Pulim 41

Pa-faro wom dendwea

1Bena yalei na kɛ to, Ejipti Pa-faro wom ma dwɛ dendwɛ. O dendwɛ dem ne, o déem zege Ejipti bu-tola kam ni ne mo, ba na bwoi-ka we ‘Naili’ to. 2O ma nii o na naane derepɛ ye de nwoŋi buga kam wone. Naane dem nugi bigila bigila, ye de zege bubɛ dem ni ne de di gaao. 3Ko ma daare ye naane derepɛ dedwonna de daa ma nwoŋi buga kam de ba de zege da. Dento maa lɔra kokware kokware mo. De maa zege naane dedem dem tei ne buga kam bubɛ dem ne. 4Na-kokware sem laam ma ja naane delo na nugi to se di. Pa-faro wom laam ma puri o yia.

5O déem daa na guni o peini se o dɔ to, mo o dwɛ dendwɛ dedwoŋi: O déem nɛ men-zwaro terepɛ mo te na leigi kaso-fera dedoa baŋa ne. Te maama bega wagela wagela lanyerane. 6O ma daare o na men-zwaro terepɛ tedwonna na nwoŋi te woli da. Tento maa ye memene mo ye te kwaare, kagoa vo-loŋo na nwoŋi wɛ-puli seeni ye ko jege-te ko zwɛa to ŋwaane. 7Men-memene sem ma ja mena yalo na bega wagela wagela to ya li nyɔ! Pa-faro wom ma puri yia, ye o maane we ko maama ye dendwɛ mo.

8Tega na poore zezeŋa ne to, Pa-faro wom boboŋa maa vugimi dedɛ. O ma toŋe o bwoŋi Ejipti teo liri-keira de ba swa tiina maama. O déem ma tole o dendwea yam o bere-ba. Ba wolowolo maa ware ya kuri o ta o bere Pɛ wom. 9Dáane mo Pɛ sana tu wom tage ded‑o o we, “Amo laam guli a ya na jege se a ke tei to. 10Pɛ, nmo bane déem zaŋe amo de a dwoŋi tontoŋeno wolo na nii bworobworo fɔgem to baŋa ne mo, ye n pa se ba ja debam balei ba pe peena diga ne, n che-tara yiga tu wom tei ne. 11Dɛ dedwe debam dedoa dedoa déem dwɛ de dendwea mo tete ne, dendwɛ maama dedaane de kuri mo. 12Hiburu tiina nɔn-doŋo wodwoŋi de déem maa tɔge o wo jeiga kam ne. Wonto déem mo toŋe o pae nmo che-tara bam yiga tu wom. Dé déem ma tole dé dendwea yam dé bere‑o, ye o daare o maŋe ya dedoa dedoa kuri o bere debam. 13Nɔɔno wom na bere dé dendwea yam kuri tei to mo seene ko ke. Nmo pɛ se a jwoori a na a totoŋa yam mo, ye n daare n pa ba kuuri nɔɔno wodwoŋi wom ba go.”

14Pa-faro wom ma pa ni se ba ja Josɛf ba ba o tei. Ba déem ma ke lela ba ja‑o ba nwoŋi peena diga kam ne. Ba ma cheeri o yuu, ye ba daare ba zo‑o gare-laaro. Ba laam ma ja‑o ba zo Pa-faro wom tei. 15Pa-faro wom déem ma ta de Josɛf we, “Amo mo dwɛ a dendwɛ ye nɔɔn-nɔɔno ware se o ta de kuri. Amo nam nigi we nmo yei dendwea kuri n tɛ n bere nɔɔna.” 16Josɛf ma leiri we, “Pɛ, amo ware a ta. Ko nam ná ye Wɛ, wonto wó pa nmo leira yalo na ye chekke to.”

17Pa-faro wom laam ma ta de Josɛf o we:

“A na dwɛ dendwea yam to, a nɛ we a zege Naili buga kam bubɛ baŋa ne mo. 18Naane derepɛ ma zege buga kam wone de nwoŋi. De nugi bigila bigila, ye de zege de di gaao. 19Dento kwaga ne mo naane derepɛ de daa nwoŋi, de na ye na-kokware, ye de tiini de lwara. Amo ta wo fɔge a na na-balɔre sem konto dwoŋi Ejipti teo kom maama ne. 20Na-kokware sem laam ma ja na-kamuna yarepɛ yalo na lwoori yiga ya nwoŋi to se di. 21De na di na-kamuna yam de ti to, de ba nii de nae we de di woŋo. Kokuri to, de ta ye na-kokware mo, nenɛɛne de na maŋe de ye tei to. A laam ma puri a yia. 22Amo daa ma dwɛ a na men-zwaro terepɛ, te na leigi kaso-fera dedoa baŋa ne ye te maama be wagela wagela lanyerane to. 23Tento kwaga ne mo men-zwaro terepɛ tedwonna de nwoŋi da, te na ye memene ye te kwaare, kagoa vo-loŋo na nwoŋi wɛ-puli seeni ye ko jege-te ko zwɛa to ŋwaane. 24Men-zwaaro telo na ye memene to laam ma ja mena yalo na bega wagela wagela to ya li. A ma maŋe dendwea yam a bere a liri-keira bam, ye ba wolowolo wo wane ya kuri o ta o bere-ne.”

25Josɛf ma ta de Pa-faro wom o we:

“Pɛ, nmo dendwea yam maama ye woŋo dedoo mo. Wɛ mo veere o bere‑m o na ti o yiga se o ke tei to. 26Na-laaro terepɛ tem ye bena yarepɛ mo. Men-wagela yarepɛ yam de maa ye bena yarepɛ. N dendwea yam maama tɛ woŋo dedoo mo. 27Ko ná ye na-balɔre serepɛ sem na ye kokware ye se da kwaga se ba to, de men-zwaro terepɛ tem na ye memene vo-loŋo kom ŋwaane to, tento maama de ye bena yarepɛ mo. Bena yanto wone kana mo wó taa wora. 28Pɛ, ko lage ko ke nenɛɛne a na maŋe a ta tei de nmo to mo: Wɛ seene o bere‑m o na lage o ke kolo to mo. 29Bena yarepɛ wone, wodiu wó taa wora kɛɛla kɛɛla Ejipti logo kom maama ne. 30Yanto nam ná kɛ, bena yarepɛ de daa wó saŋe se kana ba ka taa wora. Kana kam na wó tiini ka chɛ logo kom maama to ŋwaane, nɔɔna wó swei we wodiu déem ya gaale Ejipti ne. 31Nɔɔna bá taa guli we wodiu ya gaale logo kom ne, kolo ŋwaane, kana kalo na wó saŋe wodiiru bena yam to wó tiini ka zo nɔɔna yera mo. 32Dendwea yam nam na ye yalei ye ya ta ye woŋo dedoo to, bere we Wɛ mo chwi keim dem se de ke. Ko nam bá dáane se Wɛ pa se keim dem maama toŋe.

33Konto ŋwaane, Pɛ, ko maŋe se n beeri nɔɔno wolo na jege yi-poro ye o ta ye swa tu to, se n daare n kwei Ejipti logo kom maama n ke kotu jeŋa ne. 34Ta kuri nɔɔna balo na wó taa nii logo kom teene maama baŋa ne to n woli da. Bena yarepɛ yalo wodiu na wó gaale to wone, banto jege se ba la wodiiru popɔre senu maama wone popɔra dedoa ba tiŋi. 35Nmo wó pa-ba dam, se ba la wodiiru tem maama ba na wó wane ba la bena yarepɛ yalo wone wodiu na wó gaale to. Wodiiru telo maama ba na wó la to ye se ba tiŋi-te te-kamuna ne mo ye ba laam taa yere-te lanyerane. 36Ba jege se ba tiŋi wodiiru tento jwa dim ŋwaane mo. Kana ná tu logo baŋa, teo kom nɔn-bia wó na wodiu bena yarepɛ yam konto wone. Nmo ná ke konto, kana kam daa bá wane ka chɔge teo kom.”

37Josɛf na tage konto o ti to, Pa-faro wom dedaane o nakwa bam maama ma sɛ o taane dem. 38Pɛ wom déem ma bwei o nakwa bam we, “Dé daa wó wane dé na nɔɔno se o taa nye de wonto na? O ye wolo Wɛ jworo na wo o baŋa ne to mo.” 39O laam ma ta de Josɛf we, “Wɛ na lwoori o pa se n lɔre wonnu tento maama to, nɔɔn-nɔɔno daa tera ye o jege yi-poro dedaane swa o yi nmo. 40Amo wó pa se n ta‑n nii amo sɔŋɔ kom maama baŋa ne. A teo kom nɔn-bia bam maama jege se ba sɛ nmo ni mo. Paare dem yerane ŋwaane mo pa amo dwoi nmo.”

Josɛf tu o tei Ejipti teo maama

41Pa-faro wom ta ma ta Josɛf o we, “Amo zem kwei Ejipti logo kom ni maama a ke nmo jeŋa ne.” 42Pɛ wom ma le o dam jafole o kwei o tore Josɛf noa ne. O ta ma zo‑o gare-nyenno na lamma to, ye o daare o kwei sabu-seŋa zambili o lɛ o ba ne. 43O laam ma pa se Josɛf di sisei-toroko, ye o saŋe wonto tete kwaga. Ba ná tɔge mɛ ba kɛ, nɔɔna déem laam maa tɔge o yiga ye ba we, “Pa-na pwola se dedɛɛro Josɛf beene!” Ko dɛ konto mo ye Pɛ wom kwei Ejipti logo kom ni maama o ke Josɛf jeŋa ne se o taa nia. 44Pa-faro wom déem ma ta de Josɛf we, “Amo mo seene a ye Ejipti Pa-faro wom. Nmo nam ná wo pɛ nɔɔna chwoŋa, ba bá gɔ naga se ba toŋe kolokolo Ejipti maama wone.” 45Pa-faro wom ma pa Josɛf yere we ‘Zafenaf-Panea’. O ma daare o kwei bukɔ wodwoŋi o pa‑o se o di o ma ke o kaane. Wonto yere mo Asenaf. O maa ye Ona#41:45 Ona = Heliopolis kaanem tu Potifera bukɔ. Josɛf déem nɛ chwoŋa se o taa nii logo kom maama baŋa ne.

46Josɛf déem ye bena fintɔ mo ye o bobo se o taa toŋe o pae Ejipti Pɛ wom. O laam ma nwoŋi Pa-faro wom tei ne o beeri o kaare Ejipti logo kom maama ne se o taa nia. 47Bena yarepɛ yam na yi se wodiu neene to, tega kam ma seene ka ke wodiu se ko gaale. 48Josɛf ma la la wodiiru bena yarepɛ yam konto maama wone. O déem beeri Ejipti logo kom ni maama o la-te ye o kwei o tiŋi ba te-kamuna yam wone. Teo maama kare na ke wodiiru telo to mo o tiŋi teo kom konto wone. 49Josɛf ma tiini o la mena o tiŋi pa se ya daga ko gaale, nenɛɛne naneo ni kasol-bia na daga tei to. Ko déem na yi yiga to, Josɛf déem daa ware o jeeli ko ni na mae tei to.

50Kana bena yam déem ta wo yi ye Josɛf kaane Asenaf lo bu-baara balei o pa‑o. 51Josɛf ma pa o bu-kwea kam yere we ‘Manasɛ’ ye o we, “Wɛ seene o pa se a swei a yaara yam maama de kolo maama na ke a kwo sɔŋɔ ne to.” 52O ma pa wolo na saŋe to yere we ‘Efrayim’ ye o we, “Wɛ pɛ se a na dwi teo kolo wone a ya na yaare to.”

53Ejipti logo kom na neene de wodiiru to bena yarepɛ yam maama déem tu ya kɛ. 54Kana bena yarepɛ yam de laam ma bobo. Ko déem seene ko ke nenɛɛne Josɛf na wuuri o ta tei to mo. Kana ma tiini ka di logo baŋa teene maama. Ko déem nam ná ye Ejipti teene dem maama wone, wodiu déem wora mo. 55Kana na tu ka ja Ejipti tiina bam to, ba ma vo ba kaase ba jare Pa-faro wom se o pa-ba wodiu. O de ma ta ba maama o we, “Véi-na Josɛf tei, se á ke kolo maama o na wó bere abam se á ke to.”

56Kana kam déem jage Ejipti logo kom maama ne mo ka tiini ka chɛ. Josɛf laam ma pa ba pore tuli sem teo maama wone ye o jege mena yam o yeigi o pae Ejipti tiina bam, se kana yé go-ba. 57Nɔɔna déem zege tega baŋa teene maama ne ba tui Ejipti se ba yeigi wodiu Josɛf tei ne, kokuri to, kana kam déem tiini ka chɛ logo baŋa maama ne mo.#Lei 105:16

Currently Selected:

Pulim 41: KBG

Highlight

Copy