Nwoŋim 14
14
1 Baŋa Wɛ laam ma ta de Moses o we, 2“Ta n bere Isarele tiina bam se ba pipiri ba vo Pi-Hahirofa seeni se ba chwi ba vwoa yam da. Ko maa wo Migidola dedaane naneo kom tetare laŋa ne, ye ko jeeri Baal-Zefon mo. 3Ejipti Pɛ wom nam wó boŋe we Isarele tiina bam kare ba beeri mo jei maama ba yeiri chwoŋa. O maa wó ta we, kagoa kam mo chege ba chwoŋa. 4Amo nam daa ta wó pa se o bochare taa dana. O wó pare abam se o ja o jwoori. Tento mo amo wó na chwoŋa a wane Pa-faro wom de o jar-keira bam pa se a laam jwoŋi a zula. Ejipti tiina bam wó lɔre we amo mo ye Baŋa Wɛ.” Nɔɔna bam déem ma sɛ ba ke Wɛ na bere-ba kolo to.
5Nɔɔna ma ta ba bere Ejipti Pɛ we Isarele tiina bam duri mo ba viiri. O de o nakwa bam ma leiri ba boboŋa ye ba we, “Bɛŋwaane mo dé wó pa Isarele tiina bam chwoŋa se ba lu dé jeŋa ne? Debam gɛ de kabɛ sem mo konto!” 6Pɛ wom déem ma pa se ba ja o jara-keim toroko kolo sisein-nɔɔna na vaŋe to ba ba ba pa‑o, ye o daare o la o jar-keira bam o ke daane. 7O ma kwei o jara-keim torokooro maama de balo na diini-se to. Te maama wone bia yaredo (600) mo tiini te lamma dedɛ. Toroko maama jege ko dedɛɛro mo.
8 Baŋa Wɛ déem ya pɛ se Ejipti Pa-faro wom bochare tiini ko dana mo, pa se o pare Isarele tiina bam se o ja. Ko nam ná ye Isarele tiina bam, banto déem vei dedaane baare mo. 9Ejipti tiina bam ma pare-ba se ba ja. Ko maa ye Pɛ jar-keira bam, de ba sisei sem, de ba torokooro tem, dedaane balo na diini-se to maama mo pare Isarele tiina bam ba vo ba yi mɛ ba déem na chwi ba vwoa yam da to. Jei sem konto déem wo naneo kom teiŋa ne mo. Ko maa bwola dedaane Pi-Hahirofa, ye ko jeeri Baal-Zefon. 10Isarele tiina bam ma nii ba na Pa-faro wom de o nɔɔna bam na vei ba maa zaŋe ba baŋa ne. Foone ma tiini de ja-ba. Ba ma kaase ba jare Baŋa Wɛ se o zeini-ba. 11Ba ma bwɛ Moses ba we, “Nmo jaane debam n ba ywo-seeni se dé te kagoa kanto ne mo na? Yibeela mo tera Ejipti ne se ba ke debam ya wone na? Bɛ mo ye n ja debam n nwoŋi Ejipti ne? 12Dé ta na wo jei sem konto ne to, dé lɔre konto mo ye dé ta dé bere‑m. Dé tage de nmo se n yage debam chemm, se dé taa toŋe dé pae Ejipti tiina bam. Dé ya ná maŋe dé kabɛɛne dem wone, ko ya wó taa gare dé na lage dé te kagoa kam ne tento to!”
13Moses ma ta de-ba o we, “Yé ta‑á kɔre-na foone! Ta‑á zege-na de baare, se á wó na Baŋa Wɛ na wó ke tei o vere abam zem dɛ dem ne to. Ejipti tiina banto abam na nɛ ba na maa beene zem to, á daa bá na-ba maŋa de maŋa.#Nia Gulim 1:30 14Baŋa Wɛ mo lage o ja jara o pa abam. Abam wó ta‑á zege da chemm mo ye á nia.”#Lei 46:10
15 Baŋa Wɛ ma ta de Moses o we, “Bɛŋwaane mo ye nmo zege n kaase n jare-ne? Ta de nɔɔna bam se ba taa tutwoni ba vei yiga! 16Se nmo zeiŋi n nacheiga kam!#Nwoŋim 4:17 Twe-ka naneo kom baŋa ne, se na bam pɔɔre belei. Chwoŋa wó peini na bam tetare ne se Isarele tiina bam nɔne te-kora baŋa ne ba bɛ bubɛ dedem dem ne. 17Amo laam wó pa se Ejipti tiina bam bochara taa dana. Ba wó tɔge abam kwaga ba zo naneo kom wone. Dáane mo amo wó wane Pa-faro wom de o jar-keira bam, de ba torokooro, de ba sisein-dira maama pa se a laam jwoŋi a zula. 18Amo ná wane Pɛ wom de o jar-keira bam konto, Ejipti tiina bam wó lɔre we amo mo ye Baŋa Wɛ.”
19Wɛ maleka kam déem na yeini ka tɔge Isarele tiina jar-keira bam yiga to laam ma tutwoni ka vo ka zege ba kwaga ne. Kunkwoŋo kom de ma kɛ ko vo ko zege deiki ba kwaga ne. 20Ko déem zege Ejipti tiina kɔgɔ kom dedaane Isarele tiina kɔgɔ kom tetare laŋa ne mo. Kunkwoŋo kom ma pa se ko ye lim Ejipti tiina bam tei ne tete dem konto maama ne. Se ko ná ye Isarele tiina bam, banto déem jege pwooni mo. Tete dem konto ne ba kɔgɔ kom déem ware se ba yi da-tei.
21Moses déem ma twe o jeŋa naneo kom baŋa ne. Tete dem maama ne, Baŋa Wɛ ma pa se vo-dɛɔ nwoŋi wɛ-puli seeni ko ba ko dole buga kam baŋa ne. Na bam déem ma pɔɔre belei ye te-kora peini ba tetare ne. 22Isarele tiina bam déem vei te-kora baŋa ne mo ba bɛ naneo kom. Na bam déem nye de kabira mo na chege ba jazem dedaane jagwia maama.#Josua 3:17 23Ejipti tiina bam déem ma duri ba pu Isarele tiina bam kwaga ba tu buga kam wone. Ba déem jaane ba sisei, de ba torokooro tem mo, ko woli de ba sisein-dira bam maama ba tu da. 24Te-pora ni ne mo Baŋa Wɛ zege kunkwoŋo kom na jege mini to wone o guni o nii Ejipti jar-keira bam ye o pa se vuvuga to ba tetare ne. 25O déem ma pa se ba torokooro tem nɛ sem moore pa se ko chamma se ba wane ba vo ba bɛ. Ejipti tiina bam laam ma ta ba we, “Pa-na se dé duri dé jwoori-na se dé lu Isarele tiina jeŋa ne! Kokuri to Baŋa Wɛ mo wora o jaane jara o woli-ba se ba wane debam.”
26 Baŋa Wɛ ma ta de Moses o we, “Twe n jeŋa naneo kom baŋa ne se na bam jwoori ba pu Ejipti tiina bam, de ba torokooro tem, de ba sisein-dira bam maama.” 27Moses ma twe o jeŋa naneo kom baŋa ne. Tega na jege ka poore to, na bam ma jwoori ba ke daane nenɛɛne ko ya na maŋe ko ye tei to. Ejipti tiina bam nam ya kwaane mo se ba lu, ye Baŋa Wɛ kale banto o de naneo kom wone. 28Na bam na jwoori ba ke daane to, ba ma pu Ejipti tiina kɔgɔ kom maama, de ba torokooro tem, de ba sisein-dira bam. Nɔɔno de dedoa tete de wo wane se o lu. 29Se ko daare Isarele tiina bam, banto ya vei te-kora baŋa ne mo ba vo ba bɛ naneo kom. Na bam déem nye de kabira mo na chege ba jazem dedaane jagwia maama. 30Dɛ dem konto ne mo Baŋa Wɛ vere Isarele tiina bam Ejipti tiina bam jeŋa ne o yage. Isarele tiina bam déem ma tole ba na Ejipti tiina bam na tege ba tiga bubɛ dem baŋa ne. 31Ba déem nɛ Baŋa Wɛ na kwei o dam-fɔrɔ kom o ke totoŋ-kamunnu o ma o wane Ejipti tiina bam to. Ba laam ma kɔre Baŋa Wɛ ye ba daare ba ke ba wo-dedoa ded‑o. Ba ta ma ke ba wo-dedoa de Wɛ tontoŋeno Moses.
Currently Selected:
Nwoŋim 14: KBG
Highlight
Share
Copy
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
