Pulim 36
36
Esawu dwi dem taane
1Esawu dwi dem mo tento. Wonto yere dedwoŋi maa ye Edom.
2Esawu déem di Kanaan tiina bukwa bam wone mo o ma o ke o kaana. Ba dedoa déem ye Hiti tu Elon bukɔ mo, o yere mo Ada. Balei tu wom maa ye Ana bukɔ Oholibama. Ana déem ye Hivi tu Zibeon bu mo. 3O déem ta di Isameli bukɔ Basemafa o woli da. Wonto maa ye Nebayofa nakɔ.
4Ada déem loge Elifaza mo. Basemafa ma lo Reweli. 5Oholibama de déem ma lo Jewusi, de Jalam, dedaane Kora. Esawu kaana bam déem loge bia bam konto maama maŋa kalo o ta na wo Kanaan teo kom ne to mo.
6-7Esawu de Jakob vara bam déem tiini ba gaale mo ye ba jejegero daga dedɛ. Tega kam ba na zoore mɛ to daa ba daga se ka yi ba maama. Esawu ma zaŋe o ja o kaana bam dedaane o bia bam maama, ko woli de o sɔŋɔ nɔɔna bam maama. O ta ma kale o vara bam maama ye o kwaleme jejegero telo maama o déem na nɛ Kanaan ne to. O ma ja te maama o vo o lage jei yiga yiga se o de Jakob daa yé taa wo jeiga dedoa ne. 8Konto to, Esawu déem vei o zoore Seyira zwonnu laŋa kam ne.
9Esawu dwi dem taane mo tento. Wonto déem mo ye Edom dwi dem maama nabaaro. Banto mo wo Seyira zwonnu laŋa kam ne.
10Esawu bu-baara bam yera mo tento:
O kaane Ada déem loge Elifaza. Ko daare o kaane Basemafa de déem ma lo Reweli.
11Elifaza bu-baara bam mo tento: Teman, de Omara, de Zefo, de Gatam, dedaane Kenazi. 12Esawu bu Elifaza de déem ya jege ka-bia kadwoŋi o yere na ye Timina to. Wonto déem ma lo Amaleki o pa Elifaza. Bia bam konto maama déem ye Esawu kaane Ada naaro mo.
13Reweli bu-baara bam mo tento: Nahafi, de Zera, de Samma, dedaane Miza. Bia bam konto maama mo déem ye Esawu kaane Basemafa naaro to.
14Ko daare bu-baara balo Ana bukɔ Oholibama déem na loge o pa Esawu to mo tento: Jewusi, de Jalam, de Kora. Kaane wom kwo-nakwe yere déem mo ye Zibeon.
15Balo na ye nakwa ye ba nwoŋi Esawu dwi dem ne to mo tento:
O bu-kwea Elifaza mo ye dwia yanto nabaaro: Teman, de Omara, de Zefo, de Kenazi, 16de Kora, de Gatam dedaane Amaleki. Banto maama ye Elifaza bia mo, ye ba kwori ba ye Ada naaro.
17Esawu bu Reweli de maa ye dwia yanto nabaaro:
Nahafi, de Zera, Samma dedaane Miza. Banto maama déem ye Reweli bia mo ye ba ye Esawu kaane Basemafa naaro.
18Esawu bia balo Ana bukɔ Oholibama na loge o pa‑o to mo banto:
Jewusi, de Jalam dedaane Kora. Dwia yam konto maama mo nwoŋi Esawu kaane Ohilibama ne to.
19Banto maama déem mo ye Esawu dwi nabaara bam.
20-21Balo na maŋe ba wora jei sem konto ne ye Esawu dwi dem laam ba de zoore da to mo tento:
Hori tu Seyira dwi dem nabaara mo ye Lotan, de Sobal, de Zibeon, de Ana, de Dison, de Ezere dedaane Disan.
22Lotan dwi dem nabaara mo tento: Hori dedaane Homam. Timina de déem maa ye Lotan nakɔ.
23Sobal dwi dem nabaara mo tento: Alivan, de Manahafa, de Ebal, de Sefo, dedaane Onam.
24Zibeon dwi dem nabaara mo tento: Aya dedaane Ana. Ana wonto wom déem mo wo kagoa kam ne o tɔge o kwo bonɛ ye o beeri beeri o vo o na buli-yi delo na na lomma to.
25-26Ana de dwi dem nabaara mo tento: Dison dedaane o bia Hemidan, de Esiban, de Iferan dedaane Cheran. Ana de maa jege bukɔ, o yere mo Oholibama.
27Ezere de dwi dem nabaara mo tento: Bilihan, de Zaavan dedaane Akan.
28Disan de dwi dem nabaara mo tento: Yuzi dedaane Aran.
29Banto maama déem mo ye Hori dwi dem nabaara bam: Lotan, de Sobal, de Zibeon, de Ana, 30de Dison, de Ezere, dedaane Disan. Banto déem maa zoore Seyira teo kom ne, ba de ba sɔ-yuni tem maama.
Edom tiina pwa bam taane
31Pwa banto déem mo maŋe ba di Edom teo paare ye Isarele tiina ya ta ba jege pɛ se o taa nii ba baŋa ne: 32Beora bu Bela déem maa ye Edom tiina pɛ. O teo kom yere déem mo ye Dinaaba. 33Bela na tege to, mo Zera bu Jobaba na nwoŋi Bozera to leiri o yuu ne o ji pɛ. 34Jobaba de na tege to mo, Husam na nwoŋi Teman tiina bam teo kom to leiri o yuu ne o ji pɛ. 35Husam de maa na tege to, Bedad bu Hadad mo leiri o yuu ne o ji pɛ. Wonto déem ke tigura de Midian tiina bam o wane-ba Moaba teo kom ne. O teo kom yere déem mo ye Avifa. 36Hadad maa na tege to, mo Samila leiri o yuu ne o ji pɛ. Wonto déem nwoŋi Masareka ne mo. 37Samila na tege to mo, Sawuli leiri o yuu ne o ji pɛ. Wonto déem nwoŋi Rehobofa teo kolo na wo Yuferata buga kam ni ne to mo. 38Sawuli de na tege to, mo Akebora bu Baal-Hanan leiri o yuu ne o ji pɛ. 39Baal-Hanan déem na tege to, mo Hadad leiri o yuu ne o ji pɛ. Wonto teo kom yere déem mo ye Pawu. O kaane de yere déem mo ye Mehetabeli. Mehetabeli kwo mo déem ye Matiredi ye o kwo-nakwe yere déem ye Mezahabi.
40Esawu dwi dem déem na seere tei maama to mo tento, ba de ba nabaara bam, dedaane ba sɔ-yuni tem maama:
Timina, de Aliva, de Jefeti, 41de Oholibama, de Ela, de Pinon, 42de Kenazi, de Teman, de Mibizare, 43de Magadeli dedaane Yiram.
Edom dwi dem yera mo konto, de jei selo maama ba na jeini to yera yam. Esawu déem mo ye Edom tiina nabaaro.
Currently Selected:
Pulim 36: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
