Mareko 2

Iesu maea susuru eka karu la lei lareva leipe

(Mataio 9:1–8; Luka 5:17–26)

1Sare hea ve aite voa are Kaperanauma voa ata kerori oropōpe lea mea, are areve uvi voa peiape fari fafarapōpe. 2Fafarapi fafarapi, karu rauapo kokoruka kokoruka, uvi koko foromai lei, pisiri utape voa ta oti kasirau; aea are Ualare ve ovoro erero satiriaraiape. 3Soka karu hea ere maea susuru eka karu aea la arero tai oviti, karu orakaraka sa taiovi itipe. 4A—, ipi karu sitavu eavia, ere Iesu ve maea maria voa foreraita ore auke lei, ere areve haro arori ve uvi kōu la fareōvi, aea ere uta areravi roroka lei, ere maea susuru eka karu sa iavi eaeiape kakosa la paraea faukōpe. 5Iesu ereve sukaerereaita haiiri la ofae eovi, are maea susuru eka karu la mō ōpe, Atute e, ave iri kaiae sasuka mutapaita meha. 6Soka Safu Karoro ore karu hea lōvoa aipepea, ereve haiiri voa mō seseōvaiape, 7Mea vita o lōri aipeta ipi levea? Lea o Ualare la hasiavai. Iri kaiae la sasuka mutapai vei leisa ore? Ualare sa haria. 8A—, Iesu, ere haiiri lōfeare seseōvaiape la utohoa areve haiiri voa ore lei, erero mō ōpe, E eve haiiri voa lōfeare seseōvaipeta ipi levea? 9Heafo auke etau leavoa, mea maea susuru eka karu la mō aritōva, Ave iri kaiae la sasuka mutapai vei ei? ō mō aritōva, Itei, ave kakosa la fareōvi mora terai vei, ei? 10Soka ipi ero lei ore leiti vei, Karu ve Atute mearovaeka voa iri kaiae la sasuka mutapai vei siahu ia — are maea susuru eka karu la mō ōpe, 11Ara aro o mō la auai, Itoia, ave kakosa fareōvi taivovi, elore voa teraia. 12Lō mei are itei, areve kakosa utohoa fareōvi taiovi, ere foromai ve omopa voa maria voa terōpe. Ere foromai lea vei haihava lei, Ualare la maeati mō ōpe, Ela mōfeare etau evera ofae eavai kasirau.

Iesu Levi (Mataio) la isōpe

(Mataio 9:9–13; Luka 5:27–32)

13Are ata maea lei sitoi poe ve miri voa te, karu foromai arero tai foreri, are erero satiriaraiape. 14Are orapa vovo terōpe soa, are Levi Alefeo, etau maeamaea ve takis oti voa aiseseiape la ofae eovi, arero mō isa moipe, Araro aitetei kotiria. Lō mei, are itei arero aitetaipe.

15Soka are Levi ve uvi voa larietau la’ aiseseiape soa, takis karu rauapo aea kaiae leita karu ita, ere Iesu aea areve satiriaraita karu ita farehoria larietau la’ aipepeiape; ipi karu rauapo lōfeare arero aitetei roroaiape. 16Safu Karoro ore Farisea karu, are takis fareovaita karu ita iri kaiae leita karu ita farehoria larietau lōpe la ofae eovi, ere areve satiriaraita karu la mō ōpe, Are takis fareovaita karu ita iri kaiae leita karu ita farehoria larietau loloita ipi levea? 17Soka Iesu lea o la mapi erero mō ōpe, Maea rofo karu dokita haikaeai sore, a—, eka karu sa haria. Ara mai haura leita karu la isai vei koti kao, a—, kaiae leita karu vei.

Larietau avoha leita mai vei

(Mataio 9:14–17; Luka 5:33–39)

18Soka Ioane ve satiriaraita karu aea Farisea karu ita lea soa voa larietau avoha leiape. Lei, karu foreri arero lalasi mōri leipe, Ioane ve satiriaraita karu aea Farisea karu ve satiriaraita karu ita larietau avoha leita ipi levea, a—, ave karu avoha leiti sore, ei? 19Iesu erero mō ōpe, Ua laeai vei leipeta vita ere ita farehoria meita soa, areve paumarehari larietau avoha leita ore ei? Ua laeai vei leipeta vita ere ita fareho peita lea mea, ere larietau avoha leitita ore kasirau. 20Sare aite forerai roi lea soa mea ua laeaita vita ere voa fareovai roi, aea ere lea sare voa larietau avoha leiti roi.

21Karu kokoeai auke leita puta áre taratara la ovi puta ōsi voa levi topiari totorai roi; topiari totorait’ oria, lea puta áre taratara sa arero torerapi, puta everove ata kiripai roi, aea lea uta lōfeare foromai maealolo leiti roi. 22Karu uaina áre la ovi uaina ruru everove voa sisōvai sore; are sisōvait’ oria, lea uaina áre ruru la lei haea sisapi veverapai roi, aea uaina ruru ta hasiavai roi. Karu uaina áre la ruru áre voa sisōvaitore.

Uiti forōva oti Sabati sare voa

(Mataio 12:1–8; Luka 6:1–5)

23Sabati sare aea voa Iesu uiti forōva otioti ve aru voa terōpe, aea areve satiriaraita karu lea otiharo voa uiti fare la rurua vovo terōpe.#Deut 23:25 24Soka Farisea karu arero mō ōpe, Ofae eavaia, lea mai Sabati sare voa safu; ere lōri leipeta ipi levea? 25Lō mei, are erero mō ōpe, E Davida sa leipe lea mai ve fari muti sore ei? are aea are ita fareho roroaiape karu eroa sa’ maea kakapiso leipe lea mea.#1 Sam 21:1–6 26Abiatara sa maso harofave vita lei peiape lea soa voa, are Ualare ve uvi voa oropi, omopa posaseaita faloa la lōpe, eite lea faloa karu merava sa lari vei safu, a—, maso tivi karu sa haria; aea are lea faloa hea ta ovi areve maeapavora karu la miarōpe.#Levi 24:9 27Are o aeata erero mō ōpe, Sabati Ualare sa karu vei leipe, a—, are karu la Sabati vei leiti kao. 28Lea vei arao, Karu ve Atute, ara ta Sabati ve papuvita.

Currently Selected:

Mareko 2: TQO1983

Highlight

Copy