Matiyu 14

Pɛ Herodi na go Jɔn tei to

Maake 6:14-29; Luka 9:7-9

1Pɛ wolo na tei Galili teene dem to déem ma ba o ni Yezu ŋwa. Pɛ wom yere mo Herodi. 2O ma ta de o tontoŋena o we, “Wonto wó taa ye Jɔn wolo na ye sɛɛm tu to mo. Wonto mo jwoori o bi o tete. Mo kokuri o jege dam pa o wae wo-kenkagela dedɛ o ke.”

3-4Herodi déem tage konto dwoŋi kolo ŋwaane o ya wo ke Jɔn lanyerane, ye o ta pa ba go‑o. O déem di kaane wodwoŋi, o yere mo Herodisa. Kaane wom déem ye o zembaaro Filipi kaane mo. Jɔn ma ta o bere‑o we, ko chula se o di o zembaaro kaane. Jɔn na bwɛ‑o konto to, o ma pa ba ja‑o ba vɔ peena diga ne ba yage da.#Chullu 18:16; Luka 3:19-20 5O ya maa boŋe se o go‑o ye o laam kɔre teo kom nɔɔna bam, ba na pɛ se Jɔn ye Wɛ sampwora to ŋwaane.

6Herodi lora maŋa laam ma ba ka yi. O ma bwoŋi nɔɔna dedɛ se ba ba ba tɔge ba di ywoni. Herodisa bukɔ ma zaŋe o vo veira bam yiga o sa o bere-ba. O sɛ dem na lana konto to, ko ma pa Herodi wo pwoli dedɛ. 7O wo na pwoli to, o ma du o we, woŋo kolo maama o na lage to o wó pa‑o. 8Bukɔ wom nu ma ta o bere‑o, ye o laam vo Herodi tei o we, “Woŋo kolo amo na lage to mo ye Jɔn yuu. Nmo ná gwoni-ko, se n daŋe zon-tanlaŋa baŋa ne n pa-ne.” 9Pɛ Herodi na nigi konto to, o wo ma chɔge lanyerane. O nam na dugi ye o veira bam ni to, o ma pa ni se ba ke konto ba pa‑o. 10O ma toŋe nɔɔna se ba vo peena diga kam ba gwoni Jɔn yuu kom. 11Ba ma kwei-ko ba daŋe zon-tanlaŋa baŋa ne ba ja nwoŋi ba pa bukɔ wom. O laam ma ja-ko o vo o pa o nu Herodisa.

12Jɔn kwaga tɔgena bam ma zaŋe ba vo ba kwei o yera yam ba ja vo ba ke yibeeli wone. Ba laam ma vo ba ta de Yezu kolo na ke to.

Yezu pɛ nɔɔna 5,000 wodiu se ba di

Maake 6:30-44; Luka 9:10-17; Jɔn 6:1-14

13Yezu déem na nigi kolo na ke Jɔn to, o ma zaŋe o vo o zo nabworo o kɛ o daare jei sem konto. O ma pwɛ o tete se o vo o bɛ buga kam, se o vo o taa wora jei selo na ye gaao wo to o yerane. Nɔɔna dedɛ ma ba ba maane o na wo jei selo ne to. Ba ma zaŋe ba nwoŋi ba teene dem ne, ye ba vo tega ne ba vo o tei. 14Yezu ma nwoŋi nabworo kom wone. O laam ma na nɔn-kɔgɔ kom na tu ko wora. Nɔɔna bam ŋwaŋa ma zo‑o lanyerane. O ma yɔɔre balo na ba jege yazura to.#Matiyu 9:36

15Tega na wora ka yi to, o kwaga tɔgena bam laam ma vo ba ta ded‑o ba we, “Maŋa kam wora ka kɛa ye wodiu tera ywo-seeni se ba yeigi ba di. Konto ŋwaane nam pa nɔɔna bam vo sam wone se ba yeigi wodiu ba di.” 16Yezu ma leiri-ba o we, “Ba ba jege se ba viiri. Abam tete mo wó pa-ba wodiu se ba di.”#2 Pwa 4:42-44 17Ba ma ta ba we, “Debam na jege kolo to ye bworobwooru tenu de ywona yalei yerane mo.” 18Yezu ma ta de-ba o we, ba ja ba ba pa‑o. 19O laam ma ta de nɔɔna bam maama se ba jeini tega ne. O ma kwei bworobwooru tenu tem de ywona yalei yam, ye o kwoni o yuu wɛɛne o ke Wɛ lei te ŋwaane. O ma fɔ bworobwooru tem o pa o kwaga tɔgena bam, ye banto de laam ma kwei-te ba pa nɔɔna bam. 20Nɔɔna bam maama ma di ba su ba daare. Ba na di ba daare konto to, ba ma pɛ chichwooru telo na daare to ba su kayɛ fuga-selei. 21Nɔɔna balo déem na di konto to ye nenɛɛne baara morro tenu (5,000) mo, ko woli de kaana de bia de.

Yezu vei na baŋa ne

Maake 6:45-56; Jɔn 6:15-21

22Yezu laam ma pa o kwaga tɔgena bam vo ba zo nabworo kom se ba da yiga ba bɛ buga kam bubɛ dedwoŋi dem. Ba na maa kɛ to, o ma pa kɔgɔ kom viiri. 23O na ke konto to, o ma pwɛ o tete o vo o di peero baŋa se o ware Wɛ. Tega ma ba ka yi ye o ta wora o yerane. 24Nabworo kom nam maŋe ko kɛ naneo kom tetare yiga yiga. Vo-dɛɔ ma ba ko jeeri-ba pa se na bam pɔgele dedɛ ye ba tiini ba mage nabworo kom.

25Tega na wora ka poore to, Yezu laam ma zaŋe o nɔne na bam baŋa ne o maa vei o kwaga tɔgena bam tei. 26Ba na nɛ‑o to, foone ma tiini de ja-ba, de o na wo na bam baŋa ne o vei to. Ba ma ta ba we, “Ko wó taa ye chiru mo!” Foone na zo-ba konto to, ko ma pa se ba laare baŋa baŋa.

27O laam ma ŋɔɔne de-ba ye o we, “Pa-na á bochara ke dam, se ko ye amo mo. Yé pa-na foone taa jege abam.” 28Piita ma leiri‑o we, “Amo Teiru, ko ná seene ko ye nmo, se n bwoŋi-ne se a de vo na bam baŋa ne a ba nmo tei.” 29Yezu maa we, o ba! Piita laam ma nwoŋi nabworo kom wone o tu na bam baŋa ne o vei o maa jeeri Yezu. 30O ma ba o lɔre vio kom na tiini ko mage tei to pa se foone ja‑o, ye o laam wora o misi na bam kuri ne. O na wora o misi to, o ma lwoori Yezu de kwor-dɛa o we, “Amo Teiru, jwoŋi-ne n yage!” 31Yezu laam ma twe o jeŋa o ja‑o, ye o ta ded‑o o we, “Nmo boboŋa muri de Wɛ. Bɛŋwaane mo n jege boboŋa yalei ded‑o?”

32Ba maama laam ma vo ba zo nabworo kom wo. Vio kom ma kwori lela. 33Nɔɔna balo na wo nabworo kom wone to ma pa Yezu zula. Ba maa tɛ ba we, o seene o ye Baŋa Wɛ Bu mo.

34Ba ma vo ba bɛ ba yi bubɛ dedem dem. Ba na yi jei selo to yere mo Gɛnesara. 35Teo kom konto tiina bam ma ba ba lɔre Yezu. Ba na lɔre‑o to, ba laam ma toŋe ni ba pa nawuura yam maama, pa se balo na ba jege yazura to ba o tei se o yɔɔre-ba. 36Ba ma lwoori‑o se o pa jaweena bam chwoŋa se ba dwei o gɔrɔ kom ni yerane. Balo maama na dwei o gɔrɔ kom konto to déem ma na yazura.

Currently Selected:

Matiyu 14: xsmKBG

Highlight

Copy