Kikia 12

Wɛ maleka vere Piita Herodi jeŋa ne

1Maŋa kam konto ne Pɛ Herodi ma zaŋe o ja Yezu kɔgɔ kom nɔɔna badwonna se o pa ba na yaara. 2O ma ja Jemsi wolo na ye Jɔn zembaaro to o pa ba go‑o de se-zɔɔ.#Matiyu 4:21; Maake 10:39 3O na ke konto to, o ma lɔre we ko pwoli Juu tiina bam wo lanyerane. O ta ma fɔge o zege ye o ja Piita. Ko maa ye Bworobworo-memene kuri dim maŋa ne mo, ba na yeini ba di bworobworo kolo na ba jege sabɔle to. 4O na jaane Piita konto to, o ma ke‑o peena diga ne, ye o pa se soja tiina bana bana kuri bena yere‑o ba leini daane. Herodi déem maa lage se Atɔgebabaŋa kuri dem ná kɛ de daare, se o laam pa ba ja Piita ba nwoŋi se o di o taane nɔɔna maama yiga ne. 5Konto ŋwaane Piita maa wo peena diga kam ne taa, ye Yezu kɔgɔ kom nɔɔna bam maa tiini ba lwoori Wɛ ba pa‑o.

6Ko déem ma yi tete delo tega na wó poore se Herodi pa Piita nwoŋi pwooni se o di o taane to. Piita maa tigi soja tiina balei tetare ne o dɔa. Ba ya vɔge‑o de chaponno telei mo, jazem de jagwia. Soja tiina badwonna de wo peena diga kam ni ne ba yera. 7Baŋa Wɛ maleka laam ma pɔpɔ ka ba ka zege da. Pwooni ma su diga kam. Maleka kam ma pepage Piita yera ka pa o zaŋe ye ka ta ka we, “Ke lela n zaŋe wɛɛne!”

Chaponno tem ma kɔ Piita jea ne te to tega ne. 8Maleka kam ma ta‑o ka we, “Faŋe n zo n gɔrɔ kom de n natera yam.” O ma seene o ke konto. Ka daa ma ta ka we, “Vɔ n gɔrɔ kom se n daare n ta‑n tɔge-ne.”

9Piita ma tɔge o kwaga o nwoŋi peena diga kam wone. O maa yeiri maleka kam na ke kolo to ye chega mo naa vwa mo. O maa boŋe we o dwɛ mo. 10Ba ma vo ba tɔge jei selo soja tiina bam na wora ba yere to. Ba ma da yiga de kwaga jei sem ba kɛ. Ba ma daare ba vo ba yi luu-bworo kolo na pore ko vei teo kom wo to. Bworo kom tete ma pore ye ba kɛ ba nwoŋi. Ba ma kwei chwoŋa ba vei ba maa kɛa. Maleka kam laam ma pɔpɔ ka viiri ka daare Piita.

11Piita boboŋa laam ma jwoori. O ma ta o we, “Amo laam lɔre we konto ye chega mo. Wɛ seene o toŋe o maleka mo ye o daare o jwoŋi-ne Herodi jeŋa ne o yage, se Juu tiina bam daa yé wane ba ke amo ne ba na boŋe tei to.”

12Piita na maane ko na ye tei to, o ma vo Mary ba sɔŋɔ. Wonto maa ye Jɔn Maake nu. Nɔɔna dedɛ déem mo tigisi daane sɔŋɔ kom ne ba wora ba ware Wɛ. 13O ma vo o yi pwooni yiga bworo kom o mage. Ka-nyaane maa wo sɔŋɔ kom ne, o yere mo Roda. O ma vo se o nii wɔ mo maga. 14O na vei to, o ma lɔre Piita kwora kam. O maa tiini o jege wopwolo lanyerane pa se o duri o jwoori ye o wo pore bworo kom. O ma vo o ta de nɔɔna bam we Piita mo zege manchwoŋo ne. 15Ba ma leiri‑o ba we, o chwo mo. O ma chem ye o ta o we, ko seene ko ye chega mo. Ba daa ma leiri ba we, ko wó taa ye o tete maleka mo.

16Ko na wora ko ke konto to, Piita maa mage bworo kom taa. Ba laam ma ba ba pore. Ba na nɛ‑o to, ko ma tiini ko ke-ba yaau. 17O ma zeiŋi o jea se ba cheigi sɔɔ. O ma daare o maŋe dé Teiru wom na ke tei o ja‑o o nwoŋi peena diga kam ne tei to. O daa ma ta-ba o we, ba véi ba ta kolo na ke to ba bere Jemsi#12:17 Jemsi déem ye Yezu nyaane ye o ta ye ba kɔgɔ kom yiga tu. Galatia 1:19 de ba nu-bia bam maama. O laam ma yage-ba ye o vo jei sedwoŋi.

18Tega na poore tetete to, soja tiina balo ya na jege Piita ba yere to ma kɔre foone dedɛ ye ba boboŋa vugimi. Ba ma bwei daane ba we, “Bɛ mo ke ye Piita tera?” 19Herodi ma yage ni se ba kwaane ba beeri o jei. Ba ma beeri taa ba ga. Herodi ma bwei soja tiina bam taane o nii, ye o daare o pa se ba go-ba.

Konto na ke ko kɛ to, Herodi ma zaŋe Judea ne o vo Kazaria o zoore da.

Ko na ke tei ye Herodi te to

20Herodi bane déem tiini de zaŋe Tura de Sidon tiina baŋa ne. Jei sem nɔɔna bam ma zaŋe ba la kɔgɔ se ba vo ba kwoori Herodi se o yage. Herodi déem jege dedɛɛro wolo na nii o sɔŋɔ kom baŋa ne, o yere mo Bilasitu. Nɔɔna bam ma bobo ba di badwoŋo dedaane wonto, ye ba daare ba vo Herodi tei ba ŋɔɔne ded‑o se o yage o ban-zɔŋɔ kom. Ba déem lage ni-sɛɛm ba tete teo kom na yeini ko jwoŋi ko wodiiru pɛ wom teo kom ne to ŋwaane. 21Ba ma tiŋi dɛ se ba jeini daane ba ŋɔɔne taane dem.

Dɛ dem na yi to, Herodi ma kwei o paare zela yam o zo. O laam ma jeini o paare yituŋu kom baŋa ne se o ŋɔɔne de nɔɔna bam. 22O kwora na zaŋe ye o ŋɔɔne de-ba konto to, nɔɔna bam ma ta baŋa baŋa ba we, “Ko ye wɛ dedwoŋi mo ŋɔɔna, se ko dae nabiinu yerane.” 23Herodi na sɛ ba zula yam ye o wo pɛ se ba zuli Wɛ chekke to, Baŋa Wɛ maleka ma pa se jaweo ja‑o lela. Kanzwa ma zo o wo ya di‑o ya go.

24Wɛ kwora kam déem ma jage jei maama ye nɔɔna dedɛ sɛ-ka. 25Banabas de Sɔɔl ma ti totoŋe delo ba na vei Jerusalem se ba ke to. Ba laam ma ja Jɔn Maake ba woli ba tete ne ye ba nwoŋi Jerusalem ba jwoori ba vo Antioka.

Currently Selected:

Kikia 12: KBG

Highlight

Copy