Kikia 2

Wɛ Sin-laao kom tu ko zeini Yezu tontoŋena bam

1Dɛ dem Juu tiina bam na yeini ba di ba kuri delo yere na ye Pɛntekɔse#2:1 Pɛntekɔse kuri mo ye da finnu. Chullu 23:15-21 to ma ba de yi. Yezu tontoŋena bam maama maa wo daane jeiga dedoa. 2Sɔɔ ma pɔpɔ ko nwoŋi wɛyuu ne nenɛɛne vo-dɛɔ na fuli tei to. Sɔŋɔ kom ba na jei ko wone to ni maama ma su de sɔɔ kom konto. 3Ba ma na wonnu ne min-vɔɛ mo tei, ye te pwɛ te jeini ba dedoa dedoa yuu ne. 4Wɛ Sin-laao kom ma ba ba maama tei ne de dam, ye ba bobo se ba taa ŋɔɔne taana dwi dwi, nenɛɛne Sin-laao kom na pɛ-ba dam se ba ŋɔɔne taane delo to.

5Kanto maŋa kam ne Juu tiina dedɛ déem tu ba wo Jerusalem teo kom ne. Ba maa ye balo na kɔre Wɛ lanyerane ye ba nwoŋi jei maama logo baŋa ne. 6Balo na wora to déem ma ni sɔɔ kom na ke tei to, ye kɔgɔ dedɛ laam ba ko la daane jeiga kam ne. Ba ma nii ba na Yezu nɔɔna bam na zega ba ŋɔɔne taana dwi dwi, ye kɔgɔ kom nɔɔno maama ni o tete taane. Ba maama maa yeiri kolo na ke to. 7Ba yera ma sɔɔre ye ba ye yaau. Ba maa tɛ ba we, “Nii-na. Banto maama ye Galili tiina mo ye ba zege ba ŋɔɔne tento dwoŋi. 8Ko nam ke tɛ mo ye debam maama ni ba na ŋɔɔne debam dedoa dedoa dwi taane? 9Dé nwoŋi jei dwi dwi mo. Debam badwonna nwoŋi Patia, de Media, de Elam, ko woli de Mesopotamia, de Judea, de Kapadokia, dedaane Pontusi, de Asia teene dem maama. 10Dé badwonna ta nwoŋi Firijia, de Panfilia, de Ejipti, de Libia teene delo na bwola de Kurene to. Dé badwonna maa nwoŋi Rom. 11Debam ye Juu tiina mo, ko woli de dwi-gɛ tiina balo laam na sɛ Wɛ chwoŋa tɔgem to. Debam badwonna maa nwoŋi Kiriti, de Arabia. De konto de, debam maama nam ta ni ba na mae debam dedoa dedoa taane ba ŋɔɔne wo-kamunnu telo Wɛ na ke to.” 12Nɔɔna bam na ye yaau ye ba boboŋa vugimi konto to, ba maa bwei daane ba we, “Keim dento kuri mo bɛ?”

13Ba badaara nam maa jege Yezu tontoŋena bam ba mɔna ye ba tɛ ba we, “Nɔɔna banto nyɔge sana mo ba su.”

14Piita laam ma zaŋe wɛɛne dedaane o dwonna fuga-dedoa bam. O ma ŋɔɔne de kwor-dɛa o ta de nɔn-kɔgɔ kom o we:

“Amo badwonna bam, Juu tiina de abam balo maama na zoore Jerusalem ne to, cheigi-na se a ta keim dento kuri a bere abam. 15Abam na boŋe we nɔɔna banto nyɔge sana mo ba su to, ko nam dae konto. Ko daa ta ye tetete mo. Wea ta wo bege se ba nyɔ sana. 16Ko nam ye kolo Wɛ sampwora Joweli déem na ŋɔɔne ko taane to mo. 17O déem tɔɔle Wɛ kwora o we:

‘Logo baŋa kweelim da yam ná yia,

amo Wɛ wó lwo a Jworo mo nabiina maama baŋa ne.

Konto nam wó pa se á bia de á bukwa taa pworisi amo kwora kam,

se abam nɔn-donno na wo-kenkagela yalo a na wó veere a bere-ba to,

ko daare se á nɔn-kwe de dwɛ dendwa amo ŋwaane.

18Chega to, da yam konto ne

a lage a lwo a Jworo mo a tontoŋena baŋa ne, baara de kaana de,

pa se ba pworisi amo kwora kam.

19Amo ta wó pa se wo-kenkagela taa nae wɛyuu ne,

ye a daare a ke maana tega baŋa ne.

Kanto maŋa kam ne jana wó taa wora, de mini,

de nyoa kalo na tiini ka zwora to.

20Wea kam wó ba ka vaŋe ka ji lim,

ye chana kam de ji nasoŋo ne jana tei.

Ko laam daare se Baŋa Wɛ dɛ-kamunu kom ba ko yi,

se o nenɔŋa kam de bere jaja.

21Dɛ dem konto ne, wolo maama na wó bwoŋi dé Teiru Wɛ wom yere

o ma lwoori zeinim to wó na verem.’#Joweli 2:28-32

22A badwonna Isarele tiina bam, cheigi-ne. A lage a ta Nazarete tu Yezu taane. Wɛ tɔge wonto baŋa ne mo o ke wo-kamunnu, de wo-kenkagela, de maana se ko bere abam we o seene o nwoŋi Wɛ tei. Abam tete nam maŋe á yei konto, kolo ŋwaane wonnu tem konto maŋe te ke abam tei ne. 23Wɛ maŋe o yei ko na wó taa ye tei to. O boboŋa déem ya maŋe ya ja pa se ba ja Yezu ba ke abam jeŋa ne. Abam ma daare á tɔge nɔn-balwaaro jeŋa mo á pa se ba ja‑o ba pa dagara yuu ne. Konto mo á mɛ á go‑o. 24Wɛ nam mo bi‑o toone wone. Toone déem wo wane de cheiŋi‑o de yage yibeeli dem wone. Mo kokuri Wɛ jwoŋi‑o toone yaara yam wone o yage.

25Faŋa faŋa to Pɛ David tage Wɛ Bu wom taane o we:

‘Amo nɛ a Teiru Wɛ a tei ne maŋa maama.

O maa wo a jazem seeni mo se o zeini-ne se a zege cheppe.

26Mo kokuri a jege wopwolo lanyerane,

ye amo ni taane dem de jege ywoni.

Amo ye nabiinu mo ye a nam jege teena Wɛ tei ne.

27Kolo ŋwaane amo ná tega,

nmo Wɛ bá‑n yage-ne se a taa wo churu ne.

Nmo bá‑n sɛ se n tete Wo-pwoŋo Tu wom yera pɔ.

28Nmo pɛ se a lɔre chwei selo na pae ŋwea to se a taa tɔge-se.

Amo ná yi nmo tei, nmo wó pa se a na ywoni dedɛ.’#Lei 16:8-11

29A nu-bia bam, mo kolo debam nabaaro David déem na tage to. Amo nam lage a ŋɔɔne wonto taane mo jaja a bere abam we o tega. Ba ma kwei‑o ba suli, ye o yibeeli ta wora de zem maama. 30O déem nam ye Wɛ ni-jwoŋinu mo. Wɛ déem dugi duuri o pa‑o we, omo wó pa se o dwi tiina bam dedoa zaŋe o di paare o jeiŋa kam jei ne. David ma guli Wɛ na gwoni o ni ded‑o konto to. 31O ma wuuri o lɔre kolo Wɛ na wó ke to. Konto ŋwaane mo o tage o we, ‘Wɛ wo sɛ se o yage‑o churu ne. O yera yam de nam wo pɔge.’ O na tage konto to, ko ye Wɛ Dam Tu Krista toone biim taane mo o taga. 32Chega to, Wɛ mo bi Yezu wom tete, ye debam maama zege chega kam konto kwaga ne. 33Wɛ na bi‑o konto to, o ma daare o pa se o vo o jeini o jazem seeni. Yezu laam ma jwoŋi Sin-laao kom o Kwo Wɛ tei ne, ne Wɛ na pwooli se o pa‑o tei to. Abam zem nam na nae wonnu telo ye á kwori á ni telo to ye Yezu mo pɛ te ke. 34Ko dae David tete mo Wɛ kwei o ja di telaao. Wonto nam tage o we:

‘Yuu-tu Baŋa Wɛ tage de amo Teiru o we:

Ba n jeini amo jazem seeni

35se a laam wane nmo dona maama

a ke nmo dam kuri ne se n ta‑n tei-ba.’#Lei 110:1

36Tɔ. Isarele dwi tiina maama nam jege se ba taa yei lanyerane we, ko ná ye Yezu wom abam na jaane á pa dagara yuu ne á go to, ko ye wonto tete mo Wɛ laam pɛ se o taa ye Dam Tu Krista wom ye o kwori o ye debam Teiru.”

37Nɔɔna bam na nigi Piita na tage kolo konto to, ko ma tiini ko chɔge ba wo dedɛ. Ba ma bwei Piita de o dwonna totoŋa nakwa bam ba we, “Dé nu-bia bam, dé nam wó ke tɛ mo?” 38Piita ma leiri-ba o we, “Abam maama jege se á leiri á wo de á keim-balwaaro tem, se á daare á jwoŋi sɛɛm Yezu Krista yere ŋwaane, se Wɛ wó yage á wɛleera o ma chɛ abam.#Luka 24:47 Wɛ laam wó pa se o Sin-laao kom taa wo abam tei ne. 39Mo Wɛ na pwooli se o ke tei to, ye o tiŋi o ni dem konto o pa abam de á bia, ko woli de balo maama ta na ba ŋwae to. Ko maa ye balo maama debam Teiru Baŋa Wɛ na bwoŋi se ba taa tɔge‑o to mo.”

40Piita ta ma jwoori o fɔge o ma taane dedɛ o kaane-ba o we, ba kwaane ba jwoŋi ba tete zem nɔɔna bam wone de ba na tusi tei to. 41Nɔɔna bam dedɛ ma sɛ o taane dem, ye ba daare ba jwoŋi sɛɛm Wɛ ŋwaane. Dɛ dem konto ne nɔɔna dedɛ mo tu ba woli Yezu tɔgena kɔgɔ kom wone, ko maŋe de nɔɔna morro tetɔ (3,000). 42Ba ma tiini ba seene ba yia ba pa Yezu totoŋa nakwa bam bera yam. Ba maama maa woli daane de ni-sɛɛm dedoa, ye ba kwori ba tɔge daane ba di wodiu ne Yezu ya na fɔge bworobworo o pa o kwaga tɔgena bam pa ba di tei to. Ba ma kwori ba tɔge daane ba ware Wɛ maŋa maama.

43Nɔɔna maama déem maa kɔre Wɛ lanyerane. Wɛ ma pa Yezu totoŋa nakwa bam dam se ba taa ke wo-kenkagela de maana dedɛ. 44Yezu tɔgena bam maama maa yeini ba la daane ye ba kwori ba jege ba wonnu ba maŋe ba pa daane.#Kikia 4:32-35 45Ba maa yeini ba kwei ba jejegero de ba zela ba yeiga, ye ba maŋe te sabu kom ba ma woli nɔɔno maama ne ba dedoa dedoa na lage tei to. 46Dɛ maama ba maa yeini ba tigisi daane Wɛ diga kam wone. Ba ta ma kwori ba tɔge daane ba di wodiu ba sam ne ko maŋe de Yezu ya na bere o kwaga tɔgena bam tei to. Ba maa maŋe ba wodiiru ba pa daane, ye ba jege wopwolo lanyerane dedaane boboŋe dedwe. 47Ba maa tei Wɛ maŋa maama. Nɔɔna maama maa pae ba ye nɔn-ŋona. Dɛ maama wuu dé Teiru wom maa pae se balo na tu ba na verem to woli ba kɔgɔ kom wone.

Currently Selected:

Kikia 2: KBG

Highlight

Copy