Nwoŋim 16

Bworobworo de nɔna

1Isarele tiina kɔgɔ kom maama déem zege Elim ne mo ba vo ba yi kagoa, ka yere mo Sin. Jei sem konto nam wo Elim dedaane Sinayi Peo kom tetare laŋa ne mo. Ba na nwoŋi Ejipti to, chane selei sem da fuga-yanu dɛ ne mo ba vei ba yi da. 2Ba na wo kagoa kam ne to, mo nɔɔna bam maama bobo se ba taa poona ye ba bwɛ Moses de Aron. 3Ba maa we, “Baŋa Wɛ ya ná maŋe o pa se dé te Ejipti ne ko gare tento! Dáane, dé nae wodiu dé di, ye dé done nɔna dé sui. Abam ma ja debam á pa dé nwoŋi da dé ba kagoa kanto ne, se kana go dé kɔgɔ kom maama.”#Nwoŋim 14:12; Jeelim 14:2

4 Baŋa Wɛ ma ta de Moses o we, “Amo wó pa se bworobworo nwoŋi wɛyuu ne, nenɛɛne doa na nena tei to.#Jɔn 6:32 Dɛ maama nɔɔna bam jege se ba nwoŋi pwooni mo ba pɛ wodiu kolo na wó maŋe de ba dɛ wone dim to. Amo lage a faŋe-ba mo a nii, ba wó sɛ a ni dem naa ba bá sɛ-de. 5Nam ta de-ba se, da yaredo dɛ dem ne se ba pɛ ba dɛ wone wodiu kuni belei, se ba ja ba zo ba sam dem wone.”

6Moses de Aron ma ta de Isarele tiina bam maama we, “Zem dedaan-ni ne mo abam wó lɔre we Baŋa Wɛ mo jaane abam o ja o nwoŋi Ejipti teo kom ne o ba ywo-seeni. 7Tega ná poore, á lage á na Baŋa Wɛ nenɔŋ-fɔrɔ kom na tiini ko nyeene to mo. Kokuri to, o nigi abam na poona ye á bwɛ‑o tei maama to. Abam na poona konto to, ko ye Wɛ mo á jege á bwɛa. Debam dae kolokolo se á bwɛ debam.” 8Moses laam ma ta o we, “Tega ná lage ka yi, Baŋa Wɛ wó pa abam nɔna se á done. Tega ná poore, o ta wó pa abam bworobworo se á di á su. Abam na poone tei to, ko ye Baŋa Wɛ mo á jege á bwɛa, ye ko dae debam. Baŋa Wɛ nam mo nigi á pompona kam.”

9Moses déem ma ta de Aron o we, “Ŋɔɔne dedaane Isarele tiina kɔ-fɔrɔ kom we, ‘Baŋa Wɛ nigi á pompona kam. Á ba á la daane o yiga ne.’ ” 10Aron déem ta na ŋɔɔne dedaane nɔɔna bam to, ba kwoni ba yum ba nii kagoa kam seeni mo. Ba ma na Baŋa Wɛ nenɔŋ-fɔrɔ na tiini ka nyeene kunkwoŋo kom wone tei to. 11Baŋa Wɛ laam ma ta de Moses o we, 12“Amo nigi Isarele tiina bam pompona kam maama. Nam ta de-ba we ‘Tega ná lage ka yi, abam wó done nɔna, se te-pora ne á di bworobworo á su. Konto mo wó pa se á lɔre we amo mo ye abam Tu Baŋa Wɛ.’ ”

13Dedaan-ni dem konto ne, lwi dedɛ ma zaŋe se ba se faare mɛ nɔɔna bam na zoore to. Tega daa na poore to, nyɔnɔ ma to ko gilimi ba vwoa yam maama. 14Nyɔnɔ kom ma we, ko daare wo-meena yalo na ye fefala ye ya bwona to maa faare tega kam maama kagoa kam ne. 15Isarele tiina bam na nɛ-ya to, ba wo lɔre ya na ye woŋo kolo. Ba maa bwei daane ba we, “Bɛ mo tento?” Moses ma leiri-ba o we, “Bworobworo kolo Baŋa Wɛ na pɛ abam se á ta‑á di to mo konto. 16Baŋa Wɛ nam we á ta‑á ke tento mo: ‘Nɔɔno maama jege se o pɛ tei na wó maŋe o dim de o diga tiina dim to mo. Nɔɔno maama wó wane o na bɔŋa dedoa.’ ”

17Isarele tiina bam ma vo ba ke konto. Badwonna déem pɛ dedɛ mo ye babam pɛ fenfee. 18Ba déem na mɛ bɔŋa ba maŋe nɔɔno maama na pɛ kolo to mo ba maane we balo na pɛ dedɛ to daa wo nɛ se ko dwoni ba dim. Ko nam wo muri ko pa balo na pɛ fenfee yerane to. Ba maama déem nɛ tetei na maŋe de-ba to mo.

19Moses ma ta de-ba o we, “Nɔɔn-nɔɔno yé pa se wodiu konto peini o tei ne ko poore tega.” 20Nɔɔna badwonna ma ve se ba sɛ Moses taane dem. Ba déem ma di ba daare pa se ko poore tega. Wodiu kom ma ji kanzwa ye ko laam lwoi. Moses bane ma zaŋe de nɔɔna bam konto. 21Dɛ maama tetete, ba maa yeini ba pɛ tetei na wó maŋe de ba dim to. Wea ná yeini ka di wɛɛne, kolo maama na daare tega ne to wó nyeene mo.

22Da yaredo dɛ dem ne, ba déem pɛ wodiu kom kuni belei mo, bwɛ selei nɔɔno maama ŋwaane. Ba nakwa tiina bam ma vo Moses tei ba ta ba bere‑o ko na ke tei to. 23O ma ta de-ba o we, “Baŋa Wɛ na tage kolo to mo tento: ‘Baŋa Wɛ mo pɔɔre jwa dɛ dem se de taa ye de yera da maama wone. O nam ke-de se de taa ye siu dɛ mo se á ma á zuli‑o. Konto ŋwaane, wɔ-na woŋo kolo maama na maŋe de wɔɔm to se á saŋe kolo maama na maŋe de saŋem to. Ke-na konto zem se woŋo kolo ná daare, se á tiŋi-ko jwa ŋwaane.’ ” 24Nɔɔna bam ma ke tei Moses na tage to. Ba déem zege wodiu kolo na daare to pa se tega poore. Ko maa wo zo kanzwa, ye ko ba lwoi de.

25Tega na poore to, Moses ma ta o we, “Di-na wodiu kom konto zem, se zem dɛ dem ye siu dɛ mo se á ma á zuli Baŋa Wɛ. Abam zem bá na wodiu jei de jei tega kam baŋa ne. 26Da yaredo mo abam wó ta‑á pɛ wodiu kom. Ko daare da yarepɛ dɛ dem wó taa ye siu dɛ mo ko pae abam. Wodiu bá taa wora se á pɛ-ko.”

27Ko nam na ke tei to, nɔɔna badwonna mo nwoŋi da yarepɛ dɛ dem ne ba beeri wodiu se ba pɛ, ye ba wo nɛ kolokolo. 28Baŋa Wɛ ma ta de Moses o we, “Abam wó ve se á sɛ amo nia yam de a bera yam taa se á vo á maŋe yei ne mo? 29Á wo nɛ? Baŋa Wɛ tiŋi siu dɛ dem o pa abam.#Pulim 2:3 Konto ŋwaane mo da yaredo dɛ dem ne Wɛ wó pa da yalei wodiu se á pɛ. Nɔɔn-nɔɔno ba jege se o nwoŋi pwooni da yarepɛ dɛ dem ne. O wó maŋe sɔŋɔ ne mo.” 30Ko ma pa se da yarepɛ dɛ dem ne nɔɔna bam déem sii de ba totoŋa.

31Isarele tiina bam ma bwoŋi wodiu kom yere we ‘Manna.’ Ko déem nye dedaane nyansaŋa bia mo. Ko maa ye napwoŋo, ye ko ywomma nenɛɛne ba mɛ tooro mo ba fɔge maasa tei to. 32Moses ta ma ta o we, “Baŋa Wɛ pɛ o ni dem mo se á kwei Manna yam bɔŋa dedoa á tiŋi jwa ŋwaane. Abam bia jwa wó lɔre wodiu kolo Wɛ na pɛ abam kagoa kam yuu ne, maŋa kalo o na jaane abam o nwoŋi Ejipti ne to.”

33Moses laam ma ta de Aron o we, “Kwei zoŋa n daare n zwɛ Manna n ke ka wone se ka maŋe de bɔŋa dedoa. Laam ja-ka n vo n zege Baŋa Wɛ yiga ne. Á bia jwa wó taa nae Manna yam dáane maŋa maama.” 34Aron déem ma ke kolo maama Baŋa Wɛ na bere Moses to. O kwei Manna yam mo o zege Wɛ ni-gwonim kandwa yalei yam yiga ne se ya taa wo dáane.

35Isarele tiina bam ma di Manna yam bena finna. Ba déem di-ya mo taa se ko taa vei maŋa kalo ba na vei ba yi Kanaan ye ba zoore da to.#Josua 5:12 36Ba déem na mɛ bɔŋa kalo ba maŋe Manna yam to yere mo ye ‘Omaa’. Omaa kuni fuga mo ye kuriwaa bu dedoa.

Currently Selected:

Nwoŋim 16: KBG

Highlight

Copy