Pulim 35

Jakob jwoori o vo Bɛtel

1Wɛ déem laam ma ta Jakob o we, “Zaŋe n vo Bɛtel n ta‑n zoore da.#Pulim 28:11-17 Nmo ná yi da, se n tigisi kandwa n lɔ bimbini, se n zuli amo, Baŋa Wɛ, kokuri to, amo mo tua nmo tei maŋa kalo n déem na duri se n lu n zembaaro Esawu jeŋa ne to.” 2Jakob ma sɛ ye o ta de o diga tiina, de balo maama na wo o tei ne to o we, “Dole-na dwi-gɛ tiina jwona yalo na wo abam tei ne to á yage. Ta‑á kwɛ-na á tete, se á daare á leiri-na á gwaaro tem. 3Pa-na dé zaŋe dé vo Bɛtel. Dáane mo amo lage a lɔ bimbini a ma a zuli Wɛ, wolo wom na zeini-ne maŋa kam a déem na wo yaara wone to, ye o da amo yiga a veiŋa maama ne to.” 4Ba ma seene ba kwei ba jwona yam maama ba pa Jakob. Ba ta ma woli de zwa-kwana yalo na wo ba zwa ne to. Jakob ma kwei ya maama o ko gwoŋo Sɛkɛm tei-zɔŋɔ kom kuri ne o suli-ya.

5Ba laam ma kwei chwoŋa ba maa kɛa. Wɛ ma pa se foone tiini de ja teo kom konto de ko nawuura yam nɔɔna maama. Konto ma pa se nɔɔn-nɔɔno daa ware se o zeili o da Jakob de o nɔɔna bam kwaga. 6Jakob dedaane nɔɔna balo maama na wo o tei ne to ma vo ba yi Luzi. Ko déem ye Kanaan teo kodwoŋi mo, ye Jakob pa ko yere we ‘Bɛtel’. 7O na yi da to mo o lɔge bimbini se o ma o zuli Wɛ. O ma bwoŋi jei sem yere we ‘El-Bɛtel’, kolo ŋwaane ko ye dáane mo Wɛ bere o tete ded‑o maŋa kalo o déem na maa dura se o lu o zembaaro Esawu jeŋa ne to. 8Kaane wolo déem ya na nii Rebeka baŋa ne to ma ba o te jei sem konto ne. O yere mo Debora. Ba ma kwei‑o ba suli tei-zɔŋɔ kom kuri ne, ko na wo Bɛtel kuri seeni to. Ba ma bwoŋi jei sem konto yere we ‘Wo-chechɔgɔ keira tio’.

9Ko dɛ chwoŋa kam konto mo ye Jakob déem zege Mesopotamia ne o jwoori o ba Bɛtel. O na wora to mo Wɛ daa veere o tete ded‑o ye o daare o swɛ o swolim. 10Wɛ ma ta ded‑o we, “Ba nam daa bá taa bwoi nmo we Jakob. Nmo yere laam mo ye Isarele.”#Pulim 25:26; 32:28 Wɛ ma seene o leiri o yere dem se de taa ye ‘Isarele’.

11Wɛ laam ma ta‑o we, “Amo mo ye Dam-fɔrɔ Tu Wɛ wom. Ja dwi se n daare n puli de kɔgɔ. Teene dedɛ wó nwoŋi nmo yera ne, ye pwa de wó taa wora n dwi dem wone. 12A pɛ‑m tega kalo a déem na kwei a pa Abaraham de Izaak to mo se n ta‑n tei-ka. Amo nam ta wó pa nmo dwi dem na wó saŋe nmo kwaga to.” 13Wɛ na ŋɔɔne o ti to, o laam ma tutwoni o déem na zege jei selo ne to o kɛ, ye o daare Jakob. 14Jeiga kalo Wɛ na zege o ŋɔɔne ded‑o to mo Jakob déem kwei kandwɛ o chwi da. O ta ma kwei wo-nyɔɔro pɛɛre de nuga o lwo de baŋa ne o pa Wɛ. 15Jakob déem bwoŋi mɛ Wɛ na zege o ŋɔɔne ded‑o to we ‘Bɛtel’.

Racheli toone

16Ba déem ma zaŋe Bɛtel ne ba kwei chwoŋa ba maa kɛa. Ba na gɛ fee se ba yi Eferata to mo Racheli virigi puga se o lo, ye ko chɛ o yera ne. 17Lora kam na tiini ko chamma ka pa‑o konto to, mo ka-lworinu wolo na jaane‑o se o lo to tage ded‑o we, “Yé ta‑n lwia, se n daa‑n nɛ bakeira kadwoŋi mo.” 18Racheli déem maa wora o toa. O siu kom na lage ko kwori to, mo o pɛ o bakeira kam yere we ‘Benoni’.#35:18 Benoni kuri mo ye A-cham-bu. Bu wom kwo de déem ma pa o yere we ‘Benjamin’.#35:18 Benjamin kuri mo ye A-jeŋa-bu. 19Racheli ma te ye ba suli‑o Eferata chwoŋa kam yuu ne (Bɛtelehem mo konto). 20Jakob ma kwei kandwɛ o chwi Racheli yibeeli dem baŋa ne. De zem maama, kandwɛ dem konto mo bere mɛ yibeeli dem na zege to.

21Jakob daa ma kwei chwoŋa o kɛ, ye o vo o chwi o vwei Migadal Edera kwaga ne. 22Jakob ta na zoore laŋa kam konto ne to mo Ruben zoa o peini de o kwo ka-bia dedoa, o yere na ye Biliha to. Jakob ma ni ko ŋwa.

Jakob déem jege bu-baara fuga-balei mo.

23Leah na loge bu-baara balo to mo tento: Ruben déem mo ye Jakob bu-kwea, ko woli de Simeon, de Levi, de Judah, de Isakara, dedaane Zebulun.

24Racheli bu-baara bam mo tento: Josɛf dedaane Benjamin.

25Racheli ka-nyaane Biliha bu-baara bam mo tento: Dan dedaane Nafitali.

26Leah ka-nyaane Zilipa de bu-baara bam mo tento: Gad dedaane Asere.

Mo Jakob bu-baara bam mo konto, o kaana bam na loge ba pa‑o ye o déem ta wo Mesopotamia ne to.

Izaak toone

27Jakob ma zaŋe o jwoori o vo o kwo Izaak tei, Mamere ne. Jei sem konto déem bwola dedaane Kiriaf-Araba mo (Heboron mo konto). Abaraham de Izaak déem nam zoore dáane mo. 28Izaak bena déem ye bi dedaane funɔnɔ (180) mo. 29O déem tiini o kwe dedɛ ye o laam ba o te. O bu-baara bam Esawu dedaane Jakob déem ma kwei‑o ba suli.

Currently Selected:

Pulim 35: KBG

Highlight

Copy