Matiyu 7

Nɔɔna maŋe se ba taa nege daane

Luka 6:37-38, 41-42

1Abam nam yé ta‑á jege nɔɔna á yaala, se Wɛ de wó yaale abam. 2Kokuri, abam na yaale á dwonna tei to, Wɛ wó tɔge konto dwoŋi mo o ma di á taane. Abam na ke á dwonna tei to, Wɛ wó ke abam de konto se ko taa mae daane.

3Abam nye de nɔɔno mo ná nii o dwoŋi yi ne o na weo balaŋa da, ye o yiga tera de o tete yi na jege da-lɔŋɔ to. Ko maŋe se ko taa ye konto na? 4Nɔɔno wolo nam na jege da-lɔŋɔ o yi ne to wó taa jege chwoŋa se o ta de o dwoŋi we, ‘Pa se a le weo n yi ne’ na? 5Abam ye pipiri-nyena de á na ke á dwonna tei to. Abam nam jege se á le á tete yi da-lɔŋɔ kom mo, se á laam wane á nii lanyerane se á le á dwoŋi yi weo kom.

6Ko nam ná ye nɔn-wo-korro, se á yé gare á bere-ba Wɛ chega kam. Konto nye de nɔɔno ná kwei woŋo kolo na tiini ko jege fera to o de teira yiga ne. Ya ma nɔ-ko de ya nɛ, ye ya daare ya chiŋi kotu.

Wɛ-lworo taane

Luka 11:9-13

7Ta‑á lwoori-na Wɛ, se á wó na kolo á na gɛ to. Beeri-na kolo á na lage to, se á wó na. Ta ta‑á dɔne-na manchwo-peena yam, se ba wó pore ba pa abam.#Jeremia 29:13 8Kolo ŋwaane, wolo maama na lwoori Wɛ se o pa‑o woŋo to wó jwoŋi. Wolo maama na beeri woŋo to wó na-ko. Ba wó pore ba pa wolo maama na dɔne manchwo-peena yam to.

9Abam wolo ná jege bu, ye o ná lwoori bworobworo n tei ne, nmo wó sɛ n kwei kandwɛ n pa‑o na? 10O nam ná lwoori‑m se n pa‑o ywoni, n wó sɛ n pa‑o basankwea na? 11Aawo. Abam wo ba lana ye á ta yei se á pae á bia wo-laaro telo ba na lage to. Ko daare á Kwo Wɛ na gare abam to, wonto nam bá kwei wo-laaro dedɛ o pa balo na lwoori‑o to mo na?#Lei 84:11

12Ta‑á ke-na á dwonna lanyerane, se ko maŋe de á na lage se banto taa ke abam tei to. Konto mo ye chega kalo Moses de faŋa faŋa Wɛ sampwori sem twanno tem na maŋe te bere to.#Matiyu 22:40

Yezu tɔgena na wó tɔge chwoŋa kalo to

Luka 13:24; 6:43-44; 13:25-27; 6:47-49

13-14Ta‑á cho-na á tete se á wane á tɔge chwo-memena kam á vo á na ŋwea Wɛ tei ne. Nmo nam ná lage n tɔge chwoŋa kalo kweelim jeiga na ye chɔgem to, ka ni yala dedɛ ye ka tɔgem de ye mɔle. Nɔɔna dedɛ mo yeini ba tɔge-ka. Ko daare, ko ná ye chwoŋa kalo nmo na wó tɔge da se n vo n jwoŋi ŋwea Wɛ tei ne to, ka ni ye memena mo ye ka ta peena. Nɔɔna fenfee yerane mo lɔre chwoŋa kam konto ni ne.

15Ta‑á cho-na á tete de balo na bere we ba ye Wɛ sampwori ye ba dae to. Banto nye de wiira mo de ba na lage ba chɔge abam tei to, ye ba laam pa se ba nye de pei abam yiga ne.#Jeremia 14:14; 1 Jɔn 4:1-3 16Ba kikia nam mo wó pa se á lɔre ba na seene ba ye tei to. Kokuri, tio tera ko na wó wane ko lei ko dwoŋi bia. N bá‑n na mɔɔro sabara yuu ne. 17Tei-ŋonno mo yeini te leiri bu-ŋona. Tei-jawone mo yeini te leiri bu-kokwaaro. 18Tei-ŋoŋo tera ko na wó lei bu-kokwaaro. Tei-jawona nam tera ko na wó lei bu-ŋona. 19Tio kolo maama na ba leiri bu-ŋona to, nɔɔna wó gwoni-ko mo ba de tega ne ba zwɛ de mini. 20Ko nam wó tɔge konto mo se á seene á lɔre banto na ye balo to de ba na ke kolo to.

21Ko dae we nɔɔno wolo maama na bwoŋi-ne o we, ‘Amo Teiru, amo Teiru’ to mo wó tɔge o woli amo Kwo Wɛ paare dem wone. Ko nam wó taa ye balo na seene ba tɔge amo Kwo Wɛ boboŋa to mo.#Luka 6:46; Jemsi 1:22 22Bora borem dɛ dem ná yia, nɔɔna dedɛ wó ta de amo we, ‘Dé Teiru, dé tɔge nmo yere dem ŋwaane mo dé tɔɔle Wɛ kwora kam. Dé ta mɛ nmo yere dem dé zeili setaana nɔɔna tei ne, ye dé daare dé ma dé ke wo-kenkagela dedɛ.’ 23Amo nam wó ta-ba we, ‘A nam maŋe a wo fɔge a lɔre abam mo de. Á ye wo-lwan-keira mo. Konto to, véi-na dáa a tei ne.’

24Ko na ye konto to, wolo maama ná jwoŋi a taane dem ye o daare o tɔge-de, konto tu nye de boboŋa tu wolo na chwi o sɔŋɔ kuri pelɔrɔ baŋa ne ye o laam lɔ to mo. 25Doa ma ba ka ne pa se bwi su se pɛɛle. Vo-dɛɔ de ma ba ko mage sɔŋɔ kom. Ko maa wo to, ko kuri na chwi pelɔrɔ kom baŋa ne to ŋwaane. 26Ko daare wolo maama nam na jwoŋi amo taane dem ye o ba tɔge-de to nye de nɔn-jworo kolo na pɔpɔ ko lɔ ko sɔŋɔ kasolo baŋa ne to mo. 27Doa ma ba ka ne pa se bwi su se pɛɛle, ye vo-dɛɔ de mage sɔŋɔ kom pa se ko tiini ko to tega ne buri-buri.”

28Yezu déem na tage wonnu tento maama o ti to, nɔn-kɔgɔ kolo na wora to ma tiini ba ye yaau de o berem dem. 29O na bere-ba tei to mo pɛ se ba lɔre we o jege dam ko dwoi ba tete zamesem tiina bam.

Currently Selected:

Matiyu 7: xsmKBG

Highlight

Copy