Pulim 28

1Rebeka déem na tage konto to, Izaak ma toŋe o bwoŋi Jakob. O ma ta ded‑o o we, “Wɛ taa wo nmo tei ne. Yé zaŋe n di Kanaan tiina bukɔ n ma n ke kaane. 2Zaŋe n vo Mesopotamia leile konto, n nu wom kwo Bɛtuweli sɔŋɔ ne, se n di kaane dáane, nmo nu nabɔ Laban bukwa bam wone. 3Dam-fɔrɔ Tu Wɛ wom#28:3 Dam-fɔrɔ Tu Wɛ wom: Hiburu = El Shaddai wó swɛ nmo swolim ye o pa se á ja dwi á daare á puli dedɛ se á ji nɔn-kɔgɔ. 4Wɛ wó swɛ nmo de n dwi maama swolim, nenɛɛne o na maŋe o ke o pa n nabaaro Abaraham tei to mo, se á wane á jwoŋi tega kanto á na zoore da nenɛɛne veira tei to á ta‑á tei, nenɛɛne o na pɛ Abaraham tei to.” 5Izaak ma bane Jakob o yage chwoŋa ne, ye o de ma kɛ Mesopotamia. O déem ma vo o zoore Aram tu Bɛtuweli bu Laban tei ne. Wonto déem ye Jakob de Esawu nu Rebeka nabɔ mo.#Pulim 24:29

Esawu di kaane wodwoŋi

6Esawu ma ni Izaak na ke tei o kwei Wɛ zaane o ma swɛ Jakob swolim ye o toŋe‑o se o vo Mesopotamia o beeri kaane dáane to. O ta ma ni o na pɛ Jakob ni we, o yé di kaane Kanaan tiina bukwa bam wone. 7O ma ni Jakob na sɛ ba kwo dedaane ba nu ni tei ye o seene o vo Mesopotamia to. 8Esawu laam ma lɔre we Kanaan tiina bukwa bam o na di o ma o ke o kaana to wo su o kwo Izaak yi kɔtaa.#Pulim 26:35 9Ko ma pa se o vo o kwo zembaaro Isameli tei o di Mahalafa. Wonto ye Nebayofa nakɔ ye o ta ye Abaraham bu Isameli bukɔ. O ma di‑o o woli kaana balo o na maŋe o jege to wone.

Jakob dwɛ dendwɛ Bɛtel ne

10Jakob déem ma nwoŋi Beeriseba ne o laam maa vei Haran. 11Tega na wora ka yi, ye o yi jei sedwoŋi to mo o maŋe dáane se o peini se tega poore. O déem ma kwei kandwɛ dedoa na wo jei sem konto ne to o yeiri o yuu, ye o tigi o dɔa. 12O ma dwɛ dendwɛ o na nateini de kuri seeni na wo tega ne ye de yuu kom seeni yi Wɛ telaao ne to. Wɛ malese sem laam maa dɔɔle de baŋa ne se diini ye se tu tega ne. 13Baŋa Wɛ laam ma ba o zege da ye o we, “Amo mo ye Baŋa Wɛ, nmo kwo Abaraham Wɛ wom, dedaane Izaak Wɛ wom. Ko ná ye tega kalo baŋa ne nmo laam na tigi tento to, amo wó kwei-ka a pa nmo de n dwi dem. 14Amo wó pa se n dwi dem taa daga dedɛ nenɛɛne tega baŋa kasol-bia na ye tei to mo. Abam wó puli ye á daare á jage á yi logo baŋa jei maama ne, wɛ-zoore seeni dedaane wɛ-puli seeni, se á daare á yi baŋa seeni dedaane tega-kuri seeni. Logo kom baŋa dwi tiina bam maama wó da nmo de n dwi dem baŋa ne mo se ba de na zaane amo tei ne.#Pulim 12:2 15Nii! Amo wó taa wo nmo tei ne ye a taa nii nmo baŋa ne mɛ maama nmo na wó vo to. Amo wó ja‑m a jwoori a ba se n jeini tega kanto baŋa ne. Amo bá fɔge a yage nmo kɔtaa. Amo nam wó seene a ke amo na pwooli se a ke kolo a pa nmo to.”#Pulim 33:18

16Jakob laam ma zaŋe dɔɔm wone. O ma boŋe we, “Baŋa Wɛ seene o wo jei sento ne mo ye amo ya wo lɔre ko ni ne.” 17Foone ma ja‑o ye o we, “Nii jei sento na jege foone tei! Ywo-seeni dae jei yɔɔ yerane, ko ye Wɛ sɔŋɔ kom mo. Mo Wɛ telaao manchwo-peena yam mo tento.”

18Tega na poore zezeŋa ne to, Jakob ma kwei kandwɛ delo o na mɛ o yeiri o yuu kom to, o cheili-de wɛɛne nenɛɛne ywei dwoŋi ye o laam lwo nuga de baŋa ne.#Pulim 28:18 19O ma bwoŋi jei sem konto yere we ‘Bɛtel’,#28:19 Bɛtel kuri mo ye Wɛ Sɔŋɔ. ye ba déem ya bwoi teo kom konto we ‘Luzi’ mo.

20Jakob laam ma du duuri de Baŋa Wɛ we, “Nenɛɛne nmo ná wó taa wo amo tei ne ye n nii amo baŋa ne a chwoŋa kanto maama yuu ne, ye n ná wó pa-ne wodiu se a di dedaane gwaaro se a zo, 21ye amo laam ba a jwoori a kwo sɔŋɔ de yazura, nmo Baŋa Wɛ wó taa ye amo Wɛ. 22Amo wó daare a kwei kandwɛ dento a na chwi nenɛɛne ywei dwoŋi to mo se de taa ye nmo Wɛ sɔŋɔ kom. Woŋo kolo maama nmo na ke amo jeŋa ne to, amo wó le popɔra dedoa wonnu fuga maama wone a pa‑m.”#Pulim 14:20

Currently Selected:

Pulim 28: KBG

Highlight

Copy