Matiyu 8

Yezu yɔɔre nɔɔna badwonna

Maake 1:40-45; 1:29-34; Luka 5:12-16; 7:1-10; 4:38-41

1Yezu laam ma zaŋe o tu peo kom yuu ne se o kɛ, ye nɔn-fɔrɔ tɔge o kwaga. 2O na maa kɛ to, nayɔŋɔ kodwoŋi ma vo o tei. O ma kuni dwoona o yiga ne ye o lwoori‑o we, “Amo tu, nmo ná laga, n wó wane n pa se a na yazura.” 3Yezu ma seene o sɛ. O ma twe o jeŋa o dwei‑o, ye o we, “A lage konto. Zaŋe de yazura.” O na tage konto bedwe baŋa ne to mo nɔɔno wom yera yam fɔge ya kwɛ fase.

4Yezu laam ma ta ded‑o o we, “Yé zaŋe n ta kolo na ke to n bere nɔɔn-nɔɔno. Nam yɔɔre n vo Wɛ kaanem tu wom tei se n pa o nii n yera yam, se n daare n ja pɛɛra n vo n ke Wɛ jeŋa ne se ko maŋe de Moses nia yam na bere tei to.#Chullu 14:1-32 Konto wó bere nɔɔna we n jaweo kom seene ko jei.”

5Yezu laam ma vo o yi teo kodwoŋi, ko yere mo Kaparenia. Soja yiga tu wodwoŋi déem maa wora. 6O ma vo Yezu tei o lwoori‑o we, “Amo tu, a jege tontoŋeno sɔŋɔ ne ye jaweo tiini ko chana o yera ne. O maa tigi tega ne ye o ware o zaŋe.” 7Yezu ma leiri‑o we, “Amo wó tɔge a vo se a pa o na yazura.” 8Soja yiga tu wom ma leiri o we, “Amo tu, a muri se n ba n zo amo sɔŋɔ. Konto ŋwaane, nam ta‑n ni we a tontoŋeno wom zaŋe, se o laam wó na yazura. 9Amo yei we n jwoŋi dam Wɛ tei ne. Amo de ye nɔɔno wolo nɔɔna badwonna na jege dam amo baŋa ne to, ye amo de daa ta jege dam badaara baŋa ne. Amo ná tage we nɔɔno wolo véi, o jege se o vo mo. A nam daa ná we nɔɔno wolo ba, o de wó ba mo. Ko ta ná ye a tontoŋeno, amo ná we, o ke woŋo kolo, o jege se o ke mo.”

10Yezu na nigi konto to, ko ma tiini ko so‑o. O ma ta de balo na tɔge ba wora to o we, “A tɛ abam chega ŋwaane to, amo wo nɛ nɔɔn-nɔɔno o na jege wo-dedoa de amo se ko yi nɔɔno wonto na jege tei to, ne ko ná maŋe ko ye Isarele dwi tiina bam wone de. 11Á ta‑á yei we nɔɔna dedɛ wó nwoŋi logo baŋa jei maama ne ba ba ba zo Wɛ woro kom wo. Dáane mo ba laam wó jeini de debam nabaara Abaraham de Izaak de Jakob, ye ba di ywoni daane. 12Ko daare nɔɔna balo Wɛ na tiŋi o paare dem se ba zo to, banto daa bá na chwoŋa se ba zo. Wɛ wó zeili-ba o yage lim jei ne, yaara na wora mɛ to, ye ba wó taa keera ye ba done ba nwa.”

13Yezu laam ma ta de soja yiga tu wom o we, “Nam véi. Nmo na ke n wo-dedoa de amo se a ke kolo to, Wɛ wó pa ko ke.”#Matiyu 15:28 Ko ma seene ko ke. Maŋa kam konto ne nɔɔ mo tontoŋeno wom nɛ yazura.

14Yezu laam ma vo Piita ba sɔŋɔ. O ma na Piita tenkaane na tiga o weela. Ko ye paa mo jege‑o. 15Yezu ma vo o tei o ja o jeŋa, ye paa kam nwoŋi o yera ne. Kaane wom laam ma zaŋe wɛɛne o ke wodiu o pa‑o.

16Tega na tu ka wora ka yi to, nɔɔna maa jaane setaana na daane balo to dedɛ ba tui Yezu tei. O maa yeini o mae o ni taane o zeili setaana yam, ye o daare o pa jaweena maama na yazura. 17O na ke tei konto to, ko ye se ko pa Wɛ sampwora Izaya na maŋe o ta kolo faŋa faŋa to mo ba ko ji chega, de o na we,

“Wonto mo le jaweero de lwia yalo na jege debam to o yage.”#Izaya 53:4

Balo na lage se ba tɔge Yezu na ke tei to

Luka 9:57-62

18Yezu déem ma lɔre we nɔn-fɔrɔ tiini ko wora o tei ne. O ma pa o kwaga tɔgena bam ni se ba bɛ buga kam bubɛ dedwoŋi dem. 19Ba daa ta na wo kɛ to, Wɛ nia yam zamesem tu wodwoŋi ma vo o tei, ye o ta ded‑o o we, “Berem tu, nmo na lage n vo jei selo maama to, amo wó tɔge a vo.” 20Yezu ma leiri‑o we, “Ko ná ye yira, banto jege bɔɔna ba tigi da. Zuna de jege pworu ba tigi da. Ko daare amo Nabiin-bu wom ba jege jeiga se a peini da a sii.”

21Nɔɔno wodwoŋi de na ye o kwaga tɔgeno to ma ta ded‑o o we, “Amo tu, yage se a ná ke a kwo lua, se a laam ba a tɔge nmo.” 22Yezu ma leiri‑o we, “Ta‑n tɔge-ne, se n yage se balo na ba jege ŋwea Wɛ tei ne to taa ke ba tete lui.”

Yezu jege dam vo-dɛɔ baŋa ne

Maake 4:35-41; Luka 8:22-25

23Yezu laam ma vo o zo nabworo wo, ye o kwaga tɔgena bam tɔge ded‑o ba kɛ. 24Vo-dɛɔ ma pɔpɔ ko zaŋe ko mage nabworo kom pa se ko wora ko liri na se ko tu na bam kuri. Yezu maa tigi o dɔa. 25O kwaga tɔgena bam ma vo ba zaŋe‑o, ye ba we, “Debam tu, jwoŋi debam ŋwea, se dé lage dé te mo.” 26O ma ta de-ba o we, “Abam fona konto wo bɛ mo? Abam boboŋa muri de Wɛ.” O laam ma zaŋe wɛɛne, ye o daare o bage vio kom de na bam, pa se te maŋe da chemm. 27Nɔɔna bam maa tiini ba ye yaau, ye ba tɛ ba we, “Nɔɔno wonto ke tɛ mo o ye konto? O dam dem pae se vio kom de na bam sɛ o ni.”

Yezu zeili setaana nɔɔna balei tei ne

Maake 5:1-20; Luka 8:26-39

28Ba laam ma vo ba bɛ bubɛ dedwoŋi dem mɛ Gadara tiina na zoore to. Nɔɔna balei maa wora setaana na daane-ba. Banto tigi yibeela jei ne mo, ye ba jege foone pa se nɔɔn-nɔɔno ware o tɔge chwoŋa kam konto o kɛ. Ba laam ma nwoŋi ba peiga jei sem ne ba vo ba jeeri Yezu. 29Ba ma laare baŋa baŋa ba we, “Baŋa Wɛ Bu, nmo tu debam tei se n ke bɛ mo? Nmo tu se n waare debam ye Wɛ borem dɛ dem ta wo yi mo na?”

30Jei sem konto ne teira dedɛ ya wora ya beeri ya wodiu se ya di. 31Setaana yam ma gare ya lwoori Yezu ya we, “Nmo ná lage n zeili debam, se n pa dé vo dé taa tɔge teira yanto.” 32O ma ta o we, ya véi. Ya ma seene ya nwoŋi nɔɔna bam tei ne ya vo ya tɔge teira yam. Teira yam maama ma duri ya siseiri ya tu buga kam wo ya nyɔ na ya te.

33Nɔɔna balo ya na nii teira yam baŋa ne to ma duri ba vo teo kom wo. Ba ma ta kolo maama na ke to, de Yezu na zeili setaana yam nɔɔna balei bam tei ne tei to. 34Ko ma pa se teo kom nɔɔna bam maama nwoŋi ba vo se ba jeeri Yezu. Ba na nɛ‑o to, ba ma lwoori‑o se o nwoŋi ba teo kom ne o viiri.

Currently Selected:

Matiyu 8: xsmKBG

Highlight

Copy