Nwoŋim 7

1 Baŋa Wɛ laam ma leiri Moses o we, “Nii! Amo lage a pa se n ta‑n nye de Wɛ mo Ejipti Pɛ wom yiga ne. Nmo zembaaro Aron wó taa ye nmo ni-jwoŋinu se o taa ŋɔɔne ded‑o. 2Nmo jege se n ta kolo maama a na wó ŋɔɔne dede‑m to n bere n zembaaro Aron. Wonto laam maa wó ta de Pɛ wom se o yage chwoŋa se Isarele tiina bam viiri ba daare o teo kom. 3Amo nam wó pa se Pɛ wom bochare taa damma. Amo wó pa se wo-kenkagela dedɛ ke Ejipti tiina bam tetare ne. 4De konto de, o ta bá sɛ o cheigi abam taane dem. Amo laam wó ma a dam-fɔrɔ a waare Ejipti tiina bam. Ko kwaga ne, amo wó pa se a nɔɔna bam nwoŋi da teo kom konto ne. Isarele tiina bam maama wó nwoŋi kɔgɔ de kɔgɔ. 5Konto maama ná kea, Ejipti tiina bam wó lɔre we amo mo ye Baŋa Wɛ, de amo na mɛ dam a waare-ba pa se Isarele tiina bam na chwoŋa ba nwoŋi ba teo kom ne to ŋwaane.”

6Moses de Aron ma ke kolo maama Baŋa Wɛ na bere-ba to. 7Ba déem na vei se ba ŋɔɔne dedaane Pa-faro wom to, de Moses ye bena funɔnɔ (80) mo. Aron maa ye bena funɔnɔ-yatɔ (83).

Aron nacheiga kam jigi basankwea

8 Baŋa Wɛ déem ma ta de Moses de Aron o we, 9“Ejipti Pɛ wom ná tage o we ‘Ke-na wo-kenkagele se a nii’, se n laam ta de Aron se o kwei o nacheiga kam o dole o de tega ne, Pɛ wom yiga ne. O ná kea, ka wó ji basankwea.” 10Moses de Aron déem ma vo ba zo Pa-faro wom tei. Ba ma ke kolo maama Baŋa Wɛ na bere-ba to. Aron déem kwei o nacheiga kam mo o dole o de tega ne, Pɛ wom dedaane o nakwa yiga ne. Ka ma seene ka ji basankwea. 11Pa-faro wom ma toŋe o bwoŋi o teo kom yi-nara de ko liri-mwa tiina se ba la daane. Liri keira bam na tu to, ba de ma kwei ba liri kikia ba lwoni ba ke wo-kenkagela yanto dwoŋi. 12Ba dedoa dedoa déem ma dole ba nachei sem ba de tega ne, ye se ji basankwe. Ko nam ná ye Aron nacheiga kam, kanto déem ligi ba nachei sem maama mo. 13Ejipti Pɛ wom déem nɛ tento maama, ye o bochare ta dana. O déem wo sɛ se o cheigi ba taane dem. Baŋa Wɛ nam maŋe o ta we ko wó taa ye konto mo.

Cham kuni fuga

1. Jana

14 Baŋa Wɛ ma ta de Moses o we, “Ejipti Pɛ bochare yɔɔre de dana mo, ye o ve se o pa amo nɔɔna bam chwoŋa se ba viiri. 15Jwa tetete se n kwei nacheiga kalo na jigi basankwea to n vo Naili buga kam ni se n jeeri Pɛ wom da. O na maa beene maŋa kalo to, se n zege buga kam ni ne n cheigi‑o. 16O ná tua, se n ta ded‑o we, ‘Baŋa Wɛ wolo Hiburu tiina bam na zuli‑o to mo toŋe-ne se a ta de nmo se n pa o nɔɔna bam chwoŋa se ba vo kagoa kam wone ba zuli‑o. Nmo nam ta wo sɛ se n pa ba viiri. 17Baŋa Wɛ ni dem mo tento:

Wɛ wó ke keim se nmo wane n lɔre we wonto mo ye Baŋa Wɛ. Nii ywo! Amo lage a kwei nacheiga kanto a na zei to a mage Naili na bam se ba pipiri ba ji jana. 18Ywona yalo na wo Naili buga kam wone to maama wó te. Na bam de maa wó taa lwoi, pa se Ejipti tiina bam de daa bá wane ba nyɔ buga kam na.’ ”

19 Baŋa Wɛ daa ma ta de Moses o we, “Ta de Aron se o kwei o nacheiga kam o twe-ka o jeeri Ejipti bwi sem, de nabare sem, de bu-nwaro tem, de chwaro tem. O ná ke konto, na bam maama wó pipiri ba ji jana. Ko ná maŋe ko ye kambi sem de kɔɔra bam wone, Ejipti teo kom jei maama wó su de jana.” 20Moses de Aron ma ke kolo maama Baŋa Wɛ na bere-ba to. Ejipti Pɛ wom de o nakwa déem zege ba nii mo, ye Aron zeiŋi o nacheiga kam o ma mage na bam baŋa. Naili buga kam na bam maama ma pipiri ba ji jana. 21Buga kam wo ywona yam maama ma te pa se ka na bam de tiini ba lwoi. Ejipti tiina bam daa ware na bam se ba nyɔ. Jana déem maa yɔɔre ba su Ejipti teo kom maama. 22Ejipti liri-keira bam de ma kwei ba liri kikia ba lwoni ba ke konto dwoŋi. Pa-faro wom bochare daa ta maa dana ye o ve se o cheigi Moses de Aron taane dem. Baŋa Wɛ nam maŋe o ta we ko wó taa ye konto mo. 23Pɛ wom laam ma pipiri o jwoori o sɔŋɔ. O bere o wo sɛ se o kwei keim dento o ke o yuu ne. 24Ejipti tiina bam maama ma gwaare buli Naili buga kam ni ne se ba wane ba na na ba nyɔ, ba na ware ba nyɔ buga kam tete na bam to ŋwaane.

25 Baŋa Wɛ déem na pɛ se Naili buga kam na bam chɔge to mo da yarepɛ déem daa tu ya kɛ.

Currently Selected:

Nwoŋim 7: KBG

Highlight

Copy