Yohan 9
9
Yeesus un en plinte
1Yeesus waar am keen wii eyer en man kesiin hot woo plint uf ti welt khom waar. 2Sayn tisiple hon kefroot:
— Mayster, warom is te man plint uf ti welt khom? Waar es weche tëm sayn sinte ore weche tëm sayn eltre sayn sinte?
3Yeesus hot keantwort:
— Te is plint, yoo, awer net weche sayn aychne sinte un net weche sayn eltre sayn sinte. Is plint tas Hërkot sayn macht sich an tëm tsayche khan. 4Meyer mise xafe soo lang wii es taach is, fer ti aarwat mache fer tee woo mich kexikt hot. Wayl ti nacht is am khome, wën nimant xafe khan. 5Soo lang wii ich uf te welt sin, sin ich es licht fon te welt.#Yo 8.12
6Wii eyer tas kesaat hat, hot eyer uf te potem kexpukt, hot pisye leem mit tëm xpuk kemach, hot tee leem am plinte sayn aue kexmeyert 7un saat:
— Kee tayn kesicht ap wexe im paat khump fon Siloee. (Siloee petayt “Tee woo kexikt kep is”.)
Te plinte is kang, hot sayn kesicht kewex un is tsurik khom am siin. 8Tëm sayn nachparxlayt un ti layt woo em imer kesiin hon petle hon kefroot:
— War tas net te man woo too rom kehukt hot am petle?
9Phaar hon kesaat:
— Es is er!
Anere hon kesaat:
— Nee! Es is er net. Siit soo eenlich aus!
Awer tee selepst hot kesaat:
— Es sin ich wërklich!
10Ti layt hon kefroot:
— Wii khanst tuu yets siin?
11Tee hot keantwort:
— Te man woo Yeesus heest hot leem aan kemach, hot te leem an mayn aue kexmeyert un saat: “Kee pis an te paat khump fon Siloee un wex tayn kesicht ap.” Too sin ich mayn kesicht ap wexe kang un hon aan kefang se siin.
12Too hon se kefroot:
— Woo is tee man?
Tee hot keantwort:
— Ich wees net!
Ti fariseyer tuun te plinte aus frooe
13Too hon se te man woo plint waar fer ti fariseyer hiin kenom. 14Te taach woo Yeesus te leem aan kemach hat un te plinte keheelt fon sayn plintheet waar en samstach. 15Too hon ti fariseyer aach kefroot wii te man keheelt kep waar.
Te man hot keantwort:
— Tee hot leem an mayn aue kemach, ich hon es kesicht kewex un yets siin ich.
16Phaar fariseyer hon kesaat:
— Te man woo tas kemach hot is net fom Hërkot, wayl er net ti kesets fom samstach rexpekteyert.
Un anere hon kefroot:
— Wii khan en sinter soo kroose wunere mache?
Un tesweche waare tii net iwer ëns khom unich sich. 17Too hon ti fariseyer noch mool fer te man kefroot:
— Tuu saast tas tee tich keheelt hot fon tayn plintheet. Un was saast tuu fon tëm?
Te man hot keantwort:
— Tee is en profët!
18Ti yute fiirer hon net keklaapt tas tee plint waar un tas er yets siin khont. Tesweche hon se tëm sayn eltre khome kelos 19un hon kefroot:
— Is tee man ayre soon? Teyer saat tee weyer plint uf ti welt khom. Un wii khan tee yets siin?
20Ti eltre hon keantwort:
— Meyer wise tas eyer unser soon is un tas eyer plint uf ti welt khom is. 21Awer meyer wise net wii tee yets siin khan un wise aach net weyer em keheelt hot. Froot fer tee! Tee is xon alt kenuch fer tas selepst aus leeye.
22Ti eltre hon tas kesaat wayl se pang hate, wayl ti yute fiire hate sich ap kemach teere fon te Sinakook raus yaan weyer saan teet Yeesus weyer te Kristus. 23Tesweche hon ti eltre kesaat: “Tee is xon alt kenuch; froot fer tee.”
24Too hon ti yute fiirer es tswete mool te man keruuft woo plint waar un hon kesaat:
— Tuu tas fersichre, im Kotes naame, tas tuu ti woerheet saast. Meyer wise tas tee man en sinter is.
25Tee hot keantwort:
— Op tee en sinter is, tas wees ich net. Etwas wees ich: ich waar plint un yets siin ich!
26Tii hon noch mool kefroot:
— Was hot tee teyer kemach? Wii hot tee tich keheelt fon te plintheet?
27Te man hot keantwort:
— Ich hon es xon kesaat, un teyer hot es net keklaapt. Warom wolt teyer tas noch mool heere? Wolt teyer filaycht aach tëm sayn aanhënger sin?
28Too hon se em ferxënt un hon kesaat:
— Tuu pist tëm sayn aanhënger! Meyer sin Mooses sayn aanhënger. 29Meyer wise tas Hërkot mit Mooses kexproch hot; awer tee man, meyer wise noch net mool woo eyer heyer khomt.
30Tee hot keantwort:
— Wii khoomix! Teyer wist net fon woo tee is, awer eyer hot mich keheelt. 31Meyer wise tas Kot ti sinter net aan heyert, awer tee heyert aan tii woo tëm rexpekt tsayche un mache sayne wile. 32Tsayt woo es ti welt kept, hot mer noch nii keheyert saan tas yemant eene keheelt hot woo xon plint uf ti welt khom is. 33Wën tee man net fon Hërkot kexikt weyer waar, het tee kaar niks khëne mache.
34Tii hon kesaat:
— Tuu pist fol sinte uf ti welt khom un tuu wilst uns lërne?
Un hon em fon te sinakook raus keyaat.
Ti kaystlich plintheet
35Yeesus hot se wise kriit tas se te man fon te sinakook raus keyaat hate. Is en uf suuche kang un, wii eyer en pekeechent hot, hot eyer kefroot:
— Klaapst tuu am Soon fom Man?
36Tee hot keantwort:
— Hër, weyer is te Soon fom Man tas ich an em klaawe khan?
37Yeesus saat:
— Tuu host em xon kesiin! Is tee woo mit teyer am xpreche is!
38Te man saat:
— Ich klaawe, Hër!
Un hot sich foer aan Yeesus kekniit.
39Tan hot Yeesus fersichert:
— Ich sin uf tii welt khom fer ti layt se julkeere, tas ti plinte siin khëne un tas tii woo siin plint kewe.
40Phaar fariseyer, woo pay tëm waare, hon tas keheyert un hon kefroot:
— Meecht tas se saan hon tas meyer aach plint sin?
41Yeesus hot keantwort:
— Wën teyer plint weyert, het teyer khee xult! Awer wën teyer saat tas teyer siin khënt, tan hot teyer noch xult.
Currently Selected:
Yohan 9: NTHunsrik
Highlight
Share
Copy
Want to have your highlights saved across all your devices? Sign up or sign in
2022 Sociedade Bíblica do Brasil
