Mareko 10

Ua ia kiripaita mai vei

(Mataio 19:1–12; Luka 16:18)

1Are maea lei lea oti kiripi Iudea ve mea Ioridana itai voa ufi, karu sitavu arero tai ata kokoruka, aea usoso areve leiape mai feare are erero ata satiriaraiape.

2Soka Farisea karu hea arero tai foreri, arero seseōvai vei lalasi lei mō ōpe, Karu areve ua la kiripaita safu kao ei? 3Are tava o erero mō ōpe, Mose ero moipe safu o leafeare? 4Ere mō ōpe, Mose o mōri moipe, Vita ua la kiripaita karoro ukai ao, aite are ua la lōri kiripaita ore.#Deut 24:1–4; Mat 5:31 5A—, Iesu erero mō ōpe, Are lea safu o ukōpe ipi eve haiiri kere eavia. 6A—, mearovaeka la pisosipe lea oarehōva soa kofa voa, Ualare ereukaro vita ita ua ita la pisosipe.#Gen 1:27; 5:2 7Ipi lea etau vei vita areve oa ita lou ita la kiripi, areve ua la pasaeai roi;#Gen 2:24 8pasaea lea marota maeasarōva farakeka leiti roi; lea vei ereuka orakoria kao, a—, farakeka. 9Ualare sa topiaraita lea etau la karu aea sa levi faeaia.

10Soka ere uvi voa ata pepeiape lea mea, areve satiriaraita karu lea etau vei ata lalasi leipe. 11Lei, are erero mō ōpe, Areve ua la kiripi, aea ua haria la laeaita lea vita arero torea leiti roi.#Mat 5:32; 1 Kor 7:10–11 12Aea ua aea are areve vita la kiripi, vita haria la laeaita, a—, are ta arero torea leiti roi.

Iesu atutemori la o sa lei lareva leipe

(Mataio 19:13–15; Luka 18:15–17)

13Soka karu hea atutemori arero tai lariōvōpe, are erero mai paeai vei; a—, satiriaraita karu erero o erere ōpe. 14A—, Iesu lea la ofae eovi kitou lei, erero mō ōpe, Atutemori rapi ere roroa, ere araro tai koti vei erero o erere levi aria, ipi Ualare ve basileia ve karu ere feare. 15Ara ero okofa omoi, Ualare ve basileia la atutemori ve mai feare ovai auke leitita lea karu levi oropai roi.#Mat 18:3 16Aite are areve mai erero toilafisa pasavi, areve mai posa erero miavi, erero o sa lei lareva leiape.

Pisoso rovaea vita la moipe o

(Mataio 19:16–30; Luka 18:18–30)

17Soka are otiharo voa maea lei terai vei leipe soa, karu aea arero tai soea vo koti, areve omopa voa sukakoka avi, arero lalasi mō leipe, Satiriaraita vita lareva e, ara etau etau lekōru la lei peita makuri aite ovai vei? 18Iesu arero mō ōpe, A araro lareva o levei auai? Karu farakeka lareva kakaeite, a—, Ualare sa haria. 19A Safu O foromai ore, A karu levi paeaia, A ua torea levi leitia, A etau torea levi leitia, A havara apeva levi paraeaia, A karu ve etau la apeva mai ita lei levi ovaia, A ave oa ave lou ita la maeaforoe lei taivotaia.#Eso 20:12–16; Deut 5:16–20 20Lō mei, are arero mō ōpe, Satiriaraita papuvita e, soa arave karu áre soa voa itiiti faitora ara lea Safu O foromai la mapi kiva lei vovea. 21Iesu arero ofae ruri, arero haikaea mō ōpe, Eaeipeta etau farakeka a voa foreraia kao; a te ave ovi meita etau etau la itaea lei miōri, ereve tava la a ovi merava karu la miaraia, aea a pisoso etau kauri voa lōri ovai roi; aea araro aitetai kotiria. 22Ipi lea o vei are soso paroroa haieae ita terōpe, ipi are pisoso rovaea vita eavia.

23Soka Iesu ofae kerori kerori a’ areve satiriaraita karu la mō moipe, Pisoso rovaea ita roroaita karu ere Ualare ve basileia voa oropaita heafo foromai rovaea kofa leiti roi. 24Areve lea o vei satiriaraita karu haihava foromai leipe. Lei, are ata erero mō ōpe, Irave e, Ualare ve basileia voa oropaita heafo foromai rovaea kofa. 25Nila kōvi ve uta voa kamela sa oropaita taheka mafu maea feare, a—, pisoso karu Ualare ve basileia voa oropaita, heafo foromai rovaea reha. 26Lō mei ere haihava rovaea‐rovaeaeiteapo lei arero mō ōpe, Soka leiro lei makuri leiti roi ei? 27Iesu erero ofae ruri mō ōpe, Karu sa mea etau leitita usoso kakaeite, a—, Ualare ta haria, ipi etau foromai la Ualare sa leitita ore.

28Soka Petero arero o mōri moipe, Ofae eavaia, ela etau foromai la kiripi aro aitetai vovo la roroa. 29Iesu mō ōpe, Ara ero okofa o mō la auai, Uvi, ō mariosu, ō uarosu, ō lou, ō oa, ō atutemori, ō mea mea, ara vei aeata Ovoro Lareva vei kiripaita lea vita, 30lea ve tava rovaea soa one hundred topiari ovai roi mea faitora soa voa, uvi, aea mariosu, aea uarosu, aea louita, aea atutemori, aea mea mea, a—, arero haisora leiti vei aitetaita etau etau ita, aea aite soa voa soa sarapai auke lei peita makuri la ovai roi. 31A—, faitora omopa kofa karu rauapo aite kofa leiti roi, aeata aite kofa karu ere omopa kofa leiti roi.#Mat 20:16; Luk 13:30

Iesu areve opi ata itoi vei omoipe oroisoria soa

(Mataio 20:17–19; Luka 18:31–34)

32Soka ere otiharo Ierusalema voa papatavi, aea Iesu ereve omopa voa meiape; aea ere haihava lei, aitetaita karu ta tore ita roroaiape. Soka are twelve karu itai voa ata lariōvi, arero leiti vei leiape etau la erero lei ore lei, 33mō ōpe, Mapaia, ereita Ierusalema voa la pataipea meha, aea Karu ve Atute la maso harofave karu aeata Safu Karoro ore karu la miōri, ere arero seseōvi tava paeai o arero o mei, arero toruipi haria karu ve mai voa miarai roi. 34Aea ere arero area sa vutea a’, arero pea sa soea, arero teavi sa’ arero paeai roi; paea sare oroisoria ve aite voa are itoi roi.

Iakobo auke Ioane ita sa loki leipe o

(Mataio 20:20–28)

35Soka Iakobo auke Ioane ita, Sebede ve lea atute oraka, auka arero tai foreri arero mō ōpe, Satiriaraita papuvita e, elaka haikaeai elaka aro loki leiti vei leipeta etau la a elaka vei leiti vei. 36Are ereukaro mō ōpe, Euka lekōru la haikaeaipea ara euka vei leiti veia? 37Ereuka arero mō ōpe, Mea la elakaro miaraia, elaka farakeka ave mai toare itai voa, farakeka aea ave mai ava itai voa avai vei ave sosorusosoru soa voa. 38A—, Iesu ereukaro mō ōpe, Euka loki leipeta lea etau ve eite euka ore kao. Ara lari vei leipeta lea kōkuveisa euka larita ore ei? aea araro leiti vei leipeta lea bapatiso eukaro ta leitita ore ei?#Luk 12:50 39Soka ereuka arero mō ōpe, Elaka leitita ore. Lō mei, Iesu ereukaro mō ōpe, Ara lari vei leipeta lea kōkuveisa euka ta lari roi, aea araro leiti vei leipeta lea bapatiso eukaro ta leiti roi. 40A—, arave mai toare itai voa, aeata arave mai ava ita voa avai vei lea la miaraita lea arave kao, a—, lea itai itai oti ereuka vei kekese leita lea karu oraka ve oti reha.

41Soka ten karu lea o la mapōpe lea mea, ere Iakobo auke Ioane ita la kitou leipe. 42Lei, Iesu erero arero tai isa koti erero mō ōpe, E ore toruipi haria karu sa rare harofave karu rare aravaita lea karu ere voa papukaru mai leititore, aea ereve karu metameta sa erero tivi irori ita miava vovea.#Luk 22:25–26 43A—, e voa lōfeare mai levi leitia; a—, e voa rare rovaea haikaeaita lea vita, are eve tivi karu leiti vei;#Mat 23:11; Mak 9:35; Luk 22:26 44aea e voa omopa kofa leiti haikaeaita lea vita, karu foromai ve sarufa merava leiti vei. 45Ipi Karu ve Atute, are kofa, karu areve sarufa leiti vei koti kao, a—, are karu ve sarufa leiti vei, aea areve makuri la karu rauapo la paraeaita tava vei miarai vei.

Ofae kuku karu Batimaio

(Mataio 20:29–34; Luka 18:35–43)

46Soka ere Ieriko voa forerōpe; foreri are aea areve satiriaraita karu aeata karu sitavu pirori maea ita farehoria Ieriko kiripi teraiape soa, Batimaio, Timaio ve atute, ofae kuku karu, meru ovai vei avi loki lei vovo meiape otiharo peto voa. 47Meme Iesu Nasareta karu lōvoa lea o la mapōpe soa, are i mō isaiape, Iesu, Davida ve Atute e, araro rapi maeaforoe leitia. 48Lō isa, karu rauapo arero o erere a’ arero o isoka o ape; a—, are i rovaeka ata mō isaiape, Davida ve Atute e, araro rapi maeaforoe leitia. 49Iesu sukatai pōvi mō ōpe, Arero isa kotia. Lō mei, ere ofae kuku vita la isa mō ōpe, Rofo lei itoia, are aro i la isaipea. 50Soka are areve arori puta la mutapi, itei forea Iesu tai koti forerōpe. 51Foreri, Iesu arero lalasi lei mō ōpe, Ara aro leiti vei haikaeaipeta etau larelekōru? Ofae kuku vita arero mō ōpe, Arave Papuvita e, araro lei ara ofae ata eavai vei. 52Lō mei, Iesu arero mō ōpe, A teraia, a sukaerereaipeta eavia aro lei lareva loita meha. Aea utohoa areve ofae ovava lei are arero otiharo voa aitetaipe.

Currently Selected:

Mareko 10: TQO1983

Highlight

Copy