Mareko 13
13
Ierusalema Maso Uvi la toa foforukai o
(Mataio 24:1–2; Luka 21:5–6)
1Iesu Maso Uvi kiripōpe soa areve satiriaraita karu farakeka aea arero mō ōpe, Satiriaraita Papuvita e, ofae eavaia, mea turaita fave ita uvi ita, ere soa haria kofa! 2A—, Iesu arero mō ōpe, A mea uvi metameta la ofae eavai ei? Mōvoa eaeipeta fave koru farakeka aea la areve oti voa levi kiripi eaeava roi, erero foromai la toa foforukai roi.
Haisora leita soasoa
(Mataio 24:3–14; Luka 21:7–19)
3Soka Iesu are Maso Uvi ve omopa voa eaeita lea Olive Raepa ve arori voa aiseseiape lea mea, Petero aea Iakobo aea Ioane aea Anderea ita arero murufa lalasi lei mō ōpe, 4Elaro omoia, lea etau leasauka forerai roi, aea lea etau foromai forerai vei leita soa ve peise larelekōru?
5Soka Iesu erero o mōri moipe, Kiva leitia, karu ero apeva vuteai ave. 6Karu rauapo arave rare ita foreri ere elore elore vei mō ari roi, Ara Keriso, aea ere karu rauapo la apeva lōfeare vuteai roi. 7Soka e haekao voa arita marehaukai rauapo ve hohororo, aea ára‐ita voa arita marehaukai rauapo ve fari ita la mapaita lea mea, hai levi isoia. Lea etau rauapo forerai roi, a—, soa sarapaita soa areapo. 8Ipi toruipi haria karu ere toruipi haria karu la marehaukai vei itotea itotea ari roi, aeata basileia aea basileia haria ita sosori ari roi; aea pupuiōvu lō patei lō patei lei, aea posera soasoa voa ta leita hehea feare; lea haisora soasoa ere usoso avasa pataita soa ve oarehōva leita hehea feare.
9A—, eve elore maea vei kiva leitia, ipi karu ero fasi kōto voa ero lariōvai roi; ere ero sunako uvi voa teavi sari roi; aea e gavana karu aea king ita ve omopa voa foreri soi pavai roi ipi arave rare vei, ipi ovoro ve eite kofa la ereve omopa voa moi vei.#Mat 10:17–20; Luk 12:11–12 10Soka Ovoro Lareva torutoru karu foromai la omopa itoro ari ao. 11Ere ero fasi kōto leiti vei ero lariōvi teraita soasoa voa, e moi o vei haiiri heafo everori levi seseōvaia; a—, lea soa kofa voa ero miaraita lea o la au moia, ipi omoita karu e kao, a—, Safu Arahoha Lareva sa moi roi. 12Pauita mariosu la paeai vei miarai roi, aea oa‐ita ereve atutemori ta lōfeare leiti roi; aea atutemori ere kerori oalou‐ita la sukavutea erero paeai vei miarai roi, 13karu foromai arave rare vei ero kaifa leiti roi. A—, haiiri rofo lei pōvi pepe soa kaleitita lea karu la lei makuri leiti roi.#Mat 10:22
Heafo rovaea ve soa
(Mataio 24:15–25; Luka 21:20–24)
14Soka e mu‐eokere etau maealoloeiteapo sa are pavai usoso auke leita oti voa pavaita la ofae eavai roi. (Mutita karu e, lea etau haiiri metakao seseōvaia.) Lea soa voa Iudea mea voa pepeita karu raepa voa oroaia.#Dan 9:27; 11:31; 12:11 15Uvi kōu voa meita karu are mea voa faukaita soa, uvi iri voa areve etau aea ovi soea vo kavai vei levi oropaia.#Luk 17:31 16Forōva oti voa meita lea karu are areve arori puta ovai vei uvi voa ata levi keroria. 17A—, lea sare sare voa ére ita uamori aea kō savuaita uamori ita vei, ahai‐e! 18Ualare la loki leitia mea etau vevekoko pisahu voa levi forerai roi. 19Ipi lea sare sare ve haisora rovaea kofa leiti roi; lōfeare haisora evera leiti kasirau, soa Ualare sa mearovaeka la pisosipe soa itiiti faitora, aea lōfeare soa ata levi forerai peava roi.#Dan 12:1; Apok 7:14 20A—, Papuvita lea sare sare la haruakao sarapai auke leitita, a—, maeasarōva farakeka aea la lei makuri levi leiti roi. A—, ipi are haikaea maravi roroaita lea karu vei, are lea sare sare la sarapi haruakao leiti roi.
21Soka karu aea lea soa voa ero mō moit’ oria, Ofae eavaia, Keriso meha! ō are mōri moit’ oria, Ofae eavaia, are reha! e lea o levi mapaia. 22Ipi apeva Keriso rauapo aeata apeva peroveta karu rauapo forerai roi. Ere peise etau maeamaea aea haihava leita mai rauapo ita la muiai roi, ipi ere leita ore leitita, a—, ere Ualare sa haikaea maravaita lea karu la apeva vuteai vei. 23A—, e kiva leitia; lea etau forerai auke soa, ara etau foromai ero everori mei roroka.
Karu ve Atute forerai soa
(Mataio 24:29–31; Luka 21:25–28)
24Soka lea sare sare voa haisora soa kaleiti soa, sare murumuru lei, aeata papare areve ovava levi haeai roi,#Isa 13:10; Esek 32:7; Ioe 2:10, 31; 3:15; Apok 6:12 25koru ta kauri voa sisapi, aea kauri ve siahu etau etau la lei oriri‐oriri ari roi.#Isa 34:4; Ioe 2:10; Apok 6:13 26Lea mea Karu ve Atute mea‐e voa, siahu rovaea ita sosorusosoru rovaea ita, foreraita la karu sa misilei fofoisai roi.#Dan 7:13; Apok 1:7 27Aite are aneru rauapo la itapai roi are haikaea maravi roroaita karu la fareovaita mea ve soa orakaraka voa, aea soa mearovaeka ve itua‐tao soa tetete itua‐tao aea voa, soa kauri ve itua itua‐tao voa kokorukai roi.
Malaila tola sa satiriaraita o
(Mataio 24:32–35; Luka 21:29–33)
28Soka malaila tola sa ero satiriaraita o la ore leitia; areve sivusi taoea rorore faita lea mea, e ore avora soa haekao la loi. 29Soka mea ta lōfeare, e lea etau la eavaita soa, ore leitia, soa forerai vei haekao la loi, utape kofa voa. 30Okofa ara ero o la moi, mea taotao levi kaleiti roi tetete lea etau foromai forerai ao. 31Kauri ita mearovaeka ita kaleiti roi, a—, arave o levi kaleiti roi.
Karu ita aneru ita sa ore auke leita sare
(Mataio 24:36–44)
32A—, lea sare aeata lea ora ve foreraita soa karu foromai ore kasirau, kauri voa pepeita aneru ta ore kao, Ualare ve Atute ta ore kao, a—, Oa sa haria ore.#Mat 24:36 33Kiva leitia, ovoako leitia; ipi lea soa leasauka forerai roi, e lea la ore kasirau. 34Are usoso sariva leiti vei leita heavita aea feare, are areve uvi kiripi, areve sarufa karu la kiva leita siahu la miōri karu farafarapo ereve elore elore tivi ta miōri, utape kiva karu la ovoako leiti o ta moi roi.#Luk 12:36–38 35Soka ovoako lei vovo roroava, ipi uvi papuvita leasauka forerai roi, e lea la ore kao, sare sukopi mea aeaita soa voa varo, apisi soa voa varo, kokora vita fi oita soa voa varo, mea ōpaita soa voa varo. 36Are utohoa foreri ero ivutu siseita la eavai ave. 37Soka ara ero omoipeta lōfeare, ara karu foromai ta moi, Ovoako lei vovo roroava!
Currently Selected:
Mareko 13: TQO1983
Highlight
Share
Copy
Want to have your highlights saved across all your devices? Sign up or sign in
Published by the Bible Society of Papua New Guinea in 1983.
