Mareko 14

Iesu la paeai laua

(Mataio 26:1–5; Luka 22:1–2; Ioane 11:45–53)

1Lea soa voa Foapaita Sosoka aea Fefesi auke Faloa ve Sosoka ve soa sare orakoria ve aite voa eaeiape. Soka maso harofave karu aea Safu Karoro ore karu ita haiiri seseōvaiape mai leafeare sa lei, Iesu la murufa sukafori paea opai vei;#Eso 12:1–27 2ipi ere mō ape, Sosoka soa voa levi leitia, karu sosori a’ lavukakaeai ave.

Ua aea sa Iesu la muforoe lei vevetipe

(Mataio 26:6–13; Ioane 12:1–8)

3Soka Iesu Betania voa, Simona pokea eka karu ve uvi voa peiape; are posa voa avi larietau lalape soa, ua aea are tava rovaea‐rovaea‐eite opa‐mavo muramura muforoe sa soōpe fave kavapu ita koti, kavapu are toa fapi, muramura muforoe Iesu ve harofave voa sisōvōpe.#Luk 7:37–38 4A—, karu hea ere kitou lei elore elore mō ōpe, Lea muramura muforoe auraka sisōvaita ipi levea? 5Lea muramura itaea lei miōri tava silva moni koru 300 ve arori voa lōri ovaita, a—, lea moni merava karu la miaraita ore leiti lare. Ere arero haiarara lei seravaiape. 6A—, Iesu mō ōpe, Soka are eaea; e arero lei haisora leipeta ipi levea? Are araro loita mea mai lareva kofa. 7Ipi merava karu e ita farehoria pepeava roi, aea e haikaeaita lea soasoa voa e erero toaraita ore; a—, ara e ita soa foromai levi peava roi.#Deut 15:11 8Are ore leitita etau are loita reha; are arave maea la muramura muforoe sa roroai araro viopai soa vei everori kekese loita reha. 9Soka ara ero okofa o la moi, Ovoro Lareva la mearovaeka foromai voa itoro arita lea soasoa voa, mea ua sa loita mai ta moi peava roi arero haikaeai vei.

Iudasi ve otoare

(Mataio 26:14–16; Luka 22:3–6)

10Soka Iudasi Isakariota karu, lea twelve karu aea, are kivaia lei maso harofave karu tai terōpe, Iesu la paeai vei miarai vei. 11Ere lea o la mapi hailareva lei, ere moni arero miarai vei otoare ōpe. Soka are kivaia lei miarai vei soa lareva la au taiape.

Iesu areve satiriaraita karu ita ve Foapaita Sosoka

(Mataio 26:17–25; Luka 22:7–14; Ioane 13:21–30)

12Soka Fefesi auke Faloa ve Sosoka ve oarehōva sare, karu Foapaita Sosoka ve mamoe mere la savaita soa, Iesu ve satiriaraita karu arero mō ōpe, A haikaeaipeta oti leavoa ela te Foapaita Sosoka a lari vei lei kekese leiti vei? 13Lō mei Iesu areve satiriaraita karu oraka la mea o ita mei ereukaro itapōpe, Karikara voa teraia, aea ma posu la taiovi meita vita sa eukaro sukaeai roi; arero aitetaia. 14Aea are oropaita oti voa oropi, lea uvi ve papuvita la mō moia, Satiriaraita Papuvita o mō auai, Sariva karu ve lalava ara vei leavoa, ara arave satiriaraita karu ita Foapaita Sosoka la lōvoa lari vei? 15Aea are arori lalava rovaea, avaita oti ta fururukea kekese ereukaro muiai roi; euka ereita vei larietau lōvoa pisosia. 16Soka lea satiriaraita karu oraka te, aea are ereukaro moipe lōfeare ereuka sukaeōpe; aea ereuka Foapaita Sosoka ve larietau lei kekese leipe.

17Sare sukopi mea viriviri soa Iesu twelve karu ita fareho forerōpe. 18Foreri ere posa voa avi larietau lalape soa Iesu mō ōpe, Ara ero okofa o la moi, eve karu aea, ara ita lapeta karu farakeka, kivaia lei araro paeai vei miarai vei la roi meha.#Sal 41:9 19Ere haiiri eae lei, aea ere farafarapo arero lalasi mō leiape, Ara kao ei? 20Lei lei, are erero mō ōpe, Are eve twelve karu farakeka aea, ara ita saesa voa sukopi hivaipeta lea vita. 21Ipi Karu ve Atute usoso o are vei uka siseita feare opai voa terai roi, a—, kivaia lei Karu ve Atute la paeai vei miaraita lea vita vei, ahai‐e! Arero mi ari auke oria, are lareva leiti lare.

Papuvita ve Areto

(Mataio 26:26–30; Luka 22:15–20; 1 Korinito 11:23–25)

22Soka ere larietau lalape soa, Iesu faloa la mai paea, Ualare la maeatita o mei roroka lei, arero fofi, erero miōri mō ōpe, Ova puavaia, mea arave maea. 23Aite are kōkuveisa ta ovi, Ualare la maeatita o mei roroka lei, arero miōri, ere foromai au lōpe. 24Aea are erero mō ōpe, Mea arave ovo karu rauapo vei sisapai vei, Ualare ve otoare la lei kekese leiti vei.#Eso 24:8; Iere 31:31–34 25Ara ero okofa omoi, Ara vine fare ve opu ata levi lari roi tetete lea sare voa, ara arero opu áre la Ualare ve basileia voa lari roi. 26Aite ere Ualare la maeatita fara feri roroka lei, ere maria voa foreri Olive Raepa voa kavōpe.

Iesu Petero la avoa ari o moipe

(Mataio 26:31–35; Luka 22:31–34; Ioane 13:36–38)

27Soka Iesu erero mō ōpe, E foromai araro haiarara lei kiripai roi, ipi o mō uka sisea, Ualare mamoe kiva vita la toa paeai roi, aea mamoe ta fu ari roi.#Seka 13:7 28A—, araro makuri voa ata moravaita soa ara eve omopa voa Galilea voa kavai roi.#Mat 28:16 29Petero arero mō ōpe, Ere foromai aro kiripait’ oria, ara lōfeare levi leiti roi. 30A—, Iesu arero mō ōpe, Ara aro okofa omoi, mea faita kofa voa, kokora vita ata fi orakori soa voa arita lea mea, a soa oroisoria araro ore ita omopa avoa ari roi. 31A—, are o serea rovaea ata mō ōpe, Ara a ita fareho opaita, a—, ara aro ore leitita o la avoa levi ari roi. Soka lea satiriaraita karu foromai ta o lōfeare ōpe.

Iesu Getesemane voa

(Mataio 26:36–46; Luka 22:39–46)

32Soka ere oti aea voa patei forerōpe, areve rare Getesemane, aea Iesu areve satiriaraita karu la mō ōpe, Mōvoa avi taia, ara Ualare la loki leiti ao. 33Lō mei are Petero aea Iakobo aeata Ioane are ita fareho lariōvi, aea are haitutu a’ haiiri eae foromai leipe. 34Lei are erero mō ōpe, Arave haiiri voa eae foromai leipea, usoso opaita soa feare. Mōvoa seseravi taia, ovoako leitia. 35Lō mei are taheka omopa voa te, mea voa sosorokapi iavi Ualare la loki mō leipe, Lareva oria, mea heafo leita ora araro kiripi foapai vei. 36Aea are mō ōpe, Aba, Oa e, a etau foromai la leita ore; mea kōkuveisa la ara voa fareovaia. A—, ara sa haikaeaipeta lōfeare levi leitia, a—, a sa haikaeaipeta lōfeare leitia.

37Aite are ata kerori iti, erero ivutu siseiape la ofae eovi, are Petero la mō ōpe, Simona e, a ivutu la eaea ei? A ora farakeka voa ovoako lei rofo leiti kao ei? 38E ovoako lei Ualare la loki leitia, ero Satani sa vutea e kaiae leiti ave; e haiiri kakeva ia, a—, eve maeasarōva sa patoita.

39Lō mei are erero ata kiripi te Ualare la loki lei, lea omopa leipe loki o la ata moipe. 40Soka are ata kerori iti erero ivutu siseiape la ofae eavōpe, ipi ereve ofae pasou foromai lei, ere arero tava o leafeare moi vei ore auke leipe.

41Soka are oroisori soa iti erero mō ōpe, E ata ivutu laisisea ei? e hai la oraipea ei? Kaka isoka! ora foreraita meha, Karu ve Atute la iri kaiae karu ve siahu voa miarai vei la roi. 42Itotea, ereita maea leiti roi; ofae eavaia, araro kivaia lei miōri paeai vei leipeta vita foreraita meha.

Iesu la sukaforōpe

(Mataio 26:47–56; Luka 22:47–53; Ioane 18:1–11)

43Are laua sukavaiape lea soa kofa voa, Iudasi, lea twelve karu farakeka aea, aeata karu sitavu marehaukaita soi ita poti ita, maso harofave karu aea Safu Karoro ore karu aea opasora‐sora karu sa itapi, are ita farehoria utohoa kotipe. 44Soka kivaia lei arero miōri paeai vei leipe vita peise lea karu sitavu la satiriōri mō ōpe, Ara evera sisita lea vita are reha; arero sukafori kokoputa kere lei lōri lariōvi teraia.

45Soka Iudasi forerōpe soa are Iesu tai utohoa te mō ope, Satiriaraita Papuvita e, aea arero evera sisipe. 46Soka ere mai sosoropi arero sukaforōpe reha. 47A—, haekao soi peiape karu farakeka areve marehaukaita soi la paitaravi, maso harofave vita ve sarufa aea la toa, areve kirori la elori fareovōpe. 48Lea mea Iesu erero mō ōpe, E soi ita poti ita araro usoso torea karu la sukaforaita feare koti ei? 49Sare sare foromai ara e ita fareho Maso Uvi voa satiriaravota, a—, e araro sukaforai kao. Soka, Safu Buka ve o la lei okofa leitia.#Luk 19:47; 21:37 50Lea mea areve satiriaraita karu foromai arero kiripi fu ōpe.

51Soka harokou farakeka aea, are haropaita puta areve sofa voa fasi, Iesu la lōri aitetei meiape; lea karu rauapo arero ta sukaforōpe, 52a—, are areve puta la ereve mai voa kiripi, maea paseare soeōpe.

Iesu maso harofave karu ve omopa voa

(Mataio 26:57–68; Luka 22:54–55, 63–71; Ioane 18:13–14, 19–24)

53Lea mea ere Iesu la maso harofave vita rovaea tai lariōvōpe; aea maso harofave karu foromai, aea opasora‐sora karu aea Safu Karoro ore karu ita fareho kokoruka aipepeiape. 54Soka Petero arero áraita aitetei meiape tetete maso harofave vita rovaea ve uvi iri‐aru‐pisiri oti voa forerōpe. Foreri are uvi karu ita fareho avi, maea la a toaiape.

55Soka maso harofave karu aea lea kaunsila karu foromai Iesu la paeai o omoi vei ipi la eliape, a—, ere lōfeare havara la sukaeai kao. 56Karu rauapo arero havara apeva paraeaiape, a—, ere paraeaiape lea havara usoso leiti kao. 57Karu hea itotea arero havara apeva paraea mō ōpe, 58Ela areve o mōfeare mapaita, Ara karu sa turaita mea Maso Uvi la toa foforukai roi, aea aite sare oroisoria voa ara karu sa turai auke leita maso uvi aea la pisosi roi.#Ion 2:19 59A—, lea karu ve laua ta usoso leiti kao.

60Lea mea maso harofave vita rovaea itei, are ereve aru voa pōvi Iesu la lalasi lei mō ōpe, A tava o kao ei? Mea karu sa aro paraeaipeta havara ve eite lekōru? 61A—, are hualekavu a’, tava o omoi kasirau. Soka maso harofave vita arero lalasi ata lei mō ōpe, A Keriso ei? Maea foromai atita Ualare ve Atute ei? 62Lei, Iesu tava o mō ōpe, Ara eite reha, aea e ara, Karu ve Atute, Rofo Rovaekapo ve mai toare voa aisesea, aea kauri ve mea‐e ita kotita la ofae eavai roi.#Dan 7:13 63Lō mei, maso harofave vita rovaea areve maea puta la torerapi mō ōpe, Ereita havara paraeaita karu aea la ata haikaeaipeta ipi levea? 64E areve o kaiae la mapi roroka loita meha. Eve kekese leipeta haiiri leafeare? Aea ere foromai arero kaiae o a’ arero tava paeai vei haikaeōpe.#Levi 24:16

65Aite ere karu hea arero pea sa soea soea, aea areve soso la sasauka arero mai kupa sa toatoa, arero mō ape, Aro toaita karu ve rare omoia. Lea kiva karu ta arero sukafori, mai posa sa teavi sasape.

Petero Iesu la ore ita avoa ōpe

(Mataio 26:69–75; Luka 22:56–62; Ioane 18:15–18, 25–27)

66Soka Petero are iti uvi iri‐aru‐pisiri voa peiape lea mea, maso harofave vita ve sarufa mori farakeka aea iti, 67Petero maea a toaiape la eovi, arero ofae fofoisa mō ōpe, A ta lea Nasareta karu Iesu ita fareho mea vovea. 68A—, are lea etau avoa a’ mō ōpe, Ara ore kao, ara ave o ve eite ore kao. Lō mei are lea oti kiripi te utape tao lalava voa soi pavōpe. 69Soka lea sarufa mori arero ofae eovi haekao soi pepeiape karu la ata mō ōpe, Mea vita are areve karu. 70A—, are avoa ata ōpe. Aea soa taheka aite voa lea soi pepeiape karu Petero la ata mō ōpe, Etakofa a ta areve karu aea, ipi a ta Galilea karu eavia. 71Lea mea Petero are o kere ita mō ōpe, Ara okofa la moi auke leitit’ oria, kaiae tava Ualare sa araro miaraia: e laua sukavaipeta lea vita ara ore kakaeite. 72Lea soa kofa voa kokora vita aea orakoria soa voa fi ōpe. Soka Petero Iesu sa arero moipe mea o la haikaeōpe, Kokora vita ata fi orakori soa voa arita lea mea, a soa oroisoria araro ore ita omopa avoa ari roi. Are haiiri foromai oei ovororo sisapi fi ōpe.

Currently Selected:

Mareko 14: TQO1983

Highlight

Copy