Pulim 27

Jakob jwoŋi Izaak swolim dem

1Izaak déem ma kwe ye o yia yam dwei. O déem ma bwoŋi o bu-kwea Esawu ye o laam ta ded‑o we, “Amo bu.” O de ma leiri we, “Nii-ne da.” 2Izaak maa we, “Amo laam ye nɔn-kwea mo ye a yeiri amo toone dɛ. 3Konto to, kwei n taŋa kam de ka chena, se n vo gaao n tɔɔne n go kago-varem n pa-ne.#Pulim 25:28 4Laam kwei varem wom n ma n ke wodiu na ywomma ne a na yeini a lage tetei to, se n daare n ja n ba n pa-ne se a di. Nmo ná ke konto, a laam wó kwei Wɛ zaane a ma swɛ nmo swolim, se a daare a te.”

5Izaak déem na wora o ŋɔɔne de Esawu konto to, Rebeka ya zege o cheigi mo. Esawu na zaŋe o nwoŋi o kɛ gaao se o go varem to, 6Rebeka ma ta de Jakob we, “Nii ywo, amo nigi nmo kwo na tage de n zembaaro we, 7‘Véi n go kago-varem n ja n ba n saŋe wodi-laao n pa-ne se a di, se a laam kwei Baŋa Wɛ zaane a ma swɛ n swolim, se a laam daare a te.’ 8A bu, fɔge n cheigi, se n daare n ke kolo maama a na wó bere‑m to. 9Zo vara bam wone n le bebale selei n ja n ba n pa-ne. Amo laam wó ma-te a ma saŋe n kwo wodiu, se ko taa ywomma ne o na swoi-ko tei to. 10Se n laam ja n zo n pa n kwo se o di. Konto wó pa se o sɔɔle Wɛ swolim o yage n yuu ne, ye o laam daare o te.”

11Jakob ma ta de o nu Rebeka we, “Nmo yei we amo zembaaro Esawu ye nɔn-kogo mo, ye amo ye nɔn-siswola. 12Amo kwo ná taane amo o nii, ko wó taa nye nenɛɛne amo wora a gane‑o mo, ye amo ya na beeri se o sɔɔle lam o yage a yuu ne to, a laam wó jwoori a ja lwarem mo a ba a pa a tete.” 13O nu wom maa we, “Amo bu, yage se sɔɔlem dwi maama ba amo baŋa ne. Nmo za n ke amo na we n ke tei to. Véi n ja bone dem n ba n pa-ne.”

14O ma seene o vo o ja-de o ba o pa o nu, ye o de saŋe wodiu kolo na ywomma to, nenɛɛne o kwo wom na lage wodiu kom tei to. 15Rebeka laam ma kwei o bu-kwea Esawu gare-laaro na wo o tei ne to, o zo o bu-balaŋa Jakob. 16O daa ta ma kwei bone dem tankwallo tem o ma o kwoli Jakob je sem dedaane o ba dem mɛ na ye siswolo to. 17O laam ma kwei wodi-ywoŋo kom, de bworobworo kom o na ke to o pa o bu Jakob.

18Jakob ma vo o kwo tei ye o we, “A kwo.” O de ma leiri we, “Amo bu wɔ mo konto?” 19Jakob ma leiri o kwo we, “Amo ye nmo bu-kwea Esawu mo. Amo nam ke nenɛɛne nmo na tage tei de amo to mo. Konto to, zaŋe n jeini n di amo wodiu kom, se n laam daare n sɔɔle Wɛ swolim n yage amo yuu ne.” 20Izaak ma bwei‑o we, “Amo bu, n ke tetɛ mo n na-ko lela tento?” O ma leiri we, “Nmo Tu Baŋa Wɛ mo woli-ne konto.” 21Izaak laam ma ta de Jakob we, “Amo bu, nam fɔɔre n yi amo yera, se a taane‑m a nii nmo seene n ye amo bu-kwea Esawu mo naa n dae.” 22Jakob ma fɔɔre o yi o kwo Izaak tei. O ma taane‑o o nii ye o we, “Kwora kam ye Jakob kwora mo, ye jea yam laam ye Esawu jea.” 23O maa wo lɔre‑o, kokuri o je sem déem jege koro yerane mo, ne Esawu je sem na ye tetei to. O laam ma sɛ se o kwei Wɛ zaane o ma swɛ o bu wom swolim. 24O daa ma bwei‑o we, “Konto to, nmo seene n ye amo bu-kwea Esawu mo na?” O ma leiri we, “Ɛɛ.”

25Izaak laam ma ta we, “Ja n kago-varem nɔna yam n ba n pa-ne se a di, se a laam daare a kwei a swolim dem a pa‑m.” Jakob ma ja o yi o tei o pa‑o ye o di. O ta ma pa‑o sana ye o nyɔ. 26O kwo Izaak laam ma ta ded‑o we, “Amo bu, fɔɔre n yi ywo, se n kukwori-ne.” 27O de ma yi o tei o kukwori‑o. Izaak ma ni o gwaaro tem lwom, ye o daare o o sɔɔle Wɛ swolim o we, “Nii mo! Amo bu wom lwom dem nye nenɛɛne pwola kalo Baŋa Wɛ na ke zaane o yage ka baŋa ne to lwom mo.

28Konto ŋwaane, Wɛ wó pa se nyɔnɔ nwoŋi wɛyuu

ko pa se nmo tega kam fɔge ka ke wodiiru dedɛ,

se n mena de n sa-doora gaale.

29Wɛ wó pa se dwi-gɛ tiina taa toŋe ba pae nmo

ye nɔɔna tiiri nmo yiga ne ba pa‑m zula.

Wɛ wó pa se n ta‑n ye n chorro tem yuu tu,

ye nmo nu-bia bam maama wó tiiri nmo yiga ne ba pa‑m zula.#Pulim 25:23

Balo na sɔɔle lwarem ba yage nmo baŋa ne to

de wó jwoori ba na sɔɔlem konto dwoŋi ba baŋa ne.

Balo nam na sɔɔle lam ba yage n yuu ne to

de wó jwoori ba na zaane.”

Esawu lwoori zaane o kwo tei ne

30Izaak na yɔɔre o sɔɔle Wɛ swolim o pa Jakob o ti ye Jakob nwoŋi pwooni o daare o kwo wom to, mo o zembaaro Esawu yɔɔre o zege gaao ne o yi. 31Wonto de ma ke wodi-ywoŋo o ja o zo o kwo tei ne. Esawu laam ma ta o kwo we, “A kwo, zaŋe n jeini se n di a kago-varem nɔna yam, se n daare n sɔɔle Wɛ swolim n yage amo yuu ne.” 32O kwo Izaak ma bwei‑o we, “Nmo ye wɔ mo?” O ma leiri we, “Amo ye nmo bu-kwea Esawu mo.” 33Izaak ma ni ye ko sɔɔre o yera pa se ya tiini ya sae. O ma bwei‑o o we, “Se wɔ nam mo jaane kago-varem wom o zo ywo o pa amo to? Amo yɔɔre a di a ti mo konto ye nmo ma n zoore to, ye a maŋe a sɔɔle Wɛ swolim a pa wonto. Wonto nam wó seene o na Wɛ zaane dem konto mo!”

34Esawu na nigi o kwo taane dem konto to, o ma tiini o laare wɛ-wɛ ye o chwoosa o kwo wom tei ne we, “A kwo, a lwoori‑m! Sɔɔle Wɛ swolim n pa amo de!” 35O ma leiri‑o we, “Nmo nyaane wom zo amo tei mo o gane-ne o ma jwoŋi Wɛ swolim delo ya na ye nmo nyem to.”

36Esawu maa we, “O yere na ye Jakob to seene ko ye chega mo! O gane amo tento o ke kuni belei mo.#27:36 Jakob kuri mo nye nenɛɛne gengan-nyeno. O maŋe o ŋɔ amo bu-kwea nyɔɔre dem, ye leile konto o daa vere Wɛ swolim delo ya na ye a nyem to o woli da!” O laam daa ma bwei o kwo we, “Konto, n daa ta jege Wɛ swolim se n kwei n pa-ne na?” 37Izaak ma leiri Esawu we, “Amo maŋe a pa se wonto ji nmo yuu tu ye a ta pa se o nu-bia maama taa ye wonto kabɛ. A nam ta kwei wodi-fɔrɔ dedaane sa-doora a pa‑o. Konto to, amo bu, bɛ daa mo wó daare se a kwei a pa‑m?”

38Esawu ma fɔge o ta de o kwo o we, “Amo kwo, nmo bere n wo daare Wɛ swolim dedwoŋi na? Nam sɔɔle Wɛ swolim n yage amo de yuu ne! A kwo! A kwo!” Esawu ma to keira ne baŋa baŋa.

39O kwo Izaak ma leiri we:

“Nmo zoorem jei bá taa ye tega kalo na ke wodiiru dedɛ.

Tega kam ta bá na wɛyuu nyɔnɔ kom.

40Nmo wó ta‑n ke jara mo n zoora.

Nmo wó ta‑n toŋe n pae n nyaane wom ne kabaa tei.

Ko laam nam ná zo nmo yera,

nmo wó vere n tete wonto dam kuri ne.”

41Esawu na nigi konto to, o ma done Jakob, ba kwo na kwei Wɛ zaane o ma swɛ wonto swolim to ŋwaane. O ma ta o tete ne we, “Debam kwo bá dáane ye o te. O lua kam ni ná ti, amo laam wó go a nyaane Jakob.”

42Rebeka déem ma ni o bu-kwea Esawu na boŋe tei to. O ma toŋe o bwoŋi o bu-balaŋa Jakob ye o ta ded‑o we, “Nmo zembaaro wom boŋe se o go‑m mo se ko pa o bane zuri. 43Konto to, ke tetei amo na wó bere‑m to: Duri n vo amo nabɔ Laban tei Haran ne. 44Ta‑n zoore wonto sɔŋɔ ne se ko taa nii maŋa kalo nmo zembaaro wom bane dem na wó zuri to. 45O bane dem ná seene de zuri ye o swei nmo na toŋe kolo o yera ne to, amo laam wó pa ni se nmo zege dáane n jwoori ywo. Bɛŋwaane mo amo wó yɔɔre a ga abam balei dɛ dedwe wone?”

46Rebeka laam ma ta de Izaak o we, “Amo yera laam chɛ mo de Hiti bukwa banto Esawu na di to. Jakob de nam daa ná lage o di Hiti tiina bukɔ jei sento ne, amo toone bere de wó taa gare a ŋwea.”

Currently Selected:

Pulim 27: KBG

Highlight

Copy