Matiyu 15

Wo-digiru telo na chɔge nɔɔna to

Maake 7:1-23

1 Farisi tiina badaara de Wɛ nia zamesem tiina badaara déem ma nwoŋi Jerusalem ne ba vo Yezu tei. Ba ma vo ba bwei‑o ba we, 2“Bɛ mo ye n tɔgena bam yeini ba ve chullu telo dé nabaara bam na pɛ debam to? Ba ná lage ba di wodiu, ba yeini ba ba sane ba jea se ko tɔge dé chullu tem chwoŋa.” 3Yezu ma leiri-ba o we, “Abam yeini á tɔge á tete boboŋa chullu mo, ye á daare á ve Wɛ ni dem na bere tei to. Bɛ mo ye á ke konto dwoŋi? 4Wɛ ni dedwoŋi bere we, nɔɔno jege se o taa zuli o kwo de o nu.#Nwoŋim 20:12 Wɛ daa ta bere we, nɔɔno ná sɔɔle lwarem o yage o nu naa o kwo yuu ne, konto tu jege se o te mo.#Nwoŋim 21:17 5Ko daare abam nam yeini á ja Wɛ taane dem á pipiri ye á we, ‘Nɔɔno ná jege woŋo kolo o ya na wó ma o woli o kwo de o nu to, ye o ná we, ko maŋe ko ye Wɛ nyem mo, 6wonto daa ba jege se o kwei o ma zeini o kwo.’ Á na ke tei to bere we á ve Wɛ ni dem mo, ye á daare á tɔge á tete chwei. 7Abam maa ye pipiri-nyena mo. Izaya déem jege chega de o na wuuri o ta abam taane faŋa faŋa tei to. 8O déem tage Wɛ kwora o we:

‘Nɔɔna banto zuli amo de ba ni mo,

ye ba boboŋa tera amo tei ne.

9Ba na pae amo zula tei to maama ye kafɛ mo.

Ba bera yam tɔge nabiina boboŋa chullu mo,

ye ba pae se te ye amo nyem.’ ”#Izaya 29:13

10Yezu laam ma bwoŋi nɔn-kɔgɔ kom se ba ba o tei, ye o de dendea de-ba o we: “Cheigi-na lanyerane se á ni amo taane dem kuri. 11Nɔɔno ná kwei woŋo kolo maama o pa se ko tɔge o ni ko zo o wo, konto bá pa o digiri o tete. Ko daare kolo o na yeini o pa se ko tɔge o ni ko nwoŋi to mo wó pa o digiri.”

12Yezu kwaga tɔgena bam laam ma vo o tei, ye ba ta ded‑o ba we, “Nmo wo lɔre we Farisi tiina bam boboŋa chɔge de nmo taane dem na?” 13Yezu ma leiri-ba we, “Á nam yé ta‑á nii banto. Amo Kwo Wɛ na wo jeiri tio kolo maama to jege se ko gɔ ko yage mo. 14Yage-na ba boboŋa. Banto nye de lilwei vaŋena balo de yia na ba nae to mo. Lilwei nam ná lage o vaŋe o dwoŋi lilwei, ba maama wó to gwoŋo wone mo.”

15Piita laam ma ta de Yezu se o bere-ba dendea kam kuri na ye tei to. 16O ma ta de-ba o we, “Abam de swa ta muri mo na? 17Á jege se á ta‑á yei we, woŋo kolo maama na yeini ko zo nɔɔno ni to mo yeini ko tu o kana, ye o laam daare o tɔ-ko o yage. 18Ko daare kolo na nwoŋi nɔɔno ni ne to yeini ko zege o boboŋa ne mo ko nwoŋi. Ko ye wonnu tem konto dwoŋi mo yeini te pa o jege digiru. 19Nɔɔno boboŋa mo pae se o lage wo-balwaaro tɔgem. Ya maa wae ya pae o go nɔɔna, ye ya ta pae o tɔge bwoorim kikia, de ka-laga wo-zɔɔna maama. Ya maa wae ya pae o ŋɔna, naa o fɔ vwa, ye o taa twe o dwonna. 20Ko nam ye wonnu tento dwoŋi mo digiri nɔɔno. Ko daare, nɔɔno ná di wodiu ye o wo sane o jea, konto ware ko pa o digiri o tete.”#Maake 7:2-5

Kaane wodwoŋi ke o wo-dedoa de Yezu

Maake 7:24-30

21Yezu déem ma zaŋe o nwoŋi jei sem konto ne, ye o vo Tura de Sidon nawuura yam seeni. 22Kaane wodwoŋi maa wora o na zoore jei sem konto ne. O maa ye Kanaan tiina bukɔ. O ma vo Yezu tei ye o laare de kwor-dɛa o we, “Amo tu, Pɛ David dwi tu, popo duri amo yiniga. Setaane mo jege amo bukɔ, ye de tiini de daane‑o.” 23Yezu ma maŋe da chemm. O kwaga tɔgena bam ma vo o tei ba lwoori‑o se o pa kaane wom viiri, o na tɔge-ba ye o ke sɔɔ to ŋwaane. 24Yezu ma leiri-ba o we, “Wɛ toŋe-ne se a ba a zeini o tete nɔɔna Isarele dwi tiina bam, ba na nye de pei selo na beeri kafɛ to ŋwaane mo.”

25Kaane wom laam ma vo o kuni dwoona o yiga ne, ye o lwoori‑o we, “Amo tu, zeini-ne!” 26Yezu ma leiri‑o we, “Ko wo maŋe se nɔɔno jwoŋi o bia wodiu o dole o pa kukuri.” 27Kaane wom maa we, “Amo tu, n tage chega. Kukuri sento nam jege chwoŋa se se twɛ wodiu kolo se tu wom na di ye ko siiri tega ne to se di.” 28Yezu laam ma leiri‑o we, “Kaane, nmo tiini n ke n wo-dedoa de amo chekke. Konto to, nmo na lage kolo to, Wɛ wó pa ko ke.”#Matiyu 8:13 Maŋa kam konto ne nɔɔ mo o bukɔ wom nɛ yazura.

Yezu pɛ nɔɔna 4,000 wodiu se ba di

Maake 7:31–8:10

29Yezu laam ma kɛ o vo o tɔge Galili naneo kom ni, ye o daare o vo o di peero baŋa o jeini da. 30O na jeini da konto to, nɔn-fɔrɔ maa tui o tei, ye ba jaane jaweena dedɛ ba woli da ba tui. Badaara déem ye gwane, badaara de maa ye lilwoa, de gwaaro, de memaaro, ko woli de balo jaweero dwi dwi na jege-ba to. Ba maa jaane-ba ba vei ba tiŋi Yezu yiga ne, pa se o yɔɔre-ba. 31O na ke tei to ma pa se nɔn-kɔgɔ kom ye yaau. Ba ma nɛa we memaaro yɔɔre te ŋɔɔna, ye gwane de fɔge se kwɛ. Gwaaro de maa wae te via, ye lilwoa yia de jwoori ya nae. Ba na nɛ wo-kenkagela yam to, ko ma pa ba zuli Baŋa Wɛ wom na ye Isarele tiina Wɛ to.

32Yezu laam ma bwoŋi o kwaga tɔgena bam, ye o ta de-ba o we, “Amo jege nɔɔna banto ŋwaŋa de ba na tu ba wo amo tei ne da yatɔ, ye ba laam daa ba jege wodiu se ba di to. Amo ba lage se a pa ba viiri ye ba wo di kolokolo. Ba ná lage ba viiri konto, kana wó pa ba beiri chwoŋa ne mo.” 33O kwaga tɔgena bam ma bwei‑o ba we, “Debam wó ke tɛ mo dé na wodiu kagoa kanto yuu ne dé pa nɔn-kɔgɔ konto se ba di?” 34O ma bwei-ba o we, “Abam jege bworobworo ko mae tɛ mo?” Ba ma leiri‑o ba we, “Terepɛ mo wora, de ywon-bia fenfee.”

35Yezu laam ma ta de nɔn-kɔgɔ kom se ba maama jeini tega ne. 36O ma daare o kwei bworobwooru terepɛ tem de ywona yam ye o ke Wɛ lei te ŋwaane. O ma ja-te o fɔ fɔ o pa o kwaga tɔgena bam ye banto de laam kwei ba pa nɔɔna bam. 37Nɔɔna bam maama déem ma di ba su ba daare. Ba laam ma twɛ chichwooru telo na daare to ba su kayɛ serepɛ. 38Nɔɔna balo déem na di konto to ye nenɛɛne baara morro tena (4,000) mo, ko woli de kaana de bia de.

39Yezu laam ma pa se kɔgɔ kom viiri. O ma daare o vo o zo nabworo o bɛ o vo o yi nawuuri dedwoŋi yere na ye Magadan to.

Currently Selected:

Matiyu 15: xsmKBG

Highlight

Copy