Matiyu 21

Yezu zo Jerusalem teo wo

Maake 11:1-11, 15-19; Luka 19:28-40, 45-48; Jɔn 12:12-19

1Yezu de o kwaga tɔgena bam déem ma vo ba twɛ Jerusalem. Ba ma yi teo kodwoŋi, ko yere mo Bɛtefage. Ko wo Olivi peo kom saŋa ne mo. 2Yezu laam ma le o kwaga tɔgena balei ye o we, “Véi-na á vo á zo teo kolo na wo abam yiga ne to. Á ná yi da, á wó na bonaga na leigi da, ye bona-pɔla de tɔge ka wora. Á ná nɛa, se á bwoli-se á ja ba á pa-ne. 3Nɔɔno ná bwei abam taane, se á ta ded‑o we, ko ye dé Teiru wom mo lage-se. Konto tu laam wó sɛ o yage-se o pa abam.”

4Konto nam tu ko ke se ko pa Wɛ sampwora kadwoŋi na bere tei faŋa faŋa to ji chega, de o na we:

5“Véi-na á ta de Zion#21:5 Zion ye Jerusalem yere dedwoŋi. tiina bam we,

‘Nii-na á pɛ wom na vei o beene á tei.

Wonto nam gwooni o tete mo ye o di bonaga o beene.

Chega to, ko ye bona-pɔla mo o dɔge ka baŋa ne o via.’ ”#Zekaria 9:9

6Yezu kwaga tɔgena balei bam ma seene ba tɔge yiga ba vo ba ke kolo o na tage se ba ke to. 7Ba ma ja bona-kweo kom de bona-pɔla kam ba ba, ye ba lɔɔre ba gwaaro ba daŋe se baŋa ne. Yezu laam ma di bona-pɔla kam, ye ba vei ba maa kɛa. 8Ba na maa kɛ to, kɔ-fɔrɔ ma tɔge-ba, ye ba dedɛ le ba gwaaro ba lware chwoŋa kam ne se Yezu tɔge te baŋa ne o kɛ. Badaara de ma gwoni vɔɔro ba de chwoŋa kam ne se o tɔge te baŋa ne o kɛ. 9Nɔn-kɔgɔ kolo na wo o yiga ne de o kwaga ne ba vei to maa laare ba tɛ ba we:

“Hozaana! Pɛ David dwi tu wom maŋe de tia!

Baŋa Wɛ wó swɛ wolo na tu o yere ŋwaane to swolim.#Lei 118:26

Hozaana! Baŋa Wɛ maŋe de tia wɛyuu ne!”

10Ba déem ma vo ba yi Jerusalem teo kom ni. Teo kom tiina bam maama ma zaŋe ba ye zulimaa jei sem maama. Ba maa bwei ba we, “Nɔɔno wɔ mo tento?” 11Nɔn-kɔgɔ kolo na tɔge Yezu to maa tɛ ba we, “Wonto ye Wɛ ni-jwoŋinu Yezu mo, o na nwoŋi Galili teo Nazarete to.”

12Yezu déem ma vo o zo Wɛ diga kam. O ma na nɔɔna na wo ka konkɔlɔ kom ne ba ke pipiu. O ma zeili-ba pa se ba nwoŋi, ye o daare ja sabu-leinna tabollo tem o pipiri o pu tega ne pa ba sabia bam jage. O ma daare o yigi yitunnu telo nɔɔna badwonna na jei da ba yeigi kunkwon-puura to o de tega ne. 13O na wora o zeili-ba konto to, o ma ta de-ba o we, “Ko popone Wɛ tɔnɔ kom ne we, ‘Ba wó taa bwoi amo sɔŋɔ kom we, wara-jei mo.’#Izaya 56:7 Abam nam pɛ se ko ji ŋweena tigisim jei.”#Jeremia 7:11

14Lilwoa de gwaaro déem ma ba Yezu tei Wɛ diga konkɔlɔ kom ne, ye o yɔɔre-ba. 15Juu tiina kaanem yiga tiina bam de ba zamesem tiina bam ma na wo-kenkagela yalo o na ke to, ye ba daare ba na bia na zege Wɛ diga konkɔlɔ kom ne ye ba laare ba we, “Hozaana! Pɛ David dwi tu wom maŋe de tia!” Ba na nɛ konto to, ba bane ma zaŋe dedɛ. 16Ba ma ta de Yezu ba we, “Nii bia banto na wora ba tɛ nmo taane tei! N bá‑n che-ba se ba yé taa tɛ konto na?” Yezu ma leiri-ba o we, “A nigi ba na tɛ kolo to. Ko nam popone Wɛ tɔnɔ kom ne we, ‘Wɛ mo pɛ se bia de bu-sese taa tei o yere.’#Lei 8:2 Abam maŋe á wo gage konto na?”

17O laam ma viiri ba tei ne. O ma nwoŋi teo kom ne o vo Bɛtania o peini da.

Yezu ŋɔɔne o chɔge kaporo

Maake 11:12-14, 20-24

18Tega na poore tetete to, o ma zaŋe se o jwoori Jerusalem. O na wo chwoŋa ne to, o kana maa wɔe. 19O ma na kaporo na zege chwoŋa kam ni ne. O ma vo o nii. Vɔɔro yerane déem mo wora, ye o wo nɛ mɔɔro se o di. O ma ta de kaporo kom o we, “Wɛ daa bá pa se n lei bia maŋa de maŋa.” O na tage konto to, kaporo kom ma kwaare bedwe baŋa ne.

20Yezu kwaga tɔgena bam na nɛ konto to, ko ma so-ba. Ba ma bwei ba we, “Ko ke tɛ mo ye kaporo kom kwaare lela konto?” 21Yezu ma leiri-ba o we, “A tɛ abam chega ŋwaane to, á ná yɔɔre á ke á wo-dedoa de Wɛ ye á ba jege bobwea, abam de wó wane á ke kaporo kom keim dento dwoŋi. Ko nam dae konto dwoŋi yerane, se á wó wane á ta de peo-kamunu konto we, ko gɔ ko vo ko to naneo kom wone, ye Wɛ nam wó pa ko ke. 22Ko woli da, abam ná lwoori woŋo kolo maama Wɛ tei ne, ye á jege boŋem-dɛɔ we á wó na, Wɛ wó pa á seene á jwoŋi-ko.”

Yezu dam dem nwoŋi yei ne mo?

Maake 11:27-33; Luka 20:1-8

23Yezu déem ma jwoori o vo o zo Wɛ diga kam. O maa wora o bere nɔɔna bam. Juu tiina nakwa bam de ba kaanem yiga tiina bam ma vo o tei ba bwei‑o ba we, “Wɔ mo pɛ nmo chwoŋa se n ke wonnu telo maama n na ke to?” 24O ma leiri-ba o we, “Yage-na se a bwei abam taane dedwe se, á ná leiri-de á pa-ne, se a laam bere abam amo na ke tei a jege chwoŋa to. 25A lage a bwei abam a nii, Jɔn na pɛ nɔɔna sɛɛm to, ko ye Wɛ mo pɛ‑o chwoŋa naa nabiina mo?” O na bwei-ba konto to, ba maa wora ba bane daane se ba nii ba na wó ta kolo to, ye ba we, “Debam ná leiri dé we, ko ye Wɛ mo, o laam wó bwei debam we, bɛ mo ye dé nam wo sɛ Jɔn taane dem? 26Ko daare, dé ná we ko ye nabiina mo pɛ‑o chwoŋa, nɔn-kɔgɔ kom wó pa se foone mo ja debam, de ba maama na pɛ se Jɔn ye Wɛ sampwora to ŋwaane.” 27Ba na bane daane ba ga konto to, ba ma leiri Yezu ba we, “Dé yeiri kotu.” Yezu laam ma ta de-ba o we, “Ko na ye konto to, amo de nam bá ta wolo na pɛ-ne chwoŋa se a taa toŋe to.”

Nɔɔno de o bia balei memaŋe

28Yezu laam ma ta o we, “A lage a ta taane a bere abam se á boŋe á nii. Nɔɔno mo wora de o bia balei. O ma vo o ta de bu-kwea kam o we, o véi o toŋe o kara ne zem dɛ dem ne. 29Bu wom ma leiri‑o o we, o bá vo. Ko na ke fee to, o ma jwoori o leiri o boboŋa ye o vo o toŋe.

30Nɔɔno wom daa ma vo nyaane wom tei o ta‑o se o de vo o kara o toŋe. Wonto ma leiri o we, ‘A kwo, a wó vo.’ O ma ta konto ye o laam wo vei.

31Tɔ. Bia bam konto balei wone wɔ mo seene o ke ba kwo na lage kolo to?” Ba ma leiri‑o ba we, ko ye bu nakwe wom mo. Ba na leiri konto to, Yezu laam ma ta de-ba o we, “Chega ŋwaane to, nɔn-chechɔgero mo wora te woli Wɛ paare dem wone te daare abam, ba ná maŋe ba ye lampwoo lara de ka-bworru de. 32Kokuri Jɔn na tu abam tei to, o déem bere abam chwoŋa kalo á na wó da se á na chega Wɛ tei ne, ye á wo sɛ o taane dem. Nɔn-chechɔgero tem nam sɛ‑o ye te leiri te wo de te keim-balwaaro tem. Abam ma na banto na ke tei to, ye á daa ta wo sɛ se á leiri á boboŋa se á sɛ o taane dem.”

Nɔɔno de o gaare memaŋe

Maake 12:1-12; Luka 20:9-19

33Yezu daa ma ta de-ba o we, “Cheigi-na se a daa maŋe memaŋe dedwoŋi a bere abam. Sɔŋɔ tu wodwoŋi mo wora. O ma zaŋe o che gaare, ye o daare o jeiri Vini teeni de wone. O ma ko gwoŋo te-dɛa jei ne se o ná gwori teeni bia bam, se o ke dáane o nɔ o ŋoke te nyoa bam. O ma daare o chwi da-pala se nɔɔno taa jei da o yere gaare dem. O na fɔge o che-de konto to, o laam ma kwei nɔɔna o yage da se ba taa toŋa, ye o beeri o vo teo kodwoŋi.

34Tio-bia gworim maŋa na yi to, o ma toŋe o tontoŋena se ba vo nɔɔna balo na nii o gaare dem baŋa ne to tei se ba pɔɔre tio-bia bam wone ba pa‑o. 35O tontoŋena bam na yi da to, nɔɔna bam ma ja-ba. Ba ma mage dedoa lanyerane. Ba ma go wodwoŋi, ye ba daare ba dole dedoa de kandwa.

36Sɔŋɔ tu wom ta ma jwoori o toŋe o tontoŋena badwonna nɔɔna bam tei ne, ye banto kɔgɔ dwoi boboa nɔɔna bam. Nɔɔna bam ta ma ke banto de konto dwoŋi. 37Ko kweelim ne to, o laam ma toŋe o tete bu nɔɔna bam tei ne, ye o boŋe we, ba wó nege wonto. 38O bu wom na maa vei ye nɔɔna bam na‑o to, ba maa bane daane ba we, ‘Mo gaare dem tu bu-kwea kam, ye wonto mo lage o ba o taa tei o kwo wom wonnu. Nam pa-na se dé go‑o, se dé daare wonnu tem dé taa tei.’ 39Ba laam ma ja‑o ba vaŋe ba ja nwoŋi gaare dem ne, ye ba mage‑o ba go.

40Tɔ. Gaare dem tu wom laam ná tua, o nam wó ke nɔɔna bam konto bɛ mo?”

41Yezu na bwei-ba konto to, ba laam ma leiri ba we, “O jege se o go nɔn-wo-korro tem konto mo, se o daare gaare dem o pa nɔɔna badwonna se ba taa nii-de, se tio-bia bam gworim maŋa ná yia, se ba taa pɔɔre o nyem ba pa‑o.”

42Yezu ma ta de-ba o we, “Ko popone Wɛ tɔnɔ kom ne we:

‘Kandwɛ delo lɔra na ve to

laam mo jwoori de ba de ji

kandwɛ delo na pae diga kam dana to.

Konto ye Baŋa Wɛ keim mo.

Ko maa ye wo-kenkagele ko pa debam.’#Lei 118:22-23

Abam maŋe á wo gage konto na? 43Ko bere we Wɛ laam wó le abam o paare dem wone, á na ve o Bu wom to ŋwaane, ye o daare o pa se balo na sɛ o ni to na chwoŋa ba zo o woro kom wo. [44Ko ná ye kandwɛ delo Wɛ na kuri to, nɔɔno wolo maama ná mage o tete dedaane de, konto tu wó tiini o chochoge o tete mo. Ko daare wolo maama kandwɛ dem ná to o baŋa ne, de wó meere konto tu mo.#Izaya 8:15]”

45Yezu déem na maŋe memaŋa yam konto maama to, kaanem yiga tiina bam de Farisi tiina bam ma lɔre we ko ye banto taane mo o tɛa. 46Ba ma kwaane ba lage chwoŋa se ba ja‑o, ye ba laam kɔre foone de nɔn-kɔgɔ kom, banto na pɛ se o ye Wɛ sampwora to ŋwaane.

Currently Selected:

Matiyu 21: xsmKBG

Highlight

Copy