Pulim 32

Jakob ti o yiga se o jeeri Esawu

1Jakob de ma kwei o chwoŋa o maa kɛa. Wɛ malese ma ba se jeeri‑o. 2O de na nɛ-se to, o maa we, “Wɛ na tei o vwoa de o kwaga tɔgena bam mɛ to mo tento!” O déem bwoŋi jei sem yere we ‘Mahanayim’.

3Jakob ma pa nɔɔna ni se ba da yiga ba vo o zembaaro Esawu tei Seyira ne. Edom teo kom mo konto. 4O na lage o toŋe-ba to, o ma bere-ba we, “Á na wó ta kolo dedaane amo tu Esawu to mo tento:

‘Nmo tontoŋeno Jakob we, A déem zoore Laban tei ne mo ko dáane se ko ba ko yi zem. 5A jege naane de bonɛ de peeni de bone, dedaane kabɛ, baara de kaana maama mo. Konto ŋwaane mo a toŋe kwora kanto a pa‑m se ko pa amo totoŋa yam su nmo yi.’ ”

6Nɔɔna bam na via ye ba jwoori Jakob tei ne to, ba ma ta we, “Dé vei dé yi nmo zembaaro Esawu tei. O de nam maa beene nmo tei mo se o jeeri‑m, ye baara bia yana wo o tei ne.” 7Jakob na nigi konto to, foone ma tiini de ja‑o ye o wo chɔge. Ko ma pa se o pɔɔre nɔɔna balo na wo o tei ne to kuni belei, ko woli de o naane dem, de o pei sem, de o bone dem, dedaane o kona yam maama. 8Kokuri to, o boŋe mo we, “Esawu ná tu o yi kɔgɔ popɔra dedoa o chiŋi-ka, popɔra kadwoŋi kam wó duri ka lu.”

9O laam ma lwoori Wɛ ye o we, “Amo Tu Baŋa Wɛ, wom na ye a kwoa Abaraham de Izaak Wɛ to, nmo ya tage de amo n we ‘Jwoori n teo de n chorro tem tei ne, se amo wó ke‑m lanyerane.’ 10Tɔ. Amo ye nmo tontoŋeno mo. A bere a wo maŋe se nmo ya duri amo yibwona ye n fɔge n nii a baŋa ne lanyerane de chega. Amo déem na bɛ Jɔdan buga kam a viiri to, a zei a nacheiga yerane mo. A laam nam jwoori ye kɔgɔ popɔra belei mo wo a tei ne, nɔɔna de vara maama. 11Jwoŋi-ne n yage amo zembaaro Esawu jeŋa ne, se amo jege foone we o wó ba o chiŋi amo, de kaana bam dedaane bia bam maama. 12Nmo nam maŋe n ta we ‘A wó seene a ke‑m lanyerane. A ta wó pa se n dwi dem taa puli dedɛ nenɛɛne naneo ni kasolo na daga tei to mo. Nɔɔn-nɔɔno nam bá wane o nii o ga o ti.’ ”#Pulim 22:17

13Tete dem konto ne Jakob ma maŋe da o peini. Tega na poore to, o ma twori pɛɛra o jejegero tem wone, se o pa o zembaaro Esawu. 14Pɛɛra yam mo tento: Bo-chwa bia yalei de bo-bale finlei, dedaane pi-chwa bia yalei de pi-bɛ finlei, 15ko woli de kon-chwa fintɔ de ya bia, de na-kana finna, de nabɛ fuga, dedaane bona-chwa finlei, de bona-bɛ fuga. 16O ma pɔɔre pɛɛra yam konto maama kɔgɔ de kɔgɔ o ke o tontoŋena jeŋa ne. O laam ma ta de-ba we, “Da-na yiga á ta‑á via se a beene. Za á pa-na se pwola taa wora vara bam kɔgɔ dedoa dedoa tetare laŋa ne ye á yé ta‑á twɛ daane.” 17O ma daare o ta o bere wolo wom na tɔge ba maama yiga to we, “Amo zembaaro Esawu ná jeeri‑m ye o bwei we ‘Nmo ye wɔ nɔɔno mo? N nam maa n vei yei ne mo, ye wɔ mo tei vara banto maama nmo na jege-ba n kale to?’, 18se nmo ta ded‑o we ‘Ba ye nmo nyaane Jakob nyem mo. Ko nam za ye pɛɛre mo o na pɛ o tu Esawu. O tete nam wo kwaga ne o beene.’ ”

19Jakob ta ma ta konto dwoŋi o bere balei tu wom de batɔ tu wom dedaane balo daa ta na daare ye ba tɔge vara bam kwaga to, ye o we, “Abam de ná jeeri Esawu, á jege se á ta konto mo dedaane‑o. 20Ta‑á yei-na se á za ta we ‘N nyaane Jakob wo kwaga ne o beene.’ ” Kokuri to, o déem boŋe o yuu ne mo we, “Esawu ná nɛ pɛɛra yam a na pɛ se ya tɔge a yiga ya kɛ to, ko wó wane ko pa se o bochare zuri, se amo laam ná yi o tei, dɛ delo o wó jeeri-ne lanyerane.” 21Konto to, Jakob pɛɛra yam ma lwoori yiga ya kɛ, ye o tete maŋe jei sem ne o peini se tega ba ka poore.

Jakob jaŋe dedaane Baŋa Wɛ

22Dento tete dem ne Jakob laam ma zaŋe o ja o kaana balei bam, o woli de o ka-nyaana balei bam dedaane o bia fuga-dedoa bam, ye ba to Jaboke buga kam ba bɛ. 23O déem na jaane-ba o pa ba bɛ konto to, o ma daare o pa se o jejegero tem maama de tɔge te bɛ. 24Jakob tete ma maŋe dáane o yerane. Nɔɔno wodwoŋi ma ba o zo jaŋa ded‑o taa, se tega laam ba ka poore. 25Nɔɔno wom na tu o maane we o ware‑o se o ja o de tega ne to, o ma dwei Jakob takeiri kwi sem na jeeri daane mɛ to. Ko na ke konto to, ko déem pɛ se o takeiri mo ywori, o de nɔɔno wom jaŋa kam ŋwaane.

26Nɔɔno wom laam ma ta we, “Yage-ne se a viiri, se tega lage ka poore mo.” Jakob de ma leiri we, “Nmo ná wo sɔɔle Wɛ swolim n yage amo yuu ne, amo bá sɛ a yage‑m se n viiri!” 27Nɔɔno wom ma bwei‑o we, “Nmo yere mo bɛ?” O ma leiri we, “A yere mo Jakob.” 28Nɔɔno wom laam maa we, “Nmo yere daa bá taa ye Jakob, n yere laam wó taa ye Isarele mo, kokuri to nmo jaŋe jaŋa de Wɛ, ye n ta jaŋe dedaane nabiina.#32:28 Isarele kuri mo ye o jaŋe jaŋa de Wɛ. Nmo nam wane.”

29Jakob laam ma ta we, “Jan ja, ta nmo yere n bere-ne.” O ma leiri we, “Bɛŋwaane mo ye n bwei amo yere bwia?”#Yiga tiina 13:18 O laam ma zege da o kwei Wɛ zaane o ma swɛ Jakob swolim. 30Jakob ma bwoŋi jei sem konto yere we ‘Peneli’, ye o we, “Amo nɛ Wɛ yibia dedaane yibia ye o duri amo yibwona pa se a wo tege.”#32:30 Peneli kuri mo ye Wɛ yibia.

31Wɛ puli mo de maa diini wɛyuu ye Jakob zege Peneli ne o maa kɛa. O ma via ye o dua, o takeiri dem na ywori to ŋwaane. 32De zem maama, Isarele tiina bam ba sɛ ba di ŋɔŋɔ kolo na twoŋi takeiri kwi sem to. Ko maa ye nɔɔno wom déem na dwei Jakob takeiri dem kanto jei sem seeni to ŋwaane mo.

Currently Selected:

Pulim 32: KBG

Highlight

Copy