Pulim 16

Hagara dedaane Isameli taane

1Abaram kaane Sarai déem nam ya wo loge bu o pa‑o. O déem nam ya jege ka-nyaane mo, o na ye Ejipti tiina bukɔ. Ka-nyaane wom yere déem mo ye Hagara. 2O na wo loge to ŋwaane o ma ta de o baro Abaram we, “Baŋa Wɛ chege amo de bu-lore. Nam véi n peini de a ka-nyaane wom, se dɛ delo ko wó tɔge wonto baŋa ne mo se amo na dwi.” Abaram ma sɛ Sarai na tage tei to.

3Ka maŋa kam ne, Abaram déem zo Kanaan teo kom ne bena fuga mo. Sarai ma kwei o ka-nyaane Hagara o pa‑o se o ma o ji o kaane. 4O ma peini de Hagara, ye o ja puga. Hagara ma na nɛ we o jege puga to, o daa maa ba nege Sarai. 5Ko ma pa Sarai ta de Abaram we, “Nmo mo pɛ se amo jege yaara yanto maama a di, kokuri to, a kwei a ka-nyaane a ke n jeŋa ne. O laam na nɛ we o jege puga to, o daa ba nege amo. Baŋa Wɛ mo wó di debam balei taane dento, ko ná ye amo yiga naa nmo yiga mo.” 6Abaram ma leiri‑o o we, “Wonto ta ye nmo ka-nyaane mo, nmo mo tei o jea de o nɛ maama, se n ke‑o n boboŋa na lage tei to.” O na tage konto to, Sarai ma bobo se o taa jege Hagara o yaara. Ko laam ma pa se Hagara duri o tei ne o daare‑o.

7Hagara ma vo o zo kagoa kam wone o vo o yi buli-yi. Ko déem bwola de Sura chwoŋa kam mo. Baŋa Wɛ maleka kam laam ma ba o tei, 8ye ka we, “Sarai ka-nyaane Hagara, nmo nwoŋi yei ne mo tento, ye n nam ma n vei yei mo?” O ma leiri we, “A maa dura se a lu a tu Sarai jeŋa ne mo.”

9Maleka kam laam ma ta ded‑o we, “Jwoori n vo n ke n tete n tu wom jeŋa ne se n daare n ta‑n toŋe n pa‑o. 10Amo wó pa se n dwi puli lanyerane pa se nɔɔn-nɔɔno bá wane-ba o ga o ti.” 11Maleka kam ma ta ded‑o ka woli da ka we:

“Nmo laam zege de puga mo tento

se n lo bakeira.

Nmo jege se n pa o yere we ‘Isameli’, #16:11 Isameli kuri mo ye Wɛ niga.

kokuri to, Baŋa Wɛ nigi n wo-chechɔgɔ kom.

12O wó taa ye nenɛɛne bonaga kalo

ba na bá wane ba ja-ka to mo.

O bá taa lage nɔn-dwi maama taane,

ye nɔɔna maama de bá taa lage o taane.

Wonto de o chorro wó taa chuli daane mo.”

13Hagara na nigi maleka kam konto to, o ma boŋe o tete ne we, “Amo yia seene ya na Baŋa Wɛ wolo na nae amo to.” O ma kwei yere dento o pa Baŋa Wɛ we ‘Wɛ wolo na nae amo to.’ 14Konto ŋwaane mo ba déem pɛ vole dem konto yere we ‘Beeri Lahayi Royi’.#16:14 Beeri Lahayi Royi kuri mo ye Wɛ wolo na wora ye o nae amo to vole dem. Vole dem ta wora tento, de zege Kadese de Bereda tetare laŋa ne mo.

15Hagara laam ma lo bakeira o pa Abaram. Abaram de ma pa bu wom yere we ‘Isameli’. 16O na loge bu wom konto to, dedaane Abaram déem jege bena funɔnɔ-yaredo (86) mo.

Currently Selected:

Pulim 16: KBG

Highlight

Copy