Pulim 34

Sɛkɛm zi Dina o chɔge

1Dina déem ye bukɔ wolo Leah na loge o pa Jakob to mo. Dɛ dedwe mo o zaŋe o vo se o jeeri Kanaan teo kom bukwa bam. 2Hamora déem ye Hivi tu mo na ye pɛ jei sem konto ne. O maa jege bu-baaro, o yere na ye Sɛkɛm. Sɛkɛm na nɛ Dina to, o ma ja‑o o zi o chɔge. 3O boboŋa déem ma tiini ya zo Dina wone. O na swoi‑o to ŋwaane, o ma ŋɔɔne o kwoori‑o. 4Sɛkɛm ma ta de o kwo Hamora o we, “Tɔge bukɔ wonto nɛ n pa-ne se a ma a ke a kaane.”

5Jakob déem ma ni Sɛkɛm na chɔge o bukɔ Dina tei to, ye o ta maane we o bu-baara bam ta wo gaao ne mo ba nii o vara bam. O maa wo tage kolokolo, ye o cheigi-ba se ba jwoori sɔŋɔ.

6Sɛkɛm kwo Hamora déem ma vo Jakob tei se o ŋɔɔne ded‑o. 7Jakob bia bam ma nwoŋi gaao wo ba jwoori sɔŋɔ ye ba ni kolo na ke Dina to. Ba wo ma tiini ko chɔge ye ba bane de zaŋe ko ja gaale. Kokuri to, Sɛkɛm na zi Jakob bukɔ wom to, o yaale Isarele dwi dem mo. Keim dem konto nam ya wo maŋe se nɔɔno toŋe kɔtaa.

8Hamora ma ta de-ba o we, “Amo bu Sɛkɛm bochare maama wo abam bukɔ wom wone mo. Jan ja, sɛ-na se o di‑o o ma ke kaane. 9Pa-na se dé bia taa di daane. Yei-na á bukwa á pa debam, se á de swo debam de bukwa. 10Abam wó wane á ta‑á zoore dedaane debam. Nii-na tega kam maama mo tento abam yiga ne. Ta‑á zoore-na ka wone, se á ta‑á beeri á pipia ye á daare á yeigi tega á ta‑á tei.”

11Sɛkɛm laam ma ta de Dina kwo wom de o nabwa bam o we, “Sɛ-na á ke woŋo konto á pa-ne, se amo de wó pa abam kolo maama á na lage to. 12Abam ná tage kadiri wonnu tem de pɛɛra yalo amo na jege se a pa to, te ná ye tetei maama, amo wó ŋwe. Za‑á pa-na se a swo bukɔ wom se a ma a ke a kaane.”

13Taane dem Sɛkɛm de o kwo Hamora déem na jege ba ŋɔɔne to, Jakob bia bam seigi ba wo mo ba leiri-ba. Ba ke konto kolo ŋwaane Sɛkɛm maŋe o chɔge ba nakɔ Dina. 14Ba ma ta de-ba we, “Debam bá wane de ke konto. Debam bá kwei dé nakɔ dé yei dé pa baaro wolo na wo gwoni o peini to. Konto ye chaveera mo debam tei ne. 15Ko nam ye se abam mo sɛ se á ke woŋo dedoo á pa debam. Abam dedaane debam maŋe se dé taa ye bedwe mo peina gwonim baŋa ne. Abam jege se á gwoni á baara bam maama peina mo. 16Konto laam wó pa se pwola taa wora se dé kwei dé bukwa dé pa abam, se debam de taa swoi abam bukwa dé ma ke dé kaana. Dé maa wó taa zoore abam tei ne se dé maama taa ye dwi dedoa. 17Abam nam ná wo sɛ se á gwoni á baara peina, debam wó ja dé nakɔ mo dé viiri abam teo kom ne.”

18Ba taane dem maa lamma de pae Hamora de o bu Sɛkɛm. 19Nɔn-doŋo kom daa wo jaane taane dem o jeini. O bochare maama nam na wo Jakob bukɔ wom wone to, ko pɛ se o ke kolo maama ba na bere‑o se o ke to. O kwo sɔŋɔ kom nɔɔna maama déem maa nege‑o dedɛ.

20Hamora de o bu Sɛkɛm laam ma nwoŋi ba vo teo kom manchwo-peena ni ne, se ba ŋɔɔne de ba teo kom baara bam. 21Ba ma ta de-ba we, “Nɔɔna banto yeini ba ke debam lanyerane. Nam sɛ-na se dé pa-ba pwola se ba taa zoore debam teo kom ne. Ba ta wó wane ba taa beera ba ke pipiu ywo-seeni. Debam tega kam daga se ka yi banto de jeiŋa. Dé maa wó wane dé swo ba bukwa ye dé kwei debam de bukwa dé yei-ba. 22Woŋo kodoo mo daare se dé ke dé pa nɔɔna bam, se ba laam sɛ ba taa zoore dedaane debam se dé taa ye dwi dedoa. Ba lage se debam baara maama de gwoni dé peina nenɛɛne banto tete na ke tei to. 23Ko nam ná ke konto, ba naane, de ba jejegero, dedaane ba vara maama laam bá taa ye debam nyem mo na? Konto, pa-na se dé sɛ ba boboŋe dem, se ba taa zoore dedaane debam.”

24Baara balo maama na nwoŋi teo kom manchwo-peena yam ni to ma sɛ Hamora de o bu Sɛkɛm taane dem. Teo kom baara bam maama ma gwoni ba peina. 25Ba na gwoni ba peina yam ye da yatɔ yi to, mo Jakob bu-baara balei, Simeon dedaane Levi, zaŋe ba nwoŋi ba vo Sɛkɛm teo kom. Teo kom baara bam ta wo ba peina gwonim zonne dem wone mo. Dina nabwa balei bam ma kwei ba se-zɔɔro ba zaŋe teo kom baara bam baŋa ne ba go ba maama. 26Ba déem mɛ ba se-zɔɔro ba zɔ Hamora de o bu Sɛkɛm ba go, ye ba daare ba ja Dina Sɛkɛm sɔŋɔ kom ne ba ja nwoŋi ba viiri. 27Jakob bu-baara badaara de ma zo teo kom wo ba tɔge twa bam baŋa ne ba ŋɔ teo kom zela yam maama, se ba ma ŋwe ba nakɔ wom chaveera yam jene. 28Ba ma ja teo kom peeni, de bone, de ba naane, dedaane ba bonɛ maama mo ba ja viiri. Ba ta ma vere wonnu telo maama na wo teo kom wone to dedaane kolo maama na wo pwooni yiga ne to. 29Ba ma pɛ teo kom jejegero tem maama, ko woli de ba kaana de ba bia bam maama ba ja viiri. Ba déem ta na nɛ kolo maama sam dem ne to, mo ba lugi ba ja viiri.

30Jakob déem ma da ko ŋwaane o ta taane dento o bere Simeon dedaane Levi o we, “Abam jaane lɛɛro á ba amo yuu ne! Á pɛ se amo keim maama laam lwoi mo Kanaan tiina bam, de Pɛrizi tiina bam, dedaane nɔɔna balo maama na zoore logo konto ne to momwa ne. Abam yei we debam kɔgɔ kom ba daga. Logo kom tiina ná ke ni daane, ba laam wó zaŋe amo dedaane a sɔŋɔ kom maama baŋa ne ba chɔge debam maama.”

31Ba de ma leiri we, “Ko nam ya maŋe se nɔɔno wonto ma debam nakɔ wom o ma o ji ka-bworo se o ke kolo o na ke‑o to na?”

Currently Selected:

Pulim 34: KBG

Highlight

Copy