Matiyu 12

Siu dɛ chullu

Maake 2:23-28; 3:1-6; Luka 6:1-11

1Da yam konto ni ne Yezu déem ma tɔge kara wo o maa kɛa. Ko déem maa ye Juu tiina siu dɛ dem ne mo konto. O kwaga tɔgena bam de maa tɔge ba wora, ye kana jege-ba. Ba ma bobo se ba taa bwori mena ba yui ba dona. 2Farisi tiina na tɔge ba wora to ma na ba na ke kolo to. Ba laam ma ta de Yezu ba we, “Nii nmo kwaga tɔgena bam na ke kolo. Ko ye totoŋe delo na chɔge Wɛ siu dɛ chullu tem to mo.” 3Yezu ma leiri-ba o we, “Nam guli-na Wɛ tɔnɔ kom na bere Pɛ David taane tei to. Kana déem mo jege wonto de o nɔɔna. 4O ma vo o zo Wɛ diga kam o kwei bworobworo kolo na tigi da Wɛ ŋwaane to pa se o de o tɔgena bam di. Ko nam chula se banto ya di bworobworo kom, se ko ye Wɛ kaanem tiina yerane mo jege chwoŋa se ba di-ko.#1 Samuwel 21:1-6 5Ko ta woli da, Wɛ tɔn-dwoŋo kom bere we Wɛ kaanem tiina yeini ba toŋe o diga kam totoŋa siu dɛ maama wone mo. Ba maa yeini ba toŋe konto ye ba ta jege bora ko wone. Ko bere we Wɛ diga kam fɔgem dwoi siu dɛ chullu tem.#Jeelim 28:9-10 6Ko daare leile konto, Nabiin-bu wom tu logo baŋa ye wonto dwoi Wɛ diga kam. 7Wɛ tage o we, ‘Nɔɔna ná jege ba dwonna yibwona, konto pwoli amo wo ko dwoni ba ná ke kaanem ba pa-ne.’#Hosea 6:6 Abam ya ná lɔre taane dento kuri, á ya bá yaale balo na jege bora to. 8Kokuri Nabiin-bu wom jege dam siu dɛ chullu tem baŋa ne.”

9Yezu laam ma vo o kɛ. O ma vo o zo Juu tiina jeerim diga kadwoŋi jei sem konto ne. 10Nɔɔno maa wora o jeŋa dedoa na tega. Nɔɔna badwonna de maa wora ba na lage chwoŋa se ba bere we Yezu ke o tusi. Ba ma bwei‑o ba we, “Nɔɔno jege chwoŋa se o yɔɔre o dwoŋi siu dɛ dem ne na?” 11Yezu ma leiri-ba o we, “Abam wolo ná jege pia, ye ka ná to gwoŋo wone siu dɛ dem ne, á bá nii ka baŋa ne se á le-ka na? 12Nabiinu nam tiini o jege kuri o dwoi pia. Konto bere we nɔɔno jege chwoŋa se o ke o dwoŋi lanyerane siu dɛ dem ne.” 13O na tage konto to, o laam ma ta de nɔɔno wolo jeŋa kam na tege to o we, “Twe n jeŋa kam.” Nɔɔno wom ma seene o ke konto, dedaane o jeŋa kam jwoori ka ke lanyerane, ne o je-ŋoŋa kam tei. 14Farisi tiina bam na nɛ konto to, ba ma nwoŋi ba vo ba ŋɔɔne daane ye ba lage chwoŋa se ba go Yezu.

15Yezu déem ma lɔre ba na lage se ba chɔge‑o tei to. O ma yage jei sem konto o kɛ ye nɔn-kɔgɔ dedɛ déem tɔge‑o. O ma yɔɔre ba maama jaweero tem, 16ye o kaane-ba o we, ba yé zaŋe ba pa nɔɔna lɔre o ni ne. 17Yezu na ke tei konto to, ko ye se ko pa Wɛ sampwora Izaya na maŋe o ta Wɛ kwora kalo faŋa faŋa to mo ba ka ji chega, de o na we:

18“Nii-na, amo tontoŋeno wolo a na kuri to mo tento.

Wonto mo amo swoi ye o kikia su amo yi.

Amo wó kwei a Jworo mo a ke o wone.

O maa wó pa se dwi maama tiina ba ba lɔre

amo na toŋe chega a pa-ba tei to.

19O bá mage ni-kantɔgɔ naa o dɔne o kwora se o ke sɔɔ.

O nam bá taa pae o kwora zaŋa teo pwooni ne.

20Ko ná ye nanchan-gaa kalo na bwona to,

o bere o bá bwori-ka.

O nam bá ja min-zwoŋo kolo nuga na ti to mini

o dwei o yage.

O maa wó taa ye konto mo taa

se o laam pa Wɛ chega kam ba ka yi nɔɔna maama.

21Wonto yere ŋwaane mo

dwi maama tiina wó taa jege teena Wɛ tei ne.”#Izaya 42:1-4

Wɔ dam mo Yezu mae o zeili setaana?

Maake 3:20-30; Luka 11:14-23; 12:10; 6:43-45

22Nɔɔna badwonna déem ma ja lilwei wolo ta na ware o ŋɔɔne to ba ba Yezu tei. Ko maa ye setaane mo daane‑o konto dwoŋi. Yezu ma yɔɔre nɔɔno wom pa se o yia jwoori ya nae ye o daare o wae o ŋɔɔne de. 23Ko ma so nɔn-kɔgɔ kom maama, ye ba tɛ ba we, “Nɔɔno wonto mo wó taa ye Pɛ David dwi tu wolo Wɛ na lage o toŋe to na?”

24Farisi tiina bam na nigi konto to, ba ma ta ba we, “Wonto na wae o zeili setaana to, ko ye o tɔge setaana pɛ Bɛlzabula dam ŋwaane mo o ke konto.” 25Yezu ma lɔre ba boboŋa na ye tei to. O ma ta de-ba o we, “Teo kolo paare ná pɔɔre kuni belei pa ba jege daane, ko bá dáane ko chɔge. Teo kolo maama naa sɔŋɔ kolo maama ná pɔɔre ko tete wone, konto wó to lela mo. 26Ko ná seene ko ye chega we amo mae setaana pɛ dam mo a zeili setaana, konto wó bere we setaana pɛ dam dem pɔɔre belei mo ye o paare dem bá dáane de chɔge. 27Ko ná seene ko ye amo tɔge Bɛlzabula dam ŋwaane mo a ma a zeili setaana, abam nɔɔna bam de nam mae dam dem konto mo ba maa zeili-ya na? Á nam wó sɛ we ko ye konto na? Abam tete nɔɔna bam na ke tei to mo bere we chega tera á tei ne. 28Ko nam na ye tei to, ko ye Wɛ Sin-laao kom dam ŋwaane mo pa se a wae setaana a zeila, ye konto maa bere we Wɛ maŋe o ba se o di paare abam yuu ne.

29Setaana pɛ nam nye de nɔn-babea na nii o sɔŋɔ tei to mo. Nɔɔno ná lage se o vo nɔn-babea sɔŋɔ o ŋɔ, o jege se o bobo o ja nɔn-babea kam mo o vɔ. O ná ke konto dwoŋi mo o laam wó wane wonnu tem o kwaleme.

30Nɔɔno wolo maama nam na ba zege amo kwaga ne to ye amo dono mo. Nɔɔno wolo maama na ba tɔge o lae amo wonnu o pa-ne to boŋe se o jage-te mo. 31Á ta‑á yei we, keim-balwaaro telo maama nɔɔna na ke to, naa ta-balwaaro telo ba na ŋɔɔne to, Wɛ wae o yage-te o ma chɛ-ba. Ko daare nɔɔno wolo nam ná ŋɔɔne ta-balɔrɔ o pa Wɛ Sin-laao kom, Wɛ bá sɛ se o ma chɛ konto tu. 32Nɔɔno wolo nam ná ŋɔɔne wo-balwaaro o pa Nabiin-bu wom, Wɛ wó sɛ se o ma chɛ konto tu. Nɔɔno wolo nam ná pɛ se Wɛ Sin-laao kom dam ye setaane nyem, Wɛ bá sɛ se o ma chɛ konto tu maŋa de maŋa se ko taa vei wuu.

33Abam ná sɛ we amo kikia yam lana, á jege se á sɛ we amo dam dem nwoŋi Wɛ Sin-laao kom tei ne mo. Ko nye de tei-ŋoŋo na jege se ko taa leiri bu-ŋona tei to mo. Tei-jawona nam wó taa leiri bu-chechɔgero mo. Abam ná lage se á lɔre tio ná ye tei-ŋoŋo, á wó ma ko bia mo á lɔre.

34Abam nye de basankwe mo. Á na ye nɔn-balwaaro to, á bá wane wo-laaro á ŋɔɔne. Nɔɔno na jege kolo maama o boboŋa ne to mo wó siiri o ni taane wone. 35Nɔn-ŋom wó taa jege wo-laaro mo o boboŋa ne pa se o jege-te o ŋɔɔna. Ko daare nɔn-balɔrɔ wó taa jege wo-balwaaro mo o boboŋa ne pa se o jege tento o ŋɔɔna. 36Ta‑á yei-na we, Wɛ borem dɛ dem ne nɔɔno maama jege se o ta o ni mo o jwoŋi o tete de wo-yɔɔro telo maama o na tage to mo. 37Ko wó taa ye abam tete ni taane mo wó bere we á jege bora naa á ba jega.”#Memaŋa 10:19

Balo na ve Wɛ chega kam to wó na bora na?

Maake 8:11-12; Luka 11:29-32; 11:24-26

38Wɛ nia zamesem tiina badwonna de Farisi tiina badwonna déem ma zaŋe ba ta de Yezu ba we, “Berem tu, debam lage se n ke wo-kenkagele mo se ko taa ye maana ko pa debam.” 39O ma leiri-ba o we, “Zem nɔɔna ye wo-lwan-keira mo ye ba yiga tera de Wɛ. Mo kokuri ba lage se a ke wo-kenkagele a bere-ba. Ba maa bá na, ko ná dae wo-kenkagele delo na maŋe de ke Wɛ sampwora Jonah baŋa ne faŋa faŋa to. 40Wonto déem ke da yatɔ wea de tete maama mo ywon-kamunu kana ne. Ko nam jege se ko ke amo Nabiin-bu konto dwoŋi mo, de amo na wó ke da yatɔ wea de tete maama tega kuri ne to.#Jonah 1:17 41Jonah déem na vei Ninevɛ tiina tei o bere-ba Wɛ chega kam to, banto leiri ba wo.#Jonah 3:5 Wolo na dwoi Jonah to nam wora abam tei ne ye á wo sɛ konto tu. Mo kokuri Wɛ borem dɛ dem ná yia, Ninevɛ tiina laam wó zaŋe ba bere we abam ba jege chega. 42Ko woli da, ka-pɛ wolo déem na tei Sebaa faŋa faŋa to de wó zaŋe o bere konto. Wonto déem zaŋe o tete teo kolo na tiini ko ye yiga yiga to ne o ba Pɛ Solomon tei se o cheigi o swa yam na ye tei to. Wolo nam na dwoi Solomon to wora abam tei ne ye á yiga tera ded‑o.

43Ba ná zeili setaane se o yage nɔɔno, o laam wó vo o beeri laŋa tetare ne mo na na tera mɛ to se o lage jei o sii da. O ma beeri o ga. 44O laam maa we, ‘A jege se a jwoori a vo a na nwoŋi mɛ to mo a taa wora.’ O ma jwoori o vo nɔɔno wom tei, ye o lɔre we o jei sem fɔge se kwɛ lanyerane ye kolokolo wo leiri ko zo da. 45O laam ma jwoori o vo o lage o dwonna barepɛ balo na maŋe ba ye balwaaro ba dwoi o tete to. Ba ma tɔge ded‑o ba vo ba zoore da. Ko maama laam na kweeli tei to ye lɛɛro mo wó taa jege nɔɔno wom konto se ko dwoni o boboa kam na maŋe ka ye tei to. Konto dwoŋi mo lage ko ke zem nɔn-balwaaro tem.”

Yezu nu de o nyaana na ye balo to

Maake 3:31-35; Luka 8:19-21

46Yezu déem ta na wora o ŋɔɔne de nɔn-kɔgɔ kom konto to, o nu de o nyaana ma ba ba zege sɔŋɔ kom pwooni ne, ye ba lage se ba ŋɔɔne ded‑o. 47Nɔɔno wodwoŋi ma ta de Yezu o we, “N nu de n nyaana tua, ye ba lage se ba na nmo.” 48Yezu ma ta de nɔɔno wom o we, “Banto yerane mo ye a nu de a nyaana na?” 49O laam ma nii o kwaga tɔgena bam seeni ye o we, “Amo nu de a nyaana mo tento. 50Kokuri wolo maama na ke a Kwo Wɛ boboŋa na lage tei to mo ye a nyaane, de a nakɔ, de a nu.”

Currently Selected:

Matiyu 12: xsmKBG

Highlight

Copy