Pulim 26

Izaak dedaane Abimeleka taane

1Maŋa kadwoŋi ne kana déem daa ma jwoori ka ba tega baŋa, nenɛɛne ka na maŋe ka ke ye Abaraham ta ŋwe to. Izaak ma zaŋe o vo Filisi tiina pɛ Abimeleka tei Gerare ne. 2Baŋa Wɛ ma ba Izaak tei o we, “Yé zaŋe n vo Ejipti teo kom. Nam ta‑n zoore jei sem ne mɛ amo na wó bere‑m to. 3Maŋe n jeini teo konto ne. Amo wó taa wo nmo tei ne ye a swɛ nmo swolim. Amo wó kwei tega kanto maama a pa nmo de n dwi dem ye a daare a pa se duuri delo a na pwooli de nmo kwo Abaraham to seene de ji chega.#Pulim 12:2 4Amo wó pa se nmo dwi dem puli dedɛ de taa daga nenɛɛne wɛyuu chalechwe sem na daga tei to, ye a pa ba taa tei tega kanto maama. Ko nam ta wó tɔge nmo dwi dem baŋa ne mo se logo baŋa teene dem maama na zaane ba de yuu ne, 5Ko maa ye Abaraham na sɛ amo ni to ŋwaane mo. O sɛ amo ni-kaana yam, de a chullu tem, de chwo-laaro telo a na bere‑o to.”#Pulim 22:18

6Izaak ma seene o vo o zoore Gerare ne. 7Rebeka na tiini o lamma to ŋwaane, Izaak déem kɔre we teo kom nɔɔna wó ja‑o ba go mo o kaane wom ŋwaane. Ba ná bwei o bwia, o maa tɛ we, Rebeka ye o nakɔ mo. O déem kɔre mo se o ta we, o ye o kaane.#Pulim 12:11-13

8Izaak na zo da o dáane fee to, mo pɛ Abimeleka tɔge o sɔŋɔ takworo ne o na Izaak na wora o di bwoŋa dedaane o kaane Rebeka. 9Abimeleka na nɛ konto to, o laam ma bwoŋi Izaak ye o we, “O seene o ye nmo kaane mo! Ko laam nam ke tɛ mo ye nmo ta n we, o ye n nakɔ mo?” Izaak ma leiri we, “A kɔre we ba wó go-ne a kaane wom ŋwaane mo.” 10Abimeleka laam maa we, “Bɛ mo ye nmo ke debam konto? Baara bam dedoa ya wó wane o peini de n kaane wom, ye konto ya wó pa chaveera ja debam.”

11Abimeleka laam ma pa kwora yi o nɔɔna bam maama we, “Wolo maama na wó bɛɛse nɔɔno wonto naa o kaane wom to, toone mo wó taa ye kotu ŋweero.”

12Izaak déem ma du wo-dwa tega kam baŋa ne. Bene dem konto ne o ma na wodiiru dedɛ, kuni bi, Baŋa Wɛ na swɛ o swolim to ŋwaane. 13O déem ma duni. O duum dem maa tiini de pula, pa se o ji dedɛɛro kamunu. 14O jejegero tem daga te gaale, te maa ye peeni de bone de naane de tontoŋena dedɛ. Filisi tiina bam déem ma zwe kazwe ded‑o. 15Ko ma pa se ba kwei teero ba ma suuri vola yalo maama Abaraham tontoŋena bam déem na koga ye o ta ŋwe to.

16Abimeleka ma ta de Izaak we, “Nwoŋi n viiri, se nmo laam tiini n damma n dwoi debam.” 17Izaak ma fɔɔre o kɛ o vo o pu o vwei Gerare bwolo kom ne ye o zoore da. 18Izaak déem ma jwoori o gwaare vola yam Filisi tiina bam na suuri o kwo Abaraham toone kwaga ne to. O ta ma jwoori o pa-ya yera yalo o kwo déem na mɛ o bwoŋi-ya to.

19Izaak tontoŋena bam déem ma ko vole dedwoŋi bwolo kom ne ba yi na-ŋona. 20Gerare tiina nayera laam ma mage ni-kantɔgɔ de Izaak nayera bam ba we, “Vole dem na bam ye debam nyem mo!” Izaak ma pa vole dem yere we ‘Eseke’, ba na mage ni-kantɔgɔ de baŋa ne to ŋwaane.#26:20 Eseke kuri mo ye ni-kantɔgɔ. 21Ba daa ta ma ko vole dedwoŋi, ye ba ta mage ni-kantɔgɔ dento de baŋa ne. O ma pa vole dem konto yere we ‘Sitina’.#26:21 Sitina kuri mo ye sebaŋa.

22Izaak ma zaŋe o fɔɔre dáane o vo o ko vole dedem, ye nɔɔn-nɔɔno daa wo ke jara dento baŋa ne. O ma pa de yere we ‘Rehobofa’,#26:22 Rehobofa kuri mo ye pwola ye o we, “Baŋa Wɛ laam pɛ debam pwola se dé jeini de yazura, ye debam wó yerege tega kam baŋa ne.”

23Izaak ma zaŋe dáane o jwoori o vo o yi Beeriseba. 24O na yi da to, tete dem konto ne Baŋa Wɛ ma ba o tei ne ye o we, “Amo mo ye nmo kwo Abaraham Wɛ wom. Yé ta‑n kɔre foone, se amo wo nmo tei ne. Amo wó swɛ nmo swolim. A nam ta wó pa se n dwi dem kɔgɔ puli, amo tontoŋeno Abaraham ŋwaane.” 25Izaak maa tigisi kandwa o lɔ bimbini dáane ye o bwoŋi Baŋa Wɛ yere o zuli‑o. O ma pu o vwei jei sem konto ne, ye o tontoŋena bam de ko vole.

26Ba na wora konto to, Pɛ Abimeleka zege Gerare ne o ba o tei, wonto de o nakwe Ahuzafa dedaane o jar-keira bam yiga tu Fikola. 27Ba na tu to, Izaak ma bwei-ba o we, “Abam daa maa á beene amo tei se á ke bɛ mo? Ko dae abam déem mo chuli amo, ye á daare á zeili-ne á tei ne na?” 28Ba ma leiri we, “Debam maane we Baŋa Wɛ seene o wo nmo tei ne. Dé laam maa we, ko jege se dé du duuri mo se dé ke ni-mɔrɔ daane. Sɛ se debam ke ni-sɛɛm de nmo 29se nmo yé ke debam lwarem. Debam déem ke nmo lanyerane mo, se ko dae lwarem kɔtaa, ye dé daare dé bane‑m dé pa se n viiri dedaane yazura. Nmo laam maa n ye wolo Baŋa Wɛ na yɔɔre o swɛ nmo swolim to.”

30Izaak ma sɛ ye o ke kuri o pa-ba. Ba ma di wodi-fɔrɔ ba daare ba nyɔ. 31Tega na poore to, zezeŋa ne nɔɔna bam ma du duuri ba ke ni-sɛɛm daane. Izaak ma bane-ba o yage chwoŋa ne, ye ba de viiri de yazura.

32Dento dɛ dem ne Izaak tontoŋena bam ma ba o tei ba ta ded‑o vole delo ba ya na koge to taane. Ba maa we, “Dé koge dé yi na jei sem ne!” 33O ma bwoŋi vole dem konto we, Siba,#26:33 Siba kuri mo ye duuri. ye dedaane zem maama teo kom konto yere mo ye Beeriseba.#26:33 Beeriseba kuri mo ye vole delo ba na dugi duuri ko ŋwaane to.

34Izaak bu Esawu na yi bena finna to mo o di Hiti tiina bukwa balei o ma o ke o kaana. Dedoa déem ye Beeri bukɔ Judif mo, ye wodwoŋi wom ye Elon bukɔ Basemafa. 35Banto déem tiini ba ja wo-chechɔgɔ mo ba ba ba pa Izaak de Rebeka.#Pulim 28:8

Currently Selected:

Pulim 26: KBG

Highlight

Copy