Ioane 20

Iesu opi ata itoipe

(Mataio 28:1–10; Mareko 16:1–11; Luka 24:1–12)

1Soka hebedoma ve omopa sare voa, Maria, Magadala ua, ōpōpe mea ilaila soa voa tapu oti voa kei, tapu oti ve utape sasaukaita fave fapi eaeiape la ofae eavōpe. 2Eovi are soea Simona Petero aea Iesu sa haikakare leipe lea satiriaraita karu farakeka ita tai te, ereukaro mō ōpe, Ere Papuvita la tapu oti voa fareōvi, aea ere arero miavi eaeipeta oti ereita ore kao. 3Lō mei, Petero aea lea satiriaraita karu aea ita maria voa foreri tapu oti voa soea vo kavōpe. 4Ereuka fareho soea, lea satiriaraita karu aea Petero la sapatei tapu oti voa everori kei forerōpe. 5Foreri are hiopi, iri voa fofoisa, fasaita puta kere sa eaeiape la ofae eavōpe, a—, are iri voa oropai kao. 6Simona Petero ta areve aite voa soea vo kei foreri tapu oti iri voa oropi, fasaita puta sa haria eaeiape la ofae eavōpe, 7a—, Iesu ve harofave fasōpe muko, fasaita puta ita eaei kao, a—, are ta haria irurukea eaeiape. 8Soka tapu oti voa omopa forerōpe lea satiriaraita karu aea, are ta iri voa oropi, eovi sukaerereōpe. 9Ipi lea soa ereuka Safu Buka ve o ta haiiri ovava leitia kao, o meha, Iesu opi ata itoi roi. 10Soka lea satiriaraita karu oraka ereukave pepeiape oti voa ata keroripe.

11A—, Maria tapu oti maria voa ovororo ita soi peiape. Pea are fi ita kaiopi tapu iri voa fofoisa, 12are aneru oraka puta maea‐sea mopi, Iesu ve maea sa eaeiape lea oti voa aipepeiape la ofae eavōpe, farakeka haro ipi voa, farakeka aea mora ipi voa. 13Eovi, ereuka arero mō ōpe, Ua e, a fi ipi levea aipea? Are ereukaro mō ōpe, Ipi ere arave Papuvita la fareōvi, aea ere arero leavoa miavaita ara ore kao. 14Are lea o mei aiterori a’ Iesu sa soi peiape la ofae eavōpe, a—, are eite Iesu are lea la ore leiti kao. 15Iesu arero mō ōpe, Ua e, a fi ipi levea aipea? A elipeta karu leisa? Maria hai mō seseōvōpe are lea forōva oti la kiva leita vita, lea vei are arero mō ōpe, Karu lareva e, a sa arero fareovai oria, a—, a arero viopaia lea oti araro satiriaraia, ara arero fareōvi ovai vei. 16Iesu arero mō ōpe, Maria e! Are arero tai kerori Heberu uri arero mō ōpe, Raboni! lea o ve eite Satiriaraita Papuvita. 17Iesu arero mō ōpe, Arave maea mai levi paeaia, ipi ara arave Oa tai pataia kao. A—, arave maraiosu tai isei erero o mō aria, Ara arave Oa aeata eve Oa, arave Ualare aeata eve Ualare ita tai patai vei la roi.

18Soka Maria, Magadala ua, satiriaraita karu tai isei mō ōpe, Ara Papuvita la ofae eavai, aea are Iesu sa arero moipe lea o ta erero omoipe reha.

Iesu areve satiriaraita karu ve omopa voa forerōpe

(Mataio 28:16–20; Mareko 16:14–18; Luka 24:36–49)

19Lea hebedoma ve omopa sare, mea aeōpe soa voa, satiriaraita karu sa pepeiape lea uvi ve utape sasaukōpe, Iuda karu la tore leipe eavia. Lea mea Iesu foreri ereve aru voa soi pōvi erero mō ōpe, E foforoe tairu ovaia. 20Are lea o mei areve mai posa oraka, aea areve koesa ita la erero muiōpe. Ere Papuvita la ofae eavōpe lea mea, lea satiriaraita karu hailareva leipe. 21Soka Iesu erero ata mō ōpe, E foforoe tairu ovaia. Oa sa araro itapōpe lōfeare ara ero ta itapai roi. 22Are lea o mei, are erero ape miruru sa fōfōa erero mō ōpe, Safu Arahoha Lareva la ovaia. 23E karu ve kaiae la sasukaita, a—, erero sasukaita reha. E ereve kaiae la sasukai auke leitita, a—, ere lea kaiae ita pepeava roi.#Mat 16:19; 18:18

24Soka Iesu sa forerōpe lea soa, Tomasi, twelve karu farakeka, arero Popōta aravōpe lea vita, are lōvoa kasirau. 25Satiriaraita karu hea arero mō ōpe, Ela Papuvita la ofae eavaita. A—, are erero mō ōpe, Ara kalahe ve serare areve mai oraka voa eavai auke leitita, aea arave mai lakoka farakeka kalahe ve serare voa mopai auke leitita, aea arave mai opa areve koesa voa miavai auke leitita, a—, ara levi sukaerereai roi.

26Soka sare eight ve aite voa, areve satiriaraita karu uvi voa ata kokorukōpe, Tomasi ta ere ita farehoria. Utape foromai sasaukōpe, a—, Iesu foreri, ereve aru voa soi pea mō ōpe, E foforoe tairu ovaia. 27Aite are Tomasi la mō ōpe, Ave mai lakoka sosoropaia, aea mea arave mai posa oraka la ofae eavaia, aea ave mai opa ta sosoropi arave koesa voa miavaia; mapai vei haiarara levi leitia, a—, sukaerereaia. 28Tomasi tava o arero mō ōpe, A arave Papuvita aeata arave Ualare. 29Iesu arero mō ōpe, A araro eavaita lea vei a sukaerereai ei? Araro eavai auke leitita voa sukaerereaita lea karu lareva ia.

Mea buka ve eite

30Iesu areve satiriaraita karu ve omopa voa siahu ve peise rauapo leiape, a—, lea ve fari mea buka voa ukai kao. 31A—, mea ukōpe o ve ipi e Iesu are eite Keriso, Ualare ve Atute, e lea la sukaerereai vei, aea e arero sukaerereaita lea vei e peita makuri la ovai vei.

Currently Selected:

Ioane 20: TQO1983

Highlight

Copy