Matiyu 27

Judas go o tete

Maake 15:1; Luka 23:1-2; Jɔn 18:28-32

1Tega na tu ka poore tetete to, Juu tiina kaanem yiga tiina bam de ba teo kom nakwa bam maama ma ke ni daane se ba pa Yezu te. 2Ba ma ja‑o ba vɔ, ye ba ja‑o ba vo ba ke gɔmena tu wom jeŋa ne, o yere na ye Pilata to.

3Judas wolo na yeigi Yezu o pa nɔɔna bam to ma lɔre we ba di o taane se ba pa o to mo. O wo laam ma chɔge de o na ke kolo to, ye o jwoori o kwei lu-nyenno sabu-dala fintɔ kom se o pa kaanem yiga tiina bam de ba nakwa bam. 4O ma ta de-ba o we, “Amo ke a tusi, de a na yeigi nɔɔno wolo na wo ke kolokolo to a pa abam, ye á lage á go‑o to.” Ba ma leiri‑o ba we, “Debam yiga tera, se ko nam tɔge nmo mo.”

5O laam ma kwei sabu kom o ja vo o de o yage Wɛ diga kam wone, ye o daare o viiri. O ma vo o kuuri o tete o go.

6Kaanem yiga tiina bam déem ma kwei sabu-dala yam ye ba we, “Sabu konto ye jana nyem mo. Ko nam chula se dé gwaane-ko Wɛ diga sabia bam wone.” 7Ba ma bwɛ daane ye ba ma-ko ba yeigi tega kadwoŋi ka yere na ye ‘Kamɔ-mɔro tega’ to, se ba ma ke veira yibeela jeiga. 8Konto ŋwaane mo nɔɔna jege jeiga kam konto ba bwoi we ‘Jana tega’ se ko ba ko yi zem.#Kikia 1:18-19

9-10Konto ma pa se Wɛ sampwora Jeremia déem na bere kolo faŋa faŋa to ba ko ji chega de o na we, “Ba kwei lu-nyenno sabu-dala fintɔ kom mo ba ma yeigi kamɔ-mɔro tega kam, ne Baŋa Wɛ na pɛ-ne ni se a ke tei to. Ko maa ye sabu kolo Isarele dwi tiina na sɛ se ba ma leini nɔɔno wom to mo.”#Jeremia 32:6-9; Zekaria 11:12-13

Pilata bwei Yezu taane

Maake 15:2-15; Luka 23:3-5, 13-25; Jɔn 18:33–19:16

11Yezu ma zaŋe o zege gɔmena tu Pilata yiga ne. Gɔmena tu wom ma bwei‑o o we, “Nmo mo ye Juu tiina bam pɛ na?” Yezu ma leiri‑o o we, “Ko wo nmo tei ne.” 12Ko daare Juu tiina kaanem yiga tiina bam de ba nakwa bam na ŋɔɔne o taane ba pa‑o to, o wo leiri kolokolo. 13Pilata ma ta ded‑o o we, “Nmo wo nigi ba na ŋɔɔne kolo maama ba pa nmo to na?” 14Yezu maa wo sɛ se o leiri ba taane dem delodelo. Ko ma pa se gɔmena tu wom tiini o ye yaau ded‑o.

15Bene maama Juu tiina kuri maŋa ná yeini ka yi, gɔmena tu wom yeini o le peeno dedoa mo o pa nɔn-kɔgɔ kom, nenɛɛne banto na lage wolo to. 16Kanto maŋa kam ne peeno wodwoŋi maa wora, ye nɔɔna maama yei o keim-balwaaro ni ne. O yere mo Barabas. 17Nɔɔna bam na tu ba la daane to, Pilata ma bwei-ba o we, “Abam lage se amo yage banto wɔ mo a pa abam? Ko ye Barabas mo naa Yezu wolo ba na bwoi‑o we Krista to mo?” 18O bwei konto kolo ŋwaane o yei we ko ye wo-goo ŋwaane mo ba jaane Yezu ba ke o jeŋa ne.

19Pilata na jei o taane dim jei sem ne to, o kaane ma toŋe ni o pa‑o o we, “Yé zaŋe n ke nɔɔno wom konto kolokolo, o na jege chega to ŋwaane. Tete dento ne amo tiini a na yaara dedɛ dendwɛ wone nɔɔno wom konto ŋwaane.”

20Juu tiina kaanem yiga tiina bam de ba nakwa bam ma soge nɔn-kɔgɔ kom se ba ta de Pilata we, o yage Barabas o pa-ba, se o daare o pa ba go Yezu. 21Pilata daa ma jwoori o bwei-ba o we, “Nɔɔna banto balei wone abam lage se a yage wɔ mo a pa abam?” Ba ma leiri‑o ba we, “Barabas.” 22Pilata laam ma bwei-ba o we, “Ko nam ná ye Yezu wolo ba na bwoi‑o we Krista to, abam we a ke‑o tɛ mo?” Ba maama ma ta ded‑o ba we, “Pa‑o dagara yuu ne n go.” 23O ma jwoori o bwei-ba o we, “Wonto chɔge bɛ mo?” Ba laam ma tiini ba laare baŋa baŋa ba we, “Pa‑o dagara yuu ne n go.”

24Pilata ma lɔre we ko ba jege kuri se o taa ŋɔɔne taa taa, ko na lage ko ja bobɔga ko ba to ŋwaane. O ma jwoŋi na o sane o jea nɔn-kɔgɔ kom maama yiga ne, ye o we, “Amo yiga tɔge ka tera nɔɔno wonto toone dem wone. Ko ye abam yiga mo.” 25Nɔn-kɔgɔ kom maama ma leiri‑o ba we, “Yage se o toone dem taa wo debam de dé bia yuu ne.”

26O laam ma yage Barabas o pa-ba. O ma pa ba fere Yezu, ye o pa-ba chwoŋa se ba ja‑o ba vo ba pa dagara yuu ne ba go.#Izaya 53:5

Ba jaane Yezu ba vo ba pa dagara yuu ne

Maake 15:16-41; Luka 23:26-49; Jɔn 19:2-3, 17-30

27Gɔmena tu wom soja tiina bam laam ma ja Yezu ba vo ba zo o sɔŋɔ kom konkɔlɔ. Soja tiina kɔgɔ kom maama ma gilimi‑o da. 28Ba ma le o gwaaro tem, ye ba daare ba zo‑o gare-soŋo. 29Ba ma kwei sabare ba ma sɔ yipuga ba pu o yuu ne. Ba ma kwei kasogo ba ma ji nacheiga ba ke o jazem ne. Ba laam ma ke‑o kachaare ye ba vei ba kuni dwoona o yiga ne ba tɛ ba we, “Juu tiina pɛ, denlei naa!” 30Ba ma daare ba twe lileeru ba yage o yera ne, ye ba jege kasogo kom ba lɔe o yuu ne.

31Ba na ke‑o ba mɔne ba ti to, ba ma le gare-soŋo kom ye ba jwoori ba zo‑o o tete gɔrɔ kom. Ba laam ma ja‑o ba nwoŋi ba vo se ba pa‑o dagara yuu ne.

32Ba na jege‑o ba maa kɛ to, ba ma jeeri nɔɔno wodwoŋi, o yere na ye Simon ye o nwoŋi Kurene to. Soja tiina bam ma fe‑o se o kwei dagara kam o zeŋe se ba vo. 33Ba maama ma vo ba yi jeiga kadwoŋi ba na bwoi we ‘Goligota’ to. Yere dem konto kuri mo ye ‘Yu-kwoli-champoa Peo’. 34Ba na yi da to, ba ma kwei liri sedwoŋi se ni na chana to ba guuri sana wone ba pa Yezu se o nyɔ. O ma laŋe o nii ye o wo nyɔge.

35Ba laam ma ja‑o ba pa dagara kam yuu ne. Ba na page‑o konto to, ba ma kwei o gwaaro tem se ba pɔɔre-te ba pa daane. Ba ma ta jɔrɔ se ba nii wɔ mo wó twori kolo o na lage to. 36Ba laam ma jeini se ba taa daane‑o.

37Ba déem ma meeli tɔnɔ dagara kam yuu ne se ko bere kolo o na ke o chɔge ye ba go‑o to. Ko déem popone we:

WONTO YE YEZU,

JUU TIINA PƐ MO.#Jɔn 19:19-22

38Ba ma daare ba ja ŋweena balei ba pa dagare sedwonna baŋa ne. Ba ma chwi dedoa Yezu jazem ne. Wowom maa wo o jagwia ne. 39Nɔɔna balo na tɔge da ba kɛ to maa nia ye ba gɔgese ba yuni ye ba twe‑o. Ba maa yaale‑o, 40ye ba we, “Nmo ya boŋe se n yigi Wɛ diga kam mo n de tega ne, se n daare n ma da yatɔ n jwoori n fɔge n lɔ-ka. Tɔ. Nmo ná seene n ye Baŋa Wɛ Bu, se n laam vere n tete. Kwaane n tu da dagara kam yuu ne se dé nii.”

41Juu tiina nakwa bam, de ba kaanem yiga tiina, de ba zamesem tiina bam de maa ke‑o ba mɔna konto, ye ba tɛ daane ba we, 42“O yeini o jwoŋi nɔɔna ŋwea, ye o laam ware o tete ŋwea o jwoŋi. O maa bere we o ye Isarele dwi tiina pɛ. O laam nam tu dagara kam yuu ne leile se dé nii, se dé wó sɛ we o ye chega tu. 43O ta bere we o teege Wɛ baŋa ne. Wɛ nam ná seene o lage o ni taane, se o laam jwoŋi‑o o yage, o na pɛ se o ye Wɛ Bu to ŋwaane.”#Lei 22:7-18

44Ŋweena balo na tɔge ba pa dagare sem baŋa ne to de maa jege‑o ba twea konto dwoŋi.

45Ko ma vo ko yi maŋa kam wɛ na tu de wo yupare baŋa ne to. Tega kam maama ma ba ka ji lim se ko vo ko yi wɛ-guni maŋa ne. 46Ko na yi nenɛɛne luu batɔ to mo Yezu laare baŋa baŋa de kwor-dɛa o we, “Eli, Eli, lema sabaktani?” Taane dento kuri mo, “Amo Wɛ, amo Wɛ, bɛ mo ke ye n yage a yera?”

47Nɔɔna balo na zege da ye ba ni taane dem to badwonna ma boŋe we, o bwoi Elija mo se o ba. 48Ba dedoa ma ke lela o duri o vo o kwei sɔsɔɔ. O ma de-ko sa-nyɔna wone, ye o daare o ke-ko kasogo ni ne o vo o tei o pa Yezu se o nyɔ.#Lei 69:21 49Nɔɔna badaara bam na nɛ konto to, ba maa we, “Yage se dé cheigi dé nii, Elija wó ba o jwoŋi‑o o yage na.”

50Yezu daa ma jwoori o kaase baŋa baŋa de kwor-dɛa. O laam ma pa o siu ti.

51Yezu na tege konto to, gare-jale delo na leigi de che Wɛ di-yun-gala kam to ma kaare belei, ko zege ko baŋa ne ko tu ko kwaare ko kuri ne.#Nwoŋim 26:31-33 Tega kam maa ziziŋa ye pelwaaro bage te yare. 52Yibeela yam ma puri. Ko daare Wɛ tete nɔɔna balo ya na tege to dedɛ ma jwoori ba bi, 53ye ba nwoŋi ba yibeela yam wone. Yezu tete na tu o bi toone wone to kwaga ne, banto laam ma vo ba zo Wɛ teo Jerusalem pa se nɔɔna dedɛ na-ba.

54Soja tiina bam yiga tu de o nɔɔna balo na wora ba yere Yezu to ma na tega kam ziziŋim dem de kolo maama na ke to. Foone ma tiini de zo-ba, ye ba tɛ ba we, “Nɔɔno wonto ya seene o ye Baŋa Wɛ Bu mo.”

55Kaana dedɛ de déem tɔge ba wora, ba na zege yiga yiga ye ba nia. Banto déem ya tɔge de Yezu mo ba nwoŋi Galili ba ba, ye ba yeini ba tɔge ba zeini‑o.#Luka 8:2 56Mary wolo ba na bwoi we Magadala to maa tɔge o wo kaana bam konto wone, dedaane Mary wodwoŋi wolo na ye Jemsi de Josɛf nu to, ko woli de Zebedi bia bam nu.

Ba ke Yezu yera yam yibeeli wone

Maake 15:42-47; Luka 23:50-56; Jɔn 19:38-42

57Nɔɔno wodwoŋi déem mo wora, o yere mo Josef, o na nwoŋi Arimatea ye o kwori o ye nadum. Wonto de déem ya tu o ji Yezu tɔgeno. Tega déem na lage ka yi to, 58o ma zaŋe o vo Pilata tei se o lwoori‑o chwoŋa se o vo o kwei Yezu yera yam o suli. Pilata ma sɛ, ye o pa ni se ba kwei yera yam ba pa‑o. 59Josɛf laam ma vo o kwei Yezu yera yam o pipiri-ya de gare-jale delo na lamma to. 60O ma daare o kwei-ya o ja vo o tiŋi peo bɔɔne wone. Dento maŋe de ye o tete nyem mo, ye ba déem lugi-de peo yera ne mo. De ye yibeeli-doore mo. O na tiŋi yera yam da to, o laam ma bibili kandwɛ-polɔgɔ kamunu o ma pe bɔɔne dem ni, ye o daare o viiri. 61O na wora o fɔge-de konto to, Mary Magadala de Mary wodwoŋi wom maa jei yibeeli dem ni seeni ba nia.

Ba yɔɔre ba yere yibeeli dem

62Dɛ dem Juu tiina na yeini ba ti ba yiga se ba siu dɛ dem laam yi to ma kɛ.#27:62 Ko kuri mo ye ‘Friday’ na kɛ ko daare ‘Saturday’ to. Juu tiina kaanem yiga tiina bam de Farisi tiina bam laam ma zaŋe ba vo Pilata tei. 63Ba ma ta ded‑o ba we, “Debam tu, dé maane we, vwa-nyeno wom ta na wora maŋa kalo to, o déem tage o we, omo wó jwoori o bi da yatɔ dɛ ne. 64Konto ŋwaane, nam pa ni se nɔɔna wuuri ba vo ba kwoni yibeeli dem ni se ba fɔge ba taa nia se ko vo ko yi da yatɔ dɛ dem. Ko ná dae konto, o tɔgena bam wó wane ba vo ba kwei‑o ba ja viiri, ye ba daare ba ta de nɔɔna we, o bi toone wone mo. Konto maa wó pa se ba vwa yam tiini ya ji chega se ko dwoni boboa kam ne.” 65Pilata ma sɛ ye o we, “Nam ja-na nɔɔna á vo se ba kwaane ba taa nia se ko maŋe de abam na yei tei to.”

66Ba ma kɛ ba vo yibeeli dem ne, ye ba kwoni de ni kandwɛ-kamunu kom na pe to. Ba ma daare ba yage nɔɔna bam da se ba taa yere-de.

Currently Selected:

Matiyu 27: xsmKBG

Highlight

Copy