Pulim 33

Jakob jeeri Esawu

1Jakob ma kwoni o yuu o na Esawu na maa beene se o jeeri‑o, o de o baara bia yana bam. Jakob ma pɔɔre pɔɔre o bia bam o pa Leah, de Racheli dedaane o ka-nyaana balei bam. 2O pɛ se o ka-nyaana balei bam de ba bia mo wo yiga ne. Leah dedaane o de bia bam ma saŋe, ye Racheli dedaane o bu Josɛf maŋe kwaga ne. 3Jakob tete ma da yiga se o vo o zembaaro wom tei. O na maa vei to, o ma chɔɔle o yuu tega ne kuni berepɛ o jɔɔne‑o. 4Esawu tete nam duri kalam mo o vo o yi Jakob yera ye o daŋe o jea o ba ne o kukwori‑o. Ba ma ware daane de swono ye ba to keira ne. 5Esawu laam ma kwoni o yuu wɛɛne o na kaana bam de bia bam maama. O ma bwei‑o we, “Se banto ye bera mo ba wo nmo tei ne to?” Jakob ma leiri we, “Amo tu, mo bia balo Wɛ na dɛ o zaane baŋa ne o pa amo to.” 6Ka-nyaana bam laam ma fɔɔre ba yi, ba de ba bia, ba chɔɔle tega ne. 7Leah de o bia bam de daa ma ba, ba chɔɔle o yiga ne. Josɛf de Racheli de laam ma ba ba kweeli, ye ba de chɔɔle o yiga ne.

8Esawu ma bwei we, “Se vara balo maama amo na jeeri chwoŋa ne to bere bɛ mo?” O ma leiri we, “Amo tu, ko maama ye se ko pa a totoŋa yam su nmo yi mo.” 9Esawu ma ta o we, “A nyaane, amo maŋe a jege dedɛ mo. Nmo de ta‑n jege n wonnu.” 10Jakob maa we, “Jan ja, nmo yi ná su amo, se n sɛ n jwoŋi pɛɛre dento amo tei ne. A na nɛ nmo yibia to, ko nye de a nɛ Wɛ yibia mo, ko fɔge ko woli de nmo na jeeri amo de wopwolo tei to. 11Nam kwaane se n jwoŋi pɛɛra yalo ba na jaane ba ba pa‑m to, kokuri to Wɛ tiini o ke zaane a baŋa ne ye a jege kolo maama a na lage to.” Jakob na tiini o fe to, Esawu ma sɛ o jwoŋi pɛɛra yam.

12Esawu laam ma ta we, “Nam véi se dé kɛ. Amo wó kwogili‑m chwoŋa kam yuu ne.” 13Jakob ma ta ded‑o we, “Amo tu, nmo yei we bia bam tiini ba muri, ye a ta jege se a taa nii pei sem de naane dem baŋa ne mo, ba na jege vare-mɔra to ŋwaane. A ná lage se a tiini a kale vara bam konto dɛ dedwe wone, ba maama wó te mo. 14Konto to, amo tu, nmo da yiga n ta‑n via, se amo wó kale vara bam a ke yiga ne a taa vei mɛ mɛ, ye bia bam de tɔga. Amo laam wó ba a jeeri‑m Seyira ne.”

15Esawu ma leiri o we, “Ko nam ná ye konto, yage se a pa se a baara bam badwonna maŋe nmo tei ne ba taa tɔge ba via.” Jakob ma leiri we, “Amo tu, bɛ mo ye n jege n tete n daana? Nmo yi na su amo totoŋa yam to, ko maŋe.”

16Dento dɛ dem ne mo Esawu jwoori o pipiri o maa vei Seyira. 17Jakob de déem ma vo Sukofa. O déem ma lɔ sɔŋɔ da, ye o daare o tei pwei se o vara bam taa tigi da. Mo kokuri pa se jei sem konto yere ye Sukofa.#33:17 Sukofa kuri mo ye pwei.

18Jakob déem ya zege Mesopotamia ne ye o laam vo o yi Sɛkɛm. Teo kom konto déem wo Kanaan ne mo.#Pulim 12:6 O ma yi da de yazura ye o jeini teo kom pwooni yiga ne.#Pulim 28:15 19O déem na chwi o vwoa yam mɛ to, o ma yeigi tega kam Hamora bia bam tei ne. Sɛkɛm kwo mo konto. Tega kam jene déem ye lu-nyenno sabu-dala bi mo. 20O déem ta ma lɔ bimbini jei sem konto ne se o ma zuli Wɛ, ye o bwoŋi de yere we ‘Isarele tiina Wɛ wom mo ye Wɛ chekke dem’.

Currently Selected:

Pulim 33: KBG

Highlight

Copy