Pulim 39

Josɛf de Potifare kaane taane

1Isameli tiina bam déem ya jaane Josɛf ba vo ba yi Ejipti. Ba ma yeigi‑o ba pa Ejipti tu wodwoŋi, o yere mo Potifare. Wonto maa ye ba teo kom Pa-faro che-tara bam maama yiga tu.

2 Baŋa Wɛ déem maa wo Josɛf tei ne, pa se wonnu da chwoŋa lanyerane te pa‑o. O déem maa yɔɔre o wo o tu Potifare sɔŋɔ kom ne o toŋa. 3O tu wom déem maane we Baŋa Wɛ mo wo Josɛf tei ne. O ta ma lɔre we ko ye Baŋa Wɛ ŋwaane mo pae se Josɛf jeŋa wonnu maama tɔge chwoŋa. 4Ko ma pa se Potifare yi déem su Josɛf totoŋa yam. O ma pa‑o chwoŋa se o taa nii omo tete wonnu baŋa ne o pa‑o. O ma yɔɔre o kwei o sɔŋɔ kom totoŋa de o jejegero maama mo o ke Josɛf jeŋa ne se o taa nia. 5Ko zege dɛ dem konto ne ko taa via, Baŋa Wɛ déem swɛ Potifare de o sɔŋɔ kom maama swolim mo Josɛf ŋwaane. Ko ná ye o kare sem de o vara bam de o sɔŋɔ wonnu tem maama, Baŋa Wɛ zaane déem wo te maama baŋa ne mo. 6O déem yage o jeŋa woŋo maama o pa Josɛf se o taa nii-te o pa‑o. O yiga déem daa tera kolokolo wone, ko ná dae o tete ni-wodiu kom yerane se o ba o di.

Josɛf ye-daa kam déem maŋe daane mo ye o tiini o lamma yi ne. 7Ko wo dáane dedaane o tu wom kaane na dole o yi o na Josɛf. Kaane wom boboŋa ma zo‑o ye o ta‑o we, “Ba n peini de amo.” 8Josɛf ma ve ye o we, “A bá sɛ! Amo tu wom kwei o sɔŋɔ wonnu maama mo o ke amo jeŋa ne, ye o yiga daa tere kolokolo wone, amo na nii te baŋa ne to ŋwaane. 9Nɔɔn-nɔɔno ba dwoi amo sɔŋɔ konto ne. Amo tu wom nam wo cheiŋi kolokolo ywo amo tei ne, ko ná dae nmo yerane, nmo na ye o kaane to ŋwaane. A nam bá wane a toŋe puseŋa totoŋe dento. Ko wó taa ye wɛleere mo Wɛ yiga ne.” 10Dɛ maama mo kaane wom yɔɔre o daane Josɛf de taane dem konto dwoŋi. O de maa ba sɛa, ye o jege‑o o liisa, se ba yé twɛ daane.

11Dɛ dedwe, Josɛf ma zo sɔŋɔ kom wone se o toŋe o totoŋa. O dwonna tontoŋena bam wolowolo déem maa tere ko wone. 12Potifare kaane wom ma vo o ja‑o o gɔrɔ seeni ye o we, “Ba se dé peini daane!” Josɛf ma vere o tete o daare o gɔrɔ kom o yage kaane wom jeŋa ne, ye o duri o nwoŋi pwooni. 13Kaane wom na nɛ we o yage o gɔrɔ o jeŋa ne ye o duri o nwoŋi sɔŋɔ kom ne to, 14o ma bwoŋi sɔŋɔ kom wo tontoŋena bam o ta-ba we, “Nii-na a baro na jaane Hiburu tu wonto o ba ywo se o mɔne debam tei! O zo ywo mo se o zi-ne, ye a de tiini a kaase. 15O nam na nigi we a kaase se ba jwoŋi-ne ba yage to, mo o yage o gɔrɔ a tei ne o daare o duri o nwoŋi.”

16Kaane wom déem ma tiŋi Josɛf gɔrɔ kom o tei ne, ye o cheigi se o baro jwoori sɔŋɔ. 17O na tu to, kaane wom laam ma tole taane dem o bere‑o o we, “Hiburu kabaa kam nmo na yeigi n ja n ba to mo zo ywo se o zi-ne. 18A na kaase se ba jwoŋi-ne ba yage to, mo o yage o gɔrɔ a tei ne ye o daare o duri o nwoŋi pwooni.”

19Potifare na nigi o kaane wom na tage kolo to, o bane tiini de zaŋe de Josɛf mo. 20O déem ma pa se ba ja Josɛf ba pe peena diga ne. Dáane mo ba déem yeini ba pe Ejipti Pɛ wom peena.

Josɛf déem na wo peena diga kam ne konto to, 21Baŋa Wɛ wo o tei ne mo. O ma ke Josɛf lanyerane ye o pa peena diga kam dedɛɛro wom swoi Josɛf. 22Dedɛɛro wom déem ma pa Josɛf chwoŋa se wonto taa nii peena badwonna bam o pa‑o. O ma kwei kolo maama na wó ke peena diga kam ne to o ke Josɛf jeŋa ne. 23Peena diga kam dedɛɛro wom yiga déem tera de kolo maama o na ke Josɛf jeŋa ne to. Kokuri to, Baŋa Wɛ déem wo Josɛf tei ne mo ye o keim maama tɔge chwoŋa.

Currently Selected:

Pulim 39: KBG

Highlight

Copy