n nyaana tua, ye ba lage nmo.” 33O ma leiri-ba o we, “Banto yerane mo ye a nu de a nyaana na?” 34O laam ma nii balo na jei ba gilimi‑o to seeni ye o we, “Amo nu de a nyaana chekke mo tento. 35Wolo maama na ke Wɛ boboŋa na lage tei to mo ye a nyaane, de a nakɔ, de a nu.”

Currently Selected:

Maake 3: xsmKBG

Highlight

Copy