Maake 4

Yezu maŋe memaŋa o bere nɔɔna

Matiyu 13:1-23; Luka 8:4-15

1Yezu déem maa wo naneo kom ni ne ye o bere nɔɔna. Nɔɔna dedɛ ma ba ba gilimi‑o. Ba kɔgɔ kom na daga to, o ma zaŋe o zo nabworo na zege na bam wone to, ye o jeini da se o bere-ba. Nɔɔna bam maama ma maŋe na bam ni ne se ba taa cheigi o taane dem. 2O maa mae memaŋa o bere-ba wonnu dedɛ. O déem ma maŋe o bere-ba o we:

3“Cheigi-na. Valo déem mo wora. O ma zaŋe o vo o kara se o du. 4O ma kare o dole o men-dwa yam. Yadwonna ma to chwoŋa ni ne. Zuna ma ba ba twɛ-ya ba di. 5Yadwonna ma to kandwa yuu ne teero na ba daga mɛ to. Teero na ba lira jei sem ne to, ya maa wo dáane ya puli. 6Wea ma ba ka baane ya maama. Ya bonno na wo zo tega to, ya laam ma te lela. 7Ko daare men-dwa yadwonna ma to sabare wone. Ya na puli to, sabare sem laam ma zaŋe se jujugi-ya, pa se ya daa wo ke bia. 8Ko daare yadwonna ma to te-ŋoŋa baŋa ne, ye yanto maama puli ya nwoŋi ya ke bia lanyerane. Yadaara ke nenɛɛne bia fintɔ fintɔ. Yadaara ke nenɛɛne bia fuseredo fuseredo. Yadaara de maa ke nenɛɛne bia bi bi.”

9Yezu ta ma ta o we, “Á nam fɔge á cheigi a taane dem lanyerane.”

10Kɔgɔ kom na viiri ba daare Yezu o yerane to, nɔɔna balo ya na wo o tei ne to badaara ma tɔge de o nɔɔna fuga-balei bam ba vo ba bwei‑o memaŋa yam kuri. 11O ma leiri-ba o we, “Ko ná ye abam, Wɛ maŋe o pa se á lɔre o paare dem kuri na ye tei to, ye chega kam konto ya maŋe ka seigi mo. Ko daare balo na dae amo kɔgɔ kom wo nɔɔna to, amo mae memaŋa yerane mo a bere-ba Wɛ chega kam. 12Amo yeini a bere-ba konto dwoŋi pa se

‘Ba yia yam wó kwaane ya nii,

ye ba na nɛ kolo to bá zo ba yuu.

Ba ta wó fɔge ba ta cheigi Wɛ taane dem,

ye ba bá ni de kuri.

Ko ná dae konto, ba ya wó wane ba pipiri ba sɛ Wɛ,

pa se o yage ba wɛleera o ma chɛ-ba.’ ”#Izaya 6:9-10

13Yezu laam ma bwei-ba o we, “Á wo nigi memaŋe dento kuri na? Konto to, á wó wane á ni memaŋa yadwonna kuri na? 14Memaŋe dem kuri mo tento:

Men-dwa yalo valo wom na jege o du to mo bere Wɛ taane dem na ye tei to. 15Nɔɔna badwonna nye de men-dwa yalo na to chwoŋa kam ni ne to mo. Banto na nigi Wɛ taane dem to, setaana pɛ laam ma ba o chaale-de o le ba wone. 16Nɔɔna badwonna de maa nye de mena yalo na to kandwa yuu ne to. Banto ma ni Wɛ taane dem ye ba jwoŋi-de lela de wopwolo. 17Taane dem maa wo tiini de zo ba boboŋa, pa se ba yage-de lela. Yaara ná tu ba baŋa ye nɔɔna bɛɛse-ba Wɛ chega kam ŋwaane, ba laam wó kwei-ka ba yage lela. 18Nɔɔna badaara maa nye de mena yalo na to sabare sem wone to. Banto ye balo na nigi Wɛ taane dem 19ye ba ta jege lwia de logo baŋa wonnu to mo. Sabu-laga ma chɔge ba boboŋa ye wo-yɔɔro fera jege-ba pa se ba kwei Wɛ taane dem ba yage, ye de ta wo jaane kuri de pa-ba. 20Ko daare nɔɔna badaara nye de mena yalo na to te-ŋoŋa jei sem ne to mo. Banto mo ye balo na nigi Wɛ taane dem ye ba sɛ-de lanyerane to. Konto ma pa se Wɛ taane dem ja kuri de pa-ba, nenɛɛne mena na ke bia lanyerane se ko maŋe de bia fintɔ fintɔ, ye yadaara de ke bia fuseredo fuseredo, ye yadaara de ke bia bi bi to.”

Memaŋa yadwonna

Matiyu 13:31-32; Luka 8:16-18; 13:18-19

21Yezu daa ma maŋe o bere-ba o we, “Nɔɔno ná jege kanea, o bá sɛ o kwei-ka o pu zoŋa kuri ne, naa o zege-ka gadwogo kuri ne. O wó kwei-ka o pale wɛɛne mo.#Matiyu 5:15 22Wɛ chega kalo maama zem na seigi nɔɔna tei ne to jege se ka ba ka lɔre ja mo. Kolo maama zem na kwoli nɔɔna yibia ne to jege se ko puri mo jase se nɔɔna maama lɔre-ko. 23Á nam fɔge á cheigi a taane dem lanyerane.”

24O daa ma ta o we, “Kwaane-na á pa se á na nigi kolo to zo á boboŋa. Abam na ke á dwonna tei to, Wɛ wó ke abam de konto mo se ko taa mae daane, ye o ta ke o woli da. 25Nɔɔno wolo ná maŋe o jege woŋo, kotu ta wó jwoŋi kodwoŋi o woli da, ye nɔɔno wolo nam na maŋe o ba jege kolokolo to wó ba o ga kolo fenfee o ya na jege to de.”

26O daa ta ma ta o bere-ba we, “Wɛ paare dem na wó ba de taa wo nɔɔna baŋa ne tei to mo tento: Valo wodwoŋi mo kwei men-dwa o dole tega ne. 27Dɛ maama tete ne o maa tigi o dɔa ye te-pora ne o yeini o zaŋe. Maŋa maama wea de tete mena yam maa pula ye ya bera, ye valo wom ta yeiri ya na ke tei ya puli. 28Tega kam tete mo pae mena yam jiri konto. Ya yeini ya puli ya nwoŋi mo yiga. Ya laam ma ke men-kweero, ye ya daare ya ke bia. 29Mena yam ná bege ya ti, valo wom laam wó kwei o seo o vo o zage-ya, faao maŋa kam na yi to ŋwaane.”

30O daa ta ma ta o we, “Amo wó ke tɛ mo a bere abam Wɛ paare dem na ye tei to? Amo wó ma memaŋe mo a bere abam se á lɔre lanyerane. 31Wɛ paare dem nye de nɔɔno na kwei tio-bu-memeeno o du tega ne, ye tio-bu wom konto tiini o muri wo-bia maama wone. 32Nɔɔno wom nam na dugi‑o to, o laam ma nwoŋi o ji kamunu se ko dwoni dwo-vɔɔro telo maama na wo o kara kam ne to. Tio kom ma ta nɛ kamuna kamuna pa se zuna tui ba sɔ ba pworu ko woro ne.”

33Yezu maa mae memaŋa yanto dwoŋi dedɛ mo o tɛ Wɛ chega kam o bere nɔɔna bam. O maa yeini o bere-ba nenɛɛne ba na wó wane ba ni ko kuri tei to. 34O mɛ memaŋa yerane mo o bere nɔɔna bam. Ko nam ná daare wonto de o kwaga tɔgena bam yerane, o maa tɛ wonnu maama kuri jaja o bere-ba.

Yezu wane vo-fɔrɔ

Matiyu 8:23-27; Luka 8:22-25

35Dɛ dem konto wɛ-zoore maŋa ne to, Yezu ma ta de o kwaga tɔgena bam o we, “Pa-na dé kwei nabworo dé vo dé bɛ bubɛ dedwoŋi dem.” 36O na jei nabworo kom wone konto to, ba ma kwei‑o ba ja viiri ye ba daare kɔgɔ kom. Nabwooru tedwonna de maa tɔge-ba te via. 37Vo-fɔrɔ laam ma zaŋe ko mage bworo kom lanyerane. Na bam ma pɔgele dedɛ pa se bworo kom wora ko liri na ye ko lage ko tu na bam kuri. 38Yezu maa wo nabworo kom kwaga kam seeni o tigi pulu baŋa ne o dɔa. O kwaga tɔgena bam ma vo ba zaŋe‑o. Ba ma ta ded‑o ba we, “Berem tu, dé lage dé te mo ye n yiga tera.”

39O laam ma zaŋe wɛɛne ye o daare o bage vo-fɔrɔ kom we, ko kwori! O ma ta de na bam we, ba yage! O na tage konto to, vio kom ma seene ko yage ye na bam de maŋe da chemm. 40O ma ta de o kwaga tɔgena bam o we, “Bɛ mo ye á fomma konto? Abam ta wo ke á wo-dedoa de amo na?”

41Foone ma tiini de ja-ba. Ba ma bwei daane ba we, “Wonto nam ye wɔ mo? O dam dem pae se vio kom de na bam sɛ o ni.”

Currently Selected:

Maake 4: KBG

Highlight

Copy