Nwoŋim 6

Baŋa Wɛ toŋe Moses Pa-faro wom tei ne

1 Baŋa Wɛ laam ma ta de Moses o we, “Amo laam lage a pa se n lɔre amo na wó ke Pa-faro wom tei to mo. Amo wó ma dam mo a fe‑o se o yage a nɔɔna bam chwoŋa se ba viiri. Amo wó pa se o zeili-ba mo se ba nwoŋi ba daare o teo kom.”

2Wɛ daa ta ma ta de Moses o we, “Amo mo ye Baŋa Wɛ. 3Amo déem veere a tete de Abaraham, de Izaak, dedaane Jakob, se ba lɔre we a ye Dam-fɔrɔ Tu Wɛ wom mo. Amo déem nam wo pɛ se ba lɔre a yere dem na ye Taa Wuu Tu Baŋa Wɛ to.#Nwoŋim 3:14 4Amo déem ma gwoni ni de-ba, ye a pwooli se a pa-ba Kanaan tega kam. Ba déem nam ta ye veira mo ba zoore jei sem konto ne. 5Amo laam nam nigi Isarele tiina bam na ŋwaana tei maama to kolo ŋwaane Ejipti tiina bam tiini ba de-ba kabɛɛne wone. Amo nam wó ke a tɔge de a ni-gwonim dem. 6Nam ta de Isarele tiina bam we ‘Amo mo ye Baŋa Wɛ! A nam wó ma a dam-fɔrɔ de a totoŋ-kamunnu a ma a waare Ejipti tiina bam, se a daare a jwoŋi abam á totoŋ-dɛɛra wone a yage se á daa yé ta‑á ye kabɛ. 7A maa wó pa se á ta‑á ye amo tete nɔɔna. Amo maa wó taa ye abam Wɛ. Konto to, á wó wane á lɔre we amo mo ye abam Tu Baŋa Wɛ, a na jwoŋi abam a yage Ejipti tiina bam jeŋa ne to ŋwaane. 8A maa wó ja abam a zo tega kalo a déem na gwoni ni se a pa Abaraham, de Izaak, dedaane Jakob to. Amo wó seene a pa abam tega kam konto se ka taa ye abam tete nyem. Amo nam mo ye Baŋa Wɛ.’ ”

9Moses déem ma ta tento maama de Isarele tiina bam. Ba ma ve o taane dem, kokuri to ba vɔna mo dɛ yiga ya pare. Ba yera de déem ma chɛ, ba totoŋ-dɛɛra yam ŋwaane. 10Baŋa Wɛ laam ma ta de Moses o we, 11“Jwoori n vo Ejipti Pɛ tei, se n ta ded‑o we o pa Isarele tiina bam chwoŋa se ba nwoŋi da o teo kom ne ba viiri.” 12Moses ma leiri o we, “Nmo yei we amo ni ware de pipiri lanyerane. Nii amo tete nɔɔna bam na wo cheigi amo taane dem to, Pɛ wom laam mo wó sɛ o cheigi-de na?”

13 Baŋa Wɛ déem ma pa Moses de Aron ni ye o we, “Véi-na Isarele tiina bam de Ejipti Pɛ tei, á ta de-ba we amo Baŋa Wɛ mo pɛ abam ni se á ja Isarele tiina bam á nwoŋi da Ejipti teo kom ne.”

Moses de Aron dwi dem taane

14Nɔɔna banto déem mo wo Isarele sɔ-yuni tem maama yiga ne:

Jakob bu-kwea kam mo ye Ruben. Ruben bu-baara bam mo tento:

Hanoki, de Pallu, de Hezeron, de Karimi. Sɔ-yuni tento mo ke daane te ye Ruben dwi dem nabaara.

15Simeon de bu-baara bam mo tento:

Jemweli, de Jamin, de Ohadi, de Jakin, de Zohare, dedaane Sawuli. (Sawuli nu déem ye Kanaan tiina bukɔ mo.) Sɔ-yuni tento mo ke daane te ye Simeon dwi dem nabaara.

16Levi bu-baara bam yera na popone ya tiŋi to mo tento:

Gereson, de Kohafe, de Merari. Levi déem ŋwe mo taa o yi bena bi de fintɔ-yarepɛ (137).

17Gereson bia de ba sɔ-yuni tem déem maa ye Libini de Simeyi.

18Kohafe bia déem mo ye Amiram, de Izehara, de Heboron, dedaane Yuzeli. Kohafe de déem ŋwe mo taa o yi bena bi de fintɔ-yatɔ (133).

19Merari bia déem mo ye Mahili de Musi.

Sɔ-yuni tento mo ke daane te ye Levi dwi dem nabaara.

20Amiram déem ma di o kwo nakɔ Jokebedi o ma o ke kaane. Ba déem ma lo Aron de Moses.#Nwoŋim 2:1-2 Amiram déem ŋwe mo taa o yi bena bi de fintɔ-yarepɛ (137).

21Izehara bia de déem maa ye Kora, de Nefega, dedaane Zikiri.

22Yuzeli bia de déem maa ye Misayeli, de Elizafan, de Sitiri.

23Aron déem ma di Eliseba o ma o ke kaane. Wonto maa ye Aminadabi bukɔ mo, ye o ta ye Naason nakɔ. Ba déem loge bia bana mo: Nadab, de Abihu, de Eleaza, de Itamara.

24Kora bia déem maa ye Asiri, de Elikana, de Abiasafa. Banto de ba sɔ-yuni tem mo ye Kora dwi dem nabaara.

25Aron bu Eleaza déem ma di Puteli bukɔ o ma o ke o kaane, ye ba lo Finehase.

Levi dwi dem taane mo konto. Sɔ-yuni tem konto maama déem ye Levi dwi dem mo.#Jeelim 3:17-20

26Aron de Moses taane na bere tei tento to, banto maa ye balo Baŋa Wɛ na pɛ-ba ni o we, ba véi ba ja Isarele tiina bam de ba kɔgɔ kom maama ba ja nwoŋi da Ejipti ne. 27Banto déem ma seene ba vo Ejipti Pa-faro wom tei ba ta ded‑o se o pa Isarele tiina bam chwoŋa se ba viiri.

Baŋa Wɛ pɛ Moses de Aron ni

28 Baŋa Wɛ déem na ŋɔɔne de Moses Ejipti teo kom ne to, 29o déem tage o we, “Amo mo ye Baŋa Wɛ. Amo ná tage a bere‑m kolo maama, se n lwoni n ta tento de Ejipti Pɛ wom.” 30Moses déem ma ve ye o we, “Nmo yei we a ni ware se de pipiri lanyerane. Konto to, Pɛ wom bá sɛ o cheigi amo taane dem.”

Currently Selected:

Nwoŋim 6: KBG

Highlight

Copy