Mareko 6

Iesu elore karikara voa

(Mataio 13:53–58; Luka 4:16–30)

1Are lea oti kiripi areve elore mea voa forerōpe; aea areve satiriaraita karu arero aitetei roroaiape. 2Soka Sabati sare leipe soa are sunako uvi voa satiriaraiape. Karu rauapo lōvoa aipepea, areve o la mapi mapi haihava lei mō ōpe, Mea vita mea leavoa ovaitore? Are mōfeare naiovoro leafeare ovaitore? Are mea haihava etau etau leafeare leititore? 3Mea vita are kamuta karu kao ei? Maria ve lea atute, aea Iakobo aea Iose aea Iudasi aea Simona ita ve paua? aea areve uarosu ereita ita fareho pepeia kao ei? Aea ere arero hilisi lei kitou leipe. 4Iesu erero mō ōpe, Peroveta karu la oti haria karu sa taivotai vovea, a—, areve elore mea voa, aea areve elore toruipi voa, aea areve elore karu firu kofa voa sa haria arero taivotai sore.#Ion 4:44 5Are haihava etau hea lōvoa leiti vei ore auke lei, eka karu farafarapo haria la are mai sa paea, erero lei lareva leiape. 6Ipi ere sukaerereai auke leipe lea vei are haihava leipe.

Iesu areve satiriaraita karu la itoro ari vei itapōpe

(Mataio 10:5–15; Luka 9:1–6)

Soka are eakoa toepōpe karikara karikara voa te satiriōri vovo meiape. 7Are twelve karu arero tai isa erero karu oraka oraka itapi, siahu ta erero miarōpe harisu maeasiaviri la larivatai vei. 8Are erero o kere mō ōpe, E sariva etau levi maravaia, a—, mora kaika haria; larietau kao, oroa ta kao, aea moni ta eve kava oroa voa levi vuapaia;#Luk 10:4–11 9e tamaka eve mora voa mopi, a—, iri puta orakoria levi mopaia. 10Are erero ta mō ōpe, E alaeaita lea uvi voa pavaia, pepe e lea karikara la kiripi maea leita soa voa. 11Oti aea voa karu ero maeafukapai auke lei, aea lea karikara karu ero mapai haiarara leitit’ oria, e lōvoa kiripaita lea soa eve mora ipi voa pasaea siseita tetere la pailalaea sisapaia, ereve mai maealolo ve muiaita peise vei.#Apos 13:51 12Soka ere maea lei te, karu ere haiiri kerori vei itoro ape. 13Aea ere harisu rauapo la maria voa larivataiape, eka karu rauapo la teoru sa veveti erero ata lei lareva leiape.#Iak 5:14

Ioane Bapatiso Vita ve opai

(Mataio 14:1–12; Luka 3:19–20; 9:7–9)

14Iesu ve rare sa pisiri lei ore leipe lea vei, King Heroda areve fari ta mapōpe. Karu hea mō ape, Ioane Bapatiso Vita opai voa ata itei la mea, aea haihava leita siahu are voa etau maeamaea lea vei la leipea.#Mat 16:14; Mak 8:28; Luk 9:19 15A—, karu hea mō ape, Are Elia. Karu hea ta mō ape, Are peroveta vita aea, usoso evera soa ve peroveta karu aea feare.

16A—, Heroda lea fari la mapōpe soa are mō ōpe, Ioane, ara sa lei areve harofave sarapi fareovaia lea vita opi ata itoita meha. 17Ipi mea Heroda are Ioane la mōfeare paeōpe, are karu itapi, Ioane la fasi dibura uvi voa sasaukōpe, ipi areve paua Filipi ve ua Herodiasa sa haikaeōpe lea vei. Eite lea ua Heroda sa laeōpe,#Luk 3:19–20 18a—, Ioane are Heroda la mō ape, A ave marehari ve ua la ovaita lea mai safu. 19Soka Herodiasa arero kitou lei, arero paeai vei haikaeōpe, a—, are usoso leiti kao; 20ipi Heroda are Ioane la tore leiape eavia, ipi are ore Ioane are haura aea safu vita lareva, aea are lea vei areve makuri la kiva leiape. Are areve ovoro la mapaiape soasoa voa are haiiri kapekapea, a—, arero haihahari ita mapaiape.

21Soka Heroda arero epōpe sare la haikaeaita sosoka lei, areve basileia ve papukaru, aea areve maola karu ve kapena karu, aea Galilea ve harofave karu ita la isa kokorukōpe lea mea, Herodiasa sa taiape soa kofa forerōpe reha. 22Ipi Herodiasa ve mori oropi e‐oipe soa, are Heroda aea are ita fareho larietau lape karu ita la lei hailareva foromai leipe. Lei, king lea mori la mō ōpe, A haikaeaipeta etau lekōru, araro loki leitia, aea ara lea etau aro au miarai roi. 23Are ta otoare a’ mō ōpe. A araro loki leita lea etau la ara aro miarai roi, soa arave basileia ve itai voa. 24Soka are maria voa te areve lou la lalasi lei mō ōpe, Ara lekōru vei loki leiti roi? Lei, areve lou mō ōpe, Ioane Bapatiso leita Vita ve harofave. 25Soka are lavelave king tai ata oropi, loki mō leipe, Ara mōfeare la haikaeaipea, a utohoa Ioane Bapatiso leita Vita ve harofave mereki voa vuapi, araro miaraia. 26Lō mei, king haieae foromai leipe; a—, ipi areve otoare vei aeata ipi are ita fareho larietau la’ aipepeiape lea karu vei, are lea mori la moipe otoare la apeva leiti haikaeai kao. 27Soka king are utohoa uvi kiva maola karu aea la Ioane ve harofave sarapi ovi koti vei o mei itapōpe. Lea karu te Ioane ve harofave la dibura uvi voa sarapi fareōvi, 28areve harofave mereki voa vuapi ovi koti mori la miarōpe; lea mori are harofave la ovi areve lou la miarōpe. 29Soka Ioane ve satiriaraita karu lea fari la mapōpe lea mea, ere kei areve maea la fareōvi tapu oti voa viopōpe.

Iesu larietau karu 5,000 la miarōpe

(Mataio 14:13–21; Luka 9:10–17; Ioane 6:1–15)

30Soka aposetolo karu Iesu tai ata kerori kokoruka, ere leiape aea satiriaraiape etau etau foromai la arero omoipe. 31Omei, are erero mō ōpe, E ara ita fareho oti meara voa kotiria, soa taheka haiorai ao. Ipi lō tera lō iti leiape karu rauapo sa erero lei, ere larietau lari vei soa kao. 32Soka ere oroti voa forea, ere hariakao oti meara voa ufōpe.

33A—, ere maea lei ufōpe soa karu rauapo erero eovi ore lei, karikara karikara foromai kiripi, ere pavai vei leipe oti voa mora sa oroa eakoa, ereve omopa voa forera kokorukōpe. 34Iesu miri voa forōpe soa, are karu sitavu la ofae eovi erero maeaforoe leipe, ipi ere usoso kiva karu auke mamoe feare lei roroaiape; aea are etau rauapo erero satiriaraiape.#Num 27:17; 1 King 22:17; 2 Basil 18:16; Ese 34:5; Mat 9:36 35Satiriōri satiriōri sare kaleiti vei leipe lea soa, areve satiriaraita karu arero tai koti mō ōpe, Mea oti merava aea sare ta kaloi; 36erero paraea itapaia eakoa toepaita furuka karikara voa, aea karikara haroharo ita voa te, ere ereve larietau itaea lei maravai vei. 37A—, are tava o erero mō ōpe, Eve elore mai sa larietau erero miaraia. Soka ere arero mō ōpe, Ela te silva moni koru 200 miōri faloa lōri itaea lei maravi, erero ere lari vei miarai vei ei? 38Lō mei, are erero mō ōpe, E voa faloa koru leafere? Te ofae eavaia. Soka ere eovi ore leipe lea mea, ere mō ōpe, Five, aea ekaka oraka ta reha.

39Lea mea are eroro foromai la o mei, ere kavuru voa firufiru ava puavai vei. 40Soka ere firufiru voa, firu hea karu one hundred, firu hea karu fifty, lōri ava puavōpe. 41Are lea faloa koru five aea lea ekaka oraka ita la ovi, kauri voa misilei, larietau vei Ualare la maeati, faloa la fofi, satiriaraita karu la karu omopa posaseai vei miarōpe; are ta lea ekaka oraka la ere foromai vei fofōpe. 42Soka ere larietau la’ la’ ére popōpe. 43Ere lea fofōpe larietau ekaka ita ve hohoi hohoi la maravi, posea twelve soōpe. 44Lea larietau lalape karu voa heavita haria la mai mutipe 5,000 reha.

Iesu ma ve arori voa mora sa meiape

(Mataio 14:22–23; Ioane 6:16–21)

45Soka are areve satiriaraita karu la utohoa haisa oroti voa forea areve omopa voa Betesaida voa ufai vei leipe, are lea karu sitavu la paraea itapai ao. 46Soka are erero paraea itapi itapi roroka lei, are raepa voa Ualare la loki leiti vei pataipe. 47Mea aeōpe soa oroti mai pisiri voa meiape, a—, are mea voa hariakao meiape. 48Soka are erero ofae eovi, ere fala haisora ita toaiape, ipi mea omopa voa itiape eavia. Soka mea ōpai soa feare voa are ma ve arori voa mora sa mea erero tai foreri, aea erero foapai vei leipe. 49A—, ere arero ma ve arori voa mora sa meiape la ofae eavōpe lea mea are karisu o a’ maea fi rovaea ōpe, 50ipi ere foromai arero ofae eovi maea totororo leipe. A—, are utohoa erero o mei mō ōpe, Ivara leitia, ara meha; tore levi leitia. 51Lō mei are erero tai patei oroti voa forea, aea mea au sarapōpe. Ere haihava foromai leipe, 52ipi lea faloa vei leipe mai ve eite ere ore auke lei, ere haiivavu lei roroaiape.

53Ere ma voa ufi roroka leipe lea mea ere Genesareta ve miri voa isei, susuri avi, lopa miri voa toōpe. 54Ere miri voa fafukōpe soa, karu Iesu la eovi utohoa ore lei, 55aea lea otioti foromai voa karu lavukakaea oroa, eka leiape karu la ereve kakosa voa taiovi itiape, ere fari mapi are meiape lea otioti voa. 56Aea are foreraiape lea otioti foromai voa, karikara kaekae aeata metameta ita, aea forōva karikara ita, ere eka karu la karikara pisiri voa miavi, arero loki leiape ere areve maea puta ve ipi peto fufusi la mai sa mopai vei; aea arero mai sa mopaiape lea karu foromai ere ata lareva leiape.

Currently Selected:

Mareko 6: TQO1983

Highlight

Copy