Mareko 9

1Are erero ta mō ōpe, Ara ero okofa omoi, Mōvoa pepeipeta karu hea opai la ore levi leiti roi pepepe Ualare ve basileia sa siahu ita foreraita la ere ofae eavai roi.

Iesu ve maea toarōrisa maea haria leipe

(Mataio 17:1–13; Luka 9:28–36)

2Soka sare six ve aite voa Iesu are Petero aea lakobo aea Ioane ita la lariōvi, are ita fareho murufakao raepa koa arori voa pataipe. Patei areve maea ereve omopa voa toarōrisa maea haria lei,#2 Pet 1:17–18 3aea areve puta kevarokevaro fei, seaseaeiteapo kofa leipe; mearovaeka voa puta lōfeare lei sea leita karu kasirau. 4Soka Elia auka Mose ita erero tai forera, ereuka Iesu ita laua sukavaiape. 5Sukōvi, sukōvi Petero Iesu la mō moipe, Satiriaraita Vita e, ereita mōvoa roroaita lareva; ela harotōvu oroisoria safai vei, farakeka a vei, farakeka aea Mose vei, farakeka aea Elia vei. 6Ipi ere tore foromai leipe eavia, are laua kofa sukavaita ore auke leipe. 7Soka mea‐e foreri erero aieri, aea o mea‐e voa forera mō ōpe, Arave haikakare araita Atute meha; arero mapaia.#Mat 3:17; Mak 1:11; Luk 3:22 8Ere ofae utohoa kerori, a—, karu aea la ere ita farehoria ofae eavai kasirau, a—, Iesu sa haria.

9Ere raepa voa faukōpe soa, are erero o ōpe ere ofae eavaita lea etau la karu farakeka aea la levi moi vei tetete Karu ve Atute opi ata itoita soa ve aite voa. 10Soka ere lea o ereve haiiri voa miavi, aea opi ata itoita lea o ve eite lekōru ere laua elore elore lea vei sukavaiape. 11Soka ere arero lalasi mō leipe, Ipi levea Safu Karoro ore karu o mōfeare aritore, Elia omopa koti ao?#Mala 4:5; Mat 11:14 12Are erero mō ōpe, Okofa, Elia omopa koti ipi etau foromai la lei áre leiti vei; a—, araro, Karu ve Atute vei ukōpe mea o leafeare? Are haisora rauapo lei, karu ta arero sukavutea haiarara leiti roi. 13A—, ara ero o mō la auai, Elia koti roroka leitita, aea karu hea sa haikaeaiape lea mai ere arero leipe, usoso are vei uka siseita lea o feare.

Harisu maeasiaviri sa toōpe siare

(Mataio 17:14–21; Luka 9:37–43)

14Soka ere lea satiriaraita karu hea tai forerōpe lea mea, ere karu sitavu rovaeka erero eakoa toepi, aea Safu Karoro ore karu ere ita o serea serea ape la ofae eavōpe. 15Soka lea karu sitavu ere arero ofae eavōpe lea mea ere haihava rovaea lei, utohoa arero tai oroa vo koti arero eapo o ōpe. 16Are areve satiriaraita karu la lalasi mō leipe, E ere ita o serea serea aipeta ipi lekōru vei? 17Karu sitavu voa peiape heavita farakeka aea tava o arero mō ōpe, Satiriaraita Papuvita e, ara arave atute aro tai lariōvi iti, are arero leita okuku harisu ia; 18aea lea harisu arero ovaita soasoa voa arero mea voa toapi, ape soare foreri, tao ta karekare a’, areve maea ta perereaitore. Ara ave satiriaraita karu la lalasi loi lea harisu la taivatai vei, a—, ere usoso leiti kao. 19Soka are erero mō ōpe, E sukaerereai auke leita taotao, ara e ita fareho soa savori leafeare meava roi ei? Ara soa savori leafeare ero morari vovo meava roi ei? Arero araro tai lariōvi kotia. 20Soka ere lea siare arero tai lariōvi koti, are arero ofae eavōpe lea mea lea harisu utohoa lea siare la lei mai ita mora ita sukasuka a’ are mea voa lei putei, oriri a’, ape soare ita aroruka aroruka ape. 21Soka Iesu areve oa la lalasi mō leipe, Are soa savori leafeare mea eka ita mea vovea? Are arero mō ōpe, Soa areve seika soa voa itiiti faitora. 22Soa rauapo lea harisu arero a voa aeata ma voa toapa toapa ō vovea arero paeai vei; a—, a etau aea la leitita ore, elaro maeaforoe lei toaraia. 23Lō mei, Iesu arero mō ōpe, Leitita ore! etau foromai la sukaerereaita lea karu vei leitita ore. 24Lea atute ve oa utohoa maea fi a’ mō ōpe, Ara la sukaerereaipea; arave sukaerereai auke soa voa araro toaraia.

25Iesu karu sitavu arero tai oroavi kokorukaiape la ofae eavōpe lea mea, are harisu maeasiaviri la o kere ita mō ōpe, Okuku aea ōvasuru harisu e, arero kiripi foreraia, aea are voa ata levi oropaia. 26Are maea fi a’ lea atute la lei mora ita mai ita sukasuka a’ a’, maria voa foreri, atute la lei maea ita opi kiripōpe; lea vei ereve karu rauapo mō ōpe, Are opai. 27A—, Iesu areve mai la paea arero moravi itoipe.

28Soka Iesu uvi voa oropōpe lea mea, areve satiriaraita karu arero murufa lalasi mō leipe, Ela arero larivataita ore auke loita ipi lekōru? 29Aea are erero mō ōpe, Lōfeare harisu la larivataita ore kao, a—, Ualare la loki leita, lōfeare su haria larivataita ore.

Iesu areve opi ata itoi soa vei o ata moipe

(Mataio 17:22–23; Luka 9:43–45)

30Ere lea oti kiripi, Galilea ve aru voa sariva lei au terōpe. A—, karu lea la ore leiti vei are haikaeai kao. 31Ipi are areve satiriaraita karu la satiriōri erero mō moipe, Karu ve Atute la karu ve mai voa miōri, ere arero paeai roi, a—, are opai soa ve aite sare oroisoria voa ata itoi roi. 32Soka ere lea o ve eite haveva lei, arero lalasi leiti vei tore lei roroaiape.

Haiarori levi leitia

(Mataio 18:1–9; Luka 9:46–50)

33Soka ere Kaperanauma voa forerōpe; aea are uvi voa oropi pavōpe lea mea, are erero lalasi mō leipe, E otiharo voa o serea elore elore oita ipi lekōru? 34A—, ere o auke leipe, ipi otiharo voa ereve elore elore o serea ve ipi ere voa karu rovaeka leisa.#Luk 22:24 35Soka are avi, twelve karu la isa kokoruka erero mō ōpe, Omopa leiti vei haikaeaipeta lea vita, are karu foromai ve aite kofa vita lei, karu foromai ve sarufa vita leiti roi.#Mat 20:26–27; 23:11; Mak 10:43–44; Luk 22:26 36Aite are atute seika aea la mai paea arero ovi, ereve aru voa vipi, areve mai sa arero fareōvi haitoari ovi mō ōpe, 37Atute seika mōfeare la arave rare vei maeafukapaita lea vita, araro ta maeafukapai roi; aea araro maeafukapaita lea vita, are araro haria la maeafukapai sore, a—, araro itapōpe Ualare ta maeafukapaitore.#Mat 10:40; Luk 10:16; Ion 13:20

38Ioane arero mō ōpe, Satiriaraita Papuvita e, ela karu aea are ave rare ita harisu la larivataia la ofae eovi, ela arero o erere arita, ipi are ereitaro topiari aitetai auke eavia. 39A—, Iesu mō ōpe, Arero o erere levi aria; ipi karu aea arave rare voa siahu ita tivi leitita, lea ve aite voa are utohoa ara vei o maealolo arita ore levi leiti roi. 40Ipi ereitaro sukavuteai auke leita lea karu are ereitave karu reha.#Mat 12:30; Luk 11:23 41Ara ero okofa omoi, Karu aea ma kōkuveisa ero miarait’ oria ipi e Keriso ve karu eavia, ara ero okofa omoi, are areve maeaforoe vei lea tava levi veverapai roi.#Mat 10:42

42Uiti fare rorokea faeahohōroaita fave rovaea karu ve kōvōrehau voa suka makaikara voa toapi ma isoita lōfeare mai karu vei lareva ia; a—, are araro sukaerereaita mea karu kaekae aea la lei kaiae leita lea mai lareva kakaeite kofa. 43Soka ave mai sa aro lei kaiae leitit’ oria, arero sarapi mutapaia; makuri voa mai kui ita oropaita, a vei lareva ia; a—, a mai orakoria ita saroroapaita oti, a futai auke leita lea oti voa toapaita lareva kao.#Mat 5:30 [ 44Lōvoa ereve sarōva la loloita seseve opai sore, aea lea a ta futai sore.] 45Aea ave mora aro lei kaiae leitita, a—, arero sarapi mutapaia; a makuri voa mora kui ita oropaita, a vei lareva ia; a—, mora orakoria ita saroroapaita oti voa toapaita lareva kao. [ 46Lōvoa ereve sarōva la loloita seseve opai sore, aea lea a ta futai sore.] 47Aea ave ofae aro lei kaiae leitita, a—, arero suka fareōvi mutapaia; a Ualare ve basileia voa ofae farakeka ita oropaita, a vei lareva ia, a—, ofae orakoria ita saroroapaita oti voa toapaita lareva kao.#Mat 5:29 48Lōvoa ereve sarōva la loloita seseve opai sore, aea lea a ta futai sore.#Isa 66:24

49Ipi karu foromai la a sa sa’ sōlo sa toaita feare ovava leiti roi. 50Sōlo are etau lareva, a—, sōlo areve peroro veverapaita, a—, arero ata lei lareva leafeare leiti roi? Sōlo eve haiiri voa maravaia, aea elore elore tairu ita pepeava.#Mat 5:13; Luk 14:34–35

Currently Selected:

Mareko 9: TQO1983

Highlight

Copy