Ioane 21

Iesu Galilea voa areve maea la muiōpe

1Lea ve aite voa Iesu Tiberio ve Sitoi voa areve maea la areve satiriaraita karu la ata muiōpe. 2Simona Petero, aea Tomasi, Popōta rare aravōpe lea vita, aeata Natanaele, Kana karikara, Galilea soa ve karu, aeata Sebede ve atute oraka aea ereve satiriaraita karu oraka haria ita ta farehoria roroaiape. 3Simona Petero erero mō ōpe, Ara fauka ekaka tapora leiti vei. Ere arero mō ōpe, Ela ta reha, a ita farehoria faukai roi. Ere foreri fauka oroti voa foreōpe, a—, lea faita voa ere ekaka paeai kasirau.#Luk 5:5

4Soka mea ōpōpe soa Iesu miri voa soi peiape, a—, satiriaraita karu lea vita eite are Iesu ere lea la ore leiti kasirau. 5Iesu erero mō ōpe, Irave e, e ekaka paeai ei? Ere arero tava o mō ōpe, Kasirau. 6Soka are erero mō ōpe, Loko oroti ve mai toare itai voa paraeaia, e ekaka lōfeare voa sukaeai roi. Lō mei, ere loko paraeōpe lea mea, ere arero ata aruovai vei rofo usoso kao, ipi ekaka rauapo kofa eavia.#Luk 5:6 7Lea mea Iesu sa haikakare leipe lea satiriaraita karu are Petero la mō ōpe, Lea Papuvita sa pea! Simona Petero lea o mapi, are areve arori puta la areve maea voa fasōpe, ipi are maea paseare leiape eavia, aeata are ma voa au foreōpe. 8Lea satiriaraita karu hea ere oroti voa loko ekaka sa pōvi soa’ aruovi miri voa ukavōpe, ipi ere miri ve soa ára kofa kao, metre 100 varo.

9Soka ere miri voa pataipe lea mea, ere akoelakao sa sukaeōpe a, aea ekaka a eōpe aea faloa koru ita ta lōri eavōpe. 10Iesu erero mō ōpe, E faitora paeaita ekaka hea ta maravi kotia. 11Soka Simona Petero oroti voa ata forea, loko ekaka metameta sa soa’ miri voa aruovi pataipe. Lea ekaka mai mutipe soa ere 153; ere rauapo kofa, a—, loko torerapai kao. 12Iesu erero mō ōpe, Koti, larietau laria. Soka lea satiriaraita karu voa farakeka aea arero lalasi mōri leiti vei haiiri usoso leiti kao, A ita leisa? Ipi ere ore leipe, Papuvita reha. 13Soka Iesu koti, faloa la ovi erero miarōpe, ekaka ta lōfeare.

14Soa oroisoria reha, Iesu areve satiriaraita karu tai foreraiape, are opi ata itoipe lea ve aite voa.

Iesu aea Petero

15Larietau la’ kaleipe lea mea Iesu are Simona Petero la mō ōpe, Simona Iona e, a sa araro araita haikakare rovaeka, aeata mea karu ve haikakare la sapatai ei? Are arero mō ōpe, Papuvita e, ara aro haikakare ara vovea, a lea la ore. Are arero mō ōpe, Arave mamoe mere la savuaia. 16Are orakoria soa ata arero lalasi lei mō ōpe, Simona Iona e, a araro haikakare araitore ei? Are arero mō ōpe, Papuvita e, a ara aro haikakare ara vovea, a lea la ore. Iesu arero mō ōpe, Arave mamoe savuaia. 17Are oroisoria soa arero ata mō ōpe, Simona Iona e, a araro haikakare araitore ei? Ipi Iesu arero soa oroisoria lalasi lei mō ōpe, A araro haikakare araitore ei? Petero lea vei haieae leipe; aea are arero mō ōpe, Papuvita e, a etau foromai ore. Ara aro haikakare araitore a lea la ore. Iesu arero mō ōpe, Arave mamoe savuaia.

18Okofa ita, ara aro o la moi, a karu áre leipe lea soa voa, a ave mate si ve maea ovi aravi, a haikaeaiape lea oti hariaharia voa lō tera lō iti leiape; a—, a oasora leitita soa a ave mai oraka sosoropi, karu haria sa ave mate ave sofa fasi a sa haikaeai auke leitita lea oti voa aro lariōvai roi. 19Are lea o la moipe ipi arero ta paea opi Ualare ve fari la lōri lei sosorusosoru leiti vei lea opai mai la muiai vei. Soka Iesu lea o la mei roroka lei, are arero mō ōpe, Araro aitetaia.

20Petero aiterori a’, Iesu sa haikakare leipe lea satiriaraita karu arero aitetaipe la ofae eavōpe. Areto soa voa are Iesu ve haiposa voa makea iavi mō moipe vita are reha, Papuvita e, kivaia lei aro paeai vei miarai vita leisa? 21Soka Petero arero ofae eovi Iesu la mō ōpe, Papuvita e, mea vita leati roi? 22Iesu arero mō ōpe, Are peita pepepe ara ata koti soa ara lōfeare haikaeaita, a—, lea etau a voa larelekōru? Araro aite la taia. 23Lōfeare voa mea o paumarehari voa fafarapaiape, lea satiriaraita karu are levi opai roi. Eite Iesu are levi opai o are vei omoi kao. Iesu sa moipe o meha, Are peita pepepe ara ata koti soa, lea etau a voa larelekōru?

Evanelia Buka ve sisa o

24Lea satiriaraita karu are mea etau etau vei o pisiri meimei, mea etau etau ta uka uka roroka loita meha, aea ereita ore are sa omoita lea etau etau okofa.

25Iesu sa leiape etau rauapo hohoi laisisea, erero foromaiapo la ukaita, a—, arave haiiri meha, mearovaeka foromai voa oti ve rovaea usoso kao lea buka la miavai vei.

Currently Selected:

Ioane 21: TQO1983

Highlight

Copy