Mareko 7

Iuda karu sa satiriaraita papa mai

(Mataio 15:1–20)

1Soka Farisea karu aea Ierusalema voa pepea kotipe Safu Karoro ore karu hea ita Iesu tai kokoruka, 2ere ofae mōfeare eavaiape, areve satiriaraita karu hea ereve larietau mai ovava auke ita, lea ve eite maukai auke ita, lalape.

3Ipi Farisea karu aeata Iudea karu foromai, ere ereve mai metakao maukai auke leitita, a—, ere larietau lari sore, ere papa sa leiape mai la lōri kiva lei roroa vovea. 4Ere ta maketi voa itaea lei ovitita etau etau foromai la maukai auke leitita, a—, are levi lari roi. Ere papa sa leiape mai hariaharia rauapo ta kiva lei, kōkuveisa, aea ma posu, aea auri koavi pani maeamaea la mauka vovo roroa vovea.

5Soka lea Farisea karu aea Safu Karoro ore karu ita arero lalasi mō leipe, Ave satiriaraita karu ere papa karu sa leiape mai feare kerori vo roroai auke leipeta ipi levea, a—, mai ovava auke ita larietau laritore ei? 6A—, are erero mō ōpe, E aiera‐aiera karu e, Isaia okofa ita peroveta o e vei mōri moipe,#Isa 29:13

Mea karu ereve ape poe sa araro maeatitore,

a—, ereve haiiri araro sukavutea ára‐ita pepea vovea;

7ere araro auraka maso toaitore,

karu sa moita o la ere usoso Ualare ve safu o feare satiriara vovea.

8E Ualare ve safu o la haiarara lei kiripi, karu sa satiriaraiape papa o la kiva kofa leiti vei.

9Aea are erero ta mō moipe, E maeahahauhahau ita Ualare ve safu o la haiarara lei sukavuteaitore, ipi eve papa sa moipe o la mapi kakeva leiti vei. 10Ipi Mose mō ōpe, Ave oalou‐ita maeaforoe lei taivotaia; aea areve oa varo lou varo o maealolo arita lea karu la etakofa paeaia.#Eso 20:12; 21:17; Levi 20:9; Deut 5:16 11A—, e mō aritore, Karu aea areve oa ō areve lou la o mōfeare moit’ oria, Euka ara voa ovai haikaeaita lea meru etau faitora kobana loi (lea o mavitoai areve eite Ualare vei toutea miavaita etau); 12e arero lōri sasauka are areve oa ō areve lou vei etau farakeka aea la levi leiti vei. 13Lōfeare e kiva lei satiriaraita eve lea papa o sa Ualare ve safu o la lei eite auke ita leititore. Aea e etau rauapo ta lōfeare lei vovea.

14Aite are karu arero tai ata isa koti erero mō ōpe, E araro mapaia, aeata eve haiiri fapa puavaia. 15Maria voa eaeita etau aea karu sa la’ iri voa oropaita soa, lea etau areve haiiri la lei maealolo leitita ore kao, a—, karu ve haiiri voa pea pisiri voa foreraita lea etau arero lei maealolo leititore. 16Karu mapaita ōvauta ita oria, lea o la mapaia.

17Soka are lea karu rauapo la kiripi, areve uvi voa oropōpe lea mea, areve satiriaraita karu lea hohore o vei arero lalasi leipe. 18Lei, are erero mō ōpe, E ta haiiri ovava leiti kao ei? E mapai kao ei? Maria voa siseita etau hariaharia karu ve iri voa oropaita, arero lei maealolo leitita ore kao. 19Ipi lea larietau fauka areve haiiri voa oropai sore, a—, areve ére horou voa, aea aite pisiri voa e lei paitore. (Are lea o mei, larietau foromai la lōri lei ovava leipe.) 20Are ta mō ōpe, Karu ve haiiri voa sisea maria voa foreraita lea etau etau arero lei maealolo leititore. 21Ipi karu ve iri voa ereve haiiri sa kaiae hariaharia la seseōvi haikaeaita maealolo la lōri leititore; mōfeare, etau torea, aea karu la paeai, 22aea ua torea, aea etau ovai vei haikakare, aea karu la hasiavai, aea apeva, aea safu la sukavuteai, aea hilia hilia, aea kisari maealolo, aea maeamarōva, aea maeakakare. 23Lea kaiae etau foromai karu ve haiiri voa sisea, maria voa foreri, arero lei maealolo lōri leititore.

Suria‐Fenesia ua ve sukaerereai

(Mataio 15:21–28)

24Soka are lea oti kiripi maea lei Turo karikara ve soa voa isei, are uvi aea voa oropi pavōpe; aea are haikaeai kao karu aea lea la ore leiti vei, a—, are murufakao pavai vei usoso leiti kao. 25A—, ua aea, areve mori seika harisu maeasiaviri sa toaiape lea ua, areve fari mapi, utohoa koti, areve mora ipi voa sukakoka avi hiopōpe. 26Soka are Helene ua, Suria‐Fenisia ve toruipi karu; aea are arero loki leipe are areve mori ve iri voa peiape lea harisu maealolo la maria voa larivatai vei. 27Are arero mō ōpe, Atutemori ere omopa ére popai ao, ipi atutemori ve larietau la fareōvi, ave voa toapaita lea mai haura kasirau. 28A—, are arero tava o mō ōpe, Okofa, Papuvita e, a—, posa hiairi voa roroaita lea ave ta atutemori sa lei sisapaita larietau eloe‐eloe lalō vovea. 29Are arero mō ōpe, Ipi lea o vei, a elore voa teraia, lea harisu ave mori kiripi soeaita meha. 30Soka are areve uvi voa te, areve mori harisu arero kiripi soea roroka lei, lea mori ivutu posa voa eaeiape la ofae eavōpe.

Ōvasuru okuku karu aea

31Are Turo ve soa kiripi, Sidono voa kei tetete Dekapoli ve soa ve aru voa sariva lei, Galilea ve sitoi voa ata kerori forerōpe. 32Foreri, karu hea ōvasuru okuku karu aea la Iesu tai lariōvi iti, arero loki leipe are areve mai sa arero mopai vei. 33Soka Iesu karu sitavu la kiripi arero itai voa murufakao lariōvi, areve mai lakoka sa lea karu ve ōvauta oraka iri voa musukea, are apea soea areve uri la mai opa sa mopi, 34aea are kauri voa misilei, haisusuru a’, arero mō ōpe, Efata, lea o ve eite, Fapaia. 35Lō mei areve ōvauta fapi, areve uri ta orali lei, are laua lareva ita sukavōpe. 36Soka are erero o erere ōpe, ere lea fari karu aea la levi moi vei; a—, are erero o erere haelarehaelare ape, a—, ere ta lea fari la haelarehaelare fafarapaiape. 37Ere haihava foromai lei, mō ōpe, Are etau foromai metakao lei vovea; are ōvasuru karu la lei mapaitore, aea okuku karu ta lei laua sukavaitore.

Currently Selected:

Mareko 7: TQO1983

Highlight

Copy