Matiyu 26

Juu yiga tiina ke ni daane se ba go Yezu

Maake 14:1-2; Luka 22:1-2; Jɔn 11:45-53

1Yezu déem na tage wonnu tem konto maama o ti to, o laam ma ta de o kwaga tɔgena bam o we, 2“Abam yei we ko daare da yalei mo se Atɔgebabaŋa kuri dem ba de yi, ye ba laam wó ja amo Nabiin-bu wom ba ke dedɛɛra jea ne se ba pa-ne dagara yuu ne ba go.”

3Juu tiina nakwa bam de ba kaanem yiga tiina bam ma jeini daane Kayafa sɔŋɔ ne. Wonto maa ye ba kaanem yuu tu wom. 4Ba ma bane daane se ba nii ba na wó ke swa yalo ba ma ja Yezu se ba pa o te to. 5Ba na wora ba bɛa konto to, ba ma ta ba we, “Dé nam ba jege se dé ja‑o kuri dem maŋa ne, se ko wó ja bobɔga ko ba nɔɔna bam tetare ne.”

Kaane wodwoŋi zuli Yezu

Maake 14:3-11; Jɔn 12:1-8

6Yezu déem maa wo Bɛtania ne nɔɔno wodwoŋi o yere na ye Simon to sɔŋɔ ne. Wonto déem ya ye nayɔŋɔ mo. 7Yezu na wora o di wodiu maŋa kalo to mo kaane wodwoŋi tu o tei. O maa jege kaboa na su de terale nuga kalo sabu na daga to. O ma vo o lwo nuga kam Yezu yuu ne se o ma ke‑o zula. 8Yezu kwaga tɔgena bam na nɛ konto to, ba maa ba jege wopwolo ye ba tɛ ba we, “Bɛ mo ye o chɔge nuga kam konto? 9Dé ya wó wane dé yeigi-ka dé na sabu dedɛ se dé ma woli yiniga tiina.”

10Yezu ma lɔre ba na tɛ kolo to. O ma ta de-ba o we, “Bɛ mo ye á jege kaane wom á daana? O na ke-ne zula tei to nam ye keim-laao mo o ke o pa-ne. 11Ko nam ná ye yiniga tiina, banto wó taa wora maŋa maama mo se abam taa pa-ba zeinim. Ko daare amo bá taa wora de abam taa taa. 12Kaane wom na lwogi nuga kam amo yera ne tei to bere we o kwɛ amo yera yam mo se ba laam kwei-ne ba suli. 13A tɛ abam chega ŋwaane to, ba na wó tɔɔle amo kwor-ywoŋa kam logo baŋa jei selo maama ne to, nɔɔna wó ta kaane wom konto taane se ba taa guli o gula.”

14Yezu nɔɔna fuga-balei bam wo dedoa yere na ye Judas Yisakara to laam ma zaŋe o vo Juu tiina kaanem yiga tiina bam tei. 15O ma bwei-ba o we, “Amo ná bere abam chwoŋa ye á ja Yezu, á wó ŋwe-ne bɛ mo?” Ba ma jwoŋi o taane dem ye ba ga lu-nyenno sabu-dala fintɔ ba pa‑o.#Zekaria 11:12 16Ko zege maŋa kam konto ne Judas ma kwaane o lage chwoŋa se o ja Yezu o ke ba jeŋa ne.

Yezu di kuri wodiu de o kwaga tɔgena bam

Maake 14:12-26; Luka 22:7-23; Jɔn 13:21-30; 1 Korinti 11:23-25

17Ko ma ba ko yi dɛ delo ba na bobo se ba di Bworobworo-memene kuri dem.#26:17 Bworobworo-memene = bworobworo kolo na ba jege sabɔle ko wone to #Nwoŋim 12:1–13:16 Yezu kwaga tɔgena bam ma vo ba bwei‑o ba we, “Nmo lage se dé di Atɔgebabaŋa kuri dem jeiga kɔ ne mo se dé vo dé kwɛ woŋo maama dé pa nmo?” 18O ma leiri-ba o we, “Zaŋe-na á zo teo kom wo se á ta de nɔɔno wodwoŋi we, Berem tu wom we, o maŋa kam yia. O nam lage o tɔge de o kwaga tɔgena bam o ba wonto sɔŋɔ mo se ba di Atɔgebabaŋa kuri dem wodiu.” 19O kwaga tɔgena bam ma vo ba ke o na tage kolo to ye ba kwɛ kuri dem wonnu tem ba ti.

20Tega ma ba ka yi. Yezu de o nɔɔna fuga-balei bam laam ma jeini se ba di wodiu kom. 21Ba na wora ba di to, Yezu laam ma ta o we, “A tɛ abam chega ŋwaane to, abam dedoa mo lage o yeigi amo o pa nɔɔna.” 22Ba na nigi konto to, ba wo ma chɔge dedɛ ye ba bobo se ba taa bwei‑o ba saŋe daane we, “Amo Teiru, ko nam dae amo mo n tɛ konto, se wɔ mo nam?” 23O ma leiri-ba o we, “Nɔɔno wolo na tɔge de amo o lu zoŋa dedoa wone to mo wó yeigi amo o pa nɔɔna.#Lei 41:9 24Ko nam jege se Nabiin-bu wom vo o te se ko maŋe de Wɛ tɔnɔ kom na wuuri ko bere o taane tei to mo. Ko nam wó taa ye lɛɛro mo ko pa nɔɔno wolo na wó yeigi Nabiin-bu wom o pa to. Ba ya ná maŋe ba wo loge nɔɔno wom konto, ko ya gara.”

25Judas wolo na lage o yeigi‑o o pa to laam ma ta o we, “Berem tu, se ko nam dae amo mo n tɛa.” Yezu ma leiri‑o o we, “Ko wo n tei ne.”

26Ba na wora ba di maŋa kalo to Yezu ma kwei bworobworo ye o ke Wɛ lei ko ŋwaane. O ma daare o fɔ-ko o pa o kwaga tɔgena bam ye o we, “Jwoŋi-na á di, se konto ye a yera yam mo.”

27O daa ma kwei zoŋa de ka wo sa-soŋo, ye o ke Wɛ lei ko ŋwaane. O ma kwei o pa-ba ye o we, “Abam maama jwoŋi-na á nyɔ. 28Banto mo ye amo jana balo na lage ba pwori se ko jwoŋi nɔɔna dedɛ ba wɛleera wone to. Ko maa bere we Wɛ gwoni ni se o yage nɔɔna wɛleera mo o ma chɛ-ba jana bam konto ŋwaane.#Nwoŋim 24:8; 1 Korinti 10:16 29Ta‑á yei-na we, amo daa bá nyɔ sana banto dwoŋi se ko taa vei maŋa kam abam na wó tɔge de amo á jeini amo Kwo Wɛ paare dem wone se dé daa nyɔ sa-doora dáane to.”

30Ba laam ma leeni ba tei Wɛ, ye ba daare ba nwoŋi ba kɛ Olivi peo kom seeni.

Yezu wuuri o bere Piita na wó ve‑o tei to

Maake 14:27-31; Luka 22:31-34; Jɔn 13:36-38

31Yezu laam ma ta de-ba o we, “Tete dento ne abam maama wó jwoori amo kwaga ne, ne Wɛ tɔnɔ kom na maŋe ko bere tei we:

‘Amo wó mage nayero wom,

pa se o pei-kɔgɔ kom maama jage ko jei.’#Zekaria 13:7

32Ko daare, Wɛ ná jwoori o bi-ne, amo wó lwoori abam a vo Galili.”

33Yezu na tage konto to, Piita ma ta ded‑o o we, “Nɔɔna maama ná maŋe ba jwoori nmo kwaga ne, amo bá fɔge a ke konto.” 34Yezu ma ta ded‑o o we, “A tɛ nmo chega ŋwaane to, tete dento ye chebɛɔ ta ná wo keeri, nmo wó fo kuni betɔ we n yeiri amo.” 35Piita laam ma ta ded‑o o we, “Amo bere a bá fo we a yeiri nmo, ko ná maŋe ko ye ba ná lage ba go amo de nmo maama de.” Yezu kwaga tɔgena bam maama de ma ta konto dwoŋi.

Yezu tiini o lwoori o Kwo Wɛ

Maake 14:32-42; Luka 22:39-46

36Yezu laam ma zaŋe o tɔge de o kwaga tɔgena bam o vo jeiga kadwoŋi gaare na wora ye ba bwoi-de we Gɛsemane to. O ma ta de-ba o we, “Ta‑á jei-na ywo se a vo dáa a ware Wɛ se a ba.” 37O ma pa Piita de Zebedi bia balei bam tɔge‑o ba vo. O wo ma tiini ko chɔge ye o yera sɔɔre. 38O ma ta de nɔɔna batɔ bam o we, “Amo wo mo tiini ko chɔge se ko yi a toone. Á nam zege-na ywo á ta‑á kwogili-ne.”

39O laam ma fofɔ o vo dáa. O ma vwi o yibia tega ne o wora o lwoori Wɛ ye o we, “Amo Kwo, nmo ná sɛ, se n pa chanɛɛre delo na lage de ba amo baŋa ne to kɛ de daare-ne. Nam ke kolo na tɔge nmo boboŋa to, ye ko dae amo boboŋa na lage kolo to.”#Jɔn 12:27 40O na ti to, o ma jwoori o vo o tɔgena batɔ bam tei. O ma na we ba tigi ba dɔa. O ma zaŋe-ba ye o ta de Piita o we, “Bɛ mo ye abam ware se á kwogili-ne se ko maŋe de awa dedoa yerane? 41Fɔge-na á che á tete se á ta‑á lwoori Wɛ, se á yé to cham delo na wó soge á boboŋa to wone.#Matiyu 6:13 Á boboŋa lage se ya sɛ Wɛ ye á yera laam bwona.”

42Yezu daa ma jwoori o vo dáa, ye o lwoori Wɛ o we, “Amo Kwo, chanɛɛre dem ná bá wane de le amo baŋa ne de yage, ye de ná jege se de zo-ne maama, amo ta sɛ se ko ke nmo boboŋa yam na lage tei to.” 43O daa ma jwoori o vo o yi de ba ta dɔa, dɔɔm na tiini de jege-ba to ŋwaane. 44O ma jwoori o vo dáa se o lwoori Wɛ o ke kuni betɔ, ne o ya na maŋe o ta kolo to. 45O daa ma jwoori o kwaga tɔgena bam tei ye o ta de-ba o we, “Á ta tigi á dɔa mo na? Nii-na! Maŋa kam yia se ba ja amo Nabiin-bu wom ba ke nɔn-chechɔgero jea ne. 46Zaŋe-na se dé vo. Nɔɔno wolo na lage o yeigi-ne o pa to maa beena.”

Ba jaane Yezu

Maake 14:43-50; Luka 22:47-53; Jɔn 18:3-12

47Yezu ta na wora o ŋɔɔne konto to mo Judas wolo na ye o nɔɔna fuga-balei bam wo dedoa to laam tu o yi o tei. Nɔn-kɔgɔ dedɛ ma tɔge ded‑o ko ba, ye ba zei se-zɔɔro de da-lwanno. Ko maa ye Juu tiina nakwa bam de ba kaanem yiga tiina bam mo toŋe-ba. 48Judas ya maŋe o pa kɔgɔ kom maanem se ba ma ja Yezu ye o we, “Amo ná vei a kukwori nɔɔno wolo, se á vo á ja konto tu.”

49O laam ma yɔɔre o yi Yezu tei o jɔɔne‑o ye o we, “Berem tu, denlei naa”, ye o daare o kukwori‑o lanyerane. 50Yezu ma ta ded‑o o we, “Amo badwoŋi, nam ke kolo nmo na lage n ke to.”

Nɔɔna bam laam ma ba ba zi Yezu ba ja lanyerane. 51Nɔɔna balo na maŋe ba wo Yezu tei ne to dedoa ma le o seo o ma zage kaanem yuu tu wom tontoŋeno zwɛ o de tega ne. 52Yezu ma ta ded‑o o we, “Jwoori n ke n seo kom ko pwolo ne. Nɔɔno wolo ná swoi jara, kotu wó te jara wone mo. 53Ta‑n yei we, amo ya ná lage nɔɔna se ba woli-ne, a ya wó ta de a Kwo mo, ye o pɔpɔ o toŋe malese kɔgɔ kuni fuga-belei se se ba se woli-ne. 54Amo nam ya ná ke konto, Wɛ tɔnɔ kom na bere we ko jege se ko ke amo tei to daa wó wane ko ke na?”

55Yezu laam ma bwei kɔgɔ kom o we, “Abam na kwei seene de da-lwanno á ba se á ja amo to, amo ye ŋweeno mo na? Dɛ maama wuu amo yeini a jei Wɛ diga kam ne mo a bere nɔɔna. Abam nam maa wo jaane-ne. 56Tento maama nam ke se ko pa faŋa faŋa Wɛ sampwori sem na popone kolo Wɛ tɔnɔ kom ne to mo ba ko seene ko ke.”

Yezu kwaga tɔgena bam na nigi konto to, ba ma duri ba viiri ba daare‑o.

Ba di Yezu taane

Maake 14:53-65; Luka 22:54-55, 63-71; Jɔn 18:13-14, 19-24

57Nɔɔna balo na tu ba ja Yezu to ma ja‑o ba vo ba kaanem yuu tu Kayafa sɔŋɔ mɛ Wɛ nia zamesem tiina de ba nakwa bam na maŋe ba gilimi to. 58Piita ma dale o tɔge ba kwaga o da o vo o yi kaanem yuu tu wom sɔŋɔ. O ma kɛ o zo konkɔlɔ kom o jeini de sɔŋɔ kom tontoŋena bam se o nii kolo na lage ko ke to. 59Juu tiina kaanem yiga tiina bam de ba nakwa kɔgɔ kom maama maa kwaane se ba na chwoŋa ba tɔge vwa ŋwaane ba ma saŋe Yezu, se ba laam pa o te. 60Nɔɔna dedɛ ma zaŋe ba fɔ vwa ba pa‑o, ye ba daa ta wo wane se ba na chwoŋa. Ko kwaga seeni mo nɔɔna balei ma zaŋe ba ba, ye ba ta ba we, 61“Nɔɔno wonto tage o we, omo wó wane o yigi debam Wɛ diga kam maama o de tega ne, ye o jwoori o ma da yatɔ o fɔge o lɔ-ka.”#Jɔn 2:19-21 62Kaanem yuu tu wom na nigi konto to, o laam ma zaŋe o bwei Yezu o we, “Nɔɔna banto balei na tage kolo ba pa nmo to, nmo ba jege taane se n leiri na?” 63Yezu ma maŋe da chemm.#Izaya 53:7 Kaanem yuu tu wom laam ma ta ded‑o o we, “A ke nmo de Ŋwea Tu Baŋa Wɛ daane se n ta chega n bere debam, nmo ye Wɛ Bu Krista wolo dé na teena se o ba to mo na?” 64Yezu ma leiri‑o o we, “Mo kolo nmo na tage to. Nam ta‑á yei-na we, ko zege leile konto abam wó ba á na Nabiin-bu wom, o na jei Dam-fɔrɔ Tu Baŋa Wɛ jazem seeni, ye á ta daare á na‑o, o na nwoŋi Wɛ telaao ne o maa beene kunkwonnu baŋa ne.”#Danyeli 7:13 65Kaanem yuu tu wom na nigi konto to, o ma zaŋe o kaare o tete gwaaro se ko bere we o wo chɔge de Yezu ni taane dem. O ma ta o we, “Nii, wonto ŋɔɔne o twe Wɛ yere dem de o na pɛ se o ma de Wɛ to. Dé daa ba lage se nɔɔna zaŋe ba ŋɔɔne o taane, se abam maama maŋe á ni o na ŋɔɔne Wɛ o chɔge to. 66Konto to, abam we bɛ mo?” Ba ma leiri‑o ba we, “O maŋe se o te mo.”#Chullu 24:16

67Ba laam ma twe lileeru ba yage o yia ne, ye ba mage‑o lanyerane.#Izaya 50:6 Badaara ma lɔ o popɔŋɔ, 68ye ba we, “Wɛ Dam Tu wom, nam lɔre n bere debam wolo na mage‑m to.”

Piita seene o ve Yezu

Maake 14:66-72; Luka 22:56-62; Jɔn 18:15-18, 25-27

69Konto maŋa kam ne, Piita maa jei konkɔlɔ kom wone. Kaanem yuu tu wom sɔŋɔ ka-nyaane ma vo o tei, ye o ta ded‑o o we, “Nmo de tɔge de Yezu, Galili tu wom mo.” 70O ma fo ba maama yiga ne o we, “Amo yeiri n taane dem kuri.”

71O ma zaŋe o nwoŋi manchwoŋo ni. Busankana kadwoŋi de ma na‑o, ye o ta de nɔɔna balo na wora to o we, “Nɔɔno wonto tɔge de Nazarete tu Yezu mo.” 72Piita ma du duuri ye o ta fo o we, “Amo bere a yeiri nɔɔno wom konto.”

73Ko na ke fee to, nɔɔna badwonna ma vo ba ta de Piita ba we, “Nmo seene n ye ba kɔgɔ kom wo dedoa mo. Nmo ŋɔŋa kam na ye tei to mo bere we n seene n nwoŋi dáane.” 74O laam ma sɔɔle o pa o tete se ko bere o chega ye o we, “Amo bere a yeiri nɔɔno wom konto.” O na tage konto to, chebɛɔ ma pɔpɔ ko keeri. 75Piita laam ma guli Yezu ya na tage kolo ded‑o o we, “Nmo wó fo kuni betɔ we n yeiri amo, ye chebɛɔ laam keeri.” O na guli konto to, o laam ma nwoŋi ye o tiini o keeri lanyerane.

Currently Selected:

Matiyu 26: xsmKBG

Highlight

Copy