Matiyu 6

Yezu berem-doore dem

Luka 11:2-4

1“Ta‑á yei-na se á yé ta‑á bere á tete nɔɔna yiga ne de á na ke keim-laaro tei to. Á ná ke konto dwoŋi, ko bá pa á na nyɔɔre á Kwo Wɛ tei ne. 2Konto to, á ná kwei woŋo á pa yiniga tu, se á yé kwaane á bere á tete á pa nɔɔna maama nii abam na ke kolo to. Balo na ye pipiri-nyena to mo yeini ba bere ba tete konto dwoŋi ba jeerim di sem ne, de ba teo kom pwooni yiga ne, se ko pa nɔɔna taa zuli-ba. A tɛ abam chega ŋwaane to, banto maŋe ba na ba nyɔɔre ba ti. 3Nmo nam ná lage n woli yiniga tu, se n yé pa nɔɔn-nɔɔno lɔre ko ni ne, nenɛɛne nɔɔno na kwei woŋo o pa de o jazem, ye o jagwia yeiri ko ni ne to. 4N Kwo Wɛ nam nae kolo n na seigi n ke to. O maa wó pa se n na nyɔɔre ko ŋwaane.

5Abam ná yeini á lage á ware Wɛ, se á yé zaŋe á ta‑á bere á tete ne pipiri-nyena bam na ke tei to. Banto swoi se ba taa zaŋe wɛɛne mo ba ware Wɛ ba jeerim di sem ne, de pwooni yiga ne, se nɔɔna maama taa na-ba. A tɛ abam chega ŋwaane to, banto maŋe ba na ba nyɔɔre ba ti.#Matiyu 23:2-7 6Nmo nam ná lage n ware Wɛ, se n zo n diga kam wo n ja ka ni n pe, se n laam ware n Kwo Wɛ wom na seigi nɔɔna yiga ne to. Wonto nae kolo n na seigi n ke to. O maa wó pa se n na nyɔɔre ko ŋwaane.

7Abam ná wora á ware Wɛ, se á yé tiini á ma ta-yɔɔro nenɛɛne balo na yeiri Wɛ na yeini ba ke tei to. Banto yeini ba boŋe we, ba ná tiini ba ŋɔɔne ta-fare mo, Wɛ wó cheigi ba warem dem. 8Abam nam yé zaŋe á ke ne banto na ke tei to. Kokuri á Kwo Wɛ maŋe o yei kolo abam na gɛa ye á ta wo lwoori‑o ko ŋwaane to.

9Abam nam maŋe se á ta‑á ware Wɛ tento dwoŋi mo:

‘Debam Kwo na wo telaao ne,

nmo yere dem maŋe de tia mo.

10Nmo paare dem de ma maŋe

se de ba de jeini de dam.

Pa se nmo boboŋa wonnu taa ke tega baŋa ne,

se ko maŋe de te na ke tei telaao ne to.#Luka 22:42

11Pa debam wodiiru zem se te maŋe debam.#Memaŋa 30:8

12Yage dé wɛleera n ma n chɛ debam,

ne debam de na chɛ wolo maama

na ke wo-balɔrɔ o ma chɔge dé yiga tei to.

13Yé pa dé na cham delo na wó maŋe dé boboŋa to.

Ta‑n cho debam wo-lwanno tu setaane jeŋa ne.’

[Nmo mo tei paare, de dam, de nenɔŋ-fɔrɔ,

se ko taa vei wuu. Ameena.]

14Kokuri to, abam ná yage nɔɔna na ke tusim delo ba yage á yuu ne to á ma chɛ-ba, á Kwo Wɛ wó yage á na ke kolo á tusi to o ma chɛ abam de.#Kolosia 3:13 15Ko daare, abam ná wo sɛ se á ke konto, á Kwo Wɛ de nam bá yage á na ke kolo á tusi to o ma chɛ abam.

16Abam nam ná vɔge ni, se á yé nyɔne á yiga ne pipiri-nyena bam na yeini ba ke tei to. Banto yeini ba pa ba yibia leiri se ko pa nɔɔna lɔre we ba vɔge ni mo. A tɛ abam chega ŋwaane to, banto maŋe ba na ba nyɔɔre ba ti. 17Nmo nam ná vɔge ni, se n swɛ n yera se n daare n le n yuu lanyerane. 18Konto mo wó pa nɔɔn-nɔɔno bá lɔre we n vɔge ni. Ko ye n Kwo Wɛ wom na seigi nɔɔna yiga ne to yerane mo yei. Wonto nam nae kolo n na seigi n ke to. O maa wó pa se n na nyɔɔre ko ŋwaane.

Wɛ na wó taa jege dé teena tei to

Luka 12:32-34; 11:33-36; 16:13; 12:22-31

19Nam yé zaŋe á kwaane se á na jejegero dedɛ logo baŋa ne. Á ná tiŋi jejegero tem konto, te wó ba te chɔge. Wonnu tedwonna wó di-te, ye te ta wó ba te pɔ maama. Ŋweena de maa wó bwori diga kam ba zo ba ŋɔ-te. 20Abam nam jege se á ta‑á ke kolo na wó pa se á na wo-laaro dedɛ Wɛ telaao ne to mo. Dáane mo kolokolo daa bá wane ko chɔge á wo-laaro tem, ye ŋweena de bá wane ba ŋɔ-te. 21Ta‑á ke-na konto bɛŋwaane á wonnu tem na wo mɛ maama to, á boboŋa yɔɔre ya tigi dáane mo.

22Nɔɔno yia mo pae se o yera jege pwooni. Konto to, o yia ná lana, ko wó pa se o ŋwea maama taa tɔge pwooni mo. 23O yia nam ná ba lae, ko pae se o ŋwea maama wo lim wone mo. Pwooni ná tera nɔɔno tei ne ye ko ye lim yerane, ko bá taa tiini ko ye lɛɛro mo o tei ne na?

24Nɔɔn-nɔɔno bá wane o kwei boboŋe dedwe se o ma toŋe o pa o yuu tiina balei. O wó taa chuli dedoa kam ye o daare o swoi wodwoŋi wom, naa o wó taa nege dedoa kam ye o daare o gwooni wodwoŋi wom. Konto ŋwaane, abam bá wane á pa se Wɛ taa ye á tu, ye á daare á tɔge sabu-laga de.#Jemsi 4:4

25Baŋa Wɛ nam na tei abam to, se á yé ta‑á jege lwia de logo baŋa kolokolo, ne ko ná ye á ni-wodiu, naa á na wó zo gwaaro telo to.#Filipi 4:6 Kokuri á ŋwea jege kuri ka dwoi wodiu. Yera yalo Wɛ na pɛ abam to de maa jege kuri ya dwoi gwaaro. 26Nam maane-na á nii zuna na ye tei to. Banto ba dua, ye ba ta ba zage mena ba ke ba tuli ne. Ko nam ye á Kwo Wɛ mo nii zuna bam baŋa ne de ba ni-wodiu. Wɛ nam bá pa se abam ta‑á jege kuri á dwoi zuna bam na? 27Abam wolowolo bá wane o twoŋi o ŋwea de fenfee de, ne o ná maŋe o jege ka lwia tei de.

28Ko nam ná ye gwaaro, á jege te lwia wo bɛ mo? Maane-na á nii gaao punnu tem na wora to. Tento ba ke totoŋa, ye te ba sɔ gwaaro. 29Nam ta‑á yei-na we, tento jege lam te dwoi Pɛ Solomon déem na maŋe o zoore gare-nyenno telo to.#1 Pwa 10:4-7 30Ko nam ná ye gaaro tem konto, tento ba jege dɛ ye nɔɔna yeini ba zwɛ-te. De konto de, Wɛ ta mo pae te jege lam konto dwoŋi. Konto ŋwaane ko ná ye abam, Wɛ bá tiini o nii abam baŋa ne mo na? Abam boboŋa muri de Wɛ.

31Konto ŋwaane, á yé ta‑á jege lwia de á na wó ke tei se á na wodiu de gwaaro to. 32Balo na yeiri Wɛ to mo tiini ba boŋe wonnu tem konto maama boboŋa. Abam Kwo Wɛ nam maŋe o yei á na lage-te tei to. 33Kolo na ye wo-chɛɔ ko pa abam to ye se á pa á boboŋa mo yɔɔre ya taa tɔge Wɛ paare dem, se á daare á ta‑á ke kolo na jege chega o tei ne to. Á ná ke konto dwoŋi, Wɛ laam wó woli abam de á logo baŋa wonnu tem maama. 34Á nam yé pa lwia taa jege abam de kolo na lage ko ke dɛ dedwoŋi ne to. Yage-na se jwa dɛ dem tete taa jege de lwia, se dɛ maama tui de de cham mo.

Currently Selected:

Matiyu 6: xsmKBG

Highlight

Copy