Mareko 3

Mai hōru sisapōpe vita vei

(Mataio 12:8–21; Luka 6:6–11)

1Are sunako uvi iri voa ata oropōpe, aea mai hōru sisapōpe karu aea lōvoa aiseseiape. 2Soka ere arero ofae sa kiva lei fofoisaiape, are Sabati sare voa arero lei lareva leitita varo, ipi ere arero havara paraeai vei. 3Are mai hōru sisapōpe vita la mō ōpe, A itei aru voa pavaia. 4Aite are erero lalasi lei mō ōpe, Sabati sare voa karu la toaraita ei, ō karu la hasiavaita ei, mai lareva leavoa? Karu la lei makuri leita ei, ō karu la paeaita ei? A—, ere o kasirau. 5Are erero kitou ita ofae kerori kerori a’, ere sa maeaforoe auke leipe lea vei are haiiri eae lei, lea vita la mō ōpe, Ave mai sosoropaia. Are mai sosoropōpe soa areve mai lareva leipe. 6Soka Farisea karu sunako uvi kiripi te Herodiana karu ita laua utohoa seseōvaiape, ere arero lea’ lei arero paeai vei.

Karu sitavu sitavu Galilea sitoi ve miri voa

7Iesu areve satiriaraita karu ita lea oti kiripi, Galilea sitoi ve miri voa te forerōpe; aea Galilea soa ve karu sitavu sitavu arero aitetai roroaiape; aeata Iudea soa ve karu, 8aeata Ierusalema karu, aea Idumea soa ve karu, aea loridana mai itai voa fosipe karu, aea Turo aea Sidono ita ve mea eakoa toepōpe karu, ere are sa leiape mai foromai ve fari la mapi, ere karu sitavu sitavu arero tai forera vovo roroaiape. 9Soka are areve satiriaraita karu la o mei, ere oroti seika aea la ovi are vei lei kekese leiti vei, ipi lea karu sitavu sa arero topiferavai ave.#Mak 4:1; Luk 5:1–3 10Are eka karu rauapo la lei lareva leiape lea vei, maea eka ita roroaiape karu foromai arero mai sa mopai vei arero aopeaiape. 11Aea harisu maeasiaviri arero ofae eavaiape lea soasoa voa, ere areve omopa voa putei, i rovaea ita mō isaiape, A Ualare ve Atute. 12A—, are erero o erere kere ita ape, ere areve fari levi fafarapai vei.

Iesu areve aposetolo twelve la ovōpe

(Mataio 10:1–4; Luka 6:12–16)

13Aite are raepa voa patei, aea are ovai vei haikaeōpe lea karu la are isa, ere arero tai kotipe. 14Aea are karu twelve la ovōpe ipi are ita fareho roroai vei, aea ipi are erero maria voa itapi itoro ari vei, 15aea harisu la larivataita siahu ta ovai vei. 16Soka lea karu twelve ve rare rare meha: Simona, are rare aeata Petero la aravōpe; 17aea Iakobo Sebede, aea Iakobo ve marehari Ioane Sebede ita, ereukaro ta are Boanere rare la aravōpe, lea rare ve eite, sisorea tutururu ve atute oraka; 18aea Anderea, aea Filipi, aea Batolomeo, aea Mataio, aea Tomasi, aea Iakobo Alefeo, aea Tadeo, aea Simona Selote karu, 19aea Iudasi Isakariota karu, kivaia lei Iesu la paeai vei miarōpe lea vita.

Iesu ve paumarehari

20Aite are areve uvi voa terōpe, aea karu sitavu sa ata koti kokorukaiape lea vei, Iesu areve satiriaraita karu ita heafo lei lei, larietau lari vei soa kao. 21Soka areve paumarchari lea fari la mapōpe soa, ere arero sukafori lariōvai vei forerōpe, ipi ere mō ōpe, Are haiiri sa veverapi mea.

Safu Karoro ore karu ve o maealolo

(Mataio 12:22–32; Luka 11:14–23)

22Ierusalema voa fafuka forerōpe Safu Karoro ore karu mō ōpe, Arero Belesebulo sa ovi leipea, aea are harisu ve lea harofave vita sa lei, harisu la lōri larivataitore.#Mat 9:34; 10:25 23Are erero isa koti parabole o ita erero mō ōpe, Satani sa Satani la leafeare larivatai roi ei? 24Basileia aea tofei itai itai leitita, a—, lea basileia peita ore kao. 25Aea uvi aea ve karu ere faea itai itai leitita, ere elore maea levi pepeava roi. 26Aea Satani areve elore maea la hasiavai vei itoita, a—, are pavaita ore kao, areve soa kaleita reha.

27Karu aea are rofo vita aea ve uvi voa areve etauroro la torea leiti vei oropaita usoso kao, a—, are lea rofo vita la horou sa evera fasai ao, aite are areve uvi voa etauroro la torea lōri lei fareovaita ore.

28Ara okofa ero omoi, karu maeamaea sa leita kaiae hariaharia foromai ve tava, aea ere moita kaiae o foromai ita ve tava la sasuka mutapai roi; 29a—, Safu Arahoha Lareva la o kaiae arita lea karu ve kaiae tava la levi sasuka mutapai peava roi, a—, arero peita iri kaiae sa fasai.#Luk 12:10 30Lea o ve ipi ere mō ape eavia, Arero harisu maea siaviri sa ovi leipea.

31Soka Iesu ve lou aea areve mariosu ita koti, uvi maria voa pepea, ere karu arero tai itapi arero isa koti vei moipe. 32Karu rauapo arero eakoa toepi aipepea, arero mō ōpe, Ave lou ita mariosu ita eapo a vei maria voa popōvi lalasi la leipea. 33Soka are tava o mō ōpe, Arave lou ita, arave mariosu ita lavea lavea? 34Aea are arero eakoa toepi aipepeiape karu la ofae kerori kerori a’ mō ōpe, Ofae eavaia, arave lou ita, arave mariosu ita meha. 35Ualare sa haikaeaita mai la leita lea karu, arave marehari, aea uaroa, aea lou ere reha.

Currently Selected:

Mareko 3: TQO1983

Highlight

Copy