Mareko 1

Ioane Bapatiso leiape Vita

(Mataio 3:1–12; Luka 3:1–18; Ioane 1:19–28)

1Iesu Keriso, Ualare ve Atute vei, lea Ovoro Lareva ve oarehōva o meha. 2Usoso peroveta Isaia ve buka voa mō uka siseipeta o fefeare,

Mapaia, ara arave meu ave omopa voa itapi,

are ave otiharo la lei kekese leiti roi.#Mala 3:1

3Furuka merava voa karu aea i mō la isa moipea,

Papuvita ve otiharo la lei kekese lei,

areve terai oti la lei haura lei puavaia.#Isa 40:3

4Ioane, bapatiso leiape lea vita, furuka merava voa lōfeare foreri, iri kaiae la sasuka mutapai vei lea haiiri kerorita bapatiso la itoro ape. 5Aea Iudea mea ve karu foromai, aea Ierusalema karikara karu foromai ita kei arero tai kokorukaiape; aea ere ereve iri kaiae la vavavi, are erero Ioridana mai voa bapatiso lei vovo meiape.

6Soka Ioane kamela ve mehe sa sōpe maea puta mopi, animala ve ruru kava areve sofa voa suka meiape; aea areve larietau puka ita meoe‐ma ita reha.#2 King 1:8 7Are itoro ta a’ mō ape, Arave siahu la sapataita vita arave aite voa koti vei la roi; ara lareva kao hiopi, areve tamaka ve éla la felaukeai vei. 8Ara ero ma sa bapatiso lei vovo mea, a—, are ero Safu Arahoha Lareva sa bapatiso leiti roi.

Ioane Iesu la bapatiso leipe

(Mataio 3:13–17; Luka 3:21–22)

9Soka lea soa voa Iesu are Galilea soa ve Nasareta karikara kiripi koti, Ioane sa arero Ioridana mai voa bapatiso leipe. 10Lei are ma iri voa karoa ata itoipe lea soa kofa voa, are kauri haea aea Arahoha, usoso sua ve maea feare, arero tai faukōpe la ofae eovi, 11aea i kauri voa forera mō ōpe, Arave haikakare Atute a reha; ara a vei hailareva leititore.#Gen 22:2; Sal 2:7; Isa 42:1; Mat 3:17; 12:18; Mak 9:7; Luk 3:22

Satani sa Iesu la kaiae leiti vei kureōpe

(Mataio 4:1–11; Luka 4:1–13)

12Lea soa Arahoha arero furuka merava voa utohoa haisa itapi, 13are sare forty furuka merava voa pea, arero Satani sa are kaiae leiti vei kureaiape. Iesu fara animala ita fareho pea, aea aneru arero kiva lei toaraiape.

Iesu Galilea soa voa

(Mataio 4:12–17; Luka 14:14–15)

14Soka Ioane dibura uvi voa fasōpe soa ve aite voa, Iesu Galilea voa forera Ualare ve Ovoro Lareva la itoro a’ 15mō ape, Soa foreri kekese loita meha, aea Ualare ve basileia forerai vei la roi; haiiri keroria aea Ovoro Lareva la sukaerereaia.#Mat 3:2

Areve oarehōva satiriaraita karu

(Mataio 4:18–22; Luka 5:1–11)

16Are Galilea ve sitoi ve miri voa orapa vovo terōpe soa, are Simona, aea Simona ve marehari Anderea ita loko toaiape la ofae eavōpe; ipi ereuka ekaka tapora karu eavia. 17Iesu ereukaro mō ōpe, Euka araro aitetei kotiria, aea ara eukaro lei euka karu la usoso ekaka feare tapora lei maravai roi. 18Lō mei, ereuka loko utohoa kiripi, arero aitetei terōpe.

19Are soa taheka ata te, Iakobo Sebede auka areve marehari Ioane ita la ofae eavōpe, ereuka oroti voa loko uta sape. 20Are ereukaro ta utohoa isa, ereuka ereukave oa Sebede, tivi karu ita la oroti voa kiripi, arero aitetei terōpe.

Iesu Kaperanauma voa

(Luka 4:31–37)

21Soka ere Kaperanauma voa te forerōpe, aea Sabati sare leipe lea mea are utohoa sunako voa oropi satiriarōpe. 22Satiriōri, karu areve lea o vei haihava leipe, ipi are erero o siahu ita satiriaraiape, Safu Karoro ore karu ve mai feare kao.#Mat 7:28–29

23Aea lea soa kofa voa harisu maeasiaviri sa toōpe karu aea ereve sunako voa foreri, 24o ape rovaea ita mō moipe, A elaro leafeare leiti vei leipea, Iesu Nasareta karu e? A elaro saroroapai vei koti ei? Ara aro ore kofa, a Ualare ve Safu Vita. 25A—, Iesu lea harisu la o erere a’ mō ōpe, O soka, arero kiripi foreraia! 26Lō mei, lea harisu maeasiaviri arero lei, mai ita mora ita sukasuka a’ maea fi rovaea ita arero au kiripōpe. 27Soka karu foromai haihava rovaea kofa lei, aea ere lea vei lalasi elore elore lei mō ōpe, Mea lekōru mai? Satiriaraita mai áre meha! Are siahu ita harisu maeasiaviri o kere mei, ere arero mapi kakeva loi. 28Areve fari utohoa otioti foromai voa, Galilea ve eakoa toepōpe mea voa fafarapaiape.

Simona Petero ve ōvalou aeata eka hariaharia karu

(Mataio 8:14–17; Luka 4:38–41)

29Aite Iesu sunako uvi kiripi koti Simona auke Anderea ita ve uvi voa foreri, Iakobo auke Ioane ita farehoria oropōpe. 30Soka Simona ve ōvalou vevekoko eka sa lei eaeiape, aea ere o are vei Iesu la utohoa omoipe. 31Mei, are arero tai foreri areve mai la paea, arero moravi itei, areve vevekoko eka lōri kaleipe; aea are maeafukapaita mai ere vei leipe.

32Sare sukopi mea viriviri leipe soa, karikara karu ereve eka karu foromai, aea harisu sa toaiape karu ita la arero tai lariōvi itipe. 33Iti iti karikara karu foromai lea uvi ve utape voa aopea pepeiape. 34Aea are eka hariaharia karu rauapo la lei lareva lei, aea harisu rauapo la maria voa larivataiape. Are harisu ve laua la safutaiape, ipi ere arero ore leipe eavia.

Galilea ve oti hariaharia voa

(Luka 4:42–44)

35Soka miori muru, mea ilaila soa voa, are itei, maria voa te oti meara voa Ualare la loki leiape. 36Lei lei, Simona aea are ita fareho roroaiape karu arero aitetei eli te, 37arero ofae eovi mō ōpe, Karu foromai aro la elipea. 38A—, Iesu erero mō ōpe, Ereita oti haria voa maea hōi karikara karikara voa maea lei te, ara lōvoa ta itoro ari vei; ara maria voa foreri meipeta ipi reha. 39Are Galilea ve soa foromai voa ereve sunako hariaharia voa itoro a’ a’, aea harisu la larivata vovo teraiape.#Mat 4:23; 9:35

Iesu aea pokea eka karu ita

(Mataio 8:1–4; Luka 5:12–16)

40Soka pokea eka karu aea arero tai foreri, arero loki lei, sukakoka avi, arero mō ōpe, A haikaeai oria, a araro lei ovava leita ore. 41Lō mei, Iesu arero maeaforoe lei, areve mai sosoropi, arero mopi mō ōpe, Ara hai la kaeaipea, a ovava leitia. 42Soka lea pokea eka arero utohoa kiripi, are ovava leipe. 43Iesu arero o haiiri a’ mea o ita utohoa itapi, 44mō ōpe, Mapaia, a o karu farakeka aeata levi moia; te ave maea maso tivi karu la muiaia, aea ipi a ovava loita lea vei, a Mose sa moipe lea etau la omopa posaseaia, erero lei ore leiti vei.#Levi 14:1–32 45A—, are maria voa te, lea o lō moi lō moi lei, areve fari lōri fafarapaiape. Lea vei Iesu karikara karikara voa pisirikao oropaita ore auke lei, are maria oti maeamaea voa meiape; aea eakoa toepōpe otioti foromai voa karu arero tai foreraiape.

Currently Selected:

Mareko 1: TQO1983

Highlight

Copy