Pulim 15

Wɛ gwoni ni de Abaram

1Konto maama na ke ko kɛ to, Baŋa Wɛ ma ba Abaram tei dendwɛ wone o we, “Abaram, yé ta‑n kɔre foone. Amo mo ye wolo na wó che‑m se n yé na chɔgem, se a daare a pa nmo jwoŋi nyɔɔre dedɛ amo ŋwaane.”

2Abaram ma leiri o we, “Yuu-tu Baŋa Wɛ, nyɔɔre dwi dɔ mo wó taa wora ye a ta ba jege bia? Amo ná tera a daare, Damasika tu Eliazera mo wó jwoŋi a wonnu tem maama o taa tei. 3Nmo na wo pɛ amo bu to, amo sɔŋɔ kabaa mo laam wó jwoŋi-ko o taa tei.”

4 Baŋa Wɛ daa ma ta ded‑o we, “Eliazera nam bá jwoŋi n sɔŋɔ kom, se ko ye n bu-baaro wolo n na wó lo to mo wó ba o jwoŋi-ko o taa tei.” 5Wɛ laam ma ja‑o o nwoŋi pwooni ye o we, “Kwoni n yuu n nii wɛyuu ne se n daare n kwaane n ga chalechwe sem. Nmo wó wane n ga-se n ti na?”#Nia Gulim 1:10 O laam ma ta ded‑o we, “Nmo dwi dem na wó taa daga tei to mo konto.”

6Abaram na nɛ konto to, o ma ke o wo-dedoa de Baŋa Wɛ. Konto ŋwaane mo Wɛ pɛ se o na chega.#Rom 4:18-22

7Wɛ ta ma ta ded‑o we, “Amo mo ye Baŋa Wɛ, ko ye amo mo jaane nmo a nwoŋi Babilonia tiina teo Uri ne a ba ywo-seeni. A ma daare a pa‑m tega kanto se n ta‑n tei.”#Pulim 11:31 8Abaram ma bwei‑o we, “Yuu-tu Baŋa Wɛ, amo wó ke tɛ mo a lɔre chekke we nmo wó seene n pa amo tega kam se a taa tei?”

9 Baŋa Wɛ laam ma ta ded‑o we, “Nam ja na-chwɛ, de bo-chwɛ, de pi-bala, te maama na ye bena yatɔ yatɔ to, n ja n ba. Ta ta‑n jege kunkwoŋa de kunkwon-puuri n woli da.” 10Abaram ma ja vara bam konto maama o ba Wɛ yiga ne, ye o chɛ te maama yalei yalei, se ko ná ye zuna bam, o déem wo chɛ tento. O laam ma tigisi-te pa se chichworo maama pipiri ko jeeri kodwoŋi kom. 11Duura ma ba se ba di nɔna yam konto. Abaram ma zeili-ba o yage.

12Wɛ na wora de zoore to mo Abaram dɔ o beiri. Ko ma tiini ko ke biramm ko kaare mɛ o na wora to ye foone jege‑o. 13Baŋa Wɛ ma ta ded‑o we, “Nam ta‑n yei lanyerane we n dwi dem lage ba ji veira mo teo kodwoŋi ne, ye ko dae ba tete teo. Ba wó ji kabɛ mo ye nɔɔna bɛɛse-ba bena bia yana.#Nwoŋim 1:1-14 14Ko nam ná ye teo kolo nɔɔna na bɛɛse-ba to, amo wó vaŋe ba zwa lanyerane. Ko kwaga ne mo a wó pa se n bia bam ja jejegero dedɛ ba nwoŋi teo kom konto ne ba ja viiri.#Nwoŋim 12:36-39 15Se ko ná ye nmo tete, amo wó pa se n ta‑n ŋwe ŋwea de yazura mo se n laam te n kokweero maŋa ne. 16Dwia yana laŋa ne mo nmo dwi dem laam wó jwoori ba ba ba taa zoore ywo. Kanto maŋa kam mo wó taa ye maŋa kalo Amori tiina bam keim-lwanno na daga ye te yi se a waare-ba to. Maŋa kam ta wo yi se a ke konto.”

17Tega na yi ye jei sem maama ye lim to mo Abaram nɛ kɔlepɔte de de wo mini. O ta ma na daa de ka min-vogo, ye mina yam konto maama laam ma tɔge nɔna yalo Abaram déem na tigisi to chichworo maama tetare ne ya kɛa. 18Dento dɛ dem ne Baŋa Wɛ ma ke ni-gwonim dedaane Abaram ye o we, “Ko ye nmo dwi dem mo a na lage a pa-ba tega kanto, ka na zege Ejipti nabara kam laŋa ne, se ka taa vei Yuferata bu-zaŋa kam seeni to. 19Ko déem ye Keni tiina tega kam, de Kenizi tiina bam, de Kadimon tiina bam, 20de Hiti tiina bam, de Pɛrizi tiina bam, de Refayi tiina bam, 21de Amori tiina bam, de Kanaan tiina bam, de Giragasi tiina bam, dedaane Jebusi tiina bam maama tega kam mo konto.”#Nwoŋim 3:8

Currently Selected:

Pulim 15: KBG

Highlight

Copy