Yohan 8
8
Yeesus fertsayert en fraa woo sayne man hinerkang hat
1En tsayt tëm noo, sin se al hëm kang, awer Yeesus is uf te Oliiwe Përich kang. 2Foer taach is er tsurik kang pis uf te hoof fom Thëmpel, un tas folek hot sich um em rom kesamelt. Yeesus hot sich kesetst un hot se al keuntericht. 3Too hon phaar Kesets mayster un fariseyer en fraa pis an Yeesus kenom. Tii hat sayne man hinerkang un tii hon se ketswung xteen playwe in te mite fon te layt. 4Tii saate:
— Mayster, ti fraa is aan ketrof kep sayne man am hinerkeen. 5Noo te kesets woo Mooses uns kep hot, tii fraae woo sayn mëner hinerkeen mise mit xteen toot keworef kewe. Awer, was saat teyer too triwer?#Lv 20.10; Dt 22.22-24
6Tii hon tas kefroot tas se en uersach hete keeche Yeesus, wayl tii wolte em aan kewe. Awer Yeesus hot sich kepikt un hot aan kefang mit em finger uf te potem xraywe. 7Wayl se noch wayter imer tas selwiche kefroot hon, hot Yeesus sich kehoop un saat tëne:
— Weyer fon aych khee sint hot sol te eyerxte sin woo en xteen an tii fraa xmayst!
8Too hot eyer sich noch mool kepikt un hot wayter uf te potem kexrip. 9Wii se tas keheyert hon, sin se al fort kang, eene noo em anere, un ti elste waare ti eyerxte. Sin ploos Yeesus un ti fraa keplip, un tii is wayter tort xteen keplip. 10Too hot Yeesus sich noch mool kehoop un saat:
— Fraa, woo sin tii rom? Is nimant keplip fer tich konteneere?
11Tii saat:
— Nimant, Hër!
Yeesus saat:
— Ich tuun tich aach net konteneere. Kee un mach khee sinte mee!
Yeesus, licht fon te welt
12Yeesus hot noch mool aan kefang mit tëne se xpreche un saat:
— Ich sin tas licht fon te welt; weyer mich noo keet, keet nii im tunkle, awer wërt tas leewe licht hon.#Mt 5.14; Yo 9.5
13Ti fariseyer hon fer Yeesus kesaat:
— Yets xprechst tuu fer tich selwer. Tesweche hot ales was tuu saast khee weyert.#Yo 5.31
14Yeesus hot keantwort:
— Wën ich ach fer mich selwer xpreche, was ich saan hot weyert, wayl tas is ti woerheet. Wayl ich wees woo ich heyer sin un woo ich hiin keen, awer teyer wist net woo ich heyer sin un woo ich hiin keen. 15Teyer xulkeyert mit mënxlich khëntnis; awer ich xulkeere nimant. 16Un, wën ich xulkeere, is tas en echte xulkamënt wayl ich xulkeere net aleen, wayl te Fater, woo mich kexikt hot, is pay mich. 17In ayer Kesets is kexrip tas, wën tswaay tsayer tsuu xteen, was tii saan is ti woerheet. 18Ich kewe tsayer iwich mich selepst, un te Fater, woo mich kexikt hot, kept aach tsayer iwer mich.
19Tii hon kefroot:
— Woo is tayne fater?
Yeesus hot keantwort:
— Teyer khënt mich net un khënt mayne Fater aach net. Wën teyer mich wërklich khëne teet, teet teyer aach mayne Fater khëne.
20Yeesus hot tas tings kesaat wii Eyer am unterichte waar uf em hoof fon Thëmpel, ticht am opfer khaste. Nimant hot em kefang wayl tëm sayn uertsayt noch net khom waar.
Weyer is Yeesus?
21Yeesus saat noch mool:
— Ich keen fort, un teyer tuut mich suuche, awer tuut xtërwe oone ayre sinte fertsayert kriin. Woo ich hiin keen, tort hiin khënt teyer net khome.
22Ti yute fiirer hon kesaat:
— Tee saat tas meyer net khëne hiin woo tee hiin keet! Meecht tee sich umpringe?
23Yeesus saat wayter:
— Teyer sayt fon too une, un ich sin fon tort uwe. Teyer sayt fon tee welt, awer ich sin net fon tee welt. 24Tesweche, saat ich tas teyer xtërwe tuut oone ayre sinte fertsayert kriin. In te woerheet, teyer tuut xtërwe oone ti fertsayung fon ayre sinte wën teyer net klaawe tuut tas “Ich Sin Tee Woo Ich Sin”.
25Tii hon fer Yeesus kefroot:
— Weyer pist tuu?
Tee hot keantwort:
— Tsayt am aanfank saat ich weyer ich sin. 26Es kept fiil tings iwich aych woo ich triwer xpreche mus un woo ich julkeere mus. Awer, weyer mich kexikt hot is te waare, un ich saan fer ti welt ploos was tee mich kesaat hat.
27Tii hon net ferxtan tas Yeesus iwich te Fater am xpreche waar. 28Tesweche, saat Yeesus:
— Wën teyer te Soon fom Man heepe tuut, kriit teyer se wise tas “Ich Sin Tee Woo Ich Sin”. Un wërt aach wise tas ich niks aus mich selepst mache, awer xpreche ploos was mayne Fater mich kelërnt hot. 29Weyer mich kexikt hot is pay mich un hot mich net aleen kelos, wayl ich mache imer was tëm kefale tuut.
30Wii Yeesus tas kesaat hat, hon fiil an tëm keklaapt.
Ti sklaawe un ti fraye
31Too hot Yeesus kesaat fer tii woo an tëm keklaapt hon:
— Wën teyer wayter aan heyert was ich aych lërne, wërt teyer wërklich mayn tisiple 32un wërt ti woerheet khëne, un ti woerheet wërt aych pefraye.
33Tii hon keantwort:
— Meyer sin nookhomer fon Aapraham un waare nii sklaawe kewees fon nimant. Wii saast tuu tas meyer pefrayt kewe sole?#Mt 3.9; Lk 3.8
34Yeesus saat tëne:
— Ich fersichere aych tas tas woer is: weyer sinte macht is sklaawe fom sint. 35Te sklaawe playpt net imer pay te familye, awer te soon is imer teel fon te familye. 36Wën te Soon aych pefraye tuut, wërt teyer wërklich fray sin. 37Ich wees tas teyer nookhomer fon Apraham sayt; awer, sayt am fersuuche mich umpringe wayl teyer net mayn unterichte aan nëme tuut. 38Ich xpreche fom tings woo mayne Fater mich kewis hot, awer teyer macht was teyer mit ayre fater kelërnt hot.
39Tii hon keantwort:
— Unser fater is Aapraham!
Too saat Yeesus tëne:
— Wën teyer wërklich Aapraham sayn khiner weyert, teet teyer mache was tee kemach hot. 40Awer ich sin aych ti woerheet am saan woo ich fon Hërkot keheyert hon, un imer noch soo wolt teyer mich um pringe. Aapraham hot nii soo was kemach! 41Teyer sayt am mache was ayer fater kemach hot.
Tii hon kentwort:
— Meyer sin khee khiner woo nimant wees weyer te fater is; meyer hon en Fater: Hërkot.
42Yeesus saat noch:
— Wën Hërkot wërklich ayre Fater weyer, tan teet teyer mich liipe, wayl ich sin khom fon Hërkot un yets sin ich hier. Ich sin net aus mayne wile khom, awer Hërkot hot mich kexikt. 43Warom ferxteet teyer net was ich saan? Is wayl teyer mich net aan heere wolt. 44Teyer sayt em Taywel sayn khiner un wolt mache was ayre fater wil. Tsayt am aanfank fon te welt pringt tee mënxe um, un waar noch nii uf te woerheet sayn sayt kewees, wayl is khee woerheet in tëm. Wën te Taywel liit, macht eyer was er keweent is, wayl tee is en liichner un is te fater fon te kans liyeray. 45Awer, wayl ich ti woerheet saan, klaapt teyer net an mich. 46Weyer fon aych khan proope tas ich sinte hon? Wën ich ti woerheet saan, warom klaapt teyer net an mich? 47Te persoon woo tsu Hërkot keheyert heyert em Kot sayn wërter aan. Teyer heyert net em Hërkot sayn wërter aan wayl teyer net tsu tëm keheyert.
Yeesus un Aapraham
48Ti hon fer Yeesus kesaat:
— Hon meyer, filaycht, khee recht wën meyer saan tas tuu en samaritaaner pist un fon en xlechte kayst tomineyert pist?
49Yeesus antwort:
— Ich sin net fon en xlechte kayst tomineyert. Ich rexpekteere mayne Fater, awer teyer hot khee rexpekt mit mich. 50Ich suuche khee loop fer mich selepst; awer tas kept Yemant woo te loop fer mich fersichre wil, un tee is te Richter. 51Ich fersichere aych tas tas woerheet is: weyer mayn unterichte aan heyert tuut nii xtërwe.
52Too saate tii:
— Yets sin meyer sicher tas tuu fon en xlechte kayst tomineyert pist! Aprahaam un ti kanse profëte sin kextorep, awer tuu saast: “Weyer mayn unterichte aan heyert tuut net xtërwe.” 53Meechst tuu importanter sin wii Aprahaam, unser fater, woo kextorep is? Un ti profëte sin aach kextorep! Weyer tënkst tuu tas tuu weyerst?
54Yeesus hot keantwort:
— Wën ich mich selepst loope teet, weere mayn loope niks weyert. Weyer mich loope tuut is mayne Fater, tee selwiche woo teyer saat weyer ayre Hërkot. 55Teyer hot Hërkot nii kekhënt, awer ich khëne iim. Wën ich saan teet tas ich en net khëne, weyer ich en liichner wii teyer; awer ich khëne iim un mache ales was Eyer xikt. 56Aprahaam, ayre fater, is froo kep wii eyer ti tsayt kesiin hot woo ich khome solt. Tee hot tii tsayt kesiin un is froo kep.
57Too hon se kefroot:
— Tuu host khee fineftsich yoer un host Aprahaam kesiin?
58Yeesus hot keantwort:
— Ich fersichere aych tas tas woer is: eep Aprahaam uf ti welt khom is, “Ich Sin”!#Êx 3.14
59Too hon se xteen kehool fer iwer Yeesus se wërfe, awer tee hot sich ferxtekelt un is aus em hoof fom Thëmpel kang.
Currently Selected:
Yohan 8: NTHunsrik
Highlight
Share
Copy
Want to have your highlights saved across all your devices? Sign up or sign in
2022 Sociedade Bíblica do Brasil
