Matiyu 20

Tontoŋena de ba ŋweero memaŋe

1Yezu daa ma ta o we, “Wɛ telaao paare dem nam nye de nɔɔno wodwoŋi na jege o kara. O ma zaŋe o nwoŋi zezeŋa ne o vo se o lage nɔɔna balo na vare ba jwoŋi sabu to, se ba ba ba toŋe o kara kam ne. 2O ma sɛ se o ŋwe sabu kolo ba na maŋe se ba jwoŋi dɛ wone to. Ko maa ye lu-nyenno sabu-dale dedoa mo. Ba na sɛ konto to, o ma toŋe-ba se ba vo o kara kam ba taa toŋa.

3Wea na bege fee nenɛɛne luu nogo maŋa ne to, o daa ma vo yaga. O ma na nɔɔna badwonna na wora ye ba ba jege totoŋa. 4O ma ta de-ba o we, ‘Abam de ba á tɔge á toŋe amo kara ne, se amo wó ŋwe abam kolo na wó maŋe to.’ 5Ba ma sɛ ba vo. Wea tetare ne o daa ma jwoori o vo o lage nɔɔna badwonna o woli da. Wɛ-guni maŋa ne o ta ma vo o lage nɔɔna badwonna de. 6Dedaan-ni ne o daa ma vo yaga o na nɔɔna badwonna ta na zege da. O ma bwei-ba o we, ‘Bɛ mo ye abam zege ywo-seeni dɛ dem wone maama ye á ba ke kolokolo?’ 7Ba ma leiri‑o ba we, ‘Nɔɔn-nɔɔno wo kwei debam se dé toŋe dé pa‑o.’ O ma ta de banto de se ba vo ba tɔge ba toŋe o kara kam ne.

8Tega na lage ka yi to, o laam ma ta de o totoŋa yiga tu wom se o ta tontoŋena bam se ba zaŋe ba ba ba jwoŋi ba ŋweero. O ma ta‑o se o bobo o ŋwe tontoŋena balo na tu ba kweeli to. 9Nɔɔna balo na tu ba bobo totoŋe dem dedaan-ni ne to ma ba se ba jwoŋi ba ŋweero, ye ba dedoa dedoa ma jwoŋi sabu-dale dedoa dedoa. 10Ko daare balo na bobo ba ba se ba toŋe to de laam ma ba se ba jwoŋi ba ŋweero. Ba maa boŋe we banto lage ba jwoŋi ŋweero dedɛ mo. Ba de ma jwoŋi sabu-dale dedoa dedoa. 11Ba ma jwoŋi ba sabu ye ba daare ba poona de kara kam tu wom 12ba we, ‘Balo na tu kwaga to toŋe fenfee yerane, nenɛɛne awa dedoa mo. Debam ma ba dé toŋe pa ko chɛ dé yera ne wea yiga ne dɛ dem maama wone ye nmo nam pa se banto ŋweo yi debam na jwoŋi tei to.’

13Kara kam tu wom ma leiri ba dedoa o we, ‘Amo badwoŋi, nii ywo. Amo wo pini nmo, kokuri nmo sɛ se n toŋe n jwoŋi sabu-dale dedoa mo dɛ wone. 14Nam ja n sabu kom n viiri, se taane daa tera. Amo lage se a ŋwe nɔɔno wolo na tu kwaga o toŋe to se ko maŋe de nmo na jwoŋi tei to mo. 15Amo nam jege chwoŋa se a kwei a sabu kom a ma ke kolo a na lage to. Nmo wo chɔge de amo na jege wo-ywoŋo to mo na?’

16Tɔ. Ko maa bere we balo na wo kwaga ne to wó ba ba ji yiga tiina, ye balo na wo yiga ne to jwoori ba ji kwaga tiina.”

Yezu daa ŋɔɔne o toone taane

Maake 10:32-34; Luka 18:31-34

17Yezu déem ma tole o maa kɛ Jerusalem. O na wo chwoŋa ne to, o ma pɔɔre o kwaga tɔgena fuga-balei bam kɔgɔ kom wone, o pa ba tɔge ded‑o ba via. 18O ma ta de-ba o we, “Ta‑á yei-na, dé na maa vei Jerusalem to, dáane mo ba laam wó ja amo Nabiin-bu wom ba ke Juu tiina kaanem yiga tiina bam de ba zamesem tiina bam jeŋa ne. Nɔɔna bam konto maa wó di a taane se ko bere we a maŋe se a te mo. 19Ba laam maa wó daare ba ke-ne dwi-gɛ tiina bam jeŋa ne. Banto de maa wó ke amo ba mɔne ye ba daare ba fere-ne. Ba laam maa wó ja-ne ba pa dagara yuu ne ba go. Da yatɔ dɛ ne a maa wó jwoori a bi toone wone.”#Matiyu 16:21

Yezu chwoŋa kam tɔge yaara ŋwaane

Maake 10:35-45

20Zebedi bia bam nu déem ma vo Yezu tei de o bia balei bam. O ma kuni dwoona o yiga ne se o lwoori‑o woŋo.#Matiyu 4:21 21Yezu ma bwei‑o o we, “Nmo lage bɛ mo se a pa‑m?” O ma leiri‑o o we, “Popo ta n ni n pa amo we, nmo ná tu n di n paare dem, se n pa amo bia balei banto jeini nmo tei ne, n jazem de n jagwia ne.” 22Yezu ma ta de-ba o we, “Abam nam yeiri á na lwoori kolo to. Abam wó wane á tɔge á yaare ne amo na lage a yaare tei to na?” Ba ma leiri‑o ba we, “Ɛɛ, dé wó wane.”

23Yezu laam ma ta de-ba o we, “Abam nam wó seene á tɔge á yaare amo yaara yam dwoŋi. Ko daare ko ná ye jeiŋa jei amo paare dem ne, amo ba jege chwoŋa se a kuri nɔɔna se ba jeini da. Amo Kwo Wɛ mo maŋe o tiŋi jei sem konto se o pa balo na wó jeini da to.”

24O tɔgena fuga bam na lɔre ba dwonna balei bam na lwoori kolo Yezu tei ne to, ba bane ma tiini de zaŋe de-ba. 25Yezu laam ma bwoŋi ba maama, ye o ta de-ba o we, “Abam maŋe á yei logo baŋa pwa na yeini ba jege ba nɔɔna ba bɛɛse tei to, ye ba dedɛɛra mo di dam ba baŋa ne. 26Ko nam ná ye abam, ko ba jege se ko taa ye konto á tei ne. Kokuri abam wolo ná boŋe se o ji nɔn-kamunu á wone, konto tu mo jege se o ji tontoŋeno o pa abam. 27Wolo ná boŋe se o ji abam yiga tu, konto tu mo jege se o ji á kabaa. 28Ko ye konto dwoŋi mo de amo Nabiin-bu wom na wo tu se nɔɔna toŋe ba pa-ne to. Amo nam tu se a toŋe a pa nabiina, se a daare a kwei a ŋwea a ma leini nɔɔna dedɛ ŋwea.”#Jɔn 10:15; 11:51-52

Yezu yɔɔre lilwoa balei

Maake 10:46-52; Luka 18:35-43

29Yezu de o kwaga tɔgena bam déem ma nwoŋi Jeriko ne ba maa kɛa. Ba na maa kɛ to, nɔn-kɔgɔ dedɛ mo tɔge-ba. 30Lilwoa balei ya wora ba na jei chwoŋa kam ni ne. Ba ma lɔre we Yezu tɔge dáane o maa kɛa. Ba laam ma laare baŋa baŋa de kwor-dɛa ba we, “Debam tu! Pɛ David dwi tu! Duri debam yiniga!” 31Nɔn-kɔgɔ kom ma bwɛ-ba se ba pu ba ni. Ba laam ma fɔge ba ke sɔɔ dedɛ ye ba laare ba we, “Debam Tu! Pɛ David dwi tu! Duri debam yiniga!” 32Yezu na nigi to, o ma zege ye o bwoŋi-ba o bwei o we, “Abam lage se a ke bɛ mo a pa abam?” 33Ba ma leiri ba we, “Debam lage se n pa dé yia mo jwoori ya taa nae.” 34Yezu ma duri ba ŋwaŋa. O ma dwei ba yia yam, ye ya yɔɔre ya nae bedwe baŋa ne. Ba laam ma zaŋe ba tɔge o kwaga.

Currently Selected:

Matiyu 20: xsmKBG

Highlight

Copy