Pulim 37

Josɛf de o zembaara bam taane

1Jakob déem ta zoore Kanaan teo kom ne mo, jei selo o kwo de déem na maŋe o zoore da to. 2Jakob dwi dem boboa taane mo tento.

Josɛf déem ta na ye nɔn-doŋo ye o jege bena fuga-yarepɛ to, o zeini o chorro tem se ba taa nii ba kwo vara bam baŋa ne. O chorro tem konto maa ye Jakob kaana, Biliha de Zilipa, bia mo. Ba na jwoori sɔŋɔ to, Josɛf déem ma ba o ba o chorro tem bebara o bere ba kwo.

3Jakob déem nam swoi Josɛf mo o dwoi o bia babam bam, kokuri to, o loge wonto o kokweero maŋa ne mo. O déem ma sɔ gare-bwora na tiini ka jege nenɔŋa to o pa‑o. 4Josɛf zembaara bam na nɛ we ba kwo swoi wonto mo o dwoi ba maama to, ba ma tiini ba chuli‑o ye ba yaale‑o.

5Dɛ dedwe Josɛf ma dwɛ dendwɛ ye o daare o ta o bere o zembaara bam. Ko ma fɔge ko pa ba chuli‑o dedɛ ba woli da. 6O déem maa we, “Cheigi-na a dendwɛ dento: 7Amo dwɛ we debam maama wo kara ne mo dé vɔ mena. Amo tete men-pwoa yam laam ma zaŋe ya zege wɛɛne cheppe. Abam maama men-pwoa yam laam ma gilimi amo nyem dem ye ya chɔɔle ya tiiri tega ne ya zuli-de.”#Pulim 42:6; 50:18 8O zembaara bam ma ta ded‑o we, “Konto nmo boŋe se n ba n di paare mo debam baŋa ne na? Nmo lage se n ba n ta‑n dwoi debam mo na?” O dendwea yam de o bebare taana yam ŋwaane mo ba déem tiini ba chuli‑o dedɛ.

9Josɛf déem ta ma dwɛ dendwɛ dedwoŋi, ye o ta de o zembaara bam we, “Cheigi-na! Amo daa dwɛ dendwɛ dedwoŋi mo we, wea kam de chana kam dedaane chalechwe fuga-dedoa mo chɔɔle tega ne amo yiga ne.” 10O déem na tage-de o bere o kwo de o woli da to, mo o kwo bwɛ‑o ye o we, “Dendwɛ dwi dɔ mo konto nmo dwɛ? Ko ná ye nmo nu, de amo tete, de n zembaara bam maama, dé wó seene dé ba dé chɔɔle tega ne nmo yiga ne na?” 11O zembaara bam maama déem ma zwe kazwe ded‑o. Ko daare ye o kwo wom kwei taane dem o ke o boboŋa ne.

Josɛf zembaara bam kwei‑o ba yeigi

12Josɛf zembaara bam déem ma kale ba kwo vara bam ba vo ba yi jeiga kadwoŋi na twɛ de Sɛkɛm to se ba di gaao. 13Jakob ma ta de o bu Josɛf we, “Nmo zembaara bam na jege vara bam ba wo mɛ to bwola de Sɛkɛm. Konto to, a lage a toŋe‑m ba tei ne mo.” Josɛf ma sɛ o kwo taane dem. 14O kwo déem ma ta ded‑o we, “Véi n nii n zembaara bam jege yazura na, n daare n nii vara bam de na ye tei to, se n jwoori n ba n ta n bere-ne.” O ma toŋe‑o pa se o zege Heboron bwolo kom ne o vo Sɛkɛm.

Josɛf na yi Sɛkɛm seeni to, 15baaro wodwoŋi ma jeeri‑o gaao ne o na kare o beeri jei maama to, ye baaro wom bwei‑o we, “Bɛ mo nmo kare n beera?” 16O ma leiri we, “A beeri a chorro mo. Nmo yei ba na wo mɛ ba tɔge ba vara bam to na?” 17Nɔɔno wom ma leiri we, “Ba daa tere ywo-seeni. Amo nigi ba na ŋɔɔne ba bere daane we ‘Pa-na se dé vo Dotan.’ ” Josɛf na nigi konto to, o ma da o zembaara bam nɛ o vo o na-ba Dotan laŋa kam ne.

18Ba déem na tole ba na‑o, o maa beene to, ba ma ke ni daane se ba go‑o. 19Ba ma ta daane ba we, “Dendwea dwɛɛno wom mo tento o maa beena. 20Pa-na se dé go‑o dé daare dé dole‑o dé de vole-kora yanto dedoa wone. Debam laam maa wó daare dé vo dé ta we kago-varem mo jaane‑o de di. Dé laam wó nii o na lage o ke tei de o dendwea yam to.”

21Ruben na nigi konto to, o ma kwaane se o jwoŋi Josɛf ba jeŋa ne o yage. O maa we, “Yé pa-na se dé ti o ŋwea.” 22O ta maa we, “Yé pa-na o jana lu tega ne. Yé kwei-na á jea á dwei‑o. Za á dole-o-na á de vole-kore dento ne, kagoa kam ne ywo.” Ruben tage konto ye o boŋe se o jwoŋi‑o ba jeŋa ne o daare o jwoori o ja‑o o vo o pa o kwo mo.

23Josɛf na yi o zembaara bam tei to, ba ma ja‑o ba lɔɔre o gare-laao kom, gɔrɔ kolo o kwo na pɛ‑o ye ko jege nenɔŋa to mo konto. 24Ba laam ma kwei‑o ba dole ba de vole dem na koge to wone. 25Ba ma vo ba jeini se ba di wodiu.

Ba na wora ba di to mo ba déem kwoni ba yuni wɛɛne ba na Isameli tiina badwonna na nwoŋi Gilead ba via. Ba kona yam maa zeŋe talwoŋ-ywoŋa dwi dwi de terale nuga, ba jege ba maa vei Ejipti se ba ke pipiu. 26Judah ma ta de o chorro tem we, “Bɛ nyɔɔre mo debam wó na nenɛɛne dé ná go dé nyaane wom, ye dé daare dé kwoli o jana bam? 27Pa-na se dé kwei‑o dé yeigi dé pa Isameli tiina bam se debam tete yé ma dé jea dé chɔge‑o. Ko ná maŋe ko ye tei maama, o ta ye dé choro mo. Debam maama ye nɔɔno dedoa jana mo.” O chorro tem ma sɛ o taane dem. 28Isameli pipim-piina bam na yi da to, mo Josɛf zembaara bam vaŋe‑o ba le vole dem wone. Ba déem ma kwei‑o ba yeigi ba pa Isameli tiina bam, ye ba jwoŋi lu-nyenno sabu-dala finlei. Banto de déem ma ja‑o ba kɛ ba vo Ejipti.

29Ruben déem na jwoori o ba vole dem ne ye o na we Josɛf tera to, o ma kaare o tete gwaaro de wo-chechɔgɔ. 30O ma daare o jwoori o chorro tem tei o ta we, “Bu wom daa tera! Amo lage a vo yeini mo tento?” 31Ba ma ja boŋo ba go, ba daare ba kwei Josɛf gɔrɔ kom ba de varem wom jana bam wone. 32Ba déem ma ja gare-laao kom ba vo ba kwo tei ye ba we, “Dé nɛ tento mo. Fɔge n nii ko na zege ko ye nmo bu Josɛf gɔrɔ kom naa ko dae o nyem.” 33Ba kwo Jakob ma lɔre-ko ye o we, “Ko ye amo bu Josɛf gɔrɔ mo! Kago-varem mo jaane‑o de go de tore tore!”

34Wo-chechɔgɔ ŋwaane Jakob ma vaŋe o tete gwaaro o kaare, ye o daare o lɛ gare-nyenyaaro. O laam ma keeri o bu wom da dedɛ wone. 35O bu-baara de o bukwa bam maama déem ma ba se ba kwoori‑o se o yage keira. O ma ve ba gana yam ye o we, “Aawo! Amo wó keeri mo taa, se a vo a yi churu ye a na a bu wom dáane.” Josɛf kwo wom déem keeri konto mo o ŋwaane.

36Konto maama na jege ko ke to, dedaane Isameli pipim-piina bam jaane Josɛf mo ba vo ba yi Ejipti. Ba ma kwei‑o ba yeigi ba pa Potifare. Wonto déem ye Ejipti Pa-faro che-tara bam maama yiga tu mo.

Currently Selected:

Pulim 37: KBG

Highlight

Copy