Mareko 12

Vine oti ve parabole o

(Mataio 21:33–46; Luka 20:9–19)

1Soka Iesu parabole o ita erero mō ōpe, Karu aea vine forōva oti pisosi, vine mere suka suka, aea kora eli eakoa toepi, fare la faihohōroaita etau vei toru‐uta isa, uvi koa ta turōpe; aea are lea forōva oti tava itai ovai vei otoare a’ vine forōva arita karu hea sa kiva leiti vei miōri, maea lei oti haria voa sariva lei terōpe.#Isa 5:1–2 2Fare taita pisahu forerōpe lea mea, are sarufa karu aea la vine kiva karu tai itapōpe, vine oti ve fare hea la ere voa maravai vei. 3A—, ere arero sukafori, tola sa teavi sa’ sa’ arero maea harokao larivatōpe. 4Soka lea papuvita are sarufa karu aea la ata itapi, ere areve harofave la toa tofei, arero lei maeamariti foromai leipe. 5Aea are karu aea la ata itapi, ere arero au paeōpe; ere sarufa karu rauapo ta lōfeare lei lei, karu hea la ere au teavi sasape, hea la ere au paeaiape. 6Karu farakeka are ita peiape, areve haikakare araita atute; aite kofa voa are lea atute la erero tai itapi mō ōpe, Ere arave atute la taivotai roi. 7A—, lea vine kiva karu o elore elore a’ mō ōpe, Hasu ovai o oita vita meha; kotiria, ereita arero paea, areve oti lōri ovai vei. 8Lō mei, ere arero sukafori paea opi, areve maea vine oti ve koravasa voa toapōpe.

9Lea oti ve papuvita mai leafeare leiti roi? Are koti roi, lea oti kiva karu la saroroapi, vine oti la fareōvi, kiva leiti karu haria la miarai roi. 10E mea Safu Karoro la muti sore ei?

Uvi turaita karu sa haiarara lei eite auke o ōpe lea fave,

are arori lalave fave la eaea.#Sal 118:22–23

11Papuvita sa leipe etau reha;

ereita lea la eovi haihava loita meha.

12Are lea parabole o erero sukavuteai vei omoipe ere lea la ore lei, ere arero sukafori fasai haikaeōpe, a—, ipi ere karu sitavu la tore leipe eavia, ere arero kiripi au terōpe.

Kaisara la miaraita takis moni

(Mataio 22:15–22; Luka 20:20–26)

13Soka ere Farisea karu hea aea Heroda ve firu karu hea ita la arero tai itapōpe, areve laua sa fitōva feare arero feravi paeai vei. 14Itapi ere arero tai koti foreri mō ōpe, Satiriaraita Papuvita e, ela ore a okofa vita, aea a karu ve soso o ari sore; ipi a karu ve leita mai ve eite la seseōvai auke lei, Ualare sa haikaeaita mai la okofa ita satiriara vovea. Takis moni Kaisara la miaraita haura ei, ō haura kao ei? Ereita miarai roi ei, ō levi miarai roi ei? 15A—, are ereve aiera‐aiera la ore lei erero mō ōpe, E araro seseōvaipeta ipi levea? Silva moni aea oviti ara arero ofae eavai vei. 16Lō mei, ere farakeka aea la ovitipe. Soka are erero mō ōpe, Mea ove ita karoro ita leive? Ere arero mō ōpe, Kaisara ve. 17Iesu erero mō ōpe, Kaisara ve etau Kaisara la miaraia, aea Ualare ve etau ta Ualare la miaraia. Soka ere areve lea o vei haihava leipe.

Opi ata itoita soa vei

(Mataio 22:23–33; Luka 20:27–40)

18Soka Sadukea karu, opi ata levi itoi o la satiriaraita lea karu hea, arero tai foreri arero lalasi lei mō ōpe,#Apos 23:8 19Satiriaraita Papuvita e, Mose ereita vei o mōri ukōpe, Karu aea ve paua opi ua la mere auke ita kiripaita, a—, areve marehari are lea ua lelesi la laea, atutemori areve paua ve rare ita lei epai vei.#Deut 25:5 20Soka paua ita mariosu ita seven pepeiape; pepea omopa vita ua laea, are opōpe lea soa are mere kasirau; 21opi, aite vita lea ua ta laea, are ta mere auke ita opōpe; aite oroisoria vita ta lōfeare leipe; 22aea lea karu seven ta lōfeare, ere atutemori auke ita opaiape. Aite kofa voa lea ua ta opōpe. 23Soka opi ata itoita soa voa arero leisa ovai roi? Ipi lea karu seven arero laeaiape eavia.

24Iesu erero mō ōpe, E eve haiiri voa eae seseōvaita ipi meha, e Safu Karoro ore kao, aea Ualare ve siahu ta ore kao. 25Ipi karu opai voa ata itoita lea mea, ere ua ita vita ita levi laeai roi, a—, ere usoso kauri ve aneru feare pepeava roi. 26O aeata ipi karu opi ata itoita mai vei, e Mose sa ukōpe buka voa o muti sore ei? tola‐a ve fari voa, Ualare arero mō ōpe, Ara Abrahama ve Ualare, Isako ve Ualare, Iakobo ve Ualare;#Eso 3:6 27lea o ve eite lea karu ere makuri, ipi are opaita karu ve Ualare kao, a—, makuri karu ve. Eve seseōvaita haiiri eae kofa.

Toare Safu O vei

(Mataio 22:34–40; Luka 10:25–28)

28Soka Safu Karoro ore vita aea foreri, ere laua elore elore sukavaiape la mapōpe. Mapi Iesu tava o lareva erero moipe lea la ore lei, are Iesu la lalasi mō leipe, Safu ve toare kofa O lekōru?#Luk 10:25–28 29Iesu tava o mō ōpe, Toare Safu O meha, Israela e mapaia: Papuvita ereitave Ualare Papuvita farakeka are haria reha;#Deut 6:4–5 30aea a Papuvita ave Ualare la ave haiiri foromai ita, aea ave haikaeaita haiiri foromai ita, aea ave ore leita haiiri foromai ita, aea ave rofo foromai ita arero haikakare arai vei. 31Aite Safu O meha, A ave haekao peita karu la usoso ave elore maea feare haikakare arai vei. Lea Safu O oraka ve rovaeka la sapataita Safu O aea eaea kasirau.#Levi 19:18 32Soka lea Safu Karoro ore vita arero mō ōpe, Satiriaraita Papuvita e, a haura; a okofa ita mō auai, Are farakeka, aea Ualare aea kasirau, are haria;#Deut 4:35 33aea arero haiiri foromai ita, aea haiore foromai ita, aea rofo foromai ita haikakare araita, aea ave haekao peita karu la usoso ave elore maea feare haikakare araita, lea mai maeamakora a ea sa’ haroavaita maso etau la savi aea Ualare la omopa posaseaita animala foromai ita la sapatai.#Hose 6:6 34Lō mei, Iesu lea vita tava o haiore ita moipe la ofae eavōpe lea mea, are arero mō ōpe, A Ualare ve basileia voa ára‐ita peia kao. Soka lea ve aite voa karu arero lalasi o aeata omoi vei ivara leiti kasirau.

Lalasi o ipi Davida ve atute vei

(Mataio 22:41–46; Luka 20:41–44)

35Soka Iesu Maso Uvi voa satiriaraiape lea mea, are lalasi mō leipe, Safu Karoro ore karu ere Keriso are Davida ve meavumōla lea o la leafeare moi vovea? 36Davida Safu Arahoha sa lei mō ōpe,

Papuvita Iehova are arave Papuvita la mō ōpe,

Arave mai toare voa avaia

tetetete ara ave ote karu la ovi, ave mora posa ve ora voa miavai ao.#Sal 110:1

37Davida kofa are Keriso la Papuvita rare aravaita, a—, Keriso areve atute leafeare leitita ore ei?

Safu Karoro ore karu ve mai maealolo

(Mataio 23:1–36; Luka 20:45–47)

Soka lea karu sitavu rovaea Iesu la hailareva ita mapōpe. 38Aeata are erero satiriōri mō ōpe, Safu Karoro ore karu vei kiva lei vovo roroava, ere mopaita puta savori ita mora kerori kerori ari haikaea vo roroa vovea, aea itaea leita otioti pisiri voa karu sa erero maeatita o moi vei; 39ere sunako uvi voa toare kiriposa, aea sosoka soasoa voa toare oti voa avai haikaea vo roroa vovea. 40Ere ua vitōva‐vitōva ve etau maeamaea ta maravaita karu, aeata ere veveu o si ita lohalai toaitore. Soka kaiae ve tava rovae‐arovaea‐eite erero aite miarai roi.

Ua lelesi aea sa omopa posaseōpe meru moni

(Luka 21:1–4)

41Iesu maso uvi ve moni oroasi ve omopa voa avi, karu rauapo ereve moni la moni oroasi voa paparaeaiape mai la ofae fofoisaiape. Pisoso karu rauapo ere moni rauapo paparaeaiape. 42Soka ua lelesi merava farakeka aea koti moni kaekaelese oraka la paparaeōpe, lea ve eite usoso toea maea itua feare. 43Are areve satiriaraita karu la isa kokoruka erero mō ōpe, Ara ero okofa omoi, mea ua lelesi merava moni rovaea kofa la moni oroasi voa paparaeai, aea are sa karu hariaharia foromai la sapatai. 44Ipi lea karu hariaharia foromai ereve moni rauapo voa hohoi la fari oroasi voa paparaeai, a—, are areve merava soa areve ovi meita moni foromai la paparaeai, areve makuri la lei toaraita etau foromai reha.

Currently Selected:

Mareko 12: TQO1983

Highlight

Copy